حكاية اقوى حب

الحلقة 26
مازن دخل لمامته
"نعم ياماما"
"تعالى يامازن وحشتنى يا حبيبى"
"وانتى ياماما...هو بابا فين"
"فى الحمام...الا قولى هى عروستك مالها"
"مالها؟؟"
"ساكتة كده وشكلها خايفة من حاجة"
"لا ابدا تخاف من ايه هى بس مكسوفة شوية علشان اول مرة تشوفكم...انتى ايه رأيك فيها"
"مش عارفة اقولك ايه يامازن انا كان نفسى تتجوز واحدة فى نفس مستوانا ولا حتى اعلى علشان ده نسب بس احنا متعودناش نفرض عليك حاجة... مش هى عجباك"
"اه طبعا... وعلى فكرة لما تعرفيها هتحبيها هى طيبة اوى وقلبها ابيض وجدعة وشاطرة فى كل حاجة"
"بتحبوا بعض من زمان"
سكت مازن... يحكى لمامته الحكاية كلها ولا يسكت ولا يقول انه بيحبها من الاول
"هو سؤالى محتاج تفكير"
"لا مش تفكير ولا حاجة... المهم انى بحبها مش لازم من امتى"
ودخل باباه عليهم... وبدأ يفتح الشنط
"الشنطة دى يامازن فيها حاجات ليك وحاجات لعروستك احنا ما جبناش لبس لاننا منعرفش مقاسها مامتك جابت لها ماكياجات على برفانات"
الام"اه يامازن وحاجات كمان ليها هى تنفعها فى جهازها"
مازن"شكرا يا ماما...شكرا يابابا"
الام"انا هروح اشوفها بتعمل ايه مينفعش نسيبها كده لوحدها"
وقامت الام راحت لها المطبخ

ايهاب قاعد مكسوف فى الصالون فى بيت ايناس
مامتها وباباها وحسن قاعدين
ايناس مستنيتش كتير ... قعدت من اول المقابلة
وقبل ما تخرج لهم قالت لمنى
"منى حبيبتى معلش انا هقعد معاهم وانتى ابقى قدمى لايهاب هتلاقى كل حاجة جاهزة فى المطبخ"
بدأ ايهاب كلامه بتعريف اسمه وشغله وشغل باباه
واهل ايناس كانوا حاسين بتوتره ...وايناس كانت بتتكلم علشان يحس انها معاه بتسانده
ايهاب"هو انا ممكن اجيب بابا وماما امتى يا دكتور"
حسن"ممكن ثوانى يادكتور"
وقام حسن... وقام معاه حماه
ايهاب بص لايناس بتساؤل... ايناس قلقت

فى المجلة
ايمن بيتكلم فى التليفون
"ايوه يا شروق... لا هتأخر شوية.. كلهم مش هنا... يابنتى فيه بره ييجى 10 محررين .. من ده ومن ده... بطلى غيرة بقى عيب عليكى... بصى انا سهران فى المجلة انا وخالد واحتمال ارجع الفجر ولا الصبح... عندنا شغل كتير عايزين ننزله... ولا حد منهم خالص...امل ومازن بيجيبوا اهل مازن او زمانهم رجعوا خلاص وايهاب عند ايناس بيخطبها... ان شاءالله حاضر مش هكلم بنات... لما بنت تكلمنى هقولها هاتى محرم... بس بقى ياشروق بلاش هبل ... بقولك ايه... ما تجسى نبض باباكى كده هيوافق نتجوز وانتى فى دراسة... يعنى بفكر... اصل ربنا مسهل الحمدلله وبقول يعنى لو شفنا شقة ايجار اوضتين مثلا وفرشناها ممكن نتجوز على نص السنة الجاية مثلا...بس هجيب شبكة بسيطة لو هنتجوز بسرعة... والله انا عايز اتكلم مع باباكى بس خايف يفتكرنى بغير كلامى...شوفى انتى بس رأيه كده من بعيد لبعيد لو قال نستنى هستنى... الحمدلله ربنا موفقنا والمجلة بتوزع كويس... طيب ماشى... سلام يا حبيبتى"
قفل معاها ايمن... وكمل شغله

على السفرة فى بيت مازن... كلهم قاعدين
الام"على فكرة انا قعدت مع امل بس فى المطبخ وهى اللى عملت كل حاجة"
الاب وهو بياكل"تسلم ايدك ياامل... اكلك حلو اوى"
امل وهى مكسوفة"بألف هنا..زلو كان فيه وقت كنت عملت حاجات احسن والله"
مازن بياخد قطعتين لحمة من الطبق ويحطهم عند امل
"انتى هتتكسفى ومش هتاكلى ولا ايه"
امل"انا باكل اهو"
مازن"انتوا قاعدين اجازة لامتى"
الاب"هنمشى فى 9 يعنى قول قدامنا شهر شهر ونص كده"
مازن"يعنى اتكلم مع اخو امل على امتى"
الاب"مش لما نتعرف عليه الاول"
قامت امل
الاب"رايحة فين ياامل...اقعدى كملى اكل...انا بقول لما اتعرف على اخوكى مش علشان لسه هنوافق ولا لا...انا بتكلم فى الاحسن اننا نتفق معاه مش مازن هو اللى يروح يكلمه"
مازن شد امل من ايدها قعدها جنبه تانى
"يعنى يابابا هتتفق معاه على امتى"
الام"مش لما نجيبلكم الشقة اللى هتتجوزوا فيها الاول"
مازن"ياماما دى سهلة اوى ... مش الكاشات موجودة معاكم ولا هتكسفونا"
الاب"ان شاءالله كل حاجة هتتم زى ماانت عايز... عايزين نطمن عليك بقى"

ايناس ومامتها قاعدين مع ايهاب... ومنى كانت بتنيم بنتها
فاتت دقيقتين لحد ما رجع حسن مع الاب...بس فاتوا على ايناس وايهاب كأنهم شهرين
الاب" هااا كنا بنقول ايه"
ردت ايناس بسرعة وهى بتبص لحسن بتحدى
"ايهاب كان بيقول عايز معاد يجيب مامته وباباه"
حسن بيبتسم ابتسامة صغيرة ومستفزة وهو بيبص لايناس
الاب"ان شاءالله بس ادينا فرصة نسأل عليكم وهنبقى نرد عليك"
جكلة الاب كانت بمثابة نهاية للمقابلة... قام واستأذن ايهاب
وبعد ما مشى دخلت ايناس لباباها
"ليه احرجته كده يابابا"
الاب"احراج ليه"
الام"احنا قلنا هنقابله ياايناس نتعرف عليه واننا نسأل ده شئ عادى"
ايناس"وحسن كان بيقولك ايه"
حسن"هقول ايه يعنى... كنت بقول انى هسألكم عليه علشان انا عارف ان عمى معندوش وقت"
ايناس بتزعق"وانت تتدخل ليه فى حاجة متخصكش"
جت منى بسرعة"فى ايه"
حسن"الله يسامحك وانا اللى عاملك اختى وخايف على مصلحتك... بعد اذنكم"
وخرج حسن ناحية الباب... ومنى بتجرى وراه
"استنى يا حسن... يابابااااااا ينفع كده"
الاب والام راحوا ورا حسن... وايناس واقفة تتفرج
الاب"استنى ياحسن... متزعلش من ايناس دى زى اختك الصغيرة"
حسن"وده اللى انا بعمله انا خايف عليها وعايز مصلحتها"
الام"تعالى ياحسن...صلى ع النبى وكبر دماغك"
ايناس لما شافت حسن راجع وكلهم بيراضوه
"طيب اسمعوا بقى كلكم... انا لا هستنى سؤال ولا ليا فى الافلام دى خالص... انا مقتنعة بيه وبحبه... سامع يا حسن"
ورزعت باب اوضتها عليها ومن غيظها

تانى يوم فى المجلة كانت المشاعر ملخبطة
امل ومازن بدأوا يدوروا على شقة وتكون متشطبة علشان يحددوا معاد الفرح فى اسرع وقت
شروق وايمن فى انتظار رأى باباها بتقديم معاد الجواز
اما ايناس وايهاب فكان الحزن باين عليهم... وايهاب لما جه قعد على مكتبه ومتكلمش مع ايناس خالص الا سلام عادى
وقرب انتهاء اليوم... وايناس متضايقة من تجاهل ايهاب ليها
راحت له وبصوت مسموع
"مالك"
بص ايهاب حواليه وكانت المجلة مليانة محررين قاعدين فى النص
"مالك انتى ياايناس... فى ايه"
"والله ؟؟ بتسألنى مالك... ايه التجاهل ده من الصبح"
"نتكلم بعدين"
"مفيش بعدين...دلوقتى"
ايناس واقفة بقوة وتحدى... مش لايهاب اكتر من انها بتتحدى حسن
حتى لو كان ده غير معلن بينها وبين حسن
لحظات ايقنت انها وسط الناس
"تعالى ننزل شوية ونرجع"
قام ايهاب نزل معاها... لما ركبوا عربيتها... فضلت واقفة مكانها
"افهم بقى مالك من الصبح.. لالا قصدى من امبارح"
"عايزانى اعمل ايه ياايناس... باباكى كلامه واضح هنسأل عليك وانا اهو مستنى رده"
"انت بتحبنى ولا لا"
"بحبك طبعا"
"وانا مش مستنية رأى الناس فيك علشان نكمل مع بعض او لا"
"وده معناه؟؟"
"معناه ان ايا كان كلام اى حد انا متمسكة بيك انت لانى بحبك وعارفاك كويس... ولا انت عادى مش فارق معاك حاجة"
كلام ايناس غير مود ايهاب خالص لما اتطمن انها فعلا متمسكة بيه
"مش فارق ايه بس ... ده انا منمتش طول الليل من التفكير والقلق"
"قلق؟؟ ليه مش واثق فى حبى ليك"
"لا مش واثق فى الفروق الكبيرة اللى بيننا ياايناس وانتى عارفة كده كويس"
"تاني ياايهاب هتقول فروق... بص بقى انا لو حسيت للحظة انك بطلت تحبنى ساعتها هيبقى فيه فرق بيننا...فرق فى الحب"
"انا بحبك اوى ومش شايف غيرك ممكن تبقى مراتى حبيبتى وام عيالى"
"ياااااااااسااااااااتر عليك ... ايوه كده شوية كلام حلو مش البوز اللى ضاربهولى من الصبح"
وضحك ايهاب لما اتطمن ان ايناس متمسكة بيه
"اضحك اضحك وانت غايظنى طول النهار"
"وانا اقدر برضه... بس العمل ايه دلوقتى"
"ولا حاجة... فيه قرار انى موافقة عليك انت... قالوا اه خير وبركة قالوا لا... فلتكن حربا يا سيدى وسننتصر بعون الله"
"بموت فيكى"
"ماانا عارفة... بس بطل تردد بقى الله يخليك"
"حاضر... هنطلع المجلة ولا خطفتينى ولا ايه"
"لا اطلع انت ...وانا هروح لماما العيادة اجيبلها م الاخر"

بعد 3 ايام فى المجلة
امل"صحيح ياايمن قدمتوا معاد جوازكم"
ايمن"اه ان شاءالله يمكن فى اجازة نص السنة ان شاءالله"
امل"مبروك ياايمن انا فرحت لكم اوى"
ايمن "الله يبارك فيكى... اومال العريس فين"
امل"سافر مع مامته وباباه بيت جده وراجع بالليل ان شاءالله"
ايمن"يرجعوا بالسلامة... حددتوا ولا لسه"
امل"اول ما يكتب عقد الشقة هنحدد ان شاءالله"
كانت بتاخد شنطتها.. وبتضبط كاميرتها
"ياااه فاكرة الكاميرا دى مين اللى جابهالك"
ضحكت امل"طبعا فاكرة"
وقال وهو بيقلدها"مقدرش اخد حاجة منه"
"ههههههه وانا يعنى كنت اعرف ساعتها انه هيبقى جوزى حبيبى"
"يا سيدى على الكلام وامل بعد ما حبت"
"تصدق احرجتنى... سلام بقى"
"رايحة فين"
"عندى موضوع جامد رايحة اغطيه"
"ربنا معاكى خلى بالك من نفسك"
نزلت امل... ودخل ايهاب لايمن بعدها
"ايمن انت قاعد النهاردة"
"اه.. فيه حاجة"
"انا والدى تعبان شويةولازم امشى ... وهييجى مندوب من شركة يدفع 5000 الاف جنيه بتوع اعلانات هكلمه يديهوملك انت"
"وانا اعمل ايه فيهم"
"مفيش لو عايز تسيبهم هنا فى مكتبك ماشى لو عايز تاخدهم معاك ماشى"
"ماشى هتصرف انا"

تانى يوم وامل بتلبس علشان نازلة
خبط جامد على الباب...راحت مامتها فتحت الباب
دخل ضابط ومجموعة من العساكر
الام"فى ايه"
الظابط"انتى امل"
قالها وهو بيبص لامل
"ايوه"
"هاتوها"
وجرها 2 عساكر والام بتصوَت والجيران اللى بيتفرج واللى بيحاول يفوق الام بعد ما اغمى عليها وهى شايفة العساكر بيجروا امل على السلم

الحلقة 27
ايمن وهو بيلبس ونازل... فتح درج مكتبه
والدرج التانى... والتالت
"ماماااااااااااااااا"
جت مامته بسرعة
"مالم ياايمن فى ايه"
"كان فيه فلوس هنا امبارح بالليل... راحوا فين"
"معرفش...كانوا فين"
وراحت الام تدور مكان ما ايمن شاور فى ادراج المكتب
"زمن امتى بتشيل فلوسك فى درج"
"مش فلوسى ياماما...دول 5000جنيه بتوع المجلة"
ودبت الام فى صدرها
"كام...يامصيبتى 5 الاف جنيه ومش لاقيهم... انا فاكراك بتدور على فلوسك"
"هيكونوا راحوا ف.."
رن موبايل ايمن... ولما رد
"انا لسه فى البيت ياايناس... كنت نازل اهو... بتقولى ايه؟؟؟ امل؟؟؟ فين وازاى؟؟؟ هكلم مازن واروحلهم طبعا"
قفل ايمن موبايله
"ماما انا نازل بس دورى كويس على الفلوس يمكن اكون حطيتهم هنا ولا هنا ومش فاكر"
"بتجرى كده ليه؟؟ امل مالها"
"مش عارف... اتقبض عليها ومحدش عارف ليه"
ايمن وهو نازل بيتصل بمازن
"الو... ايه يامازن..مالها امل"

مازن فى عربيته ومعاه ابراهيم
"مش عارف لسه ياايمن...احنا رايحين القسم اهو نسأل عليها ونشوف ... معرفش اى حاجة ولا حد قال حاجة ولا هى كلمتنى ... ابراهيم اللى قاللى مامته كلمته وهو كلمنى.. طيب ..احنا وصلنا اهو...اكيد هكلمك لما اعرف..سلام"
ركن مازن عربيته... ودخل القسم هو وابراهيم
دخل لامين الشرطة الموجود
"لو سمحت... مراتى اتقبض عليها من حوالى ساعة وعايز اعرف ليه "
امين الشرطة"مفيش اى قوة خرجت النهاردة ولا حد جه "
ابراهيم"يعنى ايه؟؟ اومال هى فين"
اين الشرطة"معرفش...شوفوها فى مديرية الامن"
خرج مازن وابراهيم
واتصل مازن من موبايله
"الو.. مش موجودة فى القسم يابابا... كلمت حد؟؟ قالك ايه؟؟ لسه هيشوف... انا رايح المديرية "
قفل مازن ورن موبايله تانى
"لسه ياايناس... مش عارف حاجة والله لسه...مش موجودة فى القسم وانا فى طريقى اهو لمديرية الامن...كلمى ايمن قوليله ميجيش بقى... لما اعرف حاجة هكلمك ...سلام"
مازن بيسوق بتوتر وعصبية
"يعنى هيكون فى ايه؟؟ عملت ايه علشان تتاخد كده"
وبص مازن لابراهيم بكل غضب
"يعنى انت شايف انها عملت حاجة"
"اومال هياخدوها ليه"
"ده اللى لسه هنعرفه انما انا متأكد انها معملتش اى حاجة غلط"
سكتوا الاتنين لحد ما وصلوا مديرية الامن
رن موبايل مازن وهما طالعين على السلم
"الو ... ايه؟؟؟"
خضة مازن وسكوته...قلقت ابراهيم
"ايه يا مازن... فى ايه"
"ماشى يابابا... هسأل عليه حاضر..سلام"
"ايه يا مازن طمنى"
"يالا ... امل مش هنا"
ونزل مازن وابراهيم وراه مش فاهم
"ماتفهمنى يا مازن... امل رجعت؟؟"
"لا ...امل فى امن الدولة"

فى اوضة ايمن...الام قلبت المكتب والدولاب بتدور على الفلوس
سمعت صوت الباب بيتفتح... وسمعت صوت كحة جوزها
خرجت له
"انت نزلت امتى"
"وانتى مالك من امتى بتسألينى"
سابها ودخل اوضته... غير هدومه وراح الحمام
دخلت الام الاوضة بعد ما خرج منها
مسكت بنطلونه... وبدأت تفتش فى جيوبه
لقيت ورق مئات...عدت الفلوس 800 جنيه
"الله يخربيتك... سرقت ابنك"
قالتها وهى مش عارفة تعمل ايه
راحت اتصلت بأيمن

فى المجلة... دخل ايمن على مكتب ايناس
"ايه الاخبار"
"امل فى امن الدولة وزمان مازن بقى عندها دلوقتى"
"متعرفيش ليه"
"لسه"
ورن موبايل ايمن
"الو.. بتقولى ايه؟؟؟؟؟ خلاص طيب...خلاص ياماما متتكلميش معاه فى حاجة... رجعى كل حاجة زى ماهى علشان ميعملش معاكى مشكلة...هتصرف"
مشى ايمن دخل مكتبه... ماسك قلم وعمال بيخبط بعصبية على المكتب... سرحان فى لاشئ
دخل عليه ايهاب
"ايمن... الفلوس معاك ولا وديتها البنك"
"ياااه ...معلش يا ايهاب موضوع امل ده خلانى انسى الفلوس فى البيت... هوديهم وانا جاى الصبح متقلقش"
"ماشى بس متنساش تجيبلى ايصال الايداع علشان اظبط حساباتى"
"حاضر"
خرج ايهاب وفضل ايمن قاعد على نفس الحالة يخبط بالقلم على المكتب ويفكر

مازن وابراهيم قاعدين فى مكتب... وقدامهم لواء
"لولا بس خاطر سليمان بيه احنا كنا اتعاملنا معاها بطريقة تانية"
ابراهيم" شكرا يا سعادة الباشا"
مازن"وهى عملت ايه علشان يتوجه لها اى اتهام"
اللواء وهو بيبص لابراهيم
"انا مش عارف بنات ايه اللى بيحبوا يتدخلوا فى اللى ميخصهمش...البنت تكتب فى الموضة فى المطبخ انما بلاش الموضوعات الحساسة"
مازن بنفاذ صبر"على فكرة احتجازها هنا بدون اى مبرر...امل صحفية ومن حقها تكتب فى اى موضوع"
اللواء بتهديد"بس لما تجيب صور من جوا الحجز وتنشرها وبقالها فترة بتتكلم عن التعذيب فى الاقسام يبقى كده خطر عليها"
وخاف ابراهيم... وفهم مازن التهديد
مازن"هى من حقها تكتب يا باشا... ولو فيه تجاوزات المفروض المسئولين يحاسبوا الغلطان مش يحاسبوا اللى بيقول الحق"
اللواء"احنا هنعديها المرة دى بس ياريت تكون اخر مرة"
ابراهيم"ان شاءالله ان شاءالله... بس هى فين"
دخل العسكرى ومعاه امل
امل عينيها وارمة من العياط... اول ما شافت مازن
مازن قام من مكانه بسرعه وشافها بتعيط
اخدها فى حضنه للحظات... حست فيها امل بكل الامان
التفت للواء"نقدر ناخدها يا باشا"
اللواء"لولا بس ان سليمان بيه له افضال كتير عليا مكنتش خرجت بعد ما جت بساعتين"
ابراهيم "شكرا جدا يا سعادة الباشا"
مازن مسابش ايد امل لحد ما نزلوا ... امل ماسكة فى مازن وهى بتحتمى بيه من كل حاجة
ابراهيم ماشى وراهم وكل القلق اللى كان فيه اتحول لغيظ
اول ما وصلوا عند العربية
ابراهيم"انتى تبطلى اى كلام فى سياسة ولا تعذيب والافلام الهندى بتاعتك دى"
امل"وهو ده اللى هما عايزينه... يخوفونا واحد واحد لحد مانخرس خالص"
ابراهيم"الله الله بقالنا صوت اهو"
امل"وهو المفروض افضل ساكتة طول عمرى"
ابراهيم"ايوه هتسكتى... ومش هتكتبى فى الحاجات دى تانى"
مازن"ومين اللى هيجبرها تعمل حاجة غصب عنها"
ابراهيم"انت راضى عن اللى هى بتعمله ده"
مازن كان لسه ماسك ايديها... شد على ايديها وبص لها
ووجه كلامه لابراهيم
"انا هفضل اشجعها انها متسكتش عن اى حق من حقوقها"
ابراهيم"هى دى الامانة اللى هتحافظ عليها"
مازن"ومين اللى رجعها فى ساعتين... ابقى قادر احافظ عليها ولا لا"
ابراهيم اتنرفز... وسابهم وهو بيزعق
"انتوا احرار... وانا مليش دعوة بيكم"
فتح مازن باب العربية لامل...ولما ركبت لف قعد جنبها
مسك وشها وحركه يمين وشمال وهو بيدور على اى علامة
"حد مد ايده عليكى"
"لالالا الحمدلله... انا كنت هموت م الرعب... فيلم الكرنك على احنا بتوع الاتوبيس على البرئ كان كله بيتعرض قدامى"
"ايه ده هما حجزوكى فى سينما"
"هههه انت بتهزر...انا قلت خلاص هشوف كل الوان التعذيب"
مسك ايديها وباسها وفضل ماسكها
"وانا يعنى كنت هسيبك... ده انا كنت هموت م القلق عليكى"
اول مرة يبوس ايديها... حست ان قلبها هيخرج من مكانه
"ربنا يخليك ليا"
"ويخليكى ليا يا حبيبتى"
حست امل بتغيير كبير فى احساسها... من ربع ساعة بس كانت بتنظر مصير مجهول وهى مرعوبة.. دلوةقتى هى شايفة كل حاجة فى الدنيا حلوة
رن موبايل مازن.. دى ايناس كل شوية تكلمنى وهى بتعيط... ردى عليها طمنيها

لما وصلوا المجلة...اطمن عليها ايمن..اللى كان شكله متغير
وكل اللى فى المجلة اتلموا عليها كأنها خارجة من مؤبد
اللى بيسلم عليها واللى بيبارك لها على خروجها بالسلامة
اختفى ايمن من وسط الموجودين ومحدش اخد باله من غيابه
شوية شوية الامور رجعت لطبيعتها وكل واحد رجع على مكتبه
مازن بيشتغل على مكتبه.. سمع صوت موبايل بيرن
الصوت جاى من عند مكتب ايمن...قرب شاف موبايل ايمن
"الو...ايوه ياشروق انا مازن...ايمن مش موجود وشكله نسى التليفون هنا ..لا مقالش رايح فين ولا جاى امتى...حاضر لما ييجى هقوله..مع السلامة"

ايمن ماشى فى الشارع وحاسس انه مخنوق
ابوه سرقه...وياريتها فلوسه دى فلوس المجلة
يتصرف ازاى...هيقول ايه لاصحابه
كارثة بكل المقاييس...
راح على البنك.... سحب فلوس من رصيده
وعمل ايداع لحساب المجلة... وراح على البيت
مامته حاسة بيه... دخل ساكت على اوضته ودخلت وراه
"متزعلش نفسك ياايمن... هعملك جمعية واسددهم لك... ولو عايز تبلغ عنه بلغ...اللى انت عايزه اعمله بس متزعلش نفسك"
"خلاص ياماما انا اتصرفت ودفعتهم"
"وانت تشيل بلاويه ليه"
"اومال اطلع قدام اصحابى واهل شروق ان ابويا حرامى"
"وانت يعنى معاك فلوس زيادة"
"لا طبعا مش زيادة وال5 الاف دول هيأثروا على جوازى بعد مااتكلمت مع ابو شروق ان هنتجوز فى نص السنة كده اللى متبقى معايا مش هينفع خالص"
سكتت الام ...راحت حضنت ايمن وباست راسه
"ربنا يعوضك خير ياحبيبى ربنا كرمه واسع "
وكتمت دموعها اللى طول عمرها كاتماها

بعد اسبوع... مازن وامل بيوزعوا فى المجلة كروت الفرح
وحددوا معاد الفرح بعد 3اسابيع... واغلب وقتهم بيفرشوا الشقة
شروق مع ايمن
"عقبالنا ياحبيبى"
"ان شاءالله"
"انت لسه مدورتش على شقة"
"لسه"
"الدراسة قربت تبدأ وعلشان نلحق ياايمن"
"ربنا يسهل"
"انت مالك بتتكلم بعدم اهتمام كده ليه"
"لا ابدا... بس خلينا منستعجلش... نأجل شوية"
واخدتها شروق باهانة
"والله انت اللى كنت مستعجل مش انا... وخليك على مهلك وبراحتك بس انت احرجتنى مع بابا"
قامت شروق
"رايحة فين"
"مروَحة"
"انتى زعلانة ليه دلوقتى... هيحصل ايه لما نستنى كام شهر كمان"
"مش هيحصل حاجة..زوبعد كده كلامك منك لبابا ومليش دعوة"
مشيت شروق وهى زعلانة... وهو مش عارف يقول لباباها سبب التأجيل ايه؟

ايهاب وايناس بعد ما اخدوا كارت الفرح
"المفروض الدور علينا... ولا ايه"
"واهلك"
"كلمهم تانى"
"وافرضى ردوا نفس الرد"
"نفضل وراهم ماهو انا مش هفضل احارب لوحدى"
"خايف تكون حرب خسرانة"
"يوووووووو خايف خايف.. خليك خايف ياايهاب"
وسابته وراحت على مكتبها ومسكت شوية ورق فاضيين قعدت تقطع فيهم من غيظها

الحلقة 28
فى الايام المتتالية
التوتر هو الغالب على علاقات معظم الموجودين
شروق بتبعت شغلها لخالد المحرر الالكترونى بالايميل
وايمن مقضى اغلب وقته فى المجلة
ولولا مامته كان بات فى المجلة
رجوعه البيت بيضايقه اكتر لانه بيحاول يتجنب باباه
وكمان مش عايز يتقابل مع ابو شروق

شروق حاسة بتغيير ايمن اللى مش فاهماه
واول يومين كانت بتتصل بيه فى مكالمات سريعة على امل انه يصالحها... ولما لقت طريقته معاها زى ماهى بطلت تتصل

ايناس حست ان ايهاب مش متمسك بيها نفس تمسكها بيه
ففضلت انها تسكت خالص.. وتحاول تنساه

ايهاب اعتبر سكوتهم بعد ماقالوا هنسأل انه رفض ضمنى
وعارف سبب الرفض ايه...فرق المستوى

مازن وامل بيسابقوا الزمن علشان يخلصوا ويجهزوا كل حاجة
وتقريبا مش بيروحوا المجلة خالص

بعد اسبوع
فى المجلة.... بالليل
ومكنش فيه محررين كتير فى المجلة
جت شروق ودخلت على مكتب ايمن على طول وقعدت من غير ماتتكلم
"يااااه... حمدالله ع السلامة"
"الله يسلمك... انت كويس"
"كويس"
شروق قاعدة متوترة...حتى بعد الفترة دى بيقابلها ببرود
بتفرك ايديها وبتلف دبلتها بتوتر
ايمن ساكت مش بيتكلم
شروق بدأت تحس بسخونة الدموع فى عينيها
قلعت دبلتها... حطتها على المكتب قدام ايمن
"ايه ده"
"بريحك من التفكير... يمكن اتسرعت وبتفكر تتراجع ومش عارف تقولها ازاى"
"ايه الهبل اللى بتقوليه ده"
"لو عندك تفسير تانى للى انت فيه قولهولى"
سكت ايمن... واستنت شروق تسمع منه اى كلام
قامت شروق مشيت قبل ما دموعها تنزل قدام ايمن
ايمن قاعد زى ماهو... بيلف دبلة شروق وهى ع المكتب
حركات دائرية بطيئة وقلب عايز يصرخ مش قادر ودموع مبتنزلش

ايهاب راح لايناس مكتبها.. حط كيس قدامها وراح ناحية الباب
"ايه ده"
"جبت لك اكل"
"ليه"
"شايفك من بدرى هنا لانزلتى ولا طلبتى اكل يعنى متغديتيش طول النهار...نزلت جبتلك حاجة تاكليها"
"وانت"
"هبقى اتعشا فى البيت... كلى انتى بس وشوفى لو عايزة حاجة تانية اجيبهالك"
حست ايناس بحنيته ... الكلام بينهم رسمى فى الايام اللى فاتت
"ايهاب... لو عايزنى آكل تعالى ناكل مع بعض"
رجع ايهاب قعد قدام مكتبها
"انتى لسه زعلانة منى"
"مش زعلانة...انا متغاظة منك"
"انا عايزك تحسى بيا"
"وهو انا مش حاسة بيك"
"طيب افرضى جيت ورفضونى يبقى ايه الحل"
"طول مااحنا متمسكين ببعض محدش هيقف قصادنا"
"ماشى ... اما نشوف اخرتها ايه... شوفى هما فاضيين امتى"
"ومالك بتقولها كده ...كأنى كتفتك وهتيجى بالعافية"
"قلقان"
"يوووووووو تاااااااااانى"
"ههههه خلاص خلاص... ربنا يستر بقى ويعديها على خير"
"ان شاءالله"
"بقولك ايه...هما شروق وايمن مالهم"
"مالهم"
"شفتها من شوية جت وبعد 5 دقايق خرجت بتعيط"
"انت قلقتنى"
وقامت من على مكتبها
"رايحة فين"
"اشوف ايمن"

راحت ايناس لمكتب ايمن
محسش بيها وهى داخلة...قربت شافت الدبلة على المكتب وهى بيلفها وسرحان
"ايه ده..دبلة شرووق؟؟؟"
"ايوه"
"ايه اللى حصل علشان كده"
"متسألنيش ياايناس الله يخليكى"
دموعه خانته... دمعه صامته مسحها بسرعة قبل ماتشوفها ايناس
قام ايمن وقف فى الشباك وضهره لايناس
"مش عايز تحكى ياايمن... من امتى بنخبى على بعض"
"مخنوق ياايناس والوحيدة اللى المفروض تستحملنى سابتنى"
"ايه الاستسلام اللى بقيتوا فيه كلكم ده... انت بتحبها من سنين جاى دلوقتى تتكلم باليأس ده ايه حصلكم"
"قصدك مين"
"انت شوية وايهاب شوية...ايييييييييه"
"ماله ايهاب"
"والنبى خلينا فى مشكلتك دلوقتى.. ايه اللى حصل"
"حصل ظروف وقلت لشروق انى هأجل الجواز اتقمصت لها اسبوع وجت تدينى الدبلة"
"وهى لما اتقمصت اسبوع انت عملت ايه"
"ولا حاجة"
"وهتأجل الجواز ليه"
"ظروف"
"وانت كنت بتكلمها بالغلاسة دى والرد المقفل ده"
بص لها ومردش
"ورمت الدبلة فى وشك بس...كان المفروض تفتح دماغك"
ايمن مبيردش لانه مش عارف يرد
"هتفضل ساكت صح؟؟ ساكت مع شروق لحد ما هتضيعها من ايدك وساكت معايا مش عايز تحكيلى ... بس انا مش هسيبك غير لما اعرف مالك"
"ماانا قلتلك سابتنى علشان عايز اجل الجواز"
"انت كنت مستعجل تأجله فجاة ليه"
"ظروف حصلت نقصت الفلوس اللى كنت هتجوز بيها"
"ظروف ايه دى احنا معاك يوميا ومشفناش حاجة حصلت واكيد شروق شكت فى كلامك المبهم ده"
"مش عايز اقول يا ايناس..ممكن"
"يعنى مشكلتك فلوس بس ولا فيه حاجة تانية"
"حاجة تانية زى ايه"
"معرفش انا بسألك"
"فلوس بس...وقبل ما تكملى مش هاخد فلوس من حد"
"ماشى ياايمن مش هتاخد فلوس من حد... طيب مش هتاخد فلوسك كمان"
"فلوسى ؟؟؟"
"ايوه...احنا الحمدلله مجلتنا ناجحة وعندنا فى حساب المجلة مبلغ كويس وزى ما اتفقنا كنا هنقسم الارباح اخر السنة... ممكن تاخد مبلغ تمشى نفسك بيه ويتخصم من الارباح...ولو عايز اكتر خد ويتخصم من ارباح السنة اللى بعدها... مش هنحبسك يعنى"
ركز ايمن فى كلامها... قرب منها قعد قصادها
"ازاى مفكرتش كده"
"علشان اللى بره المشكلة بيفكر احسن"
"انتى حليتيلى المشكلة فى كلمتين"
"انت اللى كنت مكبر الموضوع وقافل على نفسك ومش عايز تتكلم مع حد"
"مش عارف اشكرك ازاى"
"متشكرنيش... خد مفتاح العربية وألحق شروق قبل ماتروح لبسها دبلتها تانى وطمنها انكم هتتجوزوا زى مااتفقتوا"
"اتصل ألحقها قبل ما تروح"
"ماشى ...لحد ما اجيبلك مفتاح العربية"

نزل ايمن بسرعة... كانت شروق قريبة من البيت
وصلها ايمن لقاها واقفة مستنياه زى ما اتفقوا فى التليفون
ركبت جنبه وهى بتعيط
"نعم"
"خدى البسى الدبلة الاول وبعدين نتكلم"
اخدتها شروق على طول كأنها كانت مستنية يقولهالها
لف ايمن بالعربية بعيد عن البيت
"رايح فين"
"راجع المجلة اودى العربية لايناس وبعدين نرجع انا وانتى بقى علشان عايز باباكى"
"يا سبحان الله كنا فى ايه من شوية وبقينا فى ايه"
"الحمدلله"
"افهم بقى...انت بتتحول بسرعة كده ازاى"
"كنت فى ازمة يا شروق...ازمة كبيرة اوى وانتى مستحملتنيش"
"انت قلتلى حاجة وانا سيبتك"
"مكنتش قادر حتى اتكلم"
"ليه ايه اللى حصل"
"مفيش حصل مشكلة ومبلغ كبير ضاع منى"
"ضاع ازاى انت مش فلوسك فى البنك"
"اللى حصل بقى والدنيا اسودت فى وشى"
"وايه اللى بيضها تانى"
"ايناس الله يباركلها بقى قالتلى اخد سلفة من ارباح المجلة ونتمم كل حاجة يا حلو انت ياحلو"
قالها وهو بيقرصها من خدها...وضحكوا هما الاتنين

رجعت ايناس البيت
وقعدت مستنية مامتها اوباباها
ولحظها الحلو ان الاتنين جم مع بعض
اول مادخلوا البيت
الام"ايه ده انتى لسه صاحية"
ايناس"مستنياكم"
الاب"خير"
ايناس"ايهاب.."
الاب"خلاص يا ايناس... اعتذرى له احنا سألنا عليه ولقيناه مش مناسب"
بصت ايناس لمامتها منتظرة انها تساعدها بعد ما قالت لها قرارها انها مش هتتخلى عن ايهاب...لقيتها ساكتة
ايناس"ممكن اسباب للرفض يابابا"
الاب"ماانا قلت لك سألنا لقيناه مش مناسب"
ايناس"سألت مين"
الاب"هو انا فاضى اسأل.. حسن راح سأل عنه وعرف انه كان خاطب قبل كده وخطيبته سابته لسبب محدش عارفه وانهم غلابة ومش من مستوانا وتلاقيه طمعان فيكى"
ايناس"حسن هو اللى قال كده... بس مجابش جديد يعنى انا عارفة كل ظروفه وموافقة بيها"
الاب"واحنا مش موافقين"
الام"بكرة ييجى اللى يناسبك ياايناس"
ايناس"بس انا شايفة انه يناسبنى"
الاب"واحنا مش شايفين كده... قلنا هنسأل ونرد عليه...لقيناه مينفعش "
سابوها ودخلوا اوضتهم... وقفت ايناس مكانها بتفكر
حسن هو السبب بكلامه عن ايهاب... وهما مصدقينه
"ماشى يا حسن والله لاوريك"

الحلقة 29
تانى يوم... نزلت ايناس الصبح بس مراحتش على المجلة
راحت لحسن الشغل
دخلت على مكتبه...اتفاجئ بيها
"ايناس؟؟؟"
"صباح الخير"
"اهلا اهلا... اتفضلى"
قعدت ايناس... وحسن واضح انه مستغرب من زيارتها
ابتسمت له ايناس
"مستغرب من زيارتى طبعا"
"طبعا"
"انا جاية اشكرك.. وقبل ما تفتكرنى بتريق ولا بهزر انا طول الليل بفكر فى كلامك انت وبابا وماما لقيت انك ممكن يكون عندك حق فيه فرق كبير فعلا فى المستوى ... حبيت اجى اشكرك بس كده "
قامت ايناس... ومدت ايدها تسلم على حسن
"مش هعطلك اكتر من كده... وعلى فكرة انا مش زعلانة منك انا عرفت انك بتخاف عليا وعلى مصلحتى ... ابقى خلينا نشوفك وياريت زيارتى دى تبقى بيننا وبين بعض محدش يعرف بيها"
سلم عليها حسن وهو لسه فى استغرابه
مشيت ناحية الباب
"ايناااااس"
ابتسمت اوى وهى بتلف له
"نعم"
"فيه كلام كتير عايز اقولهولك..كلام من زمان"
"وهو ينفع هنا"
"فين طيب"
"زى ماتحب واى وقت... بس انا دلوقتى ورايا شغل وممكن من الساعة 2 ابقى فاضية وغالبا هكون فى المجلة"
"وعلاقتك هتكون ايه بايهاب وهو معاكى فى المجلة"
"اكيد صعب انه يستمر فى المجلة.. هستنى شوية لو هو ممشيش من نفسه همشيه بأى حجة...انا شريكة فى المجلة"
قالتها وهى بتخرج من مكتبه...وهى خارجة التفتت له
كان بيتابعها بنظراته... لما التفتت له وابتسمت له ابتسامة مشجعة قبل ما تمشى

ايمن وشروق فى المجلة قاعدين مع بعض
"بص بقى انا الشقة تكون حلوة وواسعة واهم حاة بلكونة كبيرة"
"ان شاءالله"
"اه وياريت يكون المطبخ كبير علشان احط فيه ترابيزة وكراسى احضر عليها الاكل ونقعد ناكل فيها"
"ان شاءالله"
"وميكونش دور ارضى ولا دور اخير"
"ان شاءالله"
"ويكون..."
"شروووووووووق"
"اييييييييه"
"انا بدور على شقة ايجار يا حبيبتى مش رايح ابنى بيت على مزاجى"
"يوووو يا ايمن بلاش احلم"
"احلمى باللى نقدر عليه دلوقتى ولما ربنا يكرمنا هجيبلك كل اللى نفسك فيه"
"ان شاءالله... امل ومازن وحشونى"
"مشغولين ياستى ربنا يباركلهم بقى.... اول ما ايناس تيجى هننزل ماشى"
"طيب... هروح انا اخلص موضوع علشان اديه لخالد"
"اقعدى هنا على مكتب مازن وخلصى شغلك"
"طيب ماشى"

ايناس اول ما وصلت المجلة... رمت السلام على كل الموجودين ودخلت مكتبها
دخل وراها ايهاب
"مالك ياايناس "
"ايه فى ايه"
"دخلتى كده على طول على مكتبك"
"عادى...ورايا شغل"
"كلمتى باباكى ومامتك"
"ايهاب... لو فيه جديد كنت قلتلك"
قالتها وهى بتنظم الشغل اللى هتبتدى فيه
"ماشى ياايناس... انا مستنى"
خرج ايهاب من المكتب... اخدت ايناس موبايلها
"الو... ازيك ياامل.. ومازن عامل ايه... خلصتى ولا لسه... بقولك انا عايزاكى ضرورى... محتجالك اوى... لا مش هينفع فى التليفون... انتى فى شقتك طيب هجيلك بس عايزاكى لوحدك... ماشى مسافة السكة"
قفلت معاها وقامت تلم حاجتها تانى... ايمن وشروق على باب مكتبها
ايمن"انتى نازلة"
ايناس"اه عندى مشوار مهم"
ايمن"ده احنا كمان نازلين"
ايناس"ماشى ياايمن مش لازم يعنى نكون كلنا هنا"
ايمن"مالك طيب شكلك مش طايقة حد ليه"
ايناس"مفيش... سلام"
مشيت ايناس وهى خارجة مكلمتش حد خالص

ايناس دخلت مطعم... شافت حسن قاعد مستنيها
راحت له... قام يسلم عليها وقعدها وبعدين قعد
"اتأخرت عليك... انا قلتلك ساعة لما كلمتنى"
"لالا مواعيدك مظبوطة تمام... تتغدى ايه"
"اللى تطلبه "
طلب حسن الغدا ليهم هما الاتنين
"طيب انت هتتغدا معايا ولما تروح هتقول لمنى ايه"
"عادى مش اول مرة اتغدا بره... انا بس مستغرب تغيرك المفاجئ ده"
"اقولك الحق... قعدت افكر انت قلت لبابا على ايهاب انه مينفعش ياترى لانه مينفعش ولا لو اى واحد مكانه كنت برضه هتقنع بابا انه مينفعش... فضولى الصحفى بقى خلانى عايزة اسمعك وافهم منك"
"انا هقولك... بصراحة لما عرفت ان فيه عريس جايلك غيرت عليكى اوى وقلت احضر المقابلة علشان احاول اقنع باباكى ومامتك باى عيب فيه بس المرة دى بقى كان سهل لانه مستواه ضعيف وانا عارف الدكتور بيهمه المظاهر قد ايه فمتعبتش كتير"
"ده انت ناوى تكررها بقى"
"مش قادر اتخيل انك تبقى لاى راجل تانى... انا بحبك اوى ياايناس وانتى كنتى بتصدينى"
"تحبنى ازاى وانا محرمة عليك"
"مش محرمة ولا حاجة... انا ممكن اطلق منى ونتجوز"
"والناس وعيلتى"
"مش مهم اى حاجة... المهم انى بحبك انتى وعايزك انتى"
قالها وهو بيمسك ايديها... سابتها فى ايده لحظات
وشدتها فجأة وقامت وقفت وهى بتبص وراه
التفت وراه مكان نظرات عين ايناس
امل واقفة...
"يالا ياايناس... كفاية كده بقى"
امل بتبص له بقرف ... قامت ايناس
"ده انتَ زبالة"
حسن"فيه ايه...مين دى"
ايناس"بص يا حسن زى ماقنعت بابا ان ايهاب لا هتقنعه ان يقول على ايهاب اااااه.... يااما الصور بتاعة قعدتنا الحلوة دى هتروح لبابا ومش كده وبس... وكل الكلام اللى انت قلته ده كمان هيسمعه"
"بتسجليلى وتصورينى ياايناس"
ايناس"انا لو عليا اولع فيك بجاز وخسارة اختى فيك ... واوعى تفتكر هخاف ولا هسكت... الصور والتسجيل معايا فى اى وقت هتضايقنى ولا هتفكر تضايق اختى ولا تزعلها كل عيلتى وعيلتك اللى فاكرينك محترم هيعرفوا حقيقتك"
"انتى ... انتى تضحكى عليا انا"
"ما يقع الا الشاطر... ماتنساش بكرة اخر النهار لو بابا مغيرش رأيه كل حاجة هتبقى ع المكشوف"
"استنى بس... انا هقوله ايه بعد ما هو رفض خلاص"
"مش مشكلتى"
سابته ايناس ومشيت هى وامل...راحوا ركبوا عربيتها
"طمنينى صورتى كام صورة"
"متقلقيش صورت كتير ...بس لما مسك ايديكى ..."
"اسكتى ياامل ده انا عايزة اغسل ايدى بمياه نار علشان الماسكة الزبالة بتاعته دى... عاملى فيها رومانسى جته القرف"
"كده الحمدلله خلصتى منه... يارب باباكى بقى يسمع كلامه"
"هيسمع كلامه انا متأكدة اومال الفيلم الهندى ده كان ليه... هوصلك بقى وارجع لايهاب لاحسن كنت غلسة اوى النهاردة"
"وليه بس هو ذنبه ايه"
"الخطة الزفت دى كانت شاغلانى فمكنتش عارفة اتعامل مع حد والحمدلله انك جيتى معايا"
"وانا اقدر اسيبك...معاكى دايما طبعا"

تانى يوم ... اتصل بيها حسن
ردت بكل ثبات وقوة
"الو...نعم"
"انا عملت زى مااتفقنا... بس باباكى فاكرك سكتتى ومش هيفتح معاكى الموضوع تانى... افتحى معاه الموضوع انتى وبينى له انك مكنتيش هتستسلمى بسهولة"
"وايه الجديد...ما دى الحقيقة"
"طيب انتى خسرانة ايه بقى.. اطلبى منه تانى انك عايزة معاد لايهاب واهله"
"طيب "
"الصور والتسجيل هتعملى فيهم ايه"
"هيفضلوا معايا ياحسن علشان يوم ماتضايق اختى ولا تضايقنى هيطلعوا وتتفضح على ايدى"
قفل معاها وهو فعلا خايف منها... فرحت اوى انها انتصرت عليه

بعد اسبوع بالظبط
كانت قراية فاتحتها على ايهاب
كانت بسيطة بدبلتين وخاتم... وحضرت منى.. من غير حسن اللى اعتذر علشان عنده شغل
ايمن وشروق كانوا موجودين
ومازن وامل... وبعد ما قروا الفاتحة...عزمهم مازن على العشا

فى نفس الاوتيل اللى كانوا فيه يوم كتب الكتاب
كان فرح مازن وامل
امل فى اوضة فى الاوتيل بتلبس فيها
معاها ايناس وشروق ومامتها والفت
امل لانها اول مرة تظهر بزينتها كده فكانت زى الملكة
مامتها بتعيط
الفت"بتعيطى ليه بس... احنا كنا نتخيل ان امل تتجوز جوازة زى دى"
ايناس"مالك يا طنط... بدل ماتقوليلها مبروك"
امل راحت جنب مامتها
"ماما... متعيطيش لاحسن اعيط زيك"
الام"دى دموع الفرح... هتسيبينى وهبقى لوحدى ياامل"
دخلت مامة مازن
"ها ياامل... خلصتى ولا لسه"
ايناس"اهى ياطنط خلصت وبقت برنسيس"
راحت مامة مازن ناحيته امل...وباستها
"مبروك يا حبيبتى... خلى بالك من مازن ... بلاش تزعليه ولا تزعلى منه"
امل" مازن فى عينيا"
مامة مازن"وعايزة اقولك حاجة كمان... مازن اتحرم من العيلة سنين كتير بس ده كان علشان نوفر له حياة كريمة... اعتبريه جوزك وحبيبك واخوكى وابوكى.... وانتى كونى له ام واخت وزوجة وحبيبة"
امل"حاضر"

ايمن واقف مع مازن مستنيين العروسة تخلص
"مازن... انت بتحب امل صح"
"اه طبعا"
"طيب خلى بالك منها ومتزعلهاش... امل تقريبا مفرحتش بحاجة وانت فرحتها الوحيدة"
"انت بتوصينى عليها كده ليه"
"مش عارف... انا فرحان لكم اوى بس قلقان مش عارف ليه"
"ليه"
قبل ما يرد ايمن خرجت مامة مازن من الاوضة ووراها الفت بتزغرط وايناس ماسكة فستان ايناس وشروق ومامة امل معاهم
مازن لما شاف امل خارجة من الاوضة
حس للحظة انها واحدة تانية... مش هى
واحدة اجمل واشيك وغير امل اللى يعرفها خالص
اول ماقرب منها... ومسك ايديها...وابتسمت له
حس انها امل... صديقته وحبيبته ومراته
مال عليها وبصوت هامس فى ودنها
"تجننى"

الحلقة 30
بعد 3 ايام
فى شقة مازن وامل
مازن بيلبس...اتفاجئت بيه امل
"انت نازل يا مازن"
"اه عايزة حاجة اجيبهالك وانا جاى"
"لا.. بس فيه عريس ينزل وهو لسه يدوب 3 ايام"
"ايه المشكلة.... انا مكنتش بقعد فى البيت يوم واحد غير ايام الحادثة ومش عايز افتكر الايام دى خالص"
خلص كلامه وخرج من الاوضة... خرجت وراه امل وهى ساكتة
"مش هتأخر"
"طيب رايح فين"
"المجلة"
"لازم يعنى"
"شوية بس... قعدة البيت بتخنقنى اوى هروح كده اشوف ايه الاخبار واجى على طول"
"متتأخرش عليا"
"خايفة تقعدى لوحدك"
قالها وهو بيهزر معاها... ردت عليه وهى بتبص له
"لأ هتوحشنى"
باسها من جبينها وهو بيفتح الباب
"معلش مش هتأخر عليكى... سلام"

فى المجلة...اول ما دخل مازن
بقى كل الموجودين يهنوه بالجواز
دخل على مكتبه... مكنش ايمن موجود
راح على مكتب ايناس...
"ازيكم يا شباب"
ايمن كان قاعد مع ايناس بيتكلموا...اول ما شافوه
"ماااااااازن!!!!!!"
وقام ايمن اخده بالاحضان
"اهلا بالعرييييييييس"
ايناس"ايه اللى جابك يافقرى "
مازن"لسانها طويل البت دى"
ايمن"صحيح ايه اللى جابك"
مازن"ايه عايزين تستفردوا بالمجلة من غيرى يا اندال"
ايناس"اه ...طمعنا فى حتة وكنا هناخد حيطة واحنا ماشيين"
ايمن"اوعى تقول اتخانقتوا"
ايناس"ده انا كنت اقطم رقابتك يامازن لو زعلت امل"
مازن"اييييييييه مالكم داخلين فيا شمال كده... احنا كويسين الحمدلله بس زهقت من قعدة البيت وقلت اجى اشتغل شوية ساعتين كده وامشى"
ايناس"ثوانى ثوانى... ارجع بالجملة كده زهقت من قعدة البيت... انت عريس يابابا يعنى تقعد مع عروستك ولا تقعد ايه ليه مخدتهاش وسافرتوا فى اى حتة بره ولا هنا فى مصر"
مازن"سفر ليه...هى مقالتش عايزة تسافر"
ايناس"وهى لازم تقول"
ايمن"مش مهم المكان المهم وجودهم مع بعض...والبيه سابها ونزل"
ايناس"مازن بجد ومن غير هزار... فيه حاجة"
مازن"انتوا مكبرين الحكاية كده ليه... انا بجد بزهق من قعدة البيت"

امل فى بيتها... مش لاقية حاجة تعملها
مسكت اللاب توب وفتحت موقع المجلة وقعدت تقلب فيه شوية
وتقرا بعض الموضوعات... لحد ما جرس الباب رن
"اهلا ياماما... اتفضلى"
"ازيك ياامل"
ودخلت الام واخدت منها امل الاكل حطته فى المطبخ
"انا هنزل بقى التاكسى مستنى تحت"
"تنزلى ايه... خليكى قاعدة معايا شوية"
"لا يا حبيبتى انتى اقعدى مع جوزك براحتكم"
"مازن مش هنا"
"مش هنا؟؟؟ يامصيبتى"
"مصيبة ليه بس ياماما"
"الناس تقول عليكى ايه لما يشوفوا العريس نازل... يااما انتى ست نكدية يااما هو بقى... اقول ايه بس"
"متقوليش حاجة... هنادى بس على البواب يمشى التاكسى اللى مستنيكى ده ويحاسبه ونقعد شوية مع بعض"
دخلت الام تمصمص شفايفها وتضرب كف على كف
لحد ما حصلتها امل بعد ما بعتت مع البواب فلوس التاكسى
"حصل حاجة بينكم ياامل...زعلتوا"
"ليه بس ياماما بعد الشر"
"طيب زعلتيه فى حاجة"
"ابدا... متقلقيش هو راح المجلة شوية علشان زهق من قعدة البيت"
"لو زهق يبقى انتى الغلطانة... المفروض طول ماهو موجود متخليهوش يزهق ابدا شوفى اللى يرضيه ايه واعمليه شوفى هو نفسه فى حاجة تعمليهاله... لو من اول كام يوم زهق اومال بعد سنين هيعمل ايه"
"هقوم اعملك شاى"
قامت امل تعمل لمامتها شاى وهى مش مقتنعة بكلام مامتها
هى عارفة ان مامتها من زمن بيلقى اللوم على الست فى كل حاجة
بس هى متنكرش ان نزول مازن ضايقها
مش علشان كلام الناس ولا علشان بعد سنين زى مامتها ماقالت
لأ ...علشان هى عايزة تفضل معاه على طول

قامت امل من النوم ...بصت فى الساعة كانت 6 الصبح
ومازن مش جنبها... استنت شوية مسمعتش اى صوت
قلقت... قامت تشوفه
شافته قاعد على السفرة وفاتح اللاب توب ومنهمك اوى لدرجة انه محسش بيها وهى واقفة
"مازن"
"امل !! انتى صحيتى"
"اه... قلقت عليك لما ملقيتكش جنبى"
"متقلقيش يا حبيبتى... نامى انتى علشان عندنا شغل الصبح"
"انت بتعمل ايه"
"الصبح هقولك... نامى وارتاحى وشوية وجايلك"
"هستناك"
"خلاص اكمل الصبح... نلحق ننام الكام ساعة دول"

فى المجلة... مازن وامل وايناس وايمن فى مكتب واحد وقافلين عليهم المكتب ... وده معناه انهم بتكلموا فى شغل خاص ومحدش يقاطعهم ولا يدخل عليهم
مازن"بصوا بقى عايزكم تركزوا معايا فى الكلام اللى هقوله ده"
ايمن"هااا"
امل"فى ايه"
ايناس"يعنى انتى متعرفيش زينا"
مازن"ايناس احنا مش بنهزر وامل دلوقتى مش مراتى يعنى لسه متعرفش فعلا"
ايناس"بالراحة علينا طيب"
مازن"دلوقتى الكلام اللى هقوله ده ممكن ينقلنا مرحلة تانية خالص من كل حاجة نجاحا وماديا وكل حاجة"
ايمن"مااحنا الحمدلله محققين نجاح مكناش نتخيله"
امل"عايز تقول ايه يامازن"
مازن"عايز نوزع بره مصر ... نبدأ بالدول العربية وبعدين نفكر فى اوربا وامريكا"
بصوا لبعض كلهم وهما بيفكروا
ايناس"فكرة هايلة واحنا الموقع بتاعنا فيه مشاركين من كل الدول"
ايمن"تمام اوى... هنعمله ازاى بقى ده"
مازن"هنعمل اعلان اننا عايزين وكالات توزيع كمان نراسل وكالات التوزيع اللى فى الدول العربية ونشوف"
ايمن"يا مسهل يارب"
مازن"انا طول الليل امبارح بحاول اوصل لايميلات موزعين فى الدول العربية وجبت كام ايميل كده"
امل"علشان كده كنت صاحى ..مقلتليش ليه طيب"
مازن"قلت اقول مرة واحدة ياامل"
ايناس"نكتب صيغة واحدة ونخلى ولاء تبعت ايميلات ونستنى الرد"
مازن"تمام كده... يالا بقى انتشروااااااا"
ايناس "امولة انا نازلة تعالى معايا"
مازن"رايحين فين"
ايناس"نعم مش هنا امل مش مراتك يبقى ملكش دعوة"
مازن"اطلعى انتى منها يا لمضة... مراتى غصب عنك فى كل حتة"

بعد 4 شهور
ايهاب وايناس قاعدين مع بعض فى كافيه
"فرح ايمن وشروق كان حلو اوى"
"بجد ياايناس عجبك فرحهم"
"اه طبعا"
"انا قلت مش هيعجبك ...يعنى مكنش زى فرح مازن وامل"
"اهم حاجة الفرحة مش الفرح"
"بذمتك نفسك متفتحش للجواز... مفاضلش غيرنا"
"وهو انا رافضة ياايهاب"
"انا عندى حل يارب توافقى عليه"
"ايه"
"نتجوز مع بابا وماما... بصى ياايناس انا مرتبى مش هقدر ادفع منه ايجار شقة وافتح بيت كمان... انا مش زى ايمن"
ايناس وهى مترددة
"نتجوز معاهم ؟؟"
"اه... انتى عارفة ان ماما وبابا بيحبوكى وهما طيبين اوى والله"
"انا عارفة ياايهاب انا مقلتش حاجة"
"يعنى موافقة"
"مش عارفة"
"ماهو انا العقبة اللى قدامى الشقة... ولا انتى مش هتستحملينى لحد ما ظروفى تتحسن"
"الكلام ده بيضايقنى انا لو مش مستحملة ظروفك مكنتش اتمسكت بيك من الاول"
"انا مش هلح عليكى كتير بس انا بحبك ونفسى يجمعنا بيت واحد"
"انا عارفة ياايهاب ومتأكدة انك بتحبنى"
"اوعدك لو وافقتى ان محدش هيزعلك ولو بكلمة وطول ماانا عايش محدش يقدر يدوسلك على طَرف"
"ماشى ياايهاب بس لحد امتى"
"لحد بابا ما يطلع معاش ويدينى فلوس اجيب بيها شقة "
"طيب... هتكلم مع بابا وماما وربنا يسهل"
"ممكن يرفضوا؟؟"
"ميتهيأليش لانهم عارفين انا متمسكة بيك قد ايه"
"يعنى اتكلم مع بابا وماما ونبتدى نجهز الاوضة"
"ماشى ياايهاب... يالا تعالى اوصلك علشان اروح لامل"
"تروحى لها ليه"
"مجتش بقالها يومين تعبانة وانا هزورها"

راحت ايناس عند امل... فتحت لها مامة امل
"اهلا ياايناس .. تعالى"
"ازيك ياطنط... مالها امل"
"انا عارفة من امبارح الصبح تعبانة ...ماهى مش عايزة تريح نفسها ابدا طول اليوم شغل وراحت فرح ايمن بفستان خفيف تلاقيها اخدت برد"
"ههههه فستان خفيف ياطنط ... ماهو كان بكُم "
"ياختى فى واحدة فى الشتا تنزل بفستان كده من غير حاجة تقيلة"
وصلوا لاوضة امل
"امولة حبيبتى الف سلامة عليكى... صحتك مش جاية ع الافراح"
امل بعد ما عطست
"برد جامد يا ايناس مخلينى مش قادرة اقوم"
"الف سلامة... مازن فين"
"مصمم يجيب دكتور قلتله هاخد اى حاجة انما هو صمم"
"لازم دكتور يابنتى بدل انتى نايمة كده فى السرير خالص"
صوت الباب... وراحت الام فتحت الباب ورجعت مع مازن والدكتور

بعد الكشف... بدأ الدكتور يكتب الروشتة
مازن"مالها يادكتور"
الدكتور"متقلقش شوية برد بس شديد شوية... بتاخدى ادوية معينة"
امل"لا"
الدكتور"طيب انا كتبت حاجات متأثرش على الحمل"
ردوا كلهم باستغراب
"حمل!!!!!!!!!!!!!!"
الدكتور"ايه ياجماعة... مش هى المدام برضه؟؟"
كان بيسأل مازن
مازن"ايوه يادكتور المدام... بس اتفاجئنا"
الدكتور"اتفاجئتوا... دى فى التالت تقريبا"
مازن"عملتيها من ورايا"
الدكتور"فى ايه ياجماعة"
مازن"بهزر معاها يادكتور"
خرج الدكتور وهو عايز يقول ايه العيلة المجانين دى
وكان مازن بيوصله
ايناس راحت جنبها وباستها
"مبروك يا ماما يا صغنونة"
الام"مبروك ياامل ربنا يكملك على خير... هروح اسخنلك كوباية لبن"
خرجت الام من الاوضة... ومازن كان وصل الدكتور ورجع
راح جنبها وقعد جنبها على السرير... وباسها من خدها
"مبروك يا ام العيال"
امل"الله يبارك فيك ياحبيبى"
ايناس"احم احم...نحن هنا"
مازن"شكلك وحش اوى كده والله وانتى عزولة كده"
ايناس"ماشى ياسى مازن... مش هقولك بقى انى مش هبقى عزولة واتفقنا انا وايهاب اننا هنتجوز قريب"
امل"بجد...مبروك يا ايناس الف مبروك"
ايناس"الله يبارك فيكى .. متقوليش لمازن بقى"
مازن"مبروك ياام لسان طويل"
ايناس"الله يبارك فيك... انت خضيت الدكتور ليه"
مازن"ههههههه انا عارف...انا لقيته اتخض لوحده قلت اشتغله"
ايناس"مجرم الواد ده"
جت مامة امل... ومعاها كوباية لبن
"خدى اشربى اللبن ده وهعملك اكل يومين وانت يامازن ابقى سخن الاكل وانتى متقوميش من السرير"
مازن"وانتى هتسيبينا يا ماما... انتى هتقعدى معانا مش هتنزلى"
امل"اه والنبى ياماما خليكى معايا"
الام"ماهو مازن معاكى اهو"
مازن"لالا مازن نازل وايناس اللى قاعدة دى هتقوم تيجى معايا انا مش هينفع اشيل الشغل كله لوحدى امل هنا وايمن فى اجازة جواز... والفترة اللى جاية دى عندنا شغل كتير"
الام"ومراتك مش اهم"
مازن"والشغل ياماما مهم برضه"
امل"خليكى معايا ياماما علشان مازن يشوف شغله"
الام"امرى لله... حاضر"
مازن"يالا ياايناس... حبيبتى مش عايزة حاجة اجيبهالك وانا جاى"
امل"ربنا يخليك ليا "

الحلقة 31
بعد ما رجعت ايناس البيت بالليل
قعدت تستنى مامتها او باباها... واتأخروا فدخلت تنام
تانى يوم الصبح... لحقتهم وهما لسه بيلبسوا
ايناس"عايزاكم فى موضوع مهم"
الاب"خير... مبقتيش تعوزينا الا لما بيكون وراكى خبر مش ولابد"
الام وهى بتحاول تخفف من حدة الاب
"خير ياايناس... عايزانا فى ايه"
ايناس"ايهاب اقترح اننا نقدم معاد الجواز"
الاب"وهو احنا حددنا معاد م الاول... احنا وافقنا وخلاص"
الام"مبروك ياايناس... جاب الشقة"
ايناس"لسه... يعنى ممكن نتجوز فى بيت مامته وباباه لحد..."
الاب"اتفضلى شوفى بنتك بتقول ايه"
الام"ليه ياايناس... ليه تتجوزى فى بيت اهله"
ايناس"ظروفه كده ياماما وانا وعدته انى هقف جنبه لحد ماظروفه تتحسن"
الاب"انا من الاول شايف انه مش من مستوانا ولا يناسبنا"
ايناس"مالوش لازمة الكلام ده دلوقتى يابابا... انا مقتنعة بيه ومش هسيبه"
الاب"بس الناس بتتمنى تحسن مستواها انتى بتنزلى معاه حتى مش بترفعيه معاكى"
ايناس"هو رافض اى مساعدة منى"
الاب"وهو انا قصدى تديله فلوس... انا بقول بدل مايجيبلك شقة على الاقل فى نفس مستواكى عايزك تتجوزى فى شقة اهله اللى فى حتة اى كلام"
الام"باباكى كلامه صح ياايناس... مينفعش تتجوزوا فى بيت اهله"
ايناس"يبقى هنفضل مخطوبين سنين طويلة"
الاب"مخطوبة اللى بيربطكم دبلتين احسن ماتتجوزيه وتربطى نفسك بيه وكده كده النهاية معروفة ومش هتستحملى"
ايناس"مين قال مش هستحمل...انا وهو بنحب بعض"
الام"ولو رفضنا ياايناس"
ايناس"اكيد مش هعمل حاجة غصب عنكم...بس هحاول اقنعكم"
الاب"يعنى بتقولك م الاخر هفضل ازن عليكم"
ايناس"وليه ترفضوا "
الام"علشان...."
الاب"استنى استنى"
وشاور للام انها تسكت...وبص لايناس
"انتى مقتنعة وعايزاه صح"
هزت ايناس راسها بالايجاب
"اوك ياايناس...اتجوزيه فى شقة اهله اتجوزيه فى اوضة فوق سطوح بس متجيش تشتكى له منه فى اى حاجة بعد كده... ولو جيتى طلبتى تدخلى انا مش هتدخل وساعتها هقولك ده اختيارك"

فى المجلة واول ما وصلت ايناس
دخل وراها ايهاب
"كلمتى اهلك"
"ايوه"
"وقالوا ايه"
"كانوا رافضين طبعا بس انا اقنعتهم"
"مالك يا ايناس بتتكلمى وانتى مش فرحانة زى ماانا فرحان كده"
"قلقانة يا ايهاب خايفة نكون اتسرعنا"
"ندمانة انك ارتبطتى بيا"
"لا مش قصدى انت قصدى جوازنا مع اهلك"
مسك ايدها وهو بيقول
"ياحبيبتى اوعدك محدش هيزعلك خالص ولا حد يتدخل فى اى حاجة تخصك... واعتبرى ان البيت بيتك...ده وعد منى"
حست ايناس بالصدق فى كل كلمة بيقولها ايهاب
وفى نفس الوقت كلام باباها بيرن فى ودنها ان محدش هيقف جنبها لو فشلت مع ايهاب
"ننزل بقى ندور على اوضة نوم وتيجى تشوفى عايزة اى توضيب معين فى الاوضة ونحدد معاد الفرح"
"خلى اختيار التوضيب لما يكون لينا شقة ... وضبها انت على ذوقك لانها هتكون مؤقتة"
"حاضر"

بعد ايام... جت امل المجلة مع مازن
قاعدة هى وايناس لوحدهم فى المكتب
ودخلت عليهم ولاء
"فيه ايميلات جت من وكلاء التوزيع اللى راسلناهم قبل كده "
ايناس"مازن مش فى مكتبه"
ولاء"نزل من شوية"
امل"ورينى كده ياولاء"
اخدت امل الايميلات اللى طبعتها ولاء
امل"دول عايزين حد مننا يكلمهم"
ايناس"لما مازن ييجى بقى هو اللى ماسك الحكاية دى من اولها"
امل"خلاص ياولاء لما مازن ييجى قوليله ييجيلنا قبل ما ينزل تانى ولا يدخل على مكتبه"
ولاء"حاضر"
خرجت ولاء وبعد ساعة جه مازن
مازن"ايه حكاية الايميلات دى"
امل"شوف اهو"
اخد منها الورق..وبعد دقايق
"انا رايح مكتبى هكلمهم"
غاب مازن حوالى نص ساعة
"ايه ياامل ماتقومى نشوف مازن عمل ايه شكله اتلبخ فى الشغل ونسى يعرفنا"
"تعالى ده ممكن ينسى نفسه مش ينسانا بس"
دخلوا على مازن مكتبه كان بيتكلم فى التليفون
"مينفعش بقى كده... كتير اسبوع .. انا مش فاهم يعنى ازاى قاعد كل ده... مزهقتش... ماشى ماشى يعنى معايا... الله يسلمك...سلام"
بعد ماقفل الموبايل
"ايمن بيسلم عليكم"
ايناس"هو ده اللى كان معاك ع التليفون... اخباره ايه وحشنا والله"
امل"اه والله وحشنا هو جاى النهاردة"
مازن"النهاردة ايه بس ده بيستهبل بيقولى مش نازل قبل اسبوع كمان"
ايناس"ههههههه الواد ما صدق يتجوز وهيقعد فى البيت"
مازن"انا مش عارف مش مكفيه اسبوع عايز مينزلش اسبوع كمان"
بصت امل لمازن اللى بيتكلم بكل بساطة... وافتكرت انه نزل وسابها بعد تالت يوم...وقارنت بينه وبين ايمن اللى مش عايز يتحرك من البيت اسبوعين...وافتكرت كلام مامتها
"انا ممكن اكون مقصَرة فى ايه"
مكنتش سامعاهم وهما بيتكلموا... ومعرفتش هما كانوا بيقولوا ايه
ايناس"لا ياعم انا هتجوز ومش رايحة معاكوا اى فى حتة"
امل باستغراب
"تروحى فين"
ايناس" اييييه انتى مش معانا ولا ايه"
امل"معلش دوخت شوية فمركزتش"
قام مازن من مكانه
"مالك ياامل...تعبانة؟؟"
امل"لالالا متقلقش دوخة وراحت خلاص...كنتوا بتقول ايه"
مازن"دلوقتى كلمت الناس اللى بعتوا الايميلات عايزين نمضى معاهم عقود ونتفق على نسب التوزيع يعنى لازم نسافر وحاولت أأجل معاهم السفر علشان خاطر سى ايمن فاحتمال نسافر كمان اسبوعين الرياض وبيروت ودبى"
ايناس"يا محظوظييييييييييييين"
مازن"عايزة تيجى معانا تعالى... بس هنقضيها شغل مش فسح"
ايناس"لا ياعم ... هتروحى ياامل مش كده"
امل قبل ماترد رد مازن
"لا طبعا تيجى فين وهى حامل كده"
امل"انا فعلا تعبانة وهمشى...سلام"
مازن"استنى... تعبانة مالك"
امل"مفيش حاسة انى عايزة ارتاح وانام فى سريرى"
مازن"حبيبتى معلش مش هينفع اوصلك فيه معاد مهم لعميل جاى هنتفق على حملة اعلانات كبيرة"
ايناس ساكتة خالص ومش عايزة تتدخل بينهم
ايناس"خلاص يامازن متقلقش هوصلها وارجع على طول"
نزلوا امل وايناس... طول الطريق وهما الاتنين ساكتين
امل مش عايزة تتكلم... وايناس خايفة تسألها

فى المطار
ايمن وشروق ومازن وامل وايناس مع بعض
شروق بتعيط وماسكة فى ايمن...وايمن محاوطها بدراعه على كتفها وبيحاول يهديها علشان تبطل عياط
مازن وامل وايناس واقفين مع بعض
مازن"ايناس خلى بالك من امل "
ايناس"حاضر انا مش هبقى فى المجلة ده فاضل 10ايام على فرحى ..بس متقلقش هبقى معاها لو احتاجتلى"
امل"متقلقش يامازن انا لو لقيت نفسى تعبانة مش هروح المجلة واتابع من البيت"
مازن"ياعم ايمن كفاية الاحضان دى بقى الناس هتتفرج علينا"
امل بصوت واطى"بس يامازن عيب كده"
ايمن"انا مش عارف سفر ايه وشغل ايه وتاخدونى من عروستى كده"
مازن"ده بيقول اخدناه؟؟ انت مش مكفيك الانتخة اللى فاتت دى كلها"
ضم ايمن شروق لحضنه اكتر
"لا طبعا مش مكفيانى"
مازن"شروق انتى اللى هيبقى عليكى العبءالاكبر فى المجلة هتقدرى ولا لا"
شروق"متقلقش يامازن... بس متتأخروش"
وكملت عياط... ايمن مسح لها دموعها
"مش هنتأخر ان شاءالله ياحبيبتى... يعنى كفاية خمس ست ايام بالكتير ولا ايه يامازن"
مازن"اه كفاية اوى "
وسمعوا صوت النداء على الركاب
اتعلقت شروق فى ايمن وزاد عياطها... وايمن بيطبطب عليها
مازن سلم على امل وباسها فى خدها وجبينها
"خلى بالك من نفسك... لو تعبانة متنزليش م البيت"
امل"حاضر... ابقى كلمنى اول ماتوصل"
مشى مازن وايمن... ووقفوا ال3 مع بعض
ايناس وشروق وامل
شروق بتعيط بصوت... وامل نازلة من عينيها دموع صامتة

ايناس بتروح كل يوم بيت اهل ايهاب بتفرش حاجتها لوحدها
لان مامتها مش فاضية تروح معاها او بتشترى حاجات ناقصاها

امل بتروح المجلة كل يوم وبتنزل تعمل موضوعاتها الصحفية
ومامتها مش عاجبها انها بتتعب نفسها كتير وهى حامل

شروق مش بتروح الكلية وموجودة كل يوم فى المجلة مع امل

شروق قاعدة فى المكتب مع امل... كل شوية بتشوف تليفون شروق بيرن وترد على ايمن
وتروح تتكلم من المكتب التانى ... لوحدها
ميعديش ساعتين من غير مكالمة من ايمن لشروق
اما مازن فكان بيكلمها مرة الصبح يسأل عليها
ومرة تانية بالليل يطمن على يومها ويحكى لها على يومه

بعد 6 ايام... خلصوا ايمن ومازن جولتهم
وراحوا ايناس وامل وشروق يجيبوهم من المطار

الحلقة 32
وصل ايمن ومازن للمطار
كل واحد فيهم راح على مراته و بيسلم عليها
ايناس"يعنى كل واحد اخد مراته فى حضنه وانا واقفة كده محدش قالى ازيك"
مازن وهو بيسلم عليها"حبيبتنا انتى ياعروسة منستغناش"
ايناس"حمدالله على سلامتك يا مازن وحشتنى والله"
ايمن بيسلم عليها"ازيك ياايناس... وحشتينا والله"
ايناس"تسلم ياخويا متشوفش وحش"
وسلم ايمن على امل
"ازيك ياامل...مالك شكلك متغير كده ليه"
امل"مفيش ...حمدالله على سلامتكم"
وصلتهم امل كل واحد عند بيته
واكدت عليهم انها مش هتيجى المجلة لحد الفرح

اول ماوصل مازن وامل شقتهم
استقبلته مامة امل وسلمت عليه وحضنته
"حمدالله على سلامتك يامازن"
"الله يسلمك ياماما..وحشتينى"
"وانت كمان ياحبيبى ..نورت بيتك"
"منور بيكى "
"احضرلك الغدا دلوقتى"
"لا ياماما شكرا... انا هنام شوية وابقى اتغدا لما اقوم قبل مااروح المجلة"
دخل مازن اوضته... ودخلت وراه امل
وهو بيغير هدومه هى بتاخد منه هدومه تعلقها
بعد ما غير هدومه...مسك ايدها واخدها تقعد على السرير
"سيبى الهدوم دى دلوقتى تعالى احكيلى عاملة ايه"
قعدت على السرير ...لف هو وراح قعد مكانه... وحط راسه على رجلها
مسحت شعره بايديها ...اخد ايديها وباسها
"وحشتينى اوى ياامل"
"وانت كمان وحشتنى اوى"
"صحتك عاملة ايه ... تعرفى انى كنت متضايق جدا وانا هناك"
"بجد يامازن... وحشتك بجد"
"اه طبعا انا مقدرش استغنى عنك ابدا... بس اللى فرحنى اننا اتوفقنا فى السفرية دى الحمدلله"
"الحمدلله... ليه مكنتش بتكلمنى كتير يامازن"
"انا مش كنت بكلمك مرتين تلاتة فى اليوم"
"اه بس كنت بتوحشنى"
"مكنتش فاضى ياامل... سيبك انتى من الكلام ده انا قدمت لك فى مسابقة"
"مسابقة ايه دى؟؟ ومقلتليش الاول ليه"
"بصى ياستى انا لقيت اعلان امبارح بالليل عن مسابقة فى الفنون الصحفية المختلفة اخترت كام صورة من بتوعك وبعتهم باسمك وبياناتك "
"ومبعتش حاجة من شغلك ليه"
"شغلى عادى انما صورك انتى حاجة تانية ياحبيبتى"
"ربنا يخليك ليا"
"ويخليكى ليا بصى ياامل انا هنام شوية وابقى صحينى ع الساعة 5 كده علشان اروح المجلة"
"خليك النهاردة طيب وابقى روح بكرة"
"لا لازم اروح ايمن قال مش جاى النهاردة وايناس مش جاية يبقى لازم اروح اشوف الاخبار ايه وانتى لو عايزة تيجى معايا تعالى عايزة ترتاحى فى البيت خليكى"
شال مازن راسه من على رجلها وحطها على المخدة علشان ينام

امل مع ايناس عند الكوافير
هما الاتنين لوحدهم... ايناس كل شوية تبص فى ساعتها
راحت عليها امل
"مالك ياايناس كل شوية تبصى فى ساعتك...متقلقيش لسه بدرى"
"شفتى ياامل ولا ماما ولا منى حد منهم معايا ازاى"
"ماانتى عارفة مامتك مشغولة ومنى يمكن جوزها غلس عليها ولا حاجة... وبعدين انا مش كفاية ولا ايه"
"انا من غيرك كنت هبقى لوحدى"
"وانا مش هسيبك ياايناس متقلقيش... وبعدين هما كمان اكيد زمانهم جايين يعنى مش هيسبوكى فى يوم زى ده"
"هو انا غلطت ياامل"
"انتى جاية دلوقتى تسألى ياايناس...كلها كام ساعة وهتتجوزوا"
"انا خايفة اوى"
"متخافيش ايهاب طيب وبيحبك واهله بيحبوكى وانتى مكنش قدامك غير ياتستنى كتير ياتقبلى الوضع ده... وانتى اخترتى بارادتك"
"انا مقتنعة بايهاب وبحبه بس زعل بابا وماما قلقنى"
"افرحى ياايناس دى ليلة العمر متنكديش على نفسك"

قبل معاد ايهاب بساعة جت مامتها ومنى
ايناس لما جهزت كانت عروسة جميلة
باباها حضنها كتير وعيونه دمعت وهى طالعة بيتها
العربيات اللى بتوصل ايناس... مفيش زيها فى المنطقة كلها اللى ساكن فيها ايهاب
والفرق بين العيلتين واضح جدا
وواضح كمان الحب اللى فى عيون ايهاب وايناس

بعد كام شهر
فى المجلة...
شروق جت ودخلت على ايمن
"حبيبى انا نجحت"
ايمن"مبروك ياحبيبتى الف مبروك"
مازن"مبروك يا شروق...هانت كلها سنة وتخلصى"
شروق"الحمدلله خلينا نخلص... هروح اقول لامل وايناس"
دخلت شروق المكتب عندهم... لقت ايناس واقفة جنب امل
والاتنين شكلهم متغير
شروق"فى ايه"
ايناس"امل تعبانة"
شروق"مش ده شهرها يمكن ولادة"
ايناس"كانت عند الدكتور امبارح وقالها لسه"
شروق"حاسة بإيه ياامل"
امل بتتكلم بصوت واطى وبصعوبة
"حاسة بوجع فى ضهرى وانى تقلت فجأة مش قادرة اقوم من مكانى"
ايناس"تيجى نروح لماما المستشفى انتى الدكتور بتاعك بيبقى فى الجامعة دلوقتى"
شروق"انا هقول لمازن انتوا ليه مقلتلوش"
وراحت شروق دقيقة ورجعت بمازن وايمن
راح ناحيتها مازن وقعد على ركبه قدامها
"ايه ياامل... مالك وشك مخطوف كده"
امل"متقلقش تعل عادى"
مازن"لالالا قومى نشوف اى مستشفى مش لسه هنستنى لبالليل"
قامت امل وهى بتتسند على مازن
وايناس خرجت وراهم هى وشروق وايمن
وقفها ايهاب بعد ماخرجوا
"رايحة فين ياايناس"
"امل تعبانة ورايحة معاها المستشفى"
"لازم يعنى"
"ايوه لازم ياايهاب فى حاجة"
"لا براحتك... بس متتأخريش مش هتغدا غير لما تيجى"
"حسب الظروف"
"علشان خاطرى متتأخريش... هستناكى فى البيت"
"حاضر ياايهاب"

فى المستشفى... مامة ايناس بتكشف على امل
"حمدالله على سلامتك ياامل"
امل وهى بتفوق... بتدور بعينيها فى الموجودين
شافت مامتها ومعاها طفل... وشافت ابراهيم... وايناس
"ابنى؟"
جابته مامتها وقربته منها
"حمدالله على سلامتك ياامل... شوفى القمر الصغير ده محبش يزعل حد فيكم جاى شبهك انتى ومازن"
بصت امل عليه... ومكنتش قادرة تشيله
"فين مازن"
الام"كان هنا وقال رايح مشوار وجاى"
مامة ايناس"ارتاحى دلوقتى ياامل ... وبكرة الصبح ممكن تروحى بيتك ان شاءالله"
ايناس"حمدالله على سلامتك ياامل"
وبصت ايناس فى ساعة الحائط اللى قدامها...كانت الساعة 6
ايناس"انا همشى ياامل واجيلك تانى بالليل"
مامة ايناس"استنى انا كمان ماشية... هنزل معاكى"
وايناس مع مامتها فى مكتبها والام بتلم حاجتها
"عاملة ايه ياايناس... وايهاب عامل ايه معاكى"
"الحمدلله ياماما احنا كويسين"
"وحماكى وحماتك كويسين"
"الحمدلله"
"محتاجة حاجة... عايزة فلوس"
"لا الحمدلله ... متقلقيش ياماما انا معايا فلوس المجلة دخلها كويس"
"مفيش اخبار عن شقة ولا حاجة"
"لا مفيش مرتب ايهاب على مرتب باباه بيصرفوا على البيت"
"وبعدين هتفضلى عايشة عندهم على طول"
"معرفش ياماما ... ربنا يسهل"
"ايناس ياحبيبتى لو عايزة اى حاجة متتكسفيش منى "
"ربنا يخليكى ياماما...عايزاكى تطمنى والله ايهاب كويس جدا وبيحبنى ومش بيزعلنى خالص... اطمنى"

وصلت ايناس البيت... فتحت بالمفتاح ودخلت
كانت مامة ايهاب قاعدة ومعاها واحدة جارتها
دخلت على اوضتها بعد ماالقت التحية... ايهاب كان قاعد على السرير بيتفرج على التليفزيون
"اتأخرتى ليه ياايناس...انا مُت م الجوع"
"ومتغديتش ليه"
"مستنيكى... امل عملت ايه اتصلت بيكى تليفونك غير متاح"
"الشبكة وحشة فى المستشفى... تصدق انا كمان جعانة اوى"
"غيرى هدومك لحد مااقول لماما تسخن الاكل"
"استنى ياايهاب... فيه واحدة قاعدة معاها بره ومينفعش ناكل وحد هنا الست هتبقى بتتفرج علينا"
"اومال منتغداش"
"لما تمشى... انا كنت حاطة هنا حلق قلعته الصبح"
"فين انا مشفتش حاجة"
"هيكون راح فين يعنى"
"معرفش ياايناس دورى كويس احنا معندناش حد بيسرق"
"بس بيجيلكم ضيوف كتير جيران مامتك كل يوم عندها"
"دول بيبقوا بره ايه اللى هيدخلهم هنا"
"انا عارفة بقى اومال الحلق راح فين"
"استنى ياحبيبتى ندور كويس"
ايهاب بيدور معاها... وسمعوا صوت الباب بيتفتح ويتقفل
"اهى الست مشيت تعالى نتغدا ونيجى ندور عليه"
خرجت ايناس من الاوضة وهى متضايقة من اللخبطة دى
حماتها"يالا ياولاد انا سخنت الاكل"
راحت ايناس قعدت هى وايهاب ...والاكل محطوط على الترابيزة
ايناس"ايه ده"
حماتها"دى كِرشة بالحمص انما هتاكلى صوابعك وراها"
بصت ايناس حواليها على ايهاب اللى تقبل الكلمة عادى
ايهاب"تسلم ايدك ياماما من قبل مااكل"
حماتها"تسلم ياحبيبى انت اتأخرت اوى فى الغدا...متبقيش تتأخرى كده ياايناس وتسيبى جوزك كل ده مستنيكى"
ايناس مشغلهاش كلام حماتها ولا الحلق اللى بتدور عليه
كل اللى شاغلها الاكلة الغريبة اللى قدامها دى... هتتصرف ازاى
ايهاب بدأ ياكل
"ايناس مش بتاكلى ليه"
"بطنى... اه نفسى غامة عليا"
قامت ايناس ع الحمام بسرعة وقام وراها ايهاب
غابت 5 دقايق جوه... وايهاب ومامته واقفين لها بره
حماتها"يا الف بركة... شكلك حامل ياايناس"
ابتسمت لها ايناس ودخلت اوضتها... ودخلوا وراها
حماتها"انتى بتلبسى ليه انتى نازلة"
ايناس"اه"
ايهاب"رايحة فين"
ايناس"رايحة لامل اطمن عليها"
حماتها"انتى لازم ترتاحى ياايناس علشان الحمل يثبت"
ايناس"مفيش حمل ياطنط انا معدتى بس تعبانة شوية"
حماتها"وعرفتى منين يمكن حامل"
ايناس"لا انا عارفة كويس انا مش حامل"
حماتها"ربنا يطعمكم ما يحرمكم ويعوض عليكم يارب"
ايهاب"ماما هو حد جالك النهاردة وسيبتيه ودخلتى المطبخ مثلا"
حماتها"لا محدش...ليه"
ايهاب"اصل كان فيه هنا حلق بتاع ايناس مش لاقياه"
حماتها"اه ياايناس موجود ...انا شيلتهولك فى علبة الدهب بتاعتك... اهو"
وراحت فتحت الدولاب وفتحت العلبة وطلعت الحلق
ايناس"وهو حضرتك دخلتى اوضتى ليه"
حماتها"انا لقيتها بقالها اسبوع لا اتفتحت ولا اتهوت قلت اشمسها هى والفرش ونضفتها وروقتها"
وحاولت ايناس انها متنفجرش من الغيظ
"وليه تعبتى نفسك... ابقى سيبيها وانا هبقى انضفها"
حماتها"وهو انتى بتقعدى خالص... بس انا مالى انتى حرة"
قالتها وخرجت من الاوضة
"احرجتيها ياايناس"
"ياسلاااااام وده يعنى ايه لما اجى ميته م الجوع الاقى اكلة قلبت معدتى وعمرى ماسمعت عنها ولما تدخل اوضتى من غير معرفتى يبقى ايه ده"
"بس ماما متقصدش تضايقك دى عايزة تريحك"
"وانا مش مرتاحة كده... كل يوم والتانى جيران داخلين طالعين وبفضل محبوسة فى اوضتى مش عارفة حتى ادخل الحمام ده كده وانا فعلا مش موجودة طول اليوم اومال لو قعدت يومين تلاتة من الشغل هيحصل ايه"
"متزعليش ياايناس...هدى نفسك ومتتضايقيش وانا هلبس اهو وننزل نتغدا بره مع بعض"
باس راسها وهو بيصالحها... حست بيه
"ياايهاب ياحبيبى انا عارفة ان مامتك نيتها كويسة وعارفة انك مش عايز تزعلنى بس احنا فعلا اتسرعنا وغلطنا لما اتجوزنا هنا"

الحلقة 33
قامت ايناس وهى مش عايزة ترد على ايهاب
"استحملى ياحبيبتى معلش انا كمان استحملت طريقة اهلك معايا وتعاليهم عليا علشان بحبك...اتقدمتلك واترفضت واتقدمت تانى برضه علشان بحبك مهمنيش كرامتى علشانك مش قادرة تستحملى ظروفى شوية"
"ما انا مستحملة وساكتة اهو علشان خاطرك بس اعمل ايه لما اتضايق اتكلم مع مين يعنى"
عيطت ايناس من خنقتها... حضنها ايهاب وهو بيحاول يخفف عنها
"بابا قدامه سنة تقريبا ويطلع معاش وهو وعدنى انه هيدينى المكافأة بتاعته اجيب بيها شقة وعارف انها هتكون شقة عادية ..."
"اى شقة ياايهاب بس نبقى انا وانت لوحدنا"
"حاضر ياحبيبتى... متزعليش منى "
"انا مش ممكن ازعل منك ابدا"
"طيب يالا ننزل نتغدا مع بعض وبعدين نروح لامل"
مسحت ايناس دموعها وهى بتضحك له علشان حست قد ايه هو متضايق علشانها

فى المستشفى... جه مازن
"ايه ياماما اخبارها ايه"
"الحمدلله فاقت وسألت عليك... انت كنت فين"
"كنت بجيب دوا مش موجود فى المستشفى روحت اجيبه من بره واتصلت بيا ولاء قالتلى على حاجة مهمة روحت المجلة خلصتها وجيت"
"مقلتش هتسمى ابنك ايه"
"لما امل تصحى هنسميه مع بعض"
راح وقف جنبها يبص لها.... كان شعرها على وشها
رجع شعرها لورا... وشد الغطا عليها
صحيت من النوم
"مازن"
"حمدالله على سلامتك... عاملة ايه دلوقتى"
"تعبانة اوى حاسة بألم جامد"
"معلش ياحبيبتى هتبقى كويسة ان شاءالله... شدى حيلك بسرعة علشان فيه خبر حلو ليكى"
"خبر ايه"
"فاكرة المسابقة اللى اشتركتلك فيها كسبتى الجايزة الاولى مبروك"
"بجد... يعنى النهاردة فرحتى فرحتين ابننا والجايزة"
"الحمدلله ان شاءالله تبقى حياتنا كلها افراح"
الام"ربنا يسعدكم يارب ومبروك ياامل... هتسموا ابنكم ايه"
مازن"ايه رايك ياامل...نسميه ايه؟؟؟ايه؟؟"
امل"انا نفسى اسميه عمر"
مازن"جميل عمر... عمر مازن الله اسمى حلو اوى"
وضحكت امل ومقدرتش تكمل ضحكتها ومسكت بطنها من الالم

فى بيت امل ومازن.... واقفين كلهم امل ومازن ماسكين عمر وايناس وايمن وشروق
حوالين السفرة اللى فى وسطها تورتة بصورة عمر ووسطها شمعة واحدة... وكلهم بيغنوا
"happy birthday to youuuuuuuuuuuu"

بعد ما خلصوا وقفت امل تقطع التورتة وايناس بتساعدها
وشروق اخده عمر فى حجرها وبتهزر معاه
مالت ايناس على امل
"شروق بتحب عمر اوى... بتصعب عليا لما بشوفها كده"
وبصت امل لشروق وهى بتضحك مع عمر
"ربنا يديها يارب ... مازن بيقولى ان ايمن قاله ان الدكتور قالهم طول ما نفسيتها تعبانة كده العلاج ممكن يطول"
اخدوا الاطباق وراحوا قعدوا معاهم فى الصالون
عمر شبط فى مازن ...قعد يعيط ويبص لمازن
اخده مازن فى حضنه...
ايمن"هتعملى ايه فى العرض اللى جالك ياامل"
امل" دول عايزين احتكار لكل صورى وانى منزلش اى صور ليا فى اى حتة حتى مجلتنا"
ايمن"حتى مجلتنا... وانت يامازن ايه رأيك"
مازن"انا قلت لها تفكر كويس وتاخد قرارها وهى حرة فيه كده كده امل مش مصورة بس هى صحفية كمان ومن بعد المسابقة اللى كسبت فيها الجايزة الاولى كل الوكالات بتجرى وراها ..والعرض ده مغرى ماديا وكأسم مكان تنتسب ليه"
امل"انا كلمتهم ورفضت العرض ده خالص"
مازن"اللى انتى مقتنعة بيه اعمليه"
امل"انا رفضت خلاص لان مش هينفع اسيب حلمنا بعد ما بقى حقيقة"
شروق"عمر نام يامازن"
مازن"خدى ياامل نيميه "
اخدته امل وقامت
ايمن"هو احنا مش هنتفرج ع الماتش ولا ايه"
مازن"قوم تعالى نتفرج جوه "
قام مازن وايمن دخلوا اوضة يتفرجوا على التليفزيون
وجت امل قعدت مع ايناس وشروق
شروق"مامتك جاية امتى من العمرة"
امل"كمان 3ايام ان شاءالله... دى كانت شايلة عنى كتير مكنتش بشيل هم البيت ولا عمر خالص"
شروق"ربنا يرجعها بالسلامة"
رن موبايل ايناس... كتير ومش بترد
مرة واتنين... وبتعمله صامت ومش بترد
امل"مالك ساكتة النهاردة ومش بتردى على تليفونك ليه مين بيكلمك"
ايناس"ده ايهاب"
امل"ومش بتردى عليه ليه"
عيطت ايناس... قربوا منها امل وشروق يطبطبوا عليها
شروق"مالك ياايناس انتوا متخانقين"
امل"وهو ايهاب يقدر يزعلك بتعيطى ليه ده بيموت فيكى"
ايناس"تعبت واتخنقت من العيشة ف بيت اهله وخصوصا بعد ما باباه تعب وزاد عليه المرض وبقى قاعد فى البيت على طول... كل شوية زيارات من معارف وقرايب ... المطبخ بتكسف ادخله علشان حماتى بتزعل لما بتعدى على مملكتها هى اللى بتطبخ واسمعها تشتكى انى مبساعدهاش...ولما ادخل المطبخ تقعد تقول شيلتى ده من هنا ليه وحطيتى ملح كتير لا عملتى الشاى خفيف اى حاجة تخلينى افضل محبوسة جوه اوضتى... نفسى اخلف وابقى ام مانعة الحمل علشان مفيش مكان ولا استقرار"
شروق"وتمنعى الحمل ليه غيرك نفسه ومش قادر"
دمعت عين شروق... حست ايناس انها ضايقتها من غير قصد
ايناس"اسفة ياشروق والله مااقصد"
شروق"انا عارفة انك متقصديش...بس غصب عنى نفسى فى طفل نفسى ابقى ام حاسة ان عمرى ماهبقى ام ابدا"
امل"متقوليش كده انتى مش متابعة علاجك مع الدكتور"
شروق"متابعة طبعا ومبنساش ولا مرة ...بس يمكن ربنا مش رايد... وخايفة مع الوقت ايمن يزهق ويسيبنى "
امل"ايمن يسيبك...حرام عليكى يا شروق ده روحه فيكى"
ورن موبايل ايناس تانى... ومردتش
امل"مش بتردى عليه ليه...كل اللى قلتيه ده مفيهوش جديد"
ايناس"انا كنت مستحملة على امل هيجيب شقة من فلوس باباه الجديد بقى ان باباه لما قرب ياخد مكافاة المعاش قاله انه نفسه يحج وخصوصا انه مستنى الموت فى اى لحظة وايهاب طبعا مقدرش يتكلم "
امل"ماهو كمان مش معقول هيقول لباباه متحجش بفلوسك"
ايناس"قلتله نشوف شقة ايجار قال مرتبه ميكفيش ورافض انى ادفع الايجار بيقولى مش كفاية بتصرفى على نفسك كمان هتدينى فلوس"
امل"والحل ايه"
ايناس"مش عارفة... بس مش عايزة ارجع بيتهم تانى وهروح بيت بابا لحد مايبقى فيه حل"
شروق"طيب ردى عليه فهميه وقوليله انك محتاجة تريحى اعصابك شوية عند اهلك"
امل"صح ياايناس هو معملش حاجة وحشة يخليكى تسيبيه كده... قومى كلميه وقوليله زى شروق ماقالتلك"
قامت ايناس دخلت البلكونة تتصل بايهاب وتعرفه انها مش قادرة ترجع بيت اهله تانى
امل"هقوم اشوف مازن وايمن يمكن محتاجين حاجة"

ايمن ومازن وهما بيتفرجوا ع الماتش
"انا مش جاى المجلة بكرة يامازن... احتمال يومين ولا تلاتة كده"
"ليه"
"هاخد شروق ونسافر الغردقة كام يوم كده نغير جو"
"ياعم انت مبتزهقش فُسح"
"شروق نفسيتها تعبانة ومش راضية تقتنع ان الامل كبير فى ربنا والدكتور بتاعها مطمنا بس هى مش راضية تقتنع"
"يمكن التأخير ده علشان فيه حاجة احسن هتحصل... يعنى انا ايام الحادثة بتاعتى مكنتش طايق نفسى وكنت بقول اشمعنى انا يحصل معايا حادثة تقعدنى وتخلينى مش عارف اتحرك...عرفت بعدها ان دى كانت احسن حاجة فى حياتى...

كانت امل قربت على باب الاوضة... وقبل ما تدخل سمعت مازن بيقول
"لولا الحادثة وان ابراهيم شاف امل عندى فى البيت انا مكنش هيخطر على بالى انى اتجوز امل خاااااااالص انا ساعتها حسيت بأنى السبب فى ضياع مستقبلها علشان كده روحت اتقدمتلها

اول ماسمعت امل كلام مازن حست بصدمة كبيرة
صدمتها خليتها تبعد عن الاوضة قبل مايشوفوها
ومسمعتش باقى كلام مازن... اللى كان بيكمله لايمن
"بس بعد ما ارتبطنا وقربت منها لقيت نفسى بحبها معرفش ازاى وامتى بس لقيتها هى كل حاجة فى حياتى هى ادتنى الحب والحنان والاستقرار اللى كنت محتاجهم وانا اديتها الحرية والفرصة فى تحقيق حلمها من غير ما حد يتحكم فيها علشان كده انا حاسس اننا اسعد اسرة وخصوصا فى وجود عمر اللى كملت سعادتنا بوجوده "
"ربنا يسعدكم يامازن انتوا تستاهلوا كل خير"

امل رجعت عند شروق... وكانت ايناس خلصت مكالمتها
فى لحظة حست امل ان حياتها كلها بتنهار... انهارت هى كمان

شروق وايناس اتفاجئوا بأمل بتقع على الارض
صرخوا وجروا يفوقوها
وهما الاتنين بينادوا
"ياماااااااازن... يا ايمممممممممن"

مازن وايمن سمعوا صوت صراخ ايناس وشروق
قاموا يجروا بسرعة... كانت امل لسه ع الارض
ايناس بتفوقها ... بدأت تفوق
سندها مازن لحد سريرها
وكلهم وراها
مازن"ايه اللى حصل"
شروق"فجأة وقعت قدام عنينا معرفش مالها"
امل دموع نازلة منها بس من غير كلام
شافها مازن... قعد جنبها
"مالك ياامل... انتى حاسة بحاجة... هكلملك الدكتور ييجى حالا"
"لأ"
قالتها امل بحزم... وبصت لايناس ووجهت لها الكلام
"عايزة انام بس"
ايناس"يعنى انتى كويسة... شكلك تعبانة يا امل"
امل"لأ كويسة... عايزة انام بس"
ايناس"ماشى...يالا احنا هننزل بقى مش عايزة حاجة"
هزت امل راسها بالنفى... خرجوا كلهم ووراهم مازن
على الباب وهو بيوصلهم
ايمن"متسيبهاش يامازن شكلها تعبانة وانا ممكن أأجل سفرى"
ايناس"انت مسافر؟؟"
ايمن"اه كنت هسافر يومين كده انا وشروق"
ايناس"سافروا انتوا وانت خليك مع امل وانا مفيش ورايا حاجة هروح انا المجلة وملكوش دعوة انتم"
مازن"انا مش عارف ايه اللى حصلها فجأة كده... وطبعا مش هسيبها علشان عمر كمان ممكن يصحى فى اى لحظة يعيط"
ايمن"يالا هبقى اكلمك فى التليفون اطمن عليها.. لو عايز اى حاجة اى وقت كلمنى انا مش هسافر قبل 9الصبح"
مازن"ماشى ياايمن..تروحوا وترجعوا بالسلامة"
خرجوا كلهم وقفل مازن الباب ودخل لامل
"امل هجيبلك عصير شكلك عندك هبوط"
"مش عايزة حاجة"
"مالك ... ياامل"
قالها وهو بيطبطب عليها
"شيل ايدك من عليا"
اتخض مازن من طريقتها
"مالك ياامل خليكى واضحة فى ايه"
قامت امل قعدت ... وحاولت تحافظ على هدوئها بس دموعها كانت بتسبق كلامها
"انت اتجوزتنى ليه"
"ايه السؤال الغريب ده...هى الناس بتتجوز ليه"
"مليش دعوة بالناس...انا بسألك اتجوزتنى انا ليه"
"علشان حبيتك"
"كدااااااااااااب"
صرخت امل فيه... بقت تعيط وهى بتتكلم
"انا كنت حاسة انك بتعاملنى بطريقة غريبة غير ايمن وايهاب مع شروق وايناس وكنت بكذِب نفسى واقول يمكن هو طبيعته كده انا دلوقتى لقيت تفسير لكل حاجة وانا اسأل نفسى انا فيا ايه غير ايناس وشروق علشان تعاملنى بالجفاء ده"
"انتى بتتكلمى عن ايه جفاء ايه وطريقة ايه اللى غيرهم ؟"
"مفيش اهتمام مفيش كلمة حلوة مفيش حب"
كانت بتزعق باعلى صوتها... حس مازن ان عروقها بتتشد كانها هتنفجر... وصوتها بيقطع كأنها بتتخنق...خاف عليها
قرب منها... ضمها فى حضنه
"اهدى طيب... اهدى وهنتكلم"
خلصت نفسها منها بقوة ورفض
"بقولك ابعد عنى... انت فاكر انك ساعدتنى...انت خدعتنى يامازن انت خاين وغشاش"
"انا؟؟"
"ايوه... خنت ثقتى فيك وكذبت عليا غشتنى وفهمتنى انك بتحبنى"
"دى الحقيقة"
"كفاية كذب بقى... مش عايزة اسمع صوتك ولا اشوفك"
راحت على دولابها تلم هدومها
"بتعملى ايه"
"مش هقعد معاك فى بيت واحد... وخلاص كل اللى بيننا انتهى "
"متقوليش كده يا امل انا مقدرش ابعد عنك ولا عن عمر"
"تانى .. تااااااااانى هتكذب تانى...اسكت... اسكت"
كانت بتصرخ.... عمر صحى وبيعيط... وامل بتعيط بانهيار
"طيب اهدى علشان خاطر عمر مش علشانى... انتى عايزة ايه"
"مش عايزاك"
"حاضر... همشى من البيت بس خايف اسيبك وانتى فى الحالة دى"
"انا فى الحالة دى علشان انت موجود"
"لو مشيت هتبقى اهدا"
"ايوه"
"حاضر... انا هروح بيت بابا وماما لحد ما تهدى"
"لحد ما تطلقنى"
"متقوليش كده ياامل... انا مش ممكن اطلقك ابدا"
"وانا مش هعيش مع واحد غشاش زيك...هتمشى ولا امشى انا"
"لا خليكى فى بيتك وانا اللى همشى"
راح على عمر وباسه قبل ماينزل... وهو خارج من الاوضة
"استنى"
قالتها امل وهى لسه متنرفزة
رجع مازن بعد ما حس انها بتتراجع
"خد هدومك معاك... كلامى مش وقت غضب وخلاص ده قرار نهائى"
"حاضر ياامل... خلى بالك من نفسك ومن عمر"
لم مازن جزء من هدومه فى شنطة... ونزل
اخدت امل عمر فى حضنها وهى بتعيط بعد نزول مازن

الحلقة 34 والاخيرة
قضى مازن اغلب الليلة فيه اللف بالعربية فى الشوارع والكافيهات
كل مايقعد فى مكان...يزهق ويقوم يقعد فى مكان تانى
هيتصرف ازاى... مفيش غير انه يستنى امل لما تهدا ويفهمها

امل طول الليل اخدة عمر فى حضنها وبتعيط... معقول الفترة اللى فاتت دى كلها مخدوعة فى مازن...اوهمها انه بيحبها وهو اتجوزها شفقة... طيب استمر معاها ليه... اكيد الحمل ووجود عمر هو اللى ربطه بيها انما مش علشان بيحبها
تانى يوم مكنش فيه غير انها تفضل قاعدة فى البيت من ناحية علشان عمر ومن ناحية تانية علشان متقابلش مازن
بس هتفضل متروحش المجلة لحد امتى؟؟ وازاى هتقابل مازن تانى

ايناس لما راحت بيت باباها ومامتها
مكنش حد منهم موجود ..دخلت على اوضتها
معرفتش نام لانها افتكرت المكالمة اللى بينها وبين ايهاب
صوت ايهاب وهو بيقولها انه بيحبها وميستحملش بعدها عنه... احساسها بيه كان واجع قلبها... بس كانت تعبت من عدم الاستقرار
سمعت صوت الباب بيتفتح... راحت ناحية الباب
"ماما ... انا هنا"
واتنفضت الام من الخضة
"بسم الله الرحمن الرحيم... خضتينى ياايناس"
"انا بقولك انا هنا علشان متتخضيش"
"ايه اللى جابك دلوقتى الساعة 1ونص بالليل"
"انا هنا من 11"
"حصل حاجة بينك وبين جوزك... انتى غضبانة"
لفت ايناس وشها بعيد عن مامتها
"مش غضبانة ولا حاجة... حسيت انى محتاجة ابقى هنا شوية ممكن؟؟"
راحت مامتها وقفت قصادها...حست بدموع محبوسة فى عينيها
"طيب تعالى نقعد نحكى مع بعض شوية وتحكى لى مالك"
دخلوا قعدوا مع بعض فى اوضة ايناس
"مش عارفة اقولك ايه ياايناس... كل ده كان متوقع "
"عارفة ياماما لو كان ايهاب وحش معايا كنت اقدر احسم قرارى واقول ان جوازنا فشل انما بالعكس كل يوم بيعدى ايهاب بيحبنى اكتر وبيخاف على زعلى بس مش فى ايده حاجة"
"لو عايزة فلوس انا ممكن اساعدك من غير ماحد يعرف"
"هو رافض الموضوع ده نهائى ... ساعات لما بشترى لبس ولا حاجة جديدة احس انه زعل ان مش هو اللى جابهولى وانا مش زعلانة منه انه مش معاه فلوس بس الوضع ده مش مريحنى"
"ونويتى على ايه"
"انا جيت اقعد هنا علشان افكر... ومش عارفة هترسى على ايه"
"ده بيتك وتقعدى زى ماانتى عايزة... ربنا يحلها ان شاءالله...تصبحى على خير"
"وانتى من اهله ياماما"

تانى يوم الصبح راحت ايناس المجلة... كان ايهاب هناك من قبلها
ومكنش فيه غير ولاء
دخل ايهاب وراها المكتب
"وحشتينى ياايناس"
"وانت كمان ياايهاب"
"بجد وحشتك... طيب سيبتينى ليه"
"انا مسيبتكش ومش هسيبك.... انا اعصابى تعبت اوى بقيت بكره اروح البيت لانى مش مرتاحة ...اى حد بيبقى عايز يرجع بيته بعد الشغل علشان يرتاح انا لأ... حاسس بيا"
"حاسس بيكى وحاسس انى ظلمتك معايا... وانا مش انانى فى حبى ليكى... اى قرار هتاخديه انا موافق عليه حتى لو قرارك كان اننا نبعد عن بعض"
سابها ايهاب وخرج ملحقتش تقوم وراه لان ولاء دخلت
"الساعة 11 فيه معاد مع مُعلن جديد ... مين هيقابله"
"مفيش حد النهاردة غيرى وانا مليش فى موضوع الاعلانات ده مازن وايمن هما اللى بيتصرفوا... بصى شوية كده وهتصل بمازن واشوف ينفع ييجى يقابله ولا لا.. وان مقدرش نأجل المعاد"
"بلاش حكاية نأجل دى مش حلوة"
"طيب ساعة كده واكلم مازن "
شافوا مازن داخل عليهم عند ايناس... وقعد قدام مكتبها بعد ما القى التحية
ولاء"طيب كويس مش هنحتاج نأجل المعاد"
خرجت ولاء من المكتب
"ايه اللى جابك يامازن.. امل بقت كويسة؟؟"
"معرفش... انا مبتش فى البيت امبارح"
"اخص عليك يامازن اتخانقت معاها وسيبتها وهى تعبانة"
بسرعة مسح دمعة كانت هتنزل من عينيه قدام ايناس
"امل سمعت جزء من كلامى مع ايمن وفسرته انى مش بحبها وانى اتجوزتها بس علشان صعبت عليا"
"مفهمتهاش ليه"
اتكلم مازن بعصبية
"حاولت ... مدتنيش اى فرصة كانت بتزعق وتصرخ... كانت مصدومة اوى وانا خفت عليها... خفت اضغط عليها .. انا كنت خايف اوى عليها ياايناس وسمعت كلامها ومشيت من البيت علشان حسيت ان وجودى هو اللى مضايقها.... بس اللى مش هقدر عليه انى اطلقها زى ماقالت"
"هى وصلت للدرجة دى"
"انا طول الليل بلف فى الشوارع... تعرفى انى فكرت ارجع البيت ع الفجر كده بس رجعت قلت زمانها نامت وهديت ولو روحت ممكن تصحى تانى وتفتكر وتزعل... كلميها طمنينى عليها"
"هكلمها طبعا"
واتصلت ايناس بأمل...
"امل اخبارك ايه النهاردة... انتى كويسة...اهدى طيب ومتعيطيش... انا جاية لك ..يالا مش هتأخر...سلام"
"بتعيط؟؟"
"اه يامازن صوتها مخنوق اوى... وردت بسرعة يعنى شكلها كانت صاحية... انا هقوم اروح لها وانت قابل العميل الجديد"
"طيب... هنزل معاكى اجيب حاجات للبيت ولبن لعمر توديهم وانتى رايحة علشان متحتاجش حاجة وهى لوحدها... فهميها ياايناس انى بحبها اوى ومقدرش ابعد عنها هى وعمر"
"حاضر يامازن... هتكلم معاها وافهمها"

شروق وايمن وهما بيلبسوا الصبح... شروق بطيئة فى تحضير حاجتها
"يالا ياشروق بقى انتى لسه بتحضرى الشنط دلوقتى"
"اقولك حاجة ومتزعلش "
"قولى ياحبيبتى"
"مش عايزة اسافر"
"ليه"
"مش عارفة... عايزة افضل هنا وعايزة اروح للدكتور النهاردة"
"ماشى مش مهم سفر بس عايزة تروحى للدكتور ليه"
"عايزة اروح لدكتور تانى واحدة صاحبتى بتروح عنده"
"يا حبيبتى ما الدكتور بتاعك كويس وماشية معاه على العلاج هنروح ليه لحد تانى نبدأ من اول وجديد"
عيطت شروق كعادتها كل ماتيجى سيرة العلاج والدكاترة والحمل
"بتعيطى ليه... حاضر هتروحى للدكتور اللى انتى عايزاه.. اضحكى بقى"
كان بيقولها وهو بيمسح دموعها حضنته وهى بتبتسم له
"انا عارفة انى بضايقك كتير... من حبى فيك نفسى يبقى عندنا اطفال"
"ان شاءالله هيبقى عندنا اطفال... نقول يارب"
"ياااااااااارب"

وصلت ايناس البيت عند امل
اول مافتحت لها قعدت تعيط وهى بتحكى انها اتغرت كتير فى مازن اللى خدعها وهو مش بيحبها وده باين من تصرفاته سمعتها ايناس تخلص كل كلامها
"ماشى ياامل انا حاسة باحساسك ...بس احساسك مش صح مازن بيحبك بجد... انتى مشفتيش شكله عامل ازاى وهو بيحكى لى... مازن ميقدرش يستغنى عنك انتى وعمر حرام القسوة اللى انتى فيها دى... ليه مسمعتيهوش يمكن هو غلط لما محكلكيش عن سبب الخطوبة المفاجئة السريعة دى بس ده ميمنعش انه حبك فعلا بعد كده ياما ناس بتتخطب وتتجوز تقليدى بس بيحبوا بعض بعد كده"
"بس معاملته معايا انا بس اللى احسها حاجات تتحس ياايناس يعنى مقدرش اقوله قولى بحبك... هو من نفسه مش بيقولها ... حاساه بعيد عنى"
"بصى ياامل لحد هنا ومش هقدر ادخل جوه احساسك"
"اوعى تكونى فاكرة انى مبسوطة وهو بعيد عنى... انا منمتش طول الليل وهو مش موجود... بس بتصعب عليا نفسى"
"وهو حالته صعبة اوى... اتكلموا مع بعض ياامل.... اسمعوا بعض يمكن توصلوا لحل"
"مش عايزة اتكلم معاه ولا اشوفه"
"لازم هتشوفيه ده ابو ابنك وانتى عارفة عمر متعلق بمازن ازاى وكمان هتشوفيه فى المجلة مع بعض"
"زعلانة منه اوى ... ومش مصدقة انه بيحبنى فعلا ممكن يكون عايش معايا علشان عمر ولا علشان زوجة وخلاص يعنى انا او غير مش فارقة"
"مكنتيش عِندية كده ياامل"
"مش هو اللى علمنى اختار واقرر... انا دلوقتى بقرر اننا لازم ننفصل"

فى المجلة... اتفاجئ مازن بايمن وشروق
"ايه ده مسافرتوش"
"لا ... اجلناه شوية... امل اخبارها ايه"
وحكى لهم مازن على اللى حصل بعد ما مشيوا
ايمن"هو ده اللى كنت قلقان منه وعارف انه هيحصل"
شروق"وبعدين يعنى هتسيبها كده"
مازن"ايناس راحت تتكلم معاها... وكويس انك جيت تحضر معايا المقابلة اللى مع المعلن الجديد"
ايمن"هو معاده امتى"
بص مازن فى ساعته "على وصول"
شروق"انا نازلة هروح لامل ... وعلى فكرة ايناس كمان سايبة بيتها يعنى هما الاتنين محتاجين اللى يواسيهم"
مازن"مقالتليش حاجة"
شروق"تلاقيها اتلبخت بمشكلتك"
ايمن"بس سايبة البيت ليه"
شروق"نفس الحكاية... مش مرتاحة وعايزة شقة وايهاب مش قادر يجيب شقة"

لما شروق راحت لامل.. قضوا ال3 اليوم كله مع بعض
كل واحدة فيهم كانت بتحاول تنسى مشكلتها بالتخفيف عن التانيين
واتصلت شروق واخدت معاد عند الدكتور الجديد تانى يوم
وده زود الامل عندها شوية
واتصل بيهم ايمن... وكلم شروق وبعد ماقفلت معاه
"ايمن قالى اخبار حلوة"
واستنوا ايناس وامل انها تكمل
"المعلن الجديد بيعلن عن مشروع سكنى كبير... وعامل تسهيلات فى السداد بمقدم معقول واقساط ثانوية... ايمن اتفق معاه وحجز لنا شقة وقال لايهاب كمان ... والاتنين اتفقوا معاه على تفاصيل يعنى مبروك لينا انا وانتى ياايناس هنبقى جيران"
ايناس"بجد؟؟؟ ايهاب هيحجز شقة... طيب منين؟؟
وقامت ايناس دخلت البلكونة واتصلت بايهاب
"ايهاب..شروق قالتلى انك هتحجز شقة صحيح"
"اه صحيح... بس مفيش استلام قبل 3شهور فى المشروع اللى قرب يخلص والتانى كنا هنستنى سنة"
"حلو اوى مش مشكلة3 شهور...بس هتجيب فلوس منين"
"الشقة دى هتدفعى انتى مقدمها وهكتبها باسمك وانا هشتغل شغل تانى بعد الضهر وابقى ادفع الاقساط"
"ياحبيبى مفيش فرق بينى وبينك ...انا كنت بقولك كده من زمان"
"مكنتش عايز احس انى قليل اوى كده ياايناس ...بس لما حسيت اننا ممكن نبعد عن بعض بسبب الشقة اضطريت اوافق "
"مش هنبعد عن بعض ابدا ان شاءالله"
"مش هترجعى بقى علشان وحشتينى"
"لا معلش خلينا ال3شهور دول كل واحد فى بيت اهله وهنتقابل كل يوم فى المجلة "
"انتى مش عايزة ترجعى البيت زعلانة منى"
"لا مش زعلانة بالعكس انا مبسوطة اوى ان مشكلتنا اتحلت وياسيدى خلينا نسترجع ايام الخطوبة شوية"
"حاضر ياحبيبتى اللى تشوفيه"
بعد ماقفلت ايناس... حبت تطمن مازن..اتصلت بيه
"الو...ازيك يامازن... مصممة على موقفها... احنا بنقولها لازم تتكلموا مع بعض... هقولها تانى لو وافقت هكلمك... بقت اهدا من الصبح... عمر كويس طول اليوم هو وشروق بيلعبوا مع بعض ...متقلقش هما كويسين.. يالا سلام..حاضر مش هنسى"
دخلت ايناس لشروق وامل
ايناس وشروق حاولوا يقنعوا امل انها تقابل مازن
وواقفت بعد ضغط منهم انها تقابله تانى يوم

تانى يوم... اتقابلت امل مع مازن... وكان معاها عمر
عمر اتعلق فى مازن طول ماهما قاعدين وهو قاعد فى حضنه
"ازيك ياامل... وحشتينى"
"انا كويسة"
"انا هدخل فى الكلام على طول انا اسف انى خبيت عليكى"
"مش عايزة اتكلم فى اللى فات انا اتجرحت منك اوى يامازن وده كفاية... عارف احساس الخيانة هو ده اللى انا حاساه"
"انتى ليه مكبرة الموضوع اوى كده... ارتبطنا صدفة ماشى انما حبينا بعض ياامل وده المهم"
"انت محبتنيش... انت لقيت زوجة كويسة وخلاص يعنى انا او غيرى مش فارقة"
"ليه بتقولى كده"
"حاجات صغيرة انت مكنتش بتاخد بالك منها بس كانت بتجرحنى لما تنزل وتسيبنى واحنا لسه متجوزين ولما كل شوية تقول الشغل الشغل لما مسمعش منك كلمة حلوة يبقى اتجرح ولا لا... شوف ايمن بيعمل ايه مع شروق.. لما كنت بشوف معاملته ليها ومعاملتك ليا كنت بتضايق اوى"
"ياامل كل واحد وليه طريقته.. انا اتعودت ان الحب مش كلام الحب انك تسعد اللى بتحبه باللى يفرحه... انا عشت سنين كتير لوحدى عارف ان ماما وبابا بيحبونى بس مش بيقولولى كده هما بيعملوا اللى يريحنى ويسعدنى اتعودت ان الحب كده... قوليلى على حاجة كان نفسك فيها مجبتهاش... فاكرة مسابقة الصور انتى كنتى تعرفى عنها حاجة..انا اشتركت لك فيها علشان افرحك.. وقفت قدام اخوكى من اول لحظة بقيتى فيها على ذمتى علشان افرحك.. يبقى كده مبحبكيش"
"انت حرمتنى من احاسيس حلوة اى ست بتتمناها"
"فهمينى افهم منين احساس الست وانا لا عندى اخت ولا ام تفهمنى ولا حبيت قبل كده... عايزانى اعرف اللى جواكى ازاى من غير ماتقوليهولى"
"ده احساس مينفعش اطلبه"
"انا اسف ياامل على كل حاجة ضايقتك فيها... وعندى امل انك تسامحينى ومش هكدب عليمى واقولك هتغير لان محدش بيعرف يغير طبعه بس خليكى متأكدة انى بحبك واليومين اللى فاتوا دول كانوا اسوأ ايام حياتى علشان بعيد عنكم... اللى يريحك هعمله بس ارجوكى متقوليش طلاق... ده الطلب الوحيد اللى مش هقدر انفذه"
سكتت امل... دموعها نازلة ومش بتتكلم
"مسامحانى واللى فات مات ولا لسه مش عايزانى"
دورت امل وشها بعيد عنه وهى بتعيط
"خلاص ياامل فهمت... يمكن الايام تداوى الجرح ده... يمكن انا فشلت كحبيب بس فيه حب اقوى بيربطنا .. حب ربطنا من قبل مانفكر فى جواز... ربطتنا الصداقة والطموح والحلم... وده اقوى حب ... انا هعيش فى بيت بابا وماما وكل طلباتك وطلبات عمر هجيبهالك... وياريت علاقتنا فى الشغل متتأثرش بخلافاتنا... وممكن ابقى اشوف عمر كل يوم لو سمحتى لانى مش هقدر مشوفوش كتير"
هزت امل راسها موافقة على كلام مازن وهى بتعيط
"انا ماشية"
"هوصلكم"

ايمن وشروق عند الدكتور..وبعد الكشف عليها
ومراجعة التحاليل والاشعات السابقة والادوية اللى بتاخدها
"معلش كل اللى فات ده حاجة واحنا هنبدا مع بعض من جديد... انا عايز تحاليل جديدة علشان اعرف الحالة وصلت لحد فين"
شروق"يعنى ممكن اخلف"
الدكتور"انتى معندكيش حاجة تمنع الحمل وبعد التحاليل هقدر اقولك انتى حالتك ايه بالظبط... بس عموما الاطفال دول رزق من عند ربنا ومحدش يعرف رزقه جاى امتى ولا هيكون قد ايه"
ايمن"كله على الله ان شاءالله... هنعمل التحاليل ونجيبها لحضرتك ان شاءالله"
قاموا ايمن وشروق من عند الدكتور... والامل فى عيون كل واحد فيهم

تانى يوم فى المجلة...
ايهاب وايناس هما الاسعد حالا رغم ان كل واحد فيهم فى بيت بس مستنيين يستلموا شقتهم وبيحلموا باليوم اللى هيقيموا فيها مع بعض

ايمن وشروق مش موجودين لان شروق بتعمل التحاليل المطلوبة

امل ومازن العلاقة بينهم شغل وبس فى الظاهر
وكل واحد فيهم مش قادر يمنع قلبه من حب التانى

راح مازن لامل
"مامتك راجعة بكرة ان شاءالله ممكن اجى معاكى المطار نجيبها"
"اه طبعا...انت عارف ماما بتعتبرك ابنها"
"عمر فين"
"عند الفت... متقلقش عليه"
"ماشى هاتيه معاكى بكرة علشان اشوفه واحنا فى المطار.. هتقولى لمامتك ايه لما تسأل كل واحد فينا فى بيت ليه"
"هقولها الحقيقة"
"اللى تشوفيه... انا نازل عندى شغل ..اشوفك بكرة"

فى المطار... مازن شايل عمر طول الوقت
وعمر بيضحك وفرحان مع مازن
لما وصلت الام... وصلهم مازن البيت
وطلع معاهم علشان يطلع الشنط
وبعد ماقعد معاهم شوية... قام يستأذن
الام اعتقدت انه نازل كعادته عادى وهيرجع بالليل
دخلت الحمام وبعدين خرجت على اوضتها
عمر بص لمازن وهو عند البابا... ونطق لاول مرة
"بابا"
الكلمة وقفت مازن من عند الباب... ورجع لعمر يحضنه ويقوله يقولها تانى
"قول بابا تانى ياعمر... عايز اسمعها تانى"
امل فرحت بعمر اللى نطق كلمة بابا لاول مرة
واول كلمة ينطقها... حست انها فعلا قاسية اوى مع مازن
وانها هتحرمه كمان من ابنه ومنها وكفاية انه محروم من مامته وباباه
"انت هتنزل؟؟"
"متضايقة من وجودى للدرجة دى"
"لا.. انا يعنى بقولك لو مش وراك حاجة مهمة ادخل غير هدومك لحد ما اخلص العشا"
حس مازن انه متلخبط ياترى هى تقصد اللى فهمه فعلا
"حتى لو ورايا حاجة مهمة مش اهم منكم... لسه زعلانة منى"
سألها وهو بيبص لها فى عينيها بكل حب
ابتسمت له ابتسامة خجولة
"اللى بيحب حد مبيعرفش يزعل منه"
عمر قال بابا... تانى وتالت ورابع
مازن"هو عمر علَق ولا ايه؟؟"
ضحكت امل وحضنت عمر.. لف مازن دراعه على كتفها وباسها من راسها وهو بيحضن عمر اللى كان بينهم هما الاتنين

ايمن وشروق عند الدكتور الدكتور بيبص فى التحاليل وبيقراها
شروق وايمن بيبصوا له بترقب واللحظة بتعدى كانها ساعة
حط الدكتور الورق قدامه وبدأ يتكلم
وشروق مع كل لفتة من الدكتور روحها بتتسحب
"واضح ان العلاج اللى كنتى بتاخديه كان ممتاز"
بصوا لبعض وهما فرحانين
شروق"يعنى ممكن احمل"
الدكتور"حاليا... انتى حامل فعلا"
انفجرت دموع الفرح من عيون شروق وكأنها شلالات
وايمن حس ان الدنيا كلها فرحانة بفرحة شروق

النهاااااااااااااااااااااااااااااااااااااااية

» حكاية كان حلم
» حكاية لسه بحب
» حكاية جريمة قتل
» حكاية تحت سقف واحد
» حكاية عمارة 8