موقع فرحة مصر
عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك

شكرا

موقع فرحة مصر

موقع شامل
 
الرئيسيةالرئيسية  البوابةالبوابة  التسجيلالتسجيل  دخولدخول  

 

 حكاية هل يشفع الحب؟

اذهب الى الأسفل 
انتقل الى الصفحة : الصفحة السابقة  1, 2
كاتب الموضوعرسالة
مونيكا سامى
عضو مميز
عضو مميز
مونيكا سامى

عدد المساهمات : 546
تاريخ التسجيل : 05/11/2015
العمر : 24
الدولة : مصر

حكاية هل يشفع الحب؟ - صفحة 2 Empty
مُساهمةموضوع: رد: حكاية هل يشفع الحب؟   حكاية هل يشفع الحب؟ - صفحة 2 I_icon_minitimeالخميس يناير 14, 2016 10:46 am

الحلقة 26
"انا اتسرعت وغلطت ياماما ولازم الغلط يتصلح"
"يتصلح ازاى يعنى؟"
"اطلقها...الحمدلله انى مخلفتش منها... كفاية اوى كده انا محبيتش ولا هحب غير عالية...منكرش انى نفسى ف طفل...هموت وابقى اب بس ربنا مبيتعاندش... انا تعبت اوى ال3 شهور اللى فاتوا وعايز ارتاح"
نرجس بفزع
"طلاق؟؟ طلاق ليه بس... اعوذبالله متخليش الشيطان يخرب لك بيتك"
"بيت ايه؟؟بيتى انا خربته فعلا لما اتجوزت على عالية وطلعتها م البيت...ماما..انا مش مرتاح وتعبان مع مها جدا واللى غلط لازم يصلح غلطه"
"وهى عارفة الكلام ده؟؟؟ طلبته يعنى؟"
"لا طبعا"
"وهتطلقها ازاى"
"هو مش انا الراجل واقدر اطلقها"
"اه ...بس عارف انت هتدفع قد ايه لو طلقتها"
"ايه؟"
"لانها مطلبتش يبقى كل حقوقها هتاخدها... مؤخر ومتعة وعفش... معاك تدفع؟"
سكت طه يفكر...لانه مفكرش ف الفلوس
"هااا...معاك تدفع...ولا زى كل مرة انا اللى المفروض ادفع كل حاجة"
"انا مطلبتش منك حاجة ياماما... انتى اللى اختارتى مها وانتى اللى اتفقتى معاها على كل حاجة... غلطتى انى سكت على كل ده... منكرش انى كنت مطنش علشان نفسى اخلف بس انا كنت فاكرها هتبقى كويسة...والله لو كانت كويسة مكنتش فكرت اطلقها وقلت ده نصيب وحصل وخلاص حتى لو طلعت زى عالية ومخلفتش...انما انا لا حبيتها ولا هى كويسة معايا ولا بتحترم ظروف عالية ولا حبى ليها"
"يا طه انت بتتكلم ف ايه... انت عايز واحدة تحب ضرتها"
"مقلتش تحبها...وحتى لو بتكرهها متفضلش تتكلم عنها وحش قدامى احتراما ليا على الاقل...ما عالية اهى ياماما ...سمعتيها مرة بتشتم ف مها ولا بتتكلم عنها باسلوب وحش؟؟ واكيد مش بتحبها"
سكتت نرجس... وسكت طه
"وبعدين...انا اتهريت مصاريف عليك يا طه وعلى جوازاتك"
"عارف وكفاية اوى كده...هحاول اتصرف"
"متزعلش منى علشان الفلوس...وبعدين انا مش معاك ف حكاية الطلاق دى...اصبر شوية يمكن تخلف"
"انا مش عايز استنى علشان مش عايز منها عيال... مش عايز حاجة تربطنى بيها اكتر من كده"
"للدرجة دى؟؟"
"ايوه...انا بعاملها بالمقولة ... ان احبها اكرمها وان لم يحبها لم يظلمها...مش هظلمها ولا اظلم نفسى واظلم عالية وافضل معاها"
"والخلفة...ان مكنتش ارتحت مع مها نشوف واحدة تانية"
رد بحزم"ماماااا...لا تانية ولا تالتة كفاية اللى انا فيه...هستفيد بإيه لو خلفت عيل ومُت وملحقتش اربيه"
"كفى الله الشر انت بتقول ايه"
"ماهو حرق الدم اللى انا فيها من مها ممكن اوى تموتنى"
"خلاص ياطه...انت حر واعمل اللى انت عايزه"
"ممكن نرمين متعرفش حاجة من اللى قلناها دى علشان لسانها طويل وهتروح تقول لمها"
"طيب ولو انى الحركة دى ممكن تقطع علاقتهم ببعض"
"خايفة على صحوبيتهم ومش مهم عيشتى معاها"
"لا خلاص ...راحتك تهمنى"
                        ********************

عالية وطه بيتغدوا... ونرمين معاهم
نرمين...خلصت وقامت
طه وهو قايم"تسلم ايدك يا عالية... مبحسش بطعم الاكل غير من ايدك"
عالية"الف هنا وشفا...اعملك شاى دلوقتى ولا لما تقوم م النوم"
طه بصوت واطى
"متعمليش حاجة عايز اتكلم معاكى"
"حاضر هلم الغدا لحد ماتغسل ايدك واحصلك"
                  **********************

عالية داخلة الاوضة...وطه قاعد على السرير
عالية بتقفل باب الاوضة وهى داخلة
"خير ياطه...صوتك قلقنى"
قعدت جنبه... مسك ايدها وباسها
"سامحينى على كل اللى حصل الفترة اللى فاتت...كل حاجة هتتصلح قريب ان شاءالله"
طبطبت عليه
"اسامحك على ايه...انا مزعلتش منك علشان اسامحك...انا مقدرة ظروفك...كفاية انك مفرطتش فيا"
"افرط فيكى...ياعالية انتى مش عارفة قيمتك عندى ايه...انتى روحى وحياتى لما ببعد عنك مبحسش بالحياة"
"ياحبيبى ربنا يخليك ليا"
"انا خلاص..هصلح كل اللى حصل واطلق مها"
اتفاجئت عالية... فرحت لحظة وفكرت لحظات
"مالك ياعالية...مش ده رد الفعل المتوقع منك"
"تطلقها ليه؟"
"علشان مش مرتاح معاها"
"هى طلبت الطلاق؟"
"لا ومتعرفش حاجة"
"عايز تغدر بيها يا طه....حرام"
"انتى هتجنينى...انا عايز اطلقها علشان ابقى معاكى لوحدك...انتى مش عايزانى معاكى؟"
"ازاى ...عايزاك طبعا...بس انا لما فكرت انى ممكن كنت ابقى اللى مكانها ...حسيت انها غدر"
"ربنا حلل الطلاق"
"لما يكون فيه سبب"
"اخر حاجة كنت اتوقعها انك انتى اللى تدافعى عن مها...مها اللى انا متأكد انك مبتحبيهاش وهى كمان مبتحبكيش...واى موقف بيجمعكم ببتعمد تضايقك...يبقى ازاى كلامك ده"
"انا مبدافعش عن مها...انا مش عايزاك تظلمها...بس"
"خايفة انها تتظلم ....ومش خايفة اننا احنا ال3 نبقى مظلومين"
سكتت عالية...فرحانة بكلام طه وف نفس الوقت بتحط نفسها مكان مها...تتضايق
"خلاص ياعالية انا فكرت وقررت واتكلمت مع ماما كمان"
"مامتك عرفت؟؟"
"ايوه"
"وقالت ايه"
"عادى...قالت استنى شوية ولما قلتلها انى خلاص مش ظايقها سكتت...بس اللى قابلتنى دلوقتى مشكلة تانية"
"خير"
"طلاق مها هيكلفنى كتير وزى ما انتى عارفة مفيش فلوس وماما شالت ايدها"
"والعمل؟"
"بفكر ابيع العربية"
"ازاى...انت بتسافر بيها علشان تجيب بضاعة للمحل ...وكمان بتنفعك ف مشاويرك...هتقدر تستغنى عنها ازاى"
"مش عارف...ما انا كمان معنديش تصرف تانى"
"مش عارفة ياطه... ربنا يفرجها"
وفجأة خطرت على بال طه فكرة
"جت لى فكرة تانية"
"ايه"
"ابيع الشقة... ونجيب شقة تانية بس نطلع فرق...ادفع لمها مؤخرها ونرجع نبدأ العلاج من اول وجديد وان شاءالله ربنا يكرمنا"
عيطت عالية من الفرحة...حضنت طه
"يااااه...انا بحبك اوى ياطه...ربنا يخليك ليا"
"ويخليكى ليا ياحبيبتى"
                       **********************

طه فى المحل مع نرجس
يرن موبايله
"ايوه يامها...كويس... انتى كويسة؟؟ لما مش النهاردة...بكرة بالليل هاجى لك... اه عايزة ايه مش سايب لك مصروف البيت... بلاش حجج يامها الاسبوع اللى عند عالية مخلصش ومش هاجى البيت الا بكرة بالليل... ماشى روحى لمامتك لو عايزة تباتى عندها وترجعى بكرة براحتك...مع السلامة"
قفل مع مها... نرجس كانت سامعاه
"ماهى كويسة اهى يا طه... ماتشيل الفكرة دى من دماغك"
"هتتغرى بمكالمة تليفون... العيشة معاها صعبة اوى ولسانها طويل...بتتصل بتتحجج انها عايزة فلوس وانا قبل مااروح لعالية بسيب لها اللى يكفيها وزيادة"
"وهتعمل ايه ف الفلوس"
"كلمت سمسار يشوف مشترى للشقة وابقى اشوف شقة اقل شوية واخد الفرق"
"والعفش"
"على مهلى ابقى اجيب واحدة واحدة...ماهى برضه مش هتاخد العفش كله...اللى هيتبقى هبقى اكمله"
"وهتبيع الشقة ازاى وهى مش عارفة...اى مشترى هيبقى عايز يتفرج عليها"
"هقولها...لما اروح لها هقولها...كده كده ايامى عندها بتبقى عكننة فمفيش حاجة هتختلف لما تعرف"
"ربنا يستر"
                    **********************

طه وعالية ونرجس ونرمين قاعدين بيتعشوا
رن جرس الباب
قام طه يشوف مين...اول ما فتح الباب
"مهااا!!...ايه اللى جابك الساعة دى"
اول ما سمعوا اسم مها...نرمين قامت تجرى تسلم عليها
وعالية قلبها اتقبض...ونرجس فضلت مكانها

مها حضنت طه
"حبيبى عندى ليك مفاجئة"
نرمين وهى بتسلم عليها"ادخلى طيب"
دخلت وسألها طه
"الساعة 12 يامها...ايه اللى مخليكى ف الشارع لحد دلوقتى"
مها بعد ماسلمت على نرجس...وتجاهلت وجود عالية
"مش قلتلك رايحة مع ماما مشوار"
طه"ايوه كل ده مشوار؟"
مها"مش تعرف المفاجأة الاول"
سكتت لحظات محدش اتكلم ...وكملت بفرح
"انا حااااااامل"
لحظة صادمة للكل الا نرمين ... اجبرتهم على السكوت لتقبل واستيعاب الكلمة...لاظهار رد الفعل المناسب
نرمين بتباركلها بفرحة...نرجس قامت سلمت عليها وباركت لها وباركت لطه
طه اول ما سمع انها حامل...بدأ الامل يصحا ف خياله من اول وجديد...بقى يتخيل ابنه وهو بيشيله...وهو بيحضنه... وهو بيقوله يا بابا...وهو بيكبر وف المدرسة... وهو كبير وبيتخرج

صور متتالية جت ف خيال طه...اجبرته على الابتسام بفرحة
اول ما ابتسم بفرحة...انسحبت عالية بسرعة ودخلت اوضتها
مها بتبص عليها وهى داخلة اوضتها
"شايف...بدل ما تقولنا مبروك جريت ازاى...غلاوية اوى"
طه بيقول لمامته
"شايفة...شايفة الطريقة اللى بتتكلم بيها"
مها"وانا قلت حاجة غلط...انت مش شايف"
نرجس"خلاص بقى... هى كمان معذورة ...سيبيها"
نرمين"عايزين بقى بنت ولا ولد؟"
مها"نفسك ف ايه ياطه"
طه بأمل"اى حاجة...اللى يجيبه ربنا خير"
مها بتقرب منه وبتقف قصاده
"مش هتغير هدومك علشان نروح"
طه بيرجع لورا
"مش اتفقنا بكرة بالليل"
مها"افرض تعبت وانا لوحدى... يرضيك ابقى لوحدى وعلى فكرة الدكتور قالى مش كويس عليا حرق الدم وممكن يسقطنى...لو مش مصدقنى تعالى معايا وسأله"
نرجس"ربنا يكملك على خير... اوعى تزعلى نفسك ف اى حاجة ابدا ...وترتاحى يامها"
مها"حاضر"
ببتص لطه"هاا..يالا بقى..ده انا من امبارح نفسى ف بيتزا وشامة ريحتها"
نرجس"ده وحم... جيبلها ياطه اللى بتتوحم عليه اوعى متجيبلهاش"
مها"يالا بقى يا حبيبى...ابنك نفسه ف بيتزا"
                   **********************

عالية ف اوضتها بتعيط بصوت واطى
طه داخل الاوضة... شافها بتعيط
هرب الكلام من على لسانه
"طيب قوليلى اعمل ايه؟؟ انا كنت خلاص هطلقها... مش عارف اقولك ايه...حقك تزعلى زى ما انا زعلت ان ابنى مش منك انتى"
دمعت عيون طه وهو بياخدها ف حضنه
"مش هعرف افرح وانتى زعلانة...انا مبقاش ف ايدى حاجة يا عالية...مش هقدر اطلقها بعد ما الحلم قرب يتحقق... فكرة وجود طفل يبقى ابنى ...مجرد ما تخيلتها فرحت مابالك لما يبقى حقيقة"
بيتكلم وهو زعلان علشان عالية وفرحان بأمل الطفل
"انا مش زعلانة منك...انا كمان كان نفسى يبقى لى طفل منك بس هعمل ايه...غصب عنى معرفتش احقق لك الحلم ده"
"ياحبيبتى انا عارف انه غصب عنك...وبقى غصب عنى انها هتفضل معايا"
"وانا مطلبتش منك تطلقها"
"عارف...متعيطيش ياعالية علشان خاطرى"
مسحت دموعها
"حاضر"
قام وقف وهو مرتبك
"انا... اصل الدكتور قالها... هى جت علشان تقولى ان مش هتقدر تقعد لوحدها لتتعب"
هزت راسها
"طبعا...انا مجربة وعارفة...روح معاها يا طه"
قعد جنبها تانى
"انا مبرتاحش غير معاكى"
"هنعمل ايه بقى ف نصيبنا... قوم ومتشيلش همى...مبروك ياطه"
                    *****************

عالية قاعدة عند هدير...وماسكة ابن هدير
هدير بتقدم لها طبق كيك
عالية"كل سنة وهو طيب....عقبال 100 سنة"
هدير"وانتى طيبة ياعالية... احكى لى المنيلة ولدت ولا لسه"
عالية"لسه...بس قربت"
هدير"الهى تفطس وهى بتخلفهم"
عالية"يا شيخة حرام عليكى...ربنا يقومها لولادها بالسلامة"
"ايه دى البت دى راجل زى الفل واول ما اتجوزت حملت ف توأم... صحيح الحظ لما يآتى يخلى الاعمى ساعاتى"
عالية بتضحك"ضجكتينى ياهدير والله ومن زمان مضحكتش كده"
"ياختى اضحكى اضحكى...قوليلى وطه عامل ايه معاكى"
"كويس الحمدلله"
"مرجعش لنظامه القديم تانى"
"هه...رجع ايه بس...ده لو جالى وناوى يبات يوم التليفونات تشتغل واشى تعبانة اشى ودينى للدكتور اشى معرفش ايه"
"ومبتروحش عند امها ليه وتريحنا"
"متحججة بجوز امها وانها مش هترتاح الا ف بيتها"
"وطه يعنى مش شايف"
"شايف بس هيعمل ايه...بيكلمنى كل يوم وكل شوية بس طبعا مش قدامها...علشان متعملش مشاكل"
"وطبعا بعد ماتخلف الوضع مش هيتغير كتير هتتحجج بالعيال"
"اكيد"
"مش عارفة اقولك ايه"
"قوليلى ربنا يصبرنى.. وخصوصا الزفت طارق ده مش عارفة اعمل معاه ايه"
"عمل ايه تانى... مش فضل ميجيش شوية بعد ما شفتيهم"
"شوية ورجع ييجى تانى ف غيابهم ونرمين مقوياه طبعا... بعد ماكان مزودها اوى فحركاته ونظراته .. دلوقتى بقى كلامه كمان ومعرفش جاب رقمى ازاى واتصل بيا بيقولى عايز اقابلك بره من غير ماحد يعرف"
"وعملتى ايه"
"قفلت ف وشه طبعا وبعدها قفلت التليفون ساعة كده وبعدين فتحته"
"هو انتى ليكى ف كل خرابة عفريت"
"شفتى!!"
"بت ياعالية... طارق ده مش كان معاهم ف الكلية"
"اه"
"يعنى صاحب ريا وسكينة اوى...ليكونوا مسلطينه عليكى علشان يوقعوا بينك وبين طه ولا بعد الشر يخلوه يطلقك"
عالية باستغراب
"معقول؟؟؟"
"ليه لأ... نرمين علشان تبعدك عنها وتبقى براحتها والتانية طبعا علشان طه"
"يعنى اعمل ايه؟؟ واتصرف ازاى؟؟ خوفتينى"
الرجوع الى أعلى الصفحة اذهب الى الأسفل
مونيكا سامى
عضو مميز
عضو مميز
مونيكا سامى

عدد المساهمات : 546
تاريخ التسجيل : 05/11/2015
العمر : 24
الدولة : مصر

حكاية هل يشفع الحب؟ - صفحة 2 Empty
مُساهمةموضوع: رد: حكاية هل يشفع الحب؟   حكاية هل يشفع الحب؟ - صفحة 2 I_icon_minitimeالخميس يناير 14, 2016 10:47 am

الحلقة 27
"هو انتى ليكى ف كل خرابة عفريت"
"شفتى!!"
"بت ياعالية... طارق ده مش كان معاهم ف الكلية"
"اه"
"يعنى صاحب ريا وسكينة اوى...ليكونوا مسلطينه عليكى علشان يوقعوا بينك وبين طه ولا بعد الشر يخلوه يطلقك"
عالية باستغراب
"معقول؟؟؟"
"ليه لأ... نرمين علشان تبعدك عنها وتبقى براحتها والتانية طبعا علشان طه"
"يعنى اعمل ايه؟؟ واتصرف ازاى؟؟ خوفتينى"
"جوزك لازم يعرف"
"يعرف ايه... اقوله انه بييجى وانى شفتهم"
"لازم يعرف كل حاجة وان الزفت ده بيعاكسك"
"اخاف...انتى متخيلة ممكن يحصل ايه"
"يحصل اللى يحصل...تضمنى منين انها مش خطة عليكى"
"وهيعملوا عليا خطة ليه...انا مبعملش حاجة لحد"
"بس وجودك مضايقهم... كلهم عارفين طه بيحبك قد ايه... وانتى عارفة غيرة الضراير"
"بس انا مهما غيرت مش ممكن اضرها"
"مش قصدى عليكى...انتى حتى مبتبينيش غيرتك... هى غيرك يا عالية...خلى بالك"
سكتت عالية تفكر فى كلام هدير
"انا هستنى شوية...لو حصل جديد هبقى اقول لطه لما اشوفه"
                       *********************

مها قاعدة على السرير... بتكلم طه ف التليفون
"الو...انت جاى امتى ياطه"
"انا لسه ف المحل"
"انا تعبانة اوى"
"حاسة بإيه"
"ضهرى بيوجعنى"
"اتصلتى بالدكتور"
"لما تيجى انت كلمه"
"ماتكلميه لحد ما اجى"
"افرض قالى تعالى ولا طلعت بولد اعمل ايه...مش لازم تقعد ف المحل للاخر...انا تعبانة وانت سايبنى لوحدى...مش خايف يحصلى حاجة وانا لوحدى"
"خلاص يامها...شوية وجاى"
"متتأخرش ...جعانة ومش قادرة اقوم اعمل حاجة آكلها"
"طيب متتعبيش نفسك... اجيبلك حاجة وانا جاى"
"هفكر واكلمك تانى"
"ماشى...مع السلامة"
"مع السلامة"
قفلت مها معاه...ومسكت بطنها المنفوخة وهى بتكلم ولادها
"تعبتونى حرام عليكم"
                      *****************

فاتن جاية من المطبخ بصينية حاجة ساقعة
ايمن وميار قاعدين...ومامته وباباه وعبد الحميد
فاتن بتقدم لهم
"منورين ياجماعة والله... ومنور مصر كلها يا ايمن"
ايمن"ربنا يخليكى يا طنط"
ام ايمن"ده من يوم ماجه والفرحة مش سيعانى... ولا لما قال انه مش هيجدد تانى...طرت م الفرحة...والبركة فيكم لولا انه جاى علشان يتجوز كان زمانه بيجدد تانى"
فاتن"تغور الغربة...هو فيه زى بلدنا"
ام ايمن"اه والله معاكى حق"
ابو ايمن"عايزين نفرح بالعيال ياحاج"
عبد الحميد"ربنا يفرحنا بيهم..انا عن نفسى وقت ما تقولوا يالا ..احنا جاهزين...مش كده يافاتن؟"
فاتن"اه...ان شاءالله وقت ما تجهزوا هنكمل اللى ناقص"
ابو ايمن"احنا السنة اللى فاتت خلصنا الشقة وبقت جاهزة... بنقول نكتب الكتاب ونحجز للفرح ف اقرب وقت"
بصت فاتن لميار اللى شافت نظرات الفرح ف عينيها
فاتن"ايه رأيك يا عبده"
عبدالحميد"اللى تشوفيه...انا عايز افرح بيها النهاردة قبل بكرة"
فاتن"الف مبروك يا ولاد... شوف يا ايمن هتكتب الكتاب امتى وفين والفرح مش قبل شهر علشان نلحق نكمل حاجتنا ونفرش"
رد ايمن بسرعة"شهر ايه ...كتير"
ضحكوا كلهم بفرحة
ردت عليه فاتن"شوف بس حجز القاعات وربنا يسهل ان شاءالله"
                           *******************

طه ف الشغل الصبح...واقف بره المكتب ..بيتكلم ف التليفون
"صباح الخير يا حبيبتى...لسه نايمة"
"صباح النور...لا صحيت من شوية"
"وعاملة ايه؟"
"الحمدلله كويسة"
 "رجعتى امتى امبارح"
"على 10 كده"
"10 يا عالية...ليه اتأخرتى كده...انتى مش عارفة انى بقلق عليكى"
"معلش ياطه كنت قاعدة مع هدير والوقت اخدنا...متقلقش عليا...طمنى بس عليك انت عامل ايه"
"انا...كويس"
"لا صوتك مش كويس؟"
"مفيش حاجة ...كويس والايام شبه بعضها"
"فى ايه بجد؟"
" مفيش متشغليش بالك انتى بس... قوليلى هتتغدوا ايه النهاردة"

"محشى ...وعاملة تشكيلة "
"ماتعزمينى علشان اكلك وحشنى"
"ياريت يا طه...تعالى اتغدا معانا"
" كُلى انتى مكانى بقى"
"لا تعالى انت كل بنفسك"
"مش هينفع ياعالية معلش..والله نفسى اجى بس لو جيت هدخل ف متاهات دكتور وعيا وعلاج واقعد جنبى علشان تعبانة وانا ما بصدق انزل اصلا... دى كانت امنية وراحت لحالها...المهم انتى مش عايزة حاجة...ثوانى ياعالية معايا ويتنج"
"طيب ابقى كلمنى"
"حاضر...سلام"    
قفل معاها ورد على المكالمة
"الو ازيك يافاتن...فينك من زمان"
"ازيك يا طه عامل ايه"
"الحمدلله...انتى عاملة ايه"
"الحمدلله...بقولك ايه كتب كتاب ميار الجمعة الجاية والفرح كمان اسبوعين ان شاءالله"
"الف مبروك يا فاتن ربنا يتمم لها بخير...هتكبرك بسرعة"
"خليها تكبرنى بس افرح بيها...هستناكم يا طه...وهبعت كارت لابلة نرجس واكلم عالية"
"لا بلاش"
"بلاش ايه"
"متبعتيش حاجة لحد...انتى نسيتى عملوا ايه يوم الخطوبة"
"ما انا هعمل ايه ...علشانك والله"
"متقوليش انتى حاجة لحد وهاجى لك انا وعالية ان شاءالله"
"ان شاءالله...تنوروا وهستناكم"
                          *******************

عالية لابسة وخارجة من اوضتها
نرجس قاعدة"انتى نازلة؟"
"اه ياماما...رايحة لهدير"
"طه عارف؟"
"اه"
"طيب مع السلامة"
نزلت عالية...وهى ع السلم قابلت طارق طالع
"عالية!!"
ارتبكت... وخافت... تماسكت
"سلامو عليكو... مستنيينك فوق"
نزلت بسرعة من جنبه... نزل وراها بسرعة شدها من ايدها
وزقها ف الحيط ووقف قصادها وهو ساند ايديه الاتنين ع الحيط وهى ف النص ومقرب منها اوى
"انتى بتتهربى منى ليه"
من الخوف بدأت ترتعش وتعيط
"انت عايز منى ايه...انا عملت لك حاجة " 
"وانتى خايفة كده ليه"
سابها ورجع لورا اشفاقا على خوفها
كانت بتعيط
"متخافيش انا مش هعملك حاجة...بس رد فعلك غريب اوى"
"حرام عليك... انا عمر ما حد مسكنى كده الا جوزى...سيبنى ف حالى الله يخليك انا كل اللى بترجاه م الدنيا الستر"
"انتى غريبة اوى...جوزك سايبك وعايش حياته مع واحدة تانية وانتى مجرد ما قربت منك من غير ما المسك عملتى كده"
ردت وهى نازلة تجرى
"مش انا اللى غريبة...اللى بيستحل الحرام هو اللى غريب"
نزلت تجرى وسابته واقف مكانه
                    *********************

طه قاعد ف العربية...فى شارع جانبى قريب من البيت
شاف عالية جاية من بعيد...فرح لما شافها...نزل من العربية
لما قربت وشافها معيطة
"مالك؟؟"
"مفيش حاجة يالا بس نمشى من هنا"
ركبت وركب طه ومشى بالعربية
"ايه يا عالية مالك؟"
"مفيش ياطه... افتكرت حاجات ضايقتنى"
"هو انا مش عارفك...حاجات ايه اللى هتعيطك كده...حد زعلك؟؟ماما ولا نرمين حد ضايقك"
"مفيش حاجة من دى والله"
"ماتقولى فى ايه"
عالية وهى بتحاول تهدا
"هقولك بعد كتب الكتاب...ممكن"
"وليه مش دلوقتى"
"علشان نعرف نروح نبارك للناس واحنا كويسين"
"ليه انتى هتقولى ايه"
"بعد كتب الكتاب"
                       ********************

طه وعالية قاعدين جنب بعض... وبعد كتب الكتاب ما خلص
قاموا سلموا على العروسين... وبعدين باركوا لفاتن
فاتن لاحظت تغيير على عالية...خدتها على جنب
"ثوانى ياطه عايزة عالية اسألها على حاجة لميار"
طه"طيب خدوا راحتكم...هستناكى ياعالية ف العربية"
مشى طه وسألتها فاتن
"شكلك مش طبيعى كده ليه....هما عملوا لك حاجة؟"
"لا يا ابلة مفيش حاجة"
"هو انا مش عارفاهم"
"مش هما"
"اومال مين"
"مش وقته شوفى ضيوفك وهبقى اكلمك"
"ضيوفى بيتصوروا مع العروسة والعريس...انتى فيكى ايه"
"خطيب نرمين...مش سايبنى ف حالى"
"نعم...وده عايز منك ايه"
"معرفش بس وانا نازلة قابلته طالع واتهجم عليا ع السلم من ساعتها وجسمى كله بيتنفض"
"وايه اللى مسكتك"
"خايفة...وف نفس الوقت هدير قالتلى ليكون متسلط عليا علشان يخلوا طه يطلقنى"
"احتمال والله"
"يعنى اقول لطه"
"اه طبعا قوليله...ابعدى نفسك عن اللبخ بتاعهم خالص"
"حاضر يا ابلة...معلش دوشتك ارجعى لضيوفك...الف مبروك"
"الله يبارك فيكى...هكلمك بكرة اطمن عليكى"
                   **********************

عالية وطه ف العربية
"هااا قوليلى بقى مالك؟"
"هقولك بس اوعدنى ياطه انك متتسرعش ف اى تصرف"
"ليه؟؟ فى ايه؟"
"احلف انك هتتصرف بعقل"
"اخلصى ياعالية...فى ايه"
"الحكاية بقالها سنة تقريبا...لما روحت عند قعدت عند مامتك... لقيت ان طارق متعود يروح عادى ومامتك مش ف البيت"
"لنرمين لوحدها"
"مش لوحدها خالص...يعنى قبل ما اروح كانت بتبقى مها ف البيت ولما روحت بقيت اكون موجودة"
واتنرفز طه
"وكل ده ساكتة ليه"
"مامتك قالت لى ملكيش دعوة وهو بييجى وانتى ف البيت وكأنك انا وخلاص...المهم بعد كده شفتهم مرة ..."
طه بيبرق"شفتى ايه"
"لا مش زى ما فهمت... بس يعنى وضع كده معجبنيش ...ميليقش بمخطوبين...واتكلمت مع نرمين وبطلوا شوية بعدها"
"شوية...هما رجعوا تانى؟"
"الزيارات بقى تتكرر بس انا مكنتش بسيبهم لوحدهم او لو سبتهم مش بتأخر كده يعنى...بس طارق بقاله فترة كبيرة بيضايقنى"
"بيضايقك ازاى"
"نظراته... حركاته... من كام يوم كلمنى ع التليفون والنهاردة وانا نازلة قابلته ع السلم اتهجم عليا...بس والله ما لحق حتى يلمسنى انا سبته ونزلت"
وطلع طه بالعربية بسرعة جنونية
                    *********************

نرمين وطارق قاعدين... ونرجس معاهم
اتفتح الباب بالمفتاح..دخل طه وعالية معاه
شافهم طارق قام وقف وعينيه مركزة على طه
طه راح ناحيته باندفاع...وضربه ف وشه
صرخت نرمين واتفاجئت نرجس وهى بتزعق لطه
"فى ايه"
طارق بيهجم على طه يضربه...طه كانت عصبيته اكبر ومحدش قادر يسيطر على عصبيته
نرمين"قلتى لى ايه قلبتيه كده"
طه"اطلع بره والبيت ده متعتبوش تانى"
نرجس وهى بتقف بينهم
"اهدا يا طه...اقعد ياطارق...صلوا ع النبى ياولاد"
وبصت لعالية اللى واقفة بعيد وهى خايفة وكملت
"ده شيطان ودخل بينكم"
طارق"اقعد ايه بعد ما اتطردت...انا مش داخل هنا تانى"
نرمين بتمسك فيه"لا ياطارق متمشيش...محدش له دعوة بينا"
طه"ده واحد غير امين عليكى ولا بيحافظ على شرف البيت اللى دخله"
طارق"ياعم المحموق اوى... حوش حوش بتطردنى م الجنة انا ميشرفنيش اناسبكم "
نرمين بتصرخ"لا ياطارق متمشيش...استنى ياطارق"
خرج طارق ورزع الباب وراه
نرمين بتعيط وتصرخ
"انتى قلتى له ايه... منك لله يا شيخة... الغيرة عامياكى ...عايزة كل الناس تبقى زيك كده... انتى قاعدة معانا ليه... غورى ارجعى الشارع اللى جيتى منه"
ومقدرش طه يسكت اكتر من كده على نرمين
ضربها بالقلم
"اخرسى... انتى ايه مش لاقية اللى يلمك"
نرجس"هى حصلت يا طه... هتضرب اختك كمان... الشيطانة دى قالت لك ايه قلبتك على الكل كده...وانا اللى فاكراها طيبة"
عالية"انا معملتش حاجة... مكذبتش ف حاجة"
نرجس وهى بتحضن نرمين اللى عمالة تعيط
"اسكتى بقى مش عايزة اسمع صوتك...ولا عايزاكى ف بيتى"
طه وهو بيزعق لعالية
"لمى هدومك يالا وتعالى معايا"
الرجوع الى أعلى الصفحة اذهب الى الأسفل
مونيكا سامى
عضو مميز
عضو مميز
مونيكا سامى

عدد المساهمات : 546
تاريخ التسجيل : 05/11/2015
العمر : 24
الدولة : مصر

حكاية هل يشفع الحب؟ - صفحة 2 Empty
مُساهمةموضوع: رد: حكاية هل يشفع الحب؟   حكاية هل يشفع الحب؟ - صفحة 2 I_icon_minitimeالخميس يناير 14, 2016 10:49 am

الحلقة 28
نرجس"هى حصلت يا طه... هتضرب اختك كمان... الشيطانة دى قالت لك ايه قلبتك على الكل كده...وانا اللى فاكراها طيبة"
عالية"انا معملتش حاجة... مكذبتش ف حاجة"
نرجس وهى بتحضن نرمين اللى عمالة تعيط
"اسكتى بقى مش عايزة اسمع صوتك...ولا عايزاكى ف بيتى"
طه وهو بيزعق لعالية
"لمى هدومك يالا وتعالى معايا"
وقفت عالية مش عارفة تتصرف...زعق
"يالاااااااااا"
                    ********************

عالية وطه ف العربية.... بيسوق بنفس العصبية
"انت قلتلى مش هتتصرف بعصبية...ليه عملت كده"
"كنتى عايزانى ادخل اخده بالحضن...عالية مش عايز كلام تانى ف الموضوع ده بيفور دمى"
"دلوقتى مامتك ونرمين يقولوا عليا ايه... اتسرعت ياطه كنت تجوزهم مش تفسخ خطوبتهم"
"اجوزهم...واحد مصانش البيت اللى دخله هيصون اختى؟"
سكت شوية...وبص لها بقلق
"انتى تعرفى حاجة مقلتيهاش"
"والله ابدا...حاجة ايه؟"
"علاقتهم وصلت لفين"
قالها طه ووشه احمر من الغيظ
"اطمن هى اكدت لى ان محصلش بينهم حاجة تخوف...مفيش غير اللى قلتلك عليه بس"
سكتوا الاتنين...وبصت عالية ف الطريق
"انا هروح فين دلوقتى"
"البيت طبعا"
"بيت مين؟"
"بيتنا"
وبكل حزم"لا ياطه"
بص لها باستغراب
"لأ ايه؟؟"
"مش هروح عند مها...مش هينقع ولا هقدر"
"اومال هتروحى فين...هنروح فين يعنى"
"مش عارفة...بس مش هقدر ابقى ضيفة عندها...وضيفة تقيلة كمان"
"طيب خلاص حاضر"
"هنروح فين"
"ثوانى"
واتصل بمها
"الو...ايوه يامها...انا هتأخر النهاردة...هتأخر اوى ...بعدين... روحى عند مامتك او هاتيها عندك...خلاص بقى مش وقته"
وقفل ف وشها وبعدين قفل التليفون
"دى لسه هترغى...انا ناقص"
                   ********************

عالية ف العربية... طه بيفتح المحل... دخل اخد فلوس من الدرج... وقفل المحل تانى وركب جنبها
"هنعمل ايه"
"هنشوف اوضة ف اى فندق لحد بكرة ربنا يحلها"
"اخاف اقعد ف فندق لوحدى يا طه"
"متخافيش انا معاكى"
"ومها"
"مش هتاكلها القطة لو باتت ليلة لوحدها...سيبك منها... كفاية علينا اللى حصل النهاردة"
                    ******************

نرمين بتعيط ونرجس بتجيب لها عصير
"الحرباية خربت لى حياتى... اوعى تدخليها هنا تانى... وطه ازاى يطرد طارق... اسمعى انا بحبه ومش هتجوز غيره"
"لما افهم الاول ايه اللى حصل"
"بتسألينى انا ما تسأليها هى"
"انا اتصلت بأخوكى تليفونه مقفول"
"طيب والله لاطربقها على دماغهم الاتنين"
ومسكت الموبايل ونرجس بتسألها بتعمل ايه مبتردش عليها
"ايوه يامها... جوزك اخد الهانم بتاعته ونزلوا...وقافل تليفونه"
صوت مها بتزعق
"نعم...يعنى لما كلمنى كان معاها...يومه اسود بس لما اشوفه... يخربيتك ياطه ياحارق دمى...كان يوم اسود لما اتجوزتك"
وكملت نرمين وهى بتصرخ
"معرفش قالت له ايه خلته جه ضرب طارق وطرده"
"ودينى لاربيها السوسة دى... ضربت اسفين ف الكل علشان يبقى لها لوحدها..طيب هنشوف انا ولا هى"
"شوفى انا ف ايه وانتى ف ايه"
"انتى ف ايه...طارق ده يدوب خطيبك انما طه ده جوزى وابو ولادى وانا احق بيه منها"
"انتى مش همك الا نفسك...كل واحد مش هامه الا نفسه... انا كمان مش هيهمنى حد منكم وهتجوز اللى بحبه غصب عن عين اى حد"
قفلت نرمين مع مها...ونرجس بتبص لها
"غصب عن مين يا بت"
"سى طه..ولا هو كلمته خلاص اُنزلت"
"لما افهم ايه اللى حصل وليه عمل كده...واصلا يعنى انتى مخطوبة بقالك سنة ونص...عمل ايه سى طارق بتاعك ده ...اللى ماجاب شبكة ولا شفناله شقة"
"ظروفه كده وانا راضية بيها انتوا زعلانين ليه"
                     *********************

طه وعالية داخلين الاوضة....عالية بتحط شنطة هدومها على السرير
"طه...انت هتنام ازاى"
"بهدومى وخلاص"
"مش عندك شغل الصبح"
"هبقى اروح اغير قبل الشغل"
"وهتسيبنى لوحدى؟"
"هعمل ايه يا عالية...انا لازم اروح الشغل واروح المحل واشوف مها كمان متنسيش انها على وش ولادة"
"طيب وانا؟"
"مش عارف...لما يطلع النهار يبقى ربنا يحلها من عنده... الفندق هنا غالى ومش هقدر اقعدك فيه كتير"
سكتت عالية وهى مش لاقية اى اقتراح لمكان تروح فيه
                   **********************

مها سمعت صوت الباب قامت مندفعة...مقدرتش وغصب عنها قامت ببطء ...كان طه وصل الاوضة وقف قدام الدولاب بيطلع هدوم
"انت كنت معاها فين"
طه ساكت
"تسيبنى هنا طول الليل وقافل تليفونك ورايح تقضى معاها وقت لطيف وتروقوا مزاجكوا وانا هنا يتحرق دمى"
طه خلص تغيير هدومه وراح ع الباب
"استنى هنا فهمنى"
"افهمك ايه...ايوه كنت معاها... بس علشان اتطردت من البيت هناك مش علشان نقضى وقت مع بعض... كنت معاها علشان رفضت تيجى هنا"
"تيجى فين...انت كنت عايز تجيبهالى هنا"
"شكلك نسيتى انه كان بيتها"
"كااااان... فعل ماضى... دلوقتى بقى بيتى وبيت ولادى"
"وعايزة ايه دلوقتى؟"
"متسيبنيش تانى....افرض كنت هولد كنت تسيبنى اموت انا وولادك"
"الحمدلله انتى كويسة اهو"
"رايح فين"
"عندى شغل يامها...هتأخر"
"وهى فين"
"ف فندق...انا هتأخر سلام"
"متقفلش تليفونك تانى...انا كنت خايفة اتعب وانا لوحدى"
                    *********************

عالية قاعدة فى الاوضة...خايفة تخرج
كل ماتسمع صوت خطوات تجرى تقف ورا الباب وتسمع لحد ما صوت الخطوات يبعد
رن تليفونها...اتخضت...جريت ترد وهى متوقعة طه
"الو... ازيك يا ابلة... اه حكيت له... هحكيلك"
                    **********************

طه ف العربية وجنبه عالية...واقفين تحت بيت فاتن
"انا هنزل بقى"
"عالية...بجد فاتن هى اللى مسكت فيكى"
"اه والله... هى قالتلى ان الوقت ضيق وهى وميار لوحدهم ف الفرش وعايزانى معاهم"
"انتى متضايقة؟... لو مش عايزة تقعدى عندها متعمليش حاجة غصب عنك وقوليلى وانا هتصرف ف مكان"
"انت عارف انا بحب ابلة فاتن وميار قد ايه...متقلقش عليا انا مش متضايقة"
"معلش ان شاءالله كل حاجة هتتحل قريب"
"ان شاءالله...متشيلش انت بس فوق طاقتك...متخلنيش اقلق عليك"
طبطب عليها"متقلقيش انا كويس.. هكلمك ولو فيه اى حاجة ابقى كلمينى"
"حاضر"
نزلت عالية من العربية... واخدت شنطتها من الكنبة اللى ورا ودخلت العمارة... وطه واقف لحد ما اختفت ف السلم
                     ***********************

نرمين قاعدة بتعيط قدام الكمبيوتر وماسكة تليفونها
بتبعت رسالة لطارق ع الفيس
"رد عليا...مرة واحدة بس متسيبنيش كده"
واتصلت تانى...رد عليها
"عايزة ايه؟"
"انت هتاخدنى بذنب طه ليه...انا عملتلك ايه"
"خلاص يانرمين ... انتهينا من الموضوع ده بقى"
"انتهينا يعنى ايه... والسنين دى كلها كانت ايه"
"مش اول ولا اخر اتنين قعدوا يحبوا بعض وف الاخر متجوزوش"
"اهون عليك تسيبنى ياطارق وانا بحبك"
"بكرة تلاقى الاحسن منى...انا مش مستعد لجواز خالص"
"انت ماصدقت بقى علشان تبقى براحتك مع الزبالة اللى تعرفهم"
"مبقاش يخصك...مع السلامة...لا قبل مااقفل...متتصليش بيا تانى علشان مهما عملتى انتى خلاص متنفعينيش"
وقفل التليفون ف وشها...اتصلت بيه تانى مردش عليها
جت تبعتله رسالة تانى...لقيته عملها بلوك
صرخت وعيطت وهى بتقول
"ف 60 داهية"
وقعدت تعيط بحرقة وهى لوحدها
                    ********************

طه داخل المحل... نرجس واقفة مع زباين
قعد لحد ما مشيوا.. راحت قعدت قصاده
"قافل تليفونك ليه"
"فتحته الصبح"
"ايه اللى حصل امبارح خلاك تعمل كده... بتطرد خطيب اختك م البيت"
"انتى زعلانة انى طردته وفسخت الخطوبة"
"ان جيت للحق هو م الاول مش على مزاجى...بس الدَخلة اللى دخلتها امبارح مش طبيعية"
"انا هحكيلك كل اللى حصل واحكمى بالحق"
                      *****************

مها قاعدة بتتكلم ف التليفون
"قاعدة ياماما اهو... محروق دمى من امبارح... دى ايامها سودة ان شاءالله بس اقوم بالسلامة وافوق لها... ولا نرمين دى كمان اللى هتشكيلى وتعيط لى على خطيبها وانا كنت هموت من الغيظ ...لا مش هكلمها انا مش قادرة وفيا اللى مكفينى"
وفجأة مسكت بطنها
"ماما...جالى مغص جامد"
اتنهدت بالراحة
"لا خلاص راح...ما تيجى شوية"
                        ********************

نرجس وطه قاعدين بعد ما حكى لها
"وانت ايش ضمنك ان كلامها صح"
"وهى هتكذب ليه"
"معرفش...يمكن غيرانة من اختك"
"والغيرة دى هتظهر فجأة...انتى مش عارفة عالية...الاولى انها تغير من مها مش من نرمين ومع ذلك مبتجيبش سيرتها خالص"
نرجس ساكتة
"ماماا... عالية مالهاش حد غيرنا... هنسيبها متلطمة كده"
"مش وديتها لفاتن...خلى فاتن تملاها من ناحيتنا"
"عالية بتحبكم وحتى لو فاتن اتكلمت هى مش هتسمع لها"
"عايز ايه يعنى"
"عايز اصالحكم على بعض وترجع البيت
"لما الامور تهدا مش دلوقتى...اختك دلوقتى شايطة"
رن موبايل طه...رد...سمع مها بتصرخ وبتقوله
"ألحقنى يا طه....انا تعبانة اوى"
                  **********************

مها على السرير.... وطه قاعد جنبها
"حمدالله ع السلامة"
"هما فين؟؟ كويسين"
"اه الحمدلله"
"ولدين؟؟"
"لا ولد وبنت الحمدلله"
"مبروك ياحبيبى"
"الله يبارك فيكى ...ومبروك عليكى انتى كمان"
"شفت ولدت ازاى بسبب حرقة الدم بتاعة امبارح... متزعلنيش تانى علشان خاطر ولادك"
"حاضر"
"هما فين عايزة اشوفهم"
قام طه اخد واحد من نرجس وخلاها مسكته
وراح جاب البنت من مامة مها
"هااا... نسميهم ايه"
                   ********************

عالية واقفة ف المطبخ ف شقة منار... بترتب دولاب المطبخ
دخلت لها فاتن
"خلصتى يا عالية"
"قربت اهو"
"هكمل معاكى... احنا كده خلصنا الحمدلله نبقى نيجى نفرش السجاد ليلة الفرح"
"ربنا يتمم لها بخير ويسعدها يارب"
"احنا تعبناكى معانا اوى ياعالية"
"بالعكس والله...ده مفيش حاجة بتهون عليا غير وجودى معاكم...انا اللى تقلت عليكم ...بقالى 10 ايام قاعدة عندكم وطه ولا قالى هيودينى فين"
"اخص عليكى...انتى منورانى"
"ربنا يخليكى يا ابلة... انا عارفة انه اتلبخ بولاده ربنا يخليهومله يارب"
"عقبالك...انتى وقفتى العلاج؟"
"ايوه"
"ماترجعى للعلاج تانى"
"مينفعش يا ابلة"
"مينفعش ليه"
"اى واحدة بتتعالج علشان الخلفة...لازم يكون جوزها معاها... انما انا طه مش معايا ومن زمان "
"وليه ساكتة... ده جوزك وليكى حقوق عنده"
"فيه حاجات مينفعش تتطلب... ان مكنتش بتيجى تلقائية مش هيبقى لها قيمة... وانا بحب طه ومقدرة ظروفه ..مش زعلانة منه"
                         *******************

نرجس مع نرمين ف البيت...داخلة لها اوضتها
"مش هتقومى تيجى معايا سبوع ولاد اخوكى"
"لا"
"ليه"
"مش عايزة اشوف مها ولا طه ولا ليا نفس افرح"
"بقولك ايه...انتى مش اول واحدة تفسخ خطوبتها...اومال لو كان عدل"
"كنت بحبه...هو ليه محدش حاسس بيا"
"لو بيحبك مكنش بص لغيرك حتى مرات اخوكى...ده واطى"
"انا غلطانة انى حكيت لك"
"ياريتك حكيتى م الاول ...جاية تقوليلى دلوقتى انه بتاع نسوان ولسه ماسكة فيه... انتى ايه يابت...انتى كنتى عارفة وساكتة"
"كلها حاجات عابرة بس كان بيحبنى انا"
"اه ما هو باين"
"انتى بتقطمينى كده ليه...مش فسختوا الخطوبة...بلاش ازعل"
"زعلتى خلاص... اعملى حسابك عالية هترجع البيت"
"مش هيحصل ياماما"
الرجوع الى أعلى الصفحة اذهب الى الأسفل
مونيكا سامى
عضو مميز
عضو مميز
مونيكا سامى

عدد المساهمات : 546
تاريخ التسجيل : 05/11/2015
العمر : 24
الدولة : مصر

حكاية هل يشفع الحب؟ - صفحة 2 Empty
مُساهمةموضوع: رد: حكاية هل يشفع الحب؟   حكاية هل يشفع الحب؟ - صفحة 2 I_icon_minitimeالخميس يناير 14, 2016 10:50 am

الحلقة 29
عالية قاعدة ف القاعة... ف فرح ميار وايمن...مع هدير وولادها
كل الموجودين فرحانين بالعروسين وهما بيرقصوا بحب وفرحة
عالية قاعدة وعينيها ع الباب كل لحظة
والموبايل ف ايديها كل شوية تبص فيه
لحد ما بدأت تفقد الامل لما الساعة عدت 11 ونص
فاتن رغم كل الموجودين الا انها كل شوية تقعد مع عالية وتقوم وترجع تقعد معاها وهكذا

عالية قاعدة مبتسمة وقلبها حزين
خايفة يبان عليها الحزن ف الفرح
هدير"انا هقوم يا عالية يدوب ألحق اروح بالعيال"
عالية"طيب يا حبيبتى خلى بالك منهم"
هدير"هستناكى يا عالية تيجى بكرة او بعده...تعالى اقعدى معايا"
عالية"ما انا عند ابلة فاتن اهو"
هدير"ابلة فاتن مش اقرب لك منى... انتى اختى وبيتى هو بيتك.. وانتى خلاص وقفتى معاها ف جواز ميار...كفاية"
عالية بترد بكسرة نفس
"هشوف ياهدير واقولك...لازم استأذن طه"
همت هدير انها تتكلم بعصبية...رجعت مسكت نفسها
"مظنش هيقولك لأ لانه مش مهتم...ماعلينا انا قايمة هسلم عليهم وامشى"
قامت هدير سلمت على فاتن وميار وشاورت لعالية وخرجت من القاعة

قعدت عالية مستنية الفرح يخلص... حست بحد بيمسكها من كتفها
التفتت ...فرحت لما شافت طه
"طه...اتأخرت اوى كده ليه"
"معلش ياعالية كنت عند الدكتور بالعيال"
"مالهم؟"
"عندهم برد بس الحمدلله"
"سلامتهم...انا قلت مش جاى"
"انا وعدتك انى جاى... وعندى ليكى خبر كويس"
                     *********************

عالية ف اوضة ميار... بتحط هدومها ف الشنطة
وفاتن قاعدة على السرير
"يا عالية ما انتى كنتى منورانا...مستعجلة تمشى من عندنا"
"ربنا يخليكى يا ابلة... انا مش عارفة اقولكم ايه ع المقابلة وحسن الضيافة... سواء انتى ولا الحاج عبد الحميد ولا ميار... حسستونى انى وسط عيلتى"
"يا خبر ياعالية...ليه هو احنا غرب...ده والله عبد الحميد كان معتبرك زى ميار"
"ربنا يكرمكم ويسعدها يارب"
"يارب ويسعدك انتى كمان...مقلتليش انتى ماشية من هنا على اى اساس"
"هرجع البيت تانى...ماما هى اللى قالت لطه"
"ونرمين؟"
"قالى انهم مش عايزينا نتعامل مع بعض خالص لحد الامور ماتهدا وترجع المياه لمجاريها"
"وطه؟"
"ماله؟"
"مسألتيهوش عن حقك ف وجوده معاكى زيها بالظبط؟"
ردت عالية بانكسار
"ماليش عين اقارن نفسى بيها...هى دلوقتى ليها الاهتمام الاكبر ...متنسيش انها لسه والدة قريب واتنين يعنى محتاجة وجوده جنبها"
"انتى هتشيلى همها...شيلى هم نفسك"
                       *******************

طه بيفتح الباب بالمفتاح... بيدخل وهو ماسك شنطة الهدوم
بيسمع صوت نرمين بتتكلم ف التليفون ف اوضتها
"تعالى ياعالية...ادخلى"
دخلت وراه...دخل على الاوضة ...وهى ماشية وراه
حط الشنطة على الارض... وقعد على السرير ووشه ف الارض
حست عالية انه مش طبيعى ... قعدت جنبه
"مالك ياطه؟؟ شكلك متغير ... ولا مخبى حاجة؟؟"
مسك ايدها وباسها
"سامحينى ياعالية... انا بهدلتك اوى معايا"
شافت لمعة دموع ف عينيه...طبطبت عليه
"ليه بتقول كده.. انا كفاية عليا انى ابقى معاك"
"انا حاسس انى بقيت مُسير... بفكر كتير انا ايه اللى خلانى اتسرعت واتجوزت مها ... ده لا فيه حب بيننا ولا تفاهم ولا اى نوع من الاحترام... انا كل يوم بندم انى اتجوزتها"
"ايه اللى حصل بس لكل ده"
"مش مرتاح...وف نفس الوقت لما ببص ف وش ولادى بنسى تعبى معاها...انا ساعات بسرح واتخيل انك انتى امهم...واقول ياريتهم كانوا ولادنا"
ردت ودموعها نازلة
"نصيب يا طه... مش مكتوب لى اكون ام... انت تعرف انى ساعات بتخيل واقول ياترى شكلهم ايه...شبه مين فيكم...نفسى اشوفهم بس مش من حقى اطلب اشوفهم وانا بشوفك انت بالعافية"
مسح طه دموعه ...وطلع تليفونه
"اهم... انا مصورهم صور كتير اوى...قلبى واتفرجى"
اخدت عالية الموبايل وفضلت تتفرج على الصور
بتبص لهم بكل حب واشتياق لتحقيق حلم الامومة ودموع
"حلوين اوى يا طه...ربنا يخليهوملك"
"هبقى اجيبهم تشوفيهم اكيد...لما هتشوفيهم هتحسى باحساس تانى خالص غير الصور"
لاحظت عالية تغيير نبرة صوته لما بيتكلم عن ولاده..ونظرته ليهم اللى بتبين قد ايه بيحبهم ومجرد سيرتهم بتفرحه
                  ********************

عالية قاعدة فى اوضتها... دخلت عليها نرجس
"صاحية؟"
"ايوه ياماما اتفضلى"
دخلت نرجس وقعدت
"حصل حاجة بينك وبين نرمين؟"
"لا... انا اسفة والله ما كذبت على طه واللى قلته كله حصل"
"خلاص الموضوع ده انتهى... بصى انا وافقت انك ترجعى البيت علشان ده برضه بيتك...وف نفس الوقت بيت نرمين... انا مش عايزة مشاكل خالص ...نرمين مجروحة من اللى حصل وعايزاكى لو اتكلمت معاكى ولا ضايقتك استحمليها"
"حاضر"
"ولما مها تشد حيلها هبقى اعزمهم هنا كل جمعة علشان اشوف العيال واقعد معاهم...وانتى براحتك لو عايزة تبقى موجودة او لو عايزة اليوم ده تقضيه بره براحتك"
"ياماما انا والله بحبكم وبحب ولاد طه من قبل ما اشوفهم...وجودهم مش هيضايقنى انما انتم لو مش عايزينى اكون موجودة قوليلى"
"انا لو مش عايزاكى مكنتش رجعتك يا عالية...انتى اصيلة وبتحبى طه بجد"
"ربنا اللى عالم انى بحبه وبحب اشوفه سعيد حتى لو مش جنبى"
                         ******************

عالية ف المطبخ... دخلت لها نرجس
"خلصتى ياعالية"
"خلصت اهو ياماما"
"طيب تعالى حضرى معايا السفرة لاحسن كلمتهم قالوا جايين ف السكة"
"هتصحى نرمين تتغدا معانا ولا ايه؟"
"اه لما يبقوا ييجوا"
                       *********************

طه ومها ونرمين ونرجس وعالية قاعدين على السفرة بيتغدوا
يسمعوا صوت حد من الاطفال بيعيط
مها"افففف ...اهو لاعارفة انام ولا اكل ولا اشرب...قومى يانرمين شوفيهم"
نرمين"وانا هرضعهم...ماتشوفى انتى ولادك"
مها"شايفة ياماما.... من ساعة ما اتجوزت طه ونرمين بقت غلاوية اوى وبتغير منى"
نرمين"هغير منك على ايه يامها ماتلمى نفسك شوية...وانت ياطه ساكت لها كده"
طه"هتتخانقوا ومفيش واحدة فيكم هتشوف اللى بيعيط ده"
يسمعوا صوت الاتنين بيعيطوا
عالية"هقوم اشوف...كملوا انتوا اكل لحد ما اسكتهم"
تزعق مها وعالية قايمة
"لأ... انتى لأ"
تقف عالية مكانها محرجة
طه"لأ ليه؟"
مها"المرة اللى فاتت روحنا من هنا العيال عيوا...معرفش اتحسدوا ولا حد كان تعبان اتعمد يعديهم؟"
سكتت عالية مش عارفة ترد
ردت نرمين
"معاكى حق... اللى تخرب بين اتنين ممكن تعمل اى حاجة...الحقد وحش خلى بالك على عيالك...قومى شوفيهم انتى"
قامت مها لولادها
دخلت عالية اوضتها بتعيط... دخل طه وراها
"متزعليش يا عالية حقك عليا"
"طه... انا ال6 شهور اللى فاتت دى كنت بفكر... انا قاعدة هنا طول الوقت ونرمين مش طايقانى وبتسمعنى كلام صعب كل شوية وانا ساكتة مبتكلمش... الجمعة اللى بشوفك فيها مها بتسمعنى كلام اسوأ من نرمين... انت ناسينى خالص وغصب عنك انا عارفة... انا بقيت عبء عليك ياطه... وكفاية كده"
"انتى بتقولى ايه؟؟ انا مقدرش استغنى عنك"
"لا انت قدرت فعلا ...انا مبنامش الليل من التفكير يعنى متفتكرش ان كلامى ده من موقف النهاردة... انا بفكر بقالى كتير...انا مبقاش ليا وجود ف حياتك غير بمكالمة تليفون ...اه بنتكلم كل يوم واكتر من مرة وبس... ده كل اللى بيربطنا يا طه... مش عايزة افضل اتعذب واعذبك معايا"
"لا يا عالية متقوليش كده... انتى حبيبتى...ده وجودك اللى بيهون عليا حياتى"
"وانا مين يهون عليا حياتى... انا تعبت ياطه... خلاص مبقاش عندى اى قدرة استحمل حد"
وعيطت وهى بتكمل
"طلقنى يا طه"
اخدها ف حضنه وهى بتعيط
"مقدرش اطلقك... انتى حبيبتى ياعالية ومقدرش استغنى عنك"
دخلت عليهم مها فجأة
"يا سلااااااااااااام...عينى عينك كده...انتم ايه مفيش عندكم دم"
طه"اخرسى يامها"
قامت عالية وهى بتعيط...وبدأت تحط هدومها ف الشنطة
مها"ايوه يا بت اعمليهم عليا...طب هو عبيط ويخيل عليه حركاتك دى انما انا فاهماكى كويس...قال يعنى هتمشى بجد"
عالية لطه"طلقنى ياطه"
نرجس ونرمين واقفين ع الباب..نرمين بتبتسم بشماتة
نرجس مستغربة اللى بيحصل
طه بيزعق"اخرسى يامها ومتتكلميش تانى"
طه بيشد الشنطة من عالية
"مش هطلقك ياعالية"
مها"ماتسيبها تغور ف 60 داهية"
طه"لولا ولادى كنتى انتى اللى غورتى من زمان"
مها"بقى كده"
طه"ايوه كده... انا مبحبش الا عالية...سامعة"
مها وهى بتجرى على ولادها
"طيب يا طه... يبقى مش هتشوف ولادك تانى... ولا بيتى وبيت عيالى تدخله ...انت فاهم"
جريت نرجس وراها
"استنى يامها... متخليش الشيطان يدخل بينكم"
طه قعد وهو ماسك شنطة الهدوم علشان متاخدهاش عالية
"مش هتمشى ياعالية ومش هطلقك"
عالية"مش هقدر اقعد خلاص ياطه...انا كرهت عيشتى هنا...وروح لها لانك مش هتقدر تستغنى عن ولادك انا عارفة"
طه"ايوه بحبهم وبحبك انتى كمان"
عالية"هما اولى بيك منى...روح ألحقها انا لازم امشى...سيبنى امشى ارجوك"
غيرت هدومها بسرعة .... واخدت شنطتها وخرجت

كانت مها قاعدة تعيط ونرجس جنبها بتهديها
مشيت عالية من غير ما حد يقولها استنى


طه قاعد ف الاوضة زى ماهو
دخلت نرجس عليه بابنه ...حطته ف حجره
"ملكش الا مراتك وعيالك يا طه... عيالك اللى كنت بتترجاهم م الدنيا مش بعد ما ربنا رزقك بيهم تكفر بنعمته"
"وعالية؟"
"انت مسبتهاش...طالما هى اللى طلبت الطلاق سيبها وخليك مع مراتك وعيالك...قوم راضى مها وهى هتتراضى بكلمتين... قوم علشان خاطر ولادك"
                     *******************

طه بالليل صاحى ...ومها نايمة والاطفال ف سريرهم
قام طه يبص عليهم... ودموعه نازلة وهو بيفتكر كل ايامه مع عالية وراحته معاها وسعادته اللى مش حاسس بيها دلوقتى

عالية فى السرير وجنبها هنا... دموعها نازلة وهى بتفتكر ايامها مع طه قبل جوازه...وصبرها وسكوتها على الذل اللى شافته بعد جوازه
دخلت هدير تتسحب
"انتى صاحية"
مسحت عالية دموعها بسرعة
"اه"
"وبعدين بقى... هتفضلى مقهورة كده... مش انتى مقتنعة باللى طلبتيه"
"اه طبعا... مشكلتى انى لسه بحبه ...بس هو فين؟؟ مبقاش معايا"
"معلش يا عالية...مسيرك ربنا يعوضك خير"
"ربنا كريم...قومى نامى وانا شوية وهنام"
"طيب تصبحى على خير"
                      ************************

عالية بتلبس ...خرجت من الاوضة كان عصام وهدير قاعدين بيفطروا
عصام"رايحة فين ع الصبح كده يا عالية"
عالية"انتى مقولتيلوش ياهدير"
هدير"نسيت معلش... عالية شافت اعلان عن وظايف ف مدرسة خاصة فرايحة تقدم"
عصام"خير بس عالية هتشتغل ايه ف المدرسة"
عالية"هما طالبين مؤهلات كتير دبلومات وبكالوريوسات وكل حاجة"
عصام"ربنا يوفقك...تيجى اوصلك ف طريقى"
عالية"لا روح انت هركب واروح متقلقش"
قام عصام ونزل ...وسألتها هدير
"هتقولى لطه؟"
"لآ... وطول الاسبوع اللى فات بيكلمنى وانا مبردش...خايفة اضعف ..مش خايفة...انا متأكدة لو سمعت صوته هضعف وارجع له "
"وبعدين...ماهو انتوا لازم تتكلموا"
"مش دلوقتى... على الاقل لما احس انى قويت شوية واقدر اتمسك بالطلاق"
                      ********************

عالية واقفة ف زحمة ... ناس كتير جايين يقدموا
والتقديم معاه انترفيو ف نفس الوقت... سمعت حد بيكلمها
"عالية؟؟"
التفتت اتفاجئت بطارق...ارتبكت مش عارفة ترد ولا تعمل ايه
"ازيك ياعالية عاملة ايه؟"
ردت باقتضاب
"الحمدلله"
مشيت خطوات بعيد عنه...راح وراها
"انا عايز اعتذرلك عن كل اللى حصل منى... بس طمنينى عليكى"
"حصل خير...انا كويسة الحمدلله شكرا"
بعدت خطوات ... راح وراها
"انا عايز اتكلم معاكى ياعالية...حاولت ادور على رقمك اللى كان معايا ملقيتوش خالص...لازم اتكلم معاكى"
"اسفة معلش مفيش كلام بيننا... مش هقدر اتدخل بينك وبين نرمين لانى سبت البيت هناك...لو عايز تصالحها تقدر تروح المحل لمامتها واخوها"
سألها بفرحة
"انتى سبتى طه؟"
استغربت فرحته ومردتش...كمل كلامه
"انا مش عايز اتكلم على نرمين..انا عندى كلام يخصك انتى وفرحتينى لما قلتيلى انك سبتى طه"
"معلش بس ...يفرحك او يزعلك ف ايه؟"
"انا عايز اتجوزك على سنة الله ورسوله يا عالية...انا كنت عارف ان وضعك هناك مش هيستمر كتير ومسيرك تزهقى"
"انت ايه اللى بتقوله ده...انا متجوزة... انا لسه على ذمة طه"
"لسه على ذمته وسايبين بعض ولا عايشين مع بعض؟؟"
ردت بانكسار
"سايبين بعض"
"خلاص...يبقى تطلقى ونتجوز"
عالية متفاجئة من كلامه...كمل كلامه
"انا عارف انك شايفانى راجل معندوش اخلاق... بس انا عايزك تفهمى انى اتغيرت والله اتغيرت"
ردت باستنكار
"غريبة"
"انا بعترف انى كنت مش كويس وليا علاقات كتير... وحاولت معاكى لمجرد علاقة عابرة ووقت اقضيه معاكى وقلت هتبقى سهلة علشان جوزك متجوز وبعيد عنك وفاهم ممكن تحسى بإيه ومشاعرك هتكون محتاجة حد يهتم بيكى...بس اتفاجئت بقوتك وصدك ليا...انا حتى مزعلتش انك قلتى لجوزك... انا اتأكدت ان لسه فيه ناس محترمة ... ياعالية انتى اللى ابقى مطمن انى أأمنها على اسمى وشرفى ...انتى جوهرة نادرة مش اى حد يعرف قيمتك"
عالية متفاجئة من كل كلام طارق....اول حاجة جت على بالها
"انت عايز تتجوزنى وانت عارف انى صعب اخلف؟"
"ايوه طبعا عارف... بس هعمل ايه بعيال تكون امهم مش عارفة تربيهم... وبعدين محدش عارف النصيب يمكن لما نتجوز ربنا يدينا...ناس كتير الدكاترة غلبت معاهم وخلفوا...الحكاية دى مش شاغلانى لدرجة انى افرط ف واحدة زيك"
عالية ساكتة ومش عارفة تتكلم...كمل طارق كلامه
"انا اتغيرت...والله ما عملت اى حاجة غلط من يوم ما سبت نرمين انا كمان قربت من ربنا والتزمت بالصلاة... وحاسس ان ربنا قبل توبتى علشان كده قابلتك النهاردة "
"اه صحيح انت هنا ليه؟"
"جاى مع واحد صاحبى...شفتى الصدفة"
جه عليها الدور ف التقديم...واتنادى على اسمها
"هستناكى يا عالية... عايز اكمل كلام معاكى"
                       ********************

عالية وهدير قاعدين مع بعض
"هى اه حاجة غريبة بس بتحصل... ربنا غفور رحيم.. مترفضيش طارق طالما متقدملك وراضى بكل ظروفك"
"وطه؟"
"طه خلاص صفحة واتقفلت بقى... انسيه وعيشى حياتك مع حد يقدرك... فكرى ياعالية... فكرى بعقلك بس"
                  *******************

طه ع السرير...نايم صاحى
مها بتحط ايدها عليه تصحيه فاكراه نايم...يتنفض من لمستها
"يا سلاااااااام... ايه قرصتك عقربة علشان تتنفض كده"
بص ف الساعة...سابها وقام دخل الحمام
وهى ماشية وراه
"هو ايه النكد اللى احنا فيه ده من يوم ست زفتة ما مشيت... طلقها وخلصنا انت مستنى ايه"
خرج من الحمام ودخل يلبس
"هى مشيت وسابت لى عفريتها ينكد عليا...طلقها وخلصنا من اى حاجة تربطها بيك...طلقها وريحنى"
رد بعصبية
"مش هطلقها...سامعة مش هطلقها"
"لا بقى تطلقها...يا تطلقنى انا وملكش عيال عندى"
"انتى بتلوى دراعى علشان عارفة انى متعلق بيهم"
"احسبها زى ما تحسبها"
كمل لبس...ونزل من غير ما يرد عليها
                      *****************

طه قاعد مع نرجس ف المحل
"قوليلى دلوقتى اتصرف ازاى... مش كنتى بتفضلى تقوليلى اتجوز علشان تخلف...ادينى خلفت ...فين الراحة والسعادة اللى كنت عايشها مع عالية... عالية مش بترد عليا واساسا مش عارف هقولها ايه لو ردت ...انا فعلا قصرت معاها كتير... والتانية اللى بتخيرنى بين عالية والعيال...اعمل ايه"
"طلق عالية يا طه ده الحل الوحيد"
ونزلت دموعه وهو مخنوق وبيتكلم
"مش هقدر...انا بحبها...وهتفضل على ذمتى لحد ما اموت"
"بعد الشر عليك"
"شر...هو فيه اكتر من كده شر...انا بموت بالبطئ ... انا كنت ممكن مشوفهاش بالايام بس كنت بكلمها واحكى لها وتحكى لى...هى الحضن الوحدي اللى كنت بحس فيه بطعم الراحة"
"ومها ...هتعمل ايه معاها لو صممت على كلامها"
"مش عارف...انا مش عارف اعمل حاجة خالص بس اللى متأكد منه انى مش هطلق عالية ابدا"
                          *******************

بعد شهرين
عالية خارجة من المدرسة...لقيت طارق قدامها
"ازيك ياعالية"
"الحمدلله...جيت ليه؟"
"دى مقابلة برضه؟"
"معلش اصل شكلى كده يعنى"
"شكلك ايه... وحشتينى وحبيت اشوفك.... مش هنفضل كده كتير ياعالية"
"اعمل ايه طيب"
"ادينى كلمة...بقالك شهرين كل ما اكلمك تقوليلى بفكر"
"مينفعش افكر ف جواز وانا على ذمة راجل "
"وهنفضل كده...افرضى مطلقش هنفضل متعلقين كده"
"انا كنت ناوية اطلب منه الطلاق فعلا بس بقاله فترة مبيتصلش خالص"
"خلاص اتصلى بيه انتى واطلبى الطلاق لو رفض ارفعى قضية خلع"
"ربنا يسهل..معلش ياطارق لازم امشى وبلاش تجيلى هنا تانى"
"انا كنت فاكرك هتفرحى لما تشوفينى"
"معلش كل وقت وله ادان...سلام"
                   ********************

مها بتتصل بنرجس فى المحل...المغرب
"الو... هو فين طه...مقموص؟"
"مقموص ايه؟؟ طه لسه مجاش؟"
"مجاش ازاى...اومال راح فين؟"
"معرفش انا مرضيتش اتصل بيه اشوف اتاخر عليا ليه قلت يمكن نايم شوية"
"طه نزل الصبح ف معاد الشغل عادى ومجاش انا قلت جالك"
"ومتصلتيش بيه ليه يامها"
"بتصل الموبايل مقفول"
"انتى هتقلقينى ليه؟"
"لا متقلقيش ...حركة قفل الموبايل دى لما بيكون مع الزفتة بتاعته... والله العظيم ماهسكت له تانى"
"انا هتصل بيها واشوف...انتى قلقتينى...مع السلامة"
"ابقى عرفينى لما تكلميها"
                   ********************

عالية قاعدة مع عالية الصغيرة بيكتبوا الواجب
رن موبايلها...بصت لهدير
"دى ام طه"
"ردى عليها شوفى عايزة ايه وخليكى قوية اوعى تسكتى لها على اى حاجة"
ردت عالية"الو.. الحمدلله...طه؟؟؟ لا معرفش انا مشفتوش من يوم ما سبت البيت... ولا كلمنى ولا كلمته... مع السلامة"
هدير بتسأل عالية بفضول
"فى ايه"
عالية بترد بقلق"بتسأل على طه... من ساعة ما نزل من بيته الصبح مرجعش لا البيت ولا المحل...ربنا يستر"
                     *******************

عالية ف المدرسة... بتبص ف الساعة 10 الصبح
قلقانة على طه غصب عنها من ساعة اتصال نرجس...اتصلت بنرجس

مها الصبح قاعدة ومعاها نرجس...الاتنين بيعيطوا
رن موبايل نرجس...ردت بلهفة
"ايوه ياعالية...عرفتى حاجة؟"
"لا ...انا كنت عايزة اطمن بس...طه بخير؟؟"
نرجس تعيط
"معرفش... لما روحت بالليل لقيت العربية مركونة تحت البيت وسألت نرمين قالت مجاش ولسه راجعة من الشغل عنده كنت بسأل عليه قالوا مجاش"
عالية بتسأل ودموعها نازلة
"يعنى ايه؟؟ حصل له ايه؟"
الرجوع الى أعلى الصفحة اذهب الى الأسفل
مونيكا سامى
عضو مميز
عضو مميز
مونيكا سامى

عدد المساهمات : 546
تاريخ التسجيل : 05/11/2015
العمر : 24
الدولة : مصر

حكاية هل يشفع الحب؟ - صفحة 2 Empty
مُساهمةموضوع: رد: حكاية هل يشفع الحب؟   حكاية هل يشفع الحب؟ - صفحة 2 I_icon_minitimeالخميس يناير 14, 2016 10:53 am

الحلقة 30 والأخيرة
مها الصبح قاعدة ومعاها نرجس...الاتنين بيعيطوا
رن موبايل نرجس...ردت بلهفة
"ايوه ياعالية...عرفتى حاجة؟"
"لا ...انا كنت عايزة اطمن بس...طه بخير؟؟"
نرجس تعيط
"معرفش... لما روحت بالليل لقيت العربية مركونة تحت البيت وسألت نرمين قالت مجاش ولسه راجعة من الشغل عنده كنت بسأل عليه قالوا مجاش"
عالية بتسأل ودموعها نازلة
"يعنى ايه؟؟ حصل له ايه؟"
"معرفش...معرفش حاجة وعمرها ماحصلت انه يختفى كده ومحدش يعرف"
مها بتعيط وبتقول لنرجس
"حلفيها انها متعرفش؟؟؟ لو هى عارفة مكانه تقول بس ميكونش حصله حاجة"
سمعتها عالية...ردت قبل ما نرجس تسألها
"والله ما اعرف مكانه ولا شفته من اخر مرة كنت فيها ف البيت"
نرجس"يا حبيبى يا بنى...يكون عمل ف نفسه حاجة... انتوا الاتنين السبب ...لو عمل ف نفسه حاجة يبقى بسببكم كل واحدة فيكم مفكرتش الا ف نفسها بس وهو مبقاش عارف يرضى مين...منكم لله"
مها بتعيط...وعالية بترد على نرجس
"لا طه اكيد ميغضبش ربنا ويأذى نفسه...انا خايفة يكون حصل له حاجة ومحدش عارف"
نرجس برعب
"قصدك ايه؟؟ هنتصرف ازاى...انا تفكيرى اتشل خلاص"
عالية"انا هروح ادور عليه... يارب يكون بخير"
نرجس"طيب انا جاية معاكى... انتى فين"
عالية"انا ف الشغل دلوقتى...بشتغل ف مدرسة مصر التجريبية ...هستأذن واكلمك اقولك نتقابل فين"
نرجس"طيب...ربنا يطمنا يارب"
قفلت نرجس مع عالية...وقامت
مها"هتعملوا ايه"
نرجس"هنروح ندور عليه"
مها"وهتسيبينى لوحدى كده محتاسة بالعيال وقلقانة"
نرجس"اتصلى بمامتك تيجى تقعد معاكى"
مها بصوت واطى
"اتصلت بيها بالليل تيجى تبات معايا قالت مش هينفع تيجى وتسيب بيتها"
نرجس بعد لحظات تفكير
"قومى لبسى العيال وتعالى اقعدى معانا لحد مانطمن"
                      *********************

عالية ونرجس بيدوروا ف المستشفيات وبعد ما سألو عند فاتن ... بلغوا باختفاء طه
وبعد ما خلصوا واقفين مستنيين تاكسى
"انتى قاعدة فين من ساعة ما مشيتى"
"عند هدير"
"وايه حكاية الشغل ده...من امتى؟"
"من شهرين...كان لازم ابتدى افكر ف حياتى هتمشى ازاى بعد الطلاق"
"طه كانت نفسيته تعبانة اوى من بعد ما مشيتى...كان بيقول مش هيطلقك ابدا...ياحبيبى يابنى اتاريه بيقاسى ومحدش حاسس بيه"
دمعت عالية وقلبها موجوع على طه
"ربنا يرجعهولنا بالسلامة"
                         *******************

مها قاعدة ماسكة احمد ونرمين ماسكة اروى
"عملتى فيه ايه يامها خليتيه يطفش"
"هعمل ايه يانرمين انتى اتجننتى"
"ايه اللى يخليه يسيبنا كلنا كده ويختفى الا اذا كانت حصلت حاجة كبيرة"
"كبيرة ايه...مفيش حاجة كبيرة...مشاكلنا هى هى من اول ما اتجوزنا كلها عن الزفتة اللى مش قادر ولا راضى ينساها"
"اهى الزفتة دى اللى كنا بنتريق عليها حظها احسن مننا احنا الاتنين"
"ازاى يا فالحة"
"انتى جوزك طفش وسابك وطول الوقت عارفة انه بيحبها اكتر منك...وانا خطيبى اللى بحبه سابنى ومن ساعتها لاعارفة احب ولا حد حاول يتقرب منى اصلا"
"اسكتى يانرمين بلا جواز بلا خيبة...عاجبك حالى...اتجوزت وانا فاكرة انى هفرح واعيش مبسوطة واخلف واعوض احساس الاسرة اللى اتحرمت منه...كنت فاكرة هقدر اخليه ينساها...انما كنت بحلم...انتى متعرفيش يعنى ايه جوزك يكون بيحب غيرك وانتى عارفة وهو مش بينكر...حتى لما بعدت هو مش بينساها ويبدأ يبين كرهه ليكى"
"ارحم م الوحدة والفراغ اللى انا فيهم...كل اللى حواليا اتجوزوا... انتى اتجوزتى واتغيرتى معايا... بعد ما اتجوزتى اخويا كنت فاكراكى هتبقى اقرب لى م الاول بعدتى اكتر... البت المفعوصة بنت فاتن اتجوزت جوازة حلوة...كل اصحابنا اتجوزوا... مفيش غيرى اللى قاعدة زى ما انا"
"حسدوا الاعمى على وسع عينه"
"حسد... انا هحسدك؟؟... انا مش عارفة كان طه مستحمل طولة لسانك دى ازاى"
"لمى نفسك يانرمين وسيبينى ف مصيبتى...طه مش عارفة حصل له ايه وسابنى بعيلين وانتى تقولى اتجوزت واتغيرت وكلام خايب كده...ده انتى بقيتى لا تطاقى"
"دلوقتى لا اطاق... انما الاول كنت حلوة...خلصت حاجتى من عند جارتى خلاص"
اتفتح الباب ودخلت نرجس وهى بتزعق لهم
"ايه ده فى ايه؟.. صوتكوا واصل للشارع"
مها"طمننينى الاول فيه جديد؟"
نرمين"لقيتوه؟؟"
نرجس وهى بتقعد
"ولا فيه جديد ولا لقيناه"
وبصت لاحمد واروى وعينيها دمعت
                      ********************

عالية بتعيط بالليل ف الاوضة...تدخل لها هدير
"لسه بتعيطى ياعالية...انا افتكرتك نمتى"
"هتجنن ياهدير... هموت واطمن عليه... الايام بتعدى ومفيش لا حس ولا خبر ولا عارفة اذا كان عايش ولا بعد الضر حصل له حاجة"
"ربنا يستر...للدرجة دى لسه بتحبيه"
"ايوه بحبه...بحبه اوى ونفسى يرجع... حتى لو مش هشوفه خالص بس اعرف انه رجع وكويس هرتاح...انما وانا مش عارفة حصل ايه كده حاسة انى هموت روحى بتتسحب منى وقلقانة"
"متخافيش...بدل مفيش اى خبر وحش يبقى متخافيش...يمكن بيأديهم شوية وهيرجع"
"يارب...ان شاءالله يكون كويس ويرجع باللسلامة"
"عالية... انتى خلاص نهيتى مع طارق"
"طبعاااا... انا اتأكدت انى بحب طه ومش ممكن هقدر ابقى مع راجل غيره... ممكن افضل لوحدى انما مبقاش مع غيره ابدا"
                    *********************

ام مهاعندها ف بيت نرجس
احمد واروى قاعدين بيلعبوا على الارض...بتبص عليهم وبتسألها
"كبروا ماشاءالله... نينتهم مش هتعملهم عيد ميلاد؟"
"عيد؟؟ نحتفل ازاى وابوهم منعرفلوش طريق"
"وانتى هتفضلى قاعدة كده... بقاله 4 شهور لا حس ولا خبر وانتى ساكتة"
"ف ايدى ايه اعمله"
"اطلبى الطلاق طبعا...انتى لسه صغيرة والف مين يتمناكى"
بصت لها مها باستغراب
"اتطلق؟؟!! سهل طبعا انى اتطلق بس ولادى اجيبهم واقعد عندك...هتصرفى عليا وعليهم؟؟"
"تعالى اه وسيبيهم اهل ابوهم اولى بيهم"
بصت لهم مها
"اسيبهم؟؟ عايزانى اسيبهم وهما ف السن ده ويبقوا من غير ام ولا اب...عايزاهم يتربوا زيي صح... يكبروا وعمرهم ما حسوا بأمان البيت والاسرة"
مامتها ساكتة مش بترد عليها...كملت مها بحزم
"انا قاعدة هنا لما اشوف جوزى حصل له ايه؟"
"اش اش يا جوزك... من امتى يا بت... انتى اتجوزتيه علشان مبسوط وهيعيشك عيشة كويسة ويهنيكى... كل ده طلع ع الفاضى لا قاعدة ف شقتك ولا جوزك معاكى يبقى متمسكة بيه على ايه"
"انا قاعدة هنا علشان مش هقدر اقعد بالعيال لوحدى...لا هعرف اراعيهم لوحدى ولا اصرف عليهم..والشقة موجودة ومقفولة هتفيدنى بأيه وجوزى مش معايا"
"وضرتك؟"
"مالها؟"
"مش خايفة تاخد منك الشقة؟"
ضحكت مها بسخرية
"دى طلعت غير ما كنت فاكرة خالص... هى سابت لى كل حاجة...الشقة وطه وهنا... وكل اللى هى سابته انا مش قادرة اتهنى بيه... ياريتها كانت اخدت الشقة وقاسمتنى ف طه بس فضل بيننا مش سابنا احنا الاتنين"
قامت الام وهى ماشية
"طيب...انا ماشية مش عايزة حاجة؟
"لا شكرا"
راحت وصلتها ع الباب ورجعت لقت نرمين قدامها
"مها"
"نعم"
"هقولك حاجة بس مش قصدى حاجة وحشة والله"
"قولى"
"امك واطية اوى"
لسه مها هترد عليها... لقت نفسها بتضحك
نرمين"طب وحياة امك لنعملهم عيد ميلاد بالعند فيها... غاظتنى اوى"
"بس بقى يانرمين ...دى امى برضه"
"بس قوليلى انتى طلعتى بتحبى طه اوى كده"
مها بانكسار"مش جوزى وابو ولادى...لما هتخلفى هتعرفى ان جوزك قبل ما يبقى ابو ولادك حاجة ولما يبقى ابو ولادك حاجة تانية خالص"
نرمين بانكسار"اتجوز!! انا قربت افقد الامل خلاص"
                         ********************

عالية ف المطبخ عند هدير... سمعت صوت الموبايل ف الاوضة
راحت ترد...بصت ع الرقم...رقم غريب...ردت
"الو"
وسمعت صوت طه
"وحشتينى ياعالية"
صرخت وهى مش مصدقة
"طه.... حبيبى انت فين؟ كده تعمل فينا كده؟؟ انت كويس؟؟؟ انت وحشتنى اوى"
"انتى وحشتينى اوى يا حبيبتى... عاملة ايه طمنينى عليكى... بتشوفى ماما واحمد واروى ونرمين"
"ايوه يا طه...بشوفهم وكلهم كويسين... كلنا هنتجنن عليك انت فين طمنى"
"اطمنى... اسمعى الكلام اللى هقولهولك ده...افهميه ونفذيه بالحرف الواحد"
"خير؟؟"
                         *******************

عالية ماشية ف مطار الكويت بعد ما وصلت
بتدور بعينيها على طه... اول ما شافها جرى عليها وجريت عليه
حضنوا بعض بكل شوق وحب وحنين
"وحشتينى اوى يا حبيبتى... اوى"
"حبيبى انا مش مصدقة انى شفتك تانى"
كانت بتعيط من فرحتها...حست ان الناس منتبهه لهم
"طه الناس بتتفرج علينا"
بص طه حواليه كان فيه ناس بتبتسم وناس مكسوفة
"احم...ايه الاحراج ده...اعمل ايه نسيتينى الدنيا"
"فهمنى بس انت بتعمل ايه هنا وجيت امتى"
"انتى قلتى لحد انك جاية؟"
"لا هدير وابلة فاتن بس زى ما قلتلى...بس حرام يا طه كلهم هيتجننوا عليك مامتك ومها ونرمين"
"متجيبليش سيرتها يا عالية"
"حرام يا طه...دى اتكسرت خالص والله وبقت واحدة تانية"
"مش مصدق ...يالا بينا بس ونكمل كلامنا ف البيت"
                          *******************

طه بيفتح باب شقة...وبيسبق عالية
"اتفضلى...بيتنا اللى بعيد عن الناس كلها"
دخلت عالية... وهى بتبص حواليها
"سيبك من البيت اى حتة معاك تبقى جنة بالنسبة لى...احكيلى انت اختفيت فين كل ده وازاى قدرت تبعد عننا كده وبالطريقة دى"
دخلوا وقعدوا...وبدأ يحكى لها
"لما حسيت انك فعلا مش عايزانى ومش راضية تردى عليا وف نفس الوقت مها بتضغط عليا بولادى كرهت الدنيا وعيشتى وكنت بتمنى الموت كل لحظة... قابلت واحد صاحبى بيشتغل ف مكتب سفريات ولقيت انه عنده عقود عمل مضمونة هنا ف الكويت... مشيت ف الحكاية دى واستلفت فلوس ودفعتله حق العقد واخدت اجازة بدون مرتب ومقلتش لحد خالص وجيت... جيت وانا مقرر انى هجيبك نعيش هنا بعيد عن كل حاجة فرقتنا"
"وولادك يا طه؟؟ هانوا عليك تبعد عنهم"
رد بوجع" اه... علشان اتعود لما اطلق مها على بعدهم عنى"
"تطلقها؟؟"
"ايوه؟"
"لا ياطه... المرة دى لأ"
"لأ ليه"
"علشان ولادك مالهمش ذنب ف حاجة خالص"
"انا عايزك انتى بس... انا سألت هنا على دكتور كويس وكنت مستنى لما تيجى واحجزلك عنده... انا عايز عيال منك انتى يا عالية... ولو مجوش يكفى راحتى معاكى"
"بس عيالك اللى جم فعلا دول متاخدهمش بذنب امهم"
"اعمل ايه؟؟"
"اول حاجة لازم تطمنهم عليك... وبعد كده نبقى نشوف الحياة بيننا كلنا هتمشى ازاى"
                        *******************

مها فى اوضة عالية ف بيت نرجس
ولادها جنبها نايمين وهى بتعيط
تدخل عليها نرجس...تبص لها وتقعد قصادها على طرف السرير
تطبطب عليها
"الحمدلله اننا اتطمنا عليه"
مها بتعيط بحرقة
"مش عايزة اضايقك زيادة بس انا قبل جوازك بيوم قلت لك اى مقارنة معاها هيختارها هى... انتى مسمعتيش الكلام وعاندتى وخيرتيه وقارنتى...وصلتيه انه سابنا كلنا واخدها هى بس معاه"
"هو غلط انى اكون عايزة جوزى ليا لوحدى"
"محدش كذب عليكى... انتى اتجوزتيه وكنتى عارفة كل حاجة"
"انتى مش حاسة بالنار اللى جوايا... انا قاعدة هنا وهى معاه هناك"
"يا مها...هى كمان كانت بتبقى هنا وهو معاكى وكنتى مانعاه يجيلها"
"قصدك انى بشرب من نفس الكاس... شمتانة فيا"
"لا اله الا الله...هشمت فيكى ليه بس ده انا شايلاكى انتى والعيال ف عينيا"
مها بتعيط بحرقة... طبطبت عليها نرجس تانى
"هو قالك ايه عامل فيكى كده؟"
"قالى انى لو عايزة اتطلق هيطلقنى... ولو مش عايزة هخلينى هنا وهى هتبقى معاه هناك وهينزل اجازة كل سنة شهرين"
"انتى عايزة تطلقى؟"
ردت مها وهى بتعيط "لأ مش عايزة"
"خلاص امسحى دموعك واحمدى ربنا انه بخير... ومهما غاب مسيره يرجع ان شاءالله"
                      ********************

عالية وطه قاعدين ف عيادة دكتور
الاتنين متوترين والدكتور بيبص ف الورق اللى قدامه
الدكتور"التحاليل متمنعش اننا نجرب العملية تانى"
عالية بقلق"هى ممكن تفشل تانى؟"
الدكتور"وممكن تنجح...خليكى متفائلة"
طه"يعنى يادكتور اى نسبة اكتر...النجاح ولا الفشل"
الدكتور"والله مفيش حاجة تبين انها ممكن تفشل ومع ذلك دى حاجة منقدرش نجزم بيها...لو موافقين نعمل العملية وربنا ييسر ان شاءالله"
طه وهو بيبص لعالية
"نعمل العملية ونتوكل على الله"
                     **********************

عالية على السرير.. وجنبها طه... عالية بتتكلم ف التليفون
"الحمدلله يا ابلة... طه شايلنى ف عينيه والله وخصوصا بعد العملية... اه تعبانة شوية بس مبتحركش من السرير الا بسيط... ميار عاملة ايه هتولد امتى؟؟ لا هى هتسبقنى ان شاءالله... ابلة عايزة اقولك على حاجة... قولى لطه انزل اولد ف مصر... هو مش عايز ينزل اول اجازة علشان زعلان منهم... اهو معاكى"
ناولت طه التليفون
"ايوه يافاتن ازيك... الحمدلله كويسين... ماتولد هنا وخلاص... اه بكلمهم كلهم بس مش عايز انزل علشان عارف انى هرجع للمشاكل تانى... ربنا يسهل هبقى اعرفك طبعا...مع السلامة"

بعد ماقفل سألته عالية
"اقنعتك ولا لسه؟"
"الحكاية مش اقتناع...انا ما صدقت بعدنا عن المشاكل"
"حرام ياطه... مامتك واختك نفسهم يشوفوك..وولادك كبروا من غير ما يعرفوك... ومها برضه ليها حق عليك"
"يا سبحان الله...ده انتى المفروض تخلصى حقك منها"
"يعنى اساعدك ع الظلم؟؟ انا بحبك ومش عايزاك تظلم خالص ياطه... ننزل اجازة اولد هناك ونقعد كلنا مع بعض نحدد نظام حياتنا باللى يرضينا كلنا"
                          ********************

طه وعالية خارجين من المطار...عالية بطنها كبيرة
نرجس ونرمين ومها مستنيينهم...وماسكين احمد واروى ف ايديهم
اول ما شافوهم جريت نرجس على طه وحضنته وهى بتعيط
نرمين سلمت عليه وحضنته... شاف ولاده
نرجس قالت لهم "سلموا على بابا"
حضنهم طه وهما ساكتين لانهم مش عارفينه
مها واقفة مكانها....قربت منه على استحياء تسلم عليه
سلم عليها ... عيطت... حضنها وهو بيطبطب عليها
                    **********************

فى بيت نرجس...قاعدين كلهم
طه اخد ولاده على حجره
مها ونرمين بيحضروا السفرة
طه نادى على مها...راحت له
طه"اقعدى يامها... عاملة ايه؟"
مها"الحمدلله...حمدالله على سلامتكم"
طه"الله يسلمك... جهزى هدومك وهدوم احمد واروى علشان هنروح النهاردة"
بصت له مها وبصت لعالية...حست انها مش فاهمة حاجة
طه"حاليا ... ف الاجازة هنقعد ف بيتنا وعالية هتقعد هنا عند ماما ...عالية هتسافر معايا ولو حابة تسافرى معانا ماشى وهتبقى كل واحدة فيكم ف شقة مش عايزة خليكى هنا والاجازة هبقى معاكى... لحد ما العقد بتاعى يخلص وهنستقر هنا وكل واحدة فيكم تقعد ف شقة بولادها"
مها"ولادها؟"
طه"اه...اصل عالية حامل ف 3 توائم...تقريبا انا تخصص توائم يا اما انتم متفقين عليا"
عالية"الحمدلله يا طه انا مكنتش طايلة ضفر عيل"
طه"الحمدلله...وان شاءالله الاخوات يتربوا وهما قريبين من بعض... هااا يا مها قلتى ايه؟؟ تسافرى معانا ولا تقعدى هنا لحد العقد ما يخلص"
مها بتردد"مش عارفة"
طه"طيب فكرى براحتك ولسه قدامنا وقت"
نرجس تنادى عليهم
"يالا ياولاد... الغدا جاهز"

                     النهاااااااااااااااااااااااااااية
الرجوع الى أعلى الصفحة اذهب الى الأسفل
 
حكاية هل يشفع الحب؟
الرجوع الى أعلى الصفحة 
صفحة 2 من اصل 2انتقل الى الصفحة : الصفحة السابقة  1, 2

صلاحيات هذا المنتدى:لاتستطيع الرد على المواضيع في هذا المنتدى
موقع فرحة مصر :: قسم الادب والثقاف Department of Literature and Culture :: القصص والحكايات - Stories and anecdotes-
انتقل الى: