أربع سنين محذوفه من حياتي

أربع سنين محذوفه من حياتي
راح اكتب قصه حياتي راح تكون واقعيه بحت راح اكتب عن وحدتي وعالمي و افكاري الداخليه اللي ما اقدر ابوح بها ..
زمآن وانا بعمر الـ 14 دخلت عالم النت وبديت اقرأ الروايات تأثرت فيها لدرجه حاولت اغير طريقتي واسلوبي مثل بطله او بطل عاجبني بالروايه ..
بعدين كبر حبي للروايات والقصص يمكن قريت 100 روايه واكثر واغلبها اعيدها يمكن 4 مرات وبنفس الحماس , حاولت اكتب روايه لكن في كل مره افشل لان للأسف ما عندي تشويق ولا اعرف اسرد افكاري , مع ان في حصت اللغه العربيه لما نكتب قصص كانت دايم قصتي هي اللي تنجح والاستاذه تمدحها لكن للاسف فشلت في الروايات وطريقه السرد .
الحين عمري 17 سنه تقريباً بدأ يتقلص حب الروايات لكن غالباً اقرأ لان كل روايه لها مكان في قلبي لانها تذكرني بحماسي القديم , طبعاً انا كأي انسان اسوي سيناريو في عقلي بيني وبين شخص احبه لكن لما احاول اكتب يكون عكس اللي في بالي ..
عشت الاربع سنوات الاخيره كأني داخل بالون احس ان اعيش بمنطقه محدوده اشياء داخلي احلم فيها بس محرومه منها انعزلت داخل بالونتي الضيقه نسيت ان حولي ناس يحبوني ألتفت للناس اللي نسوآ وجودي , طبعاً حبيت .. حبيت من اعماق اعماق اعماقي انغمست داخل هالحب لين انكسرت فيه وراح ابقى فاقده الجزء اللي انكسر طول حياتي , افكر كيف بحب بنفس هذاك الحب احس كانه علبه عطر تنقص وتنقص وما اقدر اعبيها من جديد يعني ماراح احب بشغف وهيجان الحين اكمل حياتي بجمره بارده داخل روحي انطويت داخل همي لكن انا سعيده ماني تعيسه ابداً صح ان خوفي من الفقد يكبر يوم بعد يوم بدون توقف !
صار في بالي على طول ان احد بيروح وبيتركني وحيده بنص الطريق احس الدنيا بتنقلب وبصير تعيسه اي لحظه تمر افكر في الحب المكسور الناقص ..
افكر كيف عشت "الاربع" سنين بوهم وخيال كاني اطيير وانكسر جناحي وطحت بقوه ومعاد اقدر اطير من جديد احس بغبائي و العمى اللي سيطر على قلبي وعيني صدق اللي قال "عين الحب عمياء" .. يمكن لاني احسب اذا ابدى اهتمامه لي يعني يحبني يمكن الوحده اجبرتني على كذا عشت بدون اخت طوآل عمري تمنيت اخت احياناً افكر اقول ليت اختي اللي اكبر مني ما ماتت وهي صغيره لو كانت عايشه كيف بتكون حياتي بس يا ليت طبعاً هاذي النقطه الحساسه بالنسبه لي ..
كل يوم اعيشه له معنى بالنسبه لي اذا شفت نور الشمس ونور القمر احمد ربي على نعمه الحياه انا انتظر اليوم اللي بكره فيه الحياه لكن ما اتوقع لاني انا كل ما انجرح اصير قويه مع كل دمعه اصير شجاعه احاول افقد ذاكرتي و انظف مخي كلياً من الماضي افكر باليوم وبس لان باقي تجارب ما جربتها باقي آلام ما عشتها باقي حب انتظره انا اعيش عشان هذا اعيش عشان احمد ربي على نعمه الحب اللي تخلي القلب يدق كل يوم ويحب الحياه حتى لو كان مكسور احمد ربي على وجود امي وابوي واخواني حولي حتى لو اني احس بنقص وفراغ كبير ..
صرت بدل لا ابكي ابتسم حتى لو كنت اتقطع لان فيه فهاذي الدنيا شي اسمه "صبر" نعمه كبيره بس احسها عضو من اعضاء جسمي جنب قلبي يدق مثله بس ما يتوقف ولا يموت الصبر هو اللي بيعيش معي طوال عمري ..
اتمنى حياتي الجايه اعيشها بالحب والصبر والشكر واني استعمل عقلي قبل قلبي قبل عواطفي ..