حكاية كان حلم

موضوع: حكاية كان حلم الأحد يناير 03, 2016 12:27 pm

الحلقة 1
ماجد خلص لبس فى اوضته... قفل الهاند باج اللى ع السرير
واخدها على كتفه وخرج من الاوضة
مامته حاطة الفطار وقاعدة مستنياه
"صباح الخير ياماما"
"صباح النور ياحبيبى... انا مستنياك تفطر معايا"
قعد ماجد..وبدأ ياكل بسرعة
"هى نشوى فين"
"نايمة... انا عارفة بنات ايه اللى تفضل صاحية طول الليل وتنام نص النهار"
باب الاوضة يتفتح...وتظهر نشوى
"سامعاكى ياماما"
ماجد"ههههههه شكلك لسه منمتيش"
نشوى وهى بتقرب من ماجد وبتاخد اللقمة اللى ف ايده وبتاكلها
"لا لسه...حسيت انى جعانة قلت افطر معاكم وبعدين انام"
الام"يالا شوفى لك يومين فى بيت ابوكى قبل ماتروحى بيتك وتشيلى المسئولية كلها لوحدك"
نشوى وهى بتاكل"لما انتى عارفة ياماما انى هشيل المسئولية دى قريب...سيبينى اشوف لى يومين"
ماجد وهو بيقوم من ع الاكل
"الحمدلله"
الام"مالك يابنى انت لحقت"
ماجد"يدوب ياماما علشان لازم اروح بدرى عندى اول تمرين الساعة 10"
الام"ربنا يوفقك يا حبيبى ويوقفلك ولاد الحلال"
نشوى"ويرزقك من وسع يااخويا يابن امى وابويا علشان تجيبلى كل اللى انا عايزاه"
الام"وهو بيأخر عنك حاجة"
ماجد"ادعى يالمضة ...بتدعيلى ولا بتدعى لنفسك"
نشوى"وانا وانت ايه مش واحد"
وحدفتله بوسة وهى قاعدة ضحك ماجد وهو بيفتح الباب وبينزل

فى بيت نغم
قاعدين بيتغدوا نغم وباباها ومامتها
نغم"عملت لى ايه يابابا فى الموضوع اللى كلمتك فيه"
الاب"موضوع ايه"
الام"يوووه انت نسيت... مش قالتلك عايزة تشتغل"
نغم"كده يابابا اخد الموضوع باستهتار...انا بجد زهقت من قعدة البيت"
الاب"وايه اللى طلعها فى دماغك يعنى ماانتى بعد مااتخرجتى قلتى عايزة تقعدى ترتاحى وتعبتى من الكلية وقرفها"
نغم"وبقالى سنة قاعدة ...كفاية بقى"
الاب"ماشى انا معنديش مانع بس مش عارف والله تشتغلى ايه"
نغم"يعنى انا خريجة تربية رياضية هشتغل ايه ياتشوفلى عقد فى مدرسة يا تشوف لى عقد فى نادى... اى حاجة وانا من ناحيتى بدور فى اعلانات الجرايد وعلى النت واللى يلاقى حاجة ياريت"
الام"ربنا يقدملك اللى فيه الخير ان شاءالله"
الاب"ان شاءالله"
الام"ايوه خليها تنزل تشوف الناس والناس يشوفوها علشان ربنا يرزقها بابن الحلال"
نغم"كل شئ بأوان ومتقلقيش النصيب هييجى هييجى"
الاب"شفتى بنتك اعقل منك والله"
الام"بقى كده...شايفنى يعنى مجنونة"
الاب"وانا اقدر ...ده انتى ست العاقلين"
الام"ايوه كده "
ضحكت نغم وهى بتبص لمامتها وباباها بحب وهى بتقول فى سرها
"ربنا يخليكوا ليا يارب ومتحرمش منكم ابدا"

ماجد رجع البيت بالليل... شاف مامته قاعدة وفاتحة التليفزيون وهى نايمة...راح قفل التليفزيون
"ايه ياماجد قفلته ليه...انا صاحية"
"قومى ياماما دماغك مايلة وكده رقبتك هتوجعك"
"استنى احضرلك العشا"
"لا متتعبيش نفسك... انا هتصرف قومى انتى"
قامت الام دخلت اوضتها... ودخل ماجد حط الهاند باج فى اوضته
واخد منها هدوم حطها فى سبت الغسيل فى الحمام
واخد دش وخرج ...قعد قدام التليفزيون يقلب فى القنوات
بص على الساعة كانت 12... وشاف نور اوضة نشوى منور
قام خبط عليها...مردتش...سمعها بتضحك
خبط تانى... مردتش...فتح الباب بهدوء
شافها قاعدة على الكمبيوتر وحاطة السماعات فى ودنها
"طبعا مش سمعانى"
نشوى بتتكلم مع حد تانى"ثوانى وهكلمك تانى"
قامت نشوى من مكانها وقعدت جنب ماجد اللى كان قعد على السرير
"قعدت اخبط مسمعتنيش"
"ياحبيبى انت تدخل اى وقت من غير استئذان"
"كلينى يابت بكلمتين ماانا عارفك"
"ههههه لاوالله ده انت حبيبى"
"كنت حبيبك قبل مايدخل سى كريم قلبك"
"اللى فى القلب فى القلب يا مجاميجو انت اخويا حبيبى وهو يدوب بس خطيبى حبيبى جوزى باعتبار ماسيكون"
"ههههههههه لا واضح طبعا انه يدوب بس...كنتى بتكلميه صح"
"اه عايز حاجة"
"لا خلاص خدى راحتك...انا كنت عايز نتعشى مع بعض"
"عيونى ياحبيبى...اقلب كريم واجيلك"
"ههههه يخربيت ألفاظك"
قام ماجد وهو على الباب كانت نشوى بتقعد على الكمبيوتر تانى
"بقولك ايه...اقلبيه بسرعة الله يخليكى...عصافير بطنى بتستغيث"

بعد اسبوع فى بيت نغم
بعد مارجع الاب بالليل
كانت الام قاعدة قدام التليفزيون
"السلام عليكم"
قامت الام تستقبله
"وعليكم السلام... حمدالله ع السلامة... ادخل غير هدومك لحد مااحضر العشا"
"لا استنى ...فين نغم"
"فى اوضتها...عايزها ليه"
"اندهيلها وانا هتكلم مرة واحدة"
ونادت الام"يا نغغغغغغغغغم"
جت نغم من اوضتها
"نعم ياماما...حمدالله ع السلامة يابابا"
الاب"الله يسلمك...تعالى يانغم عايزك"
قعدوا كلهم
الام"خير يااسماعيل... شكل الحكاية فيها عريس"
الاب"لا يا فاطمة مش عريس... ده شغل"
ونطت نغم من مكانها وهى بتتعدل
"بجد يابابا... ها فين وهبدأ امتى"
الاب"انا من ساعة ماقلتيلى وانا مخلتش حد من معارفى الا وكلمته المهم من شوية قابلت واحد من اصحابى وقالى انه كلم رئيس مجلس ادارة نادى الفيروز يشوفلك شغل وهو قال انهم عندهم مدرب سباحة واحد بس ومحتاجين بنت علشان فيه بنات مش بيوافقوا يدربهم شاب واحنا داخلين على صيف وهيبقى فيه شغل كتير وهو لوحده مش هيقدر"
نغم"حلو اوى كده...هبدأ امتى"
الاب"بصى هو عايزك بكرة تروحى الساعة 12 للاستاذ فاروق غالب هو مستنيكى وهتتفقوا ويقولك المواعيد وكل حاجة"
الام"وهى يعنى هتروح لوحدها ماتروح معاها يااسماعيل"
الاب" وماله..استأذن من الشغل واروح معاها"
نغم"بابا معلش ممكن تسيبنى اروح لوحدى واعتمد على نفسى ...مش معقول اول يوم شغل هروح وبابا معايا"
الاب"كلام سليم...ربنا يوفقك يانغم"

تانى يوم... فى النادى
ماجد قاعد على البيسين بعد ماخلص تمرينين
جه عليه مصطفى
"صباح الفل ياماجد"
"صباح العسل يادرش...اخبارك ايه"
"تمام ..ايه انت بريك ولا ايه"
"اه بريك ساعة وعندى تمرين الساعة 1"
"طيب ماتيجى معايا انا عندى تمرين دلوقتى"
"ماشى يالا بينا"
قاموا الاتنين واتجهوا ناحية ملعب الكورة
**********************
بعد مادخلت نغم النادى وسألت على البوابه على ا\فاروق غالب
وصف لها الامن مكتبه
لما دخلت النادى كانت ماشية على الوصف بالظبط
بس حست انها تايهه
النادى اغلبه تمارين لاطفال صغيرين لاننا فى بداية الصيف واغلب المراحل الدراسية لسه مخلصوش امتحانات

ملقيتش حد قدامها غير 2 شباب متجهين ناحية ملعب الكورة

اتجهت نغم ناحية ماجد ومصطفى علشان تسألهم

ماجد ومصطفى شايفين بنت متجهه ناحيتهم...اول مرة يشوفوها فى النادى... الاتنين وقفوا يبصوا لها وهى بتقرب منهم

الحلقة 2
اتجهت نغم ناحية ماجد ومصطفى علشان تسألهم

ماجد ومصطفى شايفين بنت متجهه ناحيتهم...اول مرة يشوفوها فى النادى... الاتنين وقفوا يبصوا لها وهى بتقرب منهم

نغم"لو سمحتم فين مكتب ا\فاروق غالب"
مصطفى"بصى المبنى اللى هناك ده...فى الدور التانى"
نغم"شكرا"

مشيت نغم فى اتجاه المبنى اللى فيه المكتب

ماجد ومصطفى بيتابعوها
مصطفى"مين دى"
ماجد"وانا ايش عرفنى"
مصطفى"حلوة"
ماجد"اه"
مصطفى"هنفضل واقفين هنا"
ماجد"لا"
مصطفى"ما يالا بقى"

كان الحوار كله والاتنين بيبصوا على نغم لحد مااختفت جوه المبنى

نغم طالعة السلم... وصلت للمكتب
الباب مفتوح وواضح انه فيه ناس
اتقدمت نغم بخطوات مترددة لحد مابقت على الباب
قالت لنفسها"يالا اعتمدى على نفسك وخليكى جريئة"
خبطت خبطتين على الباب المفتوح ودخلت ووقفت قصاد فاروق
"صباح الخير ا\فاروق"
"اهلا يابنتى"
"انا نغم اسماعيل جاية لحضرتك من..."
"اه...اهلا اهلا اقعدى وثوانى هكون معاكى"
قعدت نغم واستنت لحد ما فاروق خلص كلام مع الناس الموجودة
"اهلا بيكى يانغم"
"اهلا بحضرتك... انا جيت حسب المعاد علشان الشغل"
"انتى خريجة ايه"
"تربية رياضية شعبة سباحة...وانا اصلا اخدة ميداليات فى السباحة من النادى اللى كنت بلعب فيه وانا صغيرة ...وانا..."
"خلاص يانغم عرفنا انك جامدة"
ابتسمت نغم بخجل"ربنا يخلى حضرتك"
"بصى يا نغم احنا داخلين على صيف وهيبقى فيه شغل كتير وخصوصا اننا هنعمل تدريب للسيدات فقط غير الاطفال...احنا معندناش هنا غير ماجد مدرب سباحة وهو بصراحة قايم بالشغل كله على اكمل وجه وعمره ماقصر"
"وانا ان شاءالله مش هقصر وهتجرب وتشوف"
"تمام...بالنسبة للاجر فالعقد بيكون بسيط انما اللى بيفرق عدد المجموعات اللى بتدربيها ...يعنى زى المدرس اللى بيشتغل بالحصة كده"
"فاهمة حضرتك"
"المواعيد انتى بتحدديها مع المتدربين واحنا عندنا اكتر من بيسين يعنى لو انتى وماجد عندكم تدريب فى نفس الوقت تقدروا تتفاهموا على مين هيدرب فين ومين هياخد البيسين التانى...لحد مانخلص البيسين المغطى اللى هيكون للسيدات فقط ده هيبقى خاص بيكى انتى وساعتها ممكن تاخدى الاطفال تدربيهم هناك"
"حاضر"
"طيب تقدرى تنزلى كده تاخدى جولة فى النادى تتفرجى واستنينى عند البيسين وانا هخلص اللى ف ايدى وانزل اعرفك على ماجد واقسم المجموعات بينكم"
قامت نغم وهى بتقوم من مكانها
"ميرسى اوى لحضرتك... بعد اذنك"

نزلت نغم اتمشت فى النادى 10 دقايق وخافت ان فاروق ينزل قبلها
راحت قعدت على البيسين
قاعدة...وفاروق مجاش ...كل شوية تبص فى الساعة
الساعة بقت واحدة الا خمسة لما شافت بعض الشباب بييجوا يقعدوا عن البيسين
بعدها جه واحد من اللى سألتهم عن مكتب فاروق
فهمت ان ده ماجد لما بدأ يتكلم مع الشباب وسمعتهم بيقولولوا
"يا كابتن"

ماجد لاحظ نغم قاعدة لوحدها...كل شوية يبص عليها
مستغرب مين دى اللى قاعدة كده لوحدها

نص ساعة ونزل فاروق وقعد معاها...لحظات ونادى على ماجد
راح لهم ماجد
"مساء الخير ا\فاروق"
فاروق"مساء النور ياكابتن...اعرفك على زميلتك الجديدة كابتن نغم"
ماجد"اهلا ياكابتن"
نغم"تشرفنا ياكابتن"
فاروق"هات جدول مواعيد التدريبات بتاعتك ياماجد علشان نخفف من عليك شوية "
ماجد اتفاجئ بكلام فاروق... هو بيحب شغله ومشتكاش
"حاضر يا ا\فاروق بس انا مشتكيتش من الشغل"
فاروق"انا عارف انك بتتعب معانا اوى بس احنا داخلين على موسم ومش هتقدر لوحدك"
قام ماجد وجاب الجدول المكتوب من شنطته وهو متضايق
اخد فاروق الورق...وبدأ يقسم وادى لنغم 4 مجموعات
"المجموعات دى مبدئية يانغم ولما الاجازة تبدأ هتلاقى المجموعات تزيد "
نغم"اوك... انا تحت امرك"

بعد شهرين من شغل نغم فى النادى
مصطفى وماجد قاعدين مع بعض
جت نغم عليهم وعدت من جنبهم
"صباح الخير ياكباتن"
مصطفى"صباح النور ياكابتن نغم"
مشيت نغم فى طريقها
"ايه ياماجد انت مردتش عليها السلام"
"بص يامصطفى انا متضايق من البت دى"
"ليه ياعم دى فى حالها ومالهاش دعوة بحد...حتى لما انت بتصمم على البيسين الكبير بتسيبهولك وتروح الصغير"
"يابنى من يوم ماجت وهى قاسمت معايا الشغل"
"ياعم ماجد ماانت شايف زحمة الصيف كنت هتقدر على كل ده لوحدك.. اهى ريحتك شوية"

ماجد داخل البيت ...كانت مامته ونشوى قاعدين مع بعض
"السلام عليكم... عاملين ايه"
قعد ماجد على اقرب كنبة وبص لنشوى
"وشك بيضحك شكل كريم كان هنا"
ضحكت نشوى اكتر
"طول عمرك اروب يا ميجوووو"
الام"ماجد... كريم كان هنا وقال انه خلص توضيب الشقة وكان عايز يحدد معانا معاد الفرح علشان يحجز قاعة"
ماجد"مبروك يا نوشة الف مبروك... ربنا يتمم بخير"
نشوى"الله يبارك فيك وعقبالك"
ماجد"ان شاءالله"
الام"دلوقتى اختك ناقصها شوية حاجات فى الفرش وحاجات بسيطة للمطبخ"
ماجد"عيونى ياماما... هو كريم قال عايز امتى"
الام"قال على شهر 10 كده"
ماجد"تمام يعنى قدامنا بتاع 3شهور...بصى بكرة هقبض هديلك اللى اقدر عليه وكل شهر برضه...وشهر 9 يبيقى فيه المسابقى السنوية اللى شرم ودى باخد منها مبلغ كويس هبقى اديهولك كله... يكفيكى ولا هتحتاجى تانى"
الام"لا يكفى ان شاءالله وان احتاجت هبقى اعمل جمعية ونسددها بعد مااختك تتجوز"
ماجد"طب خلاص محلولى الحمدلله... لولولى ى ى ى"
نشوى"ايه الزغروطة العبيطة دى ياماجد"
ماجد"زغروطة رجالى ياعبيطة لازم تبقى كده"

تانى يوم فى النادى... راح ماجد ومصطفى يقبضوا
ماجد بيعد الفلوس"ايه ده"
"ايه ياماجد"
"مرتبى ناقص 500 جنيه"
"يمكن غلطة...اسأل ا\ محمد"
ورجع ماجد تانى للحسابات
"ا\محمد انا مرتبى ناقص 500 جنيه هو فيه غلط ولا حاجة"
محمد"لا ياكابتن الفرق ده فى الاجر المتغير بتاع التدريبات"
ماجد"اه..ماشى شكرا"
نزل ماجد لمصطفى وحكى له رد محمد
"شفت اهى الست نغم جت كمان علشان تقاسمنى فى رزقى... اعمل ايه ونشوى هتتجوز كمان 3شهور"
"ياماجد متقولش كده الارزاق على الله"
"استغفر الله العظيم يارب"

فى شهر 8...نغم فى بيتها...اول مادخلت
"باباااااا...ماماااااااااااااا"
الام"ايه يانغم"
وجه الاب من اوضته...قعدوا كلهم واتكلمت نغم بفرحة
"ا\فاروق رشحنى انى اروح المسابقة السنوية اللى بيشترك فيها النادى كل سنة فى شرم الشيخ"
الام"تسافرى لوحدك يعنى"
نغم"مع الفريق اللى مشترك فى المسابقة ...هكون المشرفة"
الاب"هتقعدى قد ايه"
نغم"10 ايام...وطبعا مش معقول هتقولى لا يابابا على حاجة مهمة زى دى"
الاب مبتسم"لا مش هقول حاجة طبعا...تروحى وتيجى بالسلامة"
قام الاب..وسكتت الام بعد ماشافت فرحة نغم... وقالتلها
"بقولك ايه لسه زميلك ده بيعاملك وحش"
"هو متجنبنى وانا متجنباه تماما... ياماما بيعاملنى على ان النادى ده بتاعه وانا جيت اشاركه فيه..انا عارفة انه مش طايقنى وعلشان كده سايباه يغلى ف نفسه وبجتهد فى شغلى ومليش دعوة بيه"
"ربنا يهديلك العاصى يانغم ويوقفلك ولاد الحلال"
"يارب ياماما... ممكن تحضريلى الغدا لحد ماخد دش"
"عيونى يا ضنايا"

فى النادى...نغم فى البيسين بتدرب اطفال
ماجد قاعد سرحان وبيكلم نفسه فى سره
"يعنى كمان قاسمتينى فى رزقى وسكتت انما المسابقة اللى مستنيها علشان جواز البنت الغلبانة دى اعمل ايه... اجيب فلوس منين واتصرف ازاى... السفر فاضل عليه 3ايام... ربنا ميبعتلكيش حاجة تعطلك وتعتذرى واسافر انا... اعمل ايه"

خلصت نغم التدريب وراحت ناحية تغيير الملابس
ماجد لسه قاعد سرحان وبيكلم نفسه
"وانا لسه هستنى لما يحصل حاجة او ممكن متحصلش"

قام ماجد...اخد كيسين شامبو صغير كان فى شنطته
راح قدام باب تغيير الملابس ...فتح الكيس باسنانه
و فرغ اول كيس وبعدين تانى كيس قدام الباب
وهو بيبص حواليه وبيتأكد ان محدش شايفه

راح وقف بعيد يراقب الباب اللى عنده الشامبو وهو بيقول لنفسه
"مضطر بقى يانغم ازحبقك علشان تقعى على ايدك ولا رجلك وتضطرى ترتاحى فيها اسبوعين تلاتة اكون رجعت انا من المسابق"

دقايق وشاف نغم خارجة من اوضة تغيير الملابس
وحصل المتوقع...اتزحلقت نغم
نغم وقعت على ضهرها ودماغها اترزعت فى الارض
وقف ماجد مستنى نغم تقوم من الوقعة
لحظات بتمر بطيئة...نغم مش بتتحرك نهائى

الحلقة 3
وقف ماجد مش عارف نغم مش بتقوم ليه
جرى عليها وف نفس الوقت كان بعض الموجودين لاحظوا وقعتها
واتجمعوا عليها....محاولات افاقتها باءت بالفشل
ماجد بيحاول يفوقها بكل الحاح...مفيش فايدة
مصطفى واقف وسط الناس ومستغرب لهفة ماجد على نغم
ردود الافعال سريعة والتصرفات اسرع...ماجد اتصل بالاسعاف
وقبل ماالاسعاف ييجى عرَض واحد من رواد النادى انه يوديها المستشفى بعربيته اسرع

شالها مصطفى وماجد ونيموها فى العربية
وركبت معاها واحدة من اولياء امور الاطفال اللى كانت بتدربهم نغم

وقف ماجد ومصطفى بيبصوا على العربية وهى ماشية
ماجد"احنا هنسيبها كده"
مصطفى"احنا مالنا ياماجد"
ماجد"انت ايه مش زميلتنا... واللى راحت معاهم دول ناس اغراب"
مصطفى"نعمل ايه طيب"
ماجد"انت لسه هترغى...انا رايح لهم المستشفى"
مصطفى"وانت عارف هيروحوا مستشفى ايه"
ماجد"سمعت الست بتقول نوديها مستشفى الرحمة علشان اقرب مستشفى"

وصل ماجد ومصطفى المستشفى
وهما على السلم شافوا اللى وداها بعربيته نازل
ماجد"سلام عليكم يااستاذ...هى كابتن نغم فاقت"
الرجل"لا هما اخدوها فى الطوارئ وودوها على الرنين المغناطيسى"
ماجد رد بسرعة"متشكرين"
طلع ماجد ومصطفى وراه...ماجد بيسأل فى الاستقبال عن مكان الرنين...وصف له الموظف المكان
ماجد بيهرول ومصطفى وراه
شده مصطفى من دراعه
"ماتقف هنا وفهمنى...مالك ملهوف عليها كده ليه"
"صعبانة عليا يامصطفى ...بلاش؟...وياسيدى لو انت مستعجل ولا وراك حاجة اتفضل انت انا مغصبتكش تيجى معايا"
"ايوه انا ورايا شغل ...انا راجع النادى"
رجع مصطفى وكمل ماجد طريقه
***************
لما وصل ماجد للدور اللى فيه الرنين المغناطيسى
شاف الام وبنتها اللى جت مع نغم
اول ماشافت ماجد راحت عليه
"ياكابتن"
"نعم"
"دى شنطة كابتن نغم اللى كانت معاها لما وقعت انا طلعت الموبايل واتصلت بباباها...معلش خلى الحاجة معاك انا لازم امشى"
ومد ماجد ايده ياخد الشنطة..واتردد
"ممكن حضرتك تسيبيها تحت فى الاستقبال لانى همشى دلوقتى"
"اوك اللى يريحك"
نزلت الام وبنتها...وفضل ماجد واقف وهو قلقان
بعد ربع ساعة شاف الممرضين خارجين بنغم على السرير
وهى زى ماهى فاقدة الوعى
هم انه يروح يسأل الممرضات...لقى 2 بيجروا ناحية نغم وهما بيقولوا "بنتى...بنتى"
فهم ماجد ان دول اهل نغم...فضل واقف يراقبهم من بعيد
خاف يقرب يسألوه ايه اللى حصل
كل مابيفتكر ايه اللى حصل وانه السبب ...بيخاف
مشى ماجد وراهم من بعيد...لحد ماشاف الممرضين بيدخلوا نغم "العناية المركزة"
لما شاف واحدة من الممرضات خارجة...راح ناحيتها
"لو سمحتى هى الانسة اللى دخلتوها من هنا مالها"
"انت تعرفها"
"لالا هى بس صعبت عليا"
"هو لسه الدكتور مشفش نتيجة الاشعة بس شكلها كده دخلت فى غيبوبة"
"غيبوبة؟؟ليه؟؟"
"الناس اللى جابوها بيقولوا وقعت على دماغها"
"وهى مجرد وقعة تعمل كده"
"امر ربنا...بعد اذنك يااستاذ"
مشيت الممرضة وسابته واقف...خاف يهتم اكتر من كده حد يعرفه... فمشى من المستشفى خالص

دخل ماجد البيت... سمع صوت مامته ونشوى فى المطبخ
دخل على طول على اوضته وقفل عليه
سمع صوت نشوى بتقول
"اه والله ياماما سمعت صوت الباب...باين ماجد جه"
الصوت بيقرب من الاوضه...الباب بيتفتح
"انت جيت؟؟مالك فى ايه"
ماجد بيرد وهو مهموم وحزين
"مفيش حاجة"
"انت مش بيبقى عندك شغل دلوقتى"
واترددت كلمة شغل فى دماغ ماجد
"شغل... اه صحيح...المفروض اكون فى النادى مش فى البيت.. انا ايه اللى لخبطنى كده... وبعدين لو حد لاحظ غيابى يقول ايه"
نشوى"ماجد...ماااااااااجد...ايه مالك مبتردش ليه"
ماجد"مفيش يانشوى"
وقام رايح ناحية الباب...قابل مامته قبل مايوصل للباب
"مالك ياماجد"
"مفيش"
خرج بسرعة ورزع الباب وراه قبل مايسيب مجال للاسئلة من مامته او نشوى
وقفوا الاتنين يبصوا لبعض بعد ماجد ماخرج
الام"هو فيه ايه"
رفعت نشوى كتفيها وهى بتقولها"الله اعلم"

نغم نايمة على السرير ومتوصلها اجهزة كتير
مامتها وباباها حواليها...الام بتعيط بصمت متواصل
والاب كل شوية يقول
"لاحول ولا قوة الابالله... استغفر الله العظيم...قدر الله وماشاءفعل"
وكأنه بيصبر نفسه وبيصبر مراته بذكر الله

دخل الدكتور ومعاه ممرضة
الاب"طمنى يادكتور...بنتى مالها"
الدكتور"بصراحة وضعها صعب جدا الخبطة جت مباشرة فى المخ وفيه شرخ بسيط فى الجمجمة بس هيلتئم مش ده اللى يقلق"
الام بدموعها"لو كل ده ميقلقش اومال ايه اللى يقلق"
الدكتور"اولا الغيبوبة اللى دخلت فيها دى محدش يعرف هتفوق منها امتى"
الاب"لا حول ولا قوة الا بالله... الصبر من عندك يارب"
صوت بكاء الام كان اعلى ...طبطبت عليها الممرضة
كمل الدكتور"خلى املكم فى الله كبير ممكن تفوق بعد ساعات او ايام محدش عارف...اللى يقلق اكتر ان الخبطة كانت قريبة اوى من مركز الذاكرة فى المخ"
الاب"وده معناه ايه"
الدكتور"ولا نقدر نعرف غير لما تفوق ونعرف الخبطة اثرت ولا لأ"
الام"ياحبيبتى يابنتى...كان مستخبي لنا فين ده كله"
الممرضة"ادعيلها ياحاجة...بس معلش ربع ساعة واتفضلوا لان دى عناية مركزة ومينفعش فيها القعدة دى"

ماجد بقية اليوم وهو قاعد متضايق ولغى كل التدريبات
احساسه بالذنب بيوجعه وضميره بيأنبه
"بس انا مكنتش اعرف ان هيحصل كده"
التوتر ساد فى النادى كله لما عرفوا ان نغم فى غيبوبة
اخر اليوم بالليل بعد ماخرج ماجد من النادى
سرح وهو بيفكر فى اللى حصل...فضل ماشى لحد ماوصل المستشفى... دخل من الباب الرئيسى وراح عند العناية المركزة
جه ناحيته واحد من الممرضين
"حضرتك بتدور على حاجة"
"اه واحدة قريبتى هنا"
"ممنوع يااستاذ اتفضل دلوقتى وتعالى بكرة فى الزيارة"
طلع ماجد من جيبه 20 جنيه وحطها فى جيب الممرض
"مش هينفع اجى وقت الزيارة انا مش هطول ابص عليها بس"
ابتسم الممرض وهو بينقل ال20 جنيه من جيب البالطو الابيض لجيب البنطلون
"اه فهمت... طيب انا هدخلك دقيقتين بس اسمها ايه"
"نغم اسماعيل"
"دى ف غيبوبة يااستاذ مش هتحس بيك"
"معلش دخلنى ليها بس... بقولك ايه متعرفش حالتها ايه بالظبط"
"والله يااستاذ بيقولوا حالتها خِطرة وصعبانة ع الكل اصلها لسه صغيرة"
كان بيتكلم وهو ماشى وماجد ماشى وراه
وصلوا عند نغم
"انا هخرج اقف بره علشان لو حد جه اخليك تنزل من السلم التانى"

خرج الممرض...بص ماجد على نغم وهى نايمة
دموعه نزلت غصب عنه... قرب منها
مفيش صوت غير صوت الاجهزة
بصوت واطى ومسموع بدأ يكلمها
"سامحينى يانغم... والله ماكنت اقصد كل كده... انا اسف"
اتمنى انها ترد عليه وتقوله انها سامحته
بس كانت كل حاجة زى ماهى نفس صوت الاجهزة
فتح الممرض الباب
"يالا يااستاذ احنا اتفقنا على دقيقتين"
مسح ماجد دموعه وخرج ورا الممرض

دخل ماجد البيت ... حمد ربنا ان مامته مش قاعدة
والبيت كله هادى ومطفى ماعدا نور اوضة نشوى
فهم ان مامته نامت واكيد نشوى مش هتسمعه وهو داخل
دخل اوضته...غير هدومه وحدف نفسه على السرير كأنه بيرمى عليه همومه
فضل نايم وعينه على السقف وكأن السقف شاشة عرض بتعرض احداث اليوم...الدموع نازلة من جنب عينيه على المخدة
"معقول انا عملت كده...ليه ؟؟وازاى قدرت افكر كده"
ميعرفش هو فضل كده قد ايه... هو صحا من النوم بعد غفلة بسيطة على صوت خبط عالى على الباب
قام من النوم... خرج من اوضته
مامته على باب اوضتها ...صحيت على صوت الخبط
نشوى على باب اوضتها... قامت على صوت الخبط
ماجد بيفتح الباب... لقى قدامه ضابط وعساكر
قبل ما يسأل فاجئه الظابط
"فين ماجد عبد السلام"
وبصوت خايف رد ماجد
"انا"
شاور الظابط للعساكر
"اقبضوا عليه"
ماجد"ليه"
الظابط"انت متهم بقتل نغم اسماعيل فيه شاهد شاف الواقعة"
ماجد"قتل!!! هى ماتت؟؟"

الحلقة 4
شاور الظابط للعساكر
"اقبضوا عليه"
ماجد"ليه"
الظابط"انت متهم بقتل نغم اسماعيل فيه شاهد شاف الواقعة"
ماجد"قتل!!! هى ماتت؟؟"
الظابط"خدووووه"
هجم العساكر على ماجد وشدوه بره الباب
نشوى ومامته بيعيطوا
ماجد"مكنش قصدى... مكنش قصدى"
نشوى"ماجد... ماجد...ماجد"

نشوى"ماجد....ماجد....ماجد"
فتح ماجد عينيه ونشوى جنبه بتصحيه
ماجد"ايه... نشوى؟؟؟فى ايه"
نشوى"انت كنت بتتقلب وتقول كلام مش مفهوم...فصحيتك"
ماجد"كابوس"
مدت نشوى ايدها مسحت دمعة كانت نازلة من عين ماجد
"مالك ياماجد"
"مفيش يانشوى...كنت بحلم بس ..عادى يعنى"
نشوى بابتسامة"اول مرة تنام من غير ماتيجى ترخم عليا"
ماجد بجدية"معلش يانشوى...انا هنام"
واتدور وادالها ضهره وهو بيقولها
"تصبحى على خير"
"مش هتتعشا طيب"
"لا اتعشيت بره"
فهمت نشوى انه مش عايز يتكلم قامت قفلت النور والباب وخرجت

تانى يوم فى النادى...ماجد راح فى معاده
بدأ تدريباته وعلى الساعة 12 جه مصطفى
"صباح الخير ياماجد"
"صباح النور"
"ايه لسه عندك تمرين"
"اه... لسه ساعة كمان"
"طيب هروح التمرين بتاعى واجيلك"
"ماشى"

بعد ساعة... جه مصطفى وقعد جنب ماجد
"ايه حكايتك بقى"
"حكاية ايه"
"من امبارح وانت مش طبيعى من ساعة اللى حصل لنغم"
ورد ماجد بقلق
"مش طبيعى ازاى يعنى"
"شكلك متأثر اوى يعنى... مع انك مكنتش بتطيقها"
"صعبت عليا"
"يا واد ياحنين"
قالها مصطفى وهو بيضحك
ماجد بيبص له بغضب
"ايه ياعم ...انا بهزر معاك بتبص لى كده ليه"
"مفيش يا مصطفى مخنوق بس شوية"
"احكيلى ياصاحبى...مالك"
سكت ماجد مش عارف يحكى ولا يسكت
قاطعتهم بنت اول مرة يشوفوها
"هاى... مين كابتن ماجد"
قام ماجد وقف...
"انا ماجد"
مدت ايدها تسلم عليه
"انا يسرا ... زميلتك الجديدة"
مد ايده يسلم وهو مستغرب ان بالسرعة دى جابوا مدربة مكان نغم
مصطفى قام ومد ايده يسلم وهو مبتسم اوى
"اهلا ياكابتن نورتينا... انا مصطفى مدرب كورة هنا فى النادى"
"تشرفنا يا كابتن"
ووجهت كلامها لماجد
" ا\فاروق قالى انك هتعرفنى على مواعيد المدربة اللى قبلى وهمسك انا مجموعاتها"
"بسرعة كده لحق ا\فاروق يلاقى مدربة جديدة"
"انا مش جديدة ياكابتن...انا بدرب بقالى 3سنين وجاية هنا بترشيح من مدير النادى اللى بشتغل فيه لانى عارفة ان فيه مجموعات شغالة وغياب المدربة هيأثر على النادى هنا"
مصطفى"ايه ياكابتن انتى افشتى ليه...كابتن ماجد ميقصدش"
يسرا"ولا يقصد...انا حبيت افهمه واوضحله بس... هتقولى مواعيدها ولا ايه"
ماجد"انا معرفش... تقدرى تسألى فى السكرتارية"
"ميرسى"
مشيت يسرا وقعد ماجد ومصطفى تانى
"انت كنت غتت"
"ليه ان شاءالله"
"واحدة رقيقة كده وبتقول هاى وميرسى ترد عليها بالغلاسة دى"
"وحياة ابوك يا مصطفى سيبنى ف حالى"
جه ولد صغير بيشتغل فى النادى
"كابتن ماجد ا\فاروق عايزك"
"ماشى هطلع له اهو"
مشى الولد ... وقام ماجد
"تفتكر يسرا تبع ا\فاروق وهيوصيك عليها ولا يديك كلمتين علشان طريقتك معاها دى"
"معرفش...هطلع اشوف اهو"

فى المستشفى... نغم نايمة فى الغيبوبة
باباها ومامتها حواليها
الام قاعدة ماسكة مصحف وبتقرا وكل شوية تبص لنغم
الاب واقف شوية يكلم نغم باى كلام وكأنها سامعاه
وشوية يسكت لما يتعب من قلة الرد
جت الممرضة
"ياجماعة يالا معاد الزيارة انتهى"
الام"احنا يدوب بقالنا نص ساعة بس"
الممرضة"معلش هى الزيارة فى العناية كده ساعة فى اليوم بس"
الاب"حاضر يابنتى هنمشى اهو"

خبط ماجد على باب مكتب فاروق المفتوح
"تعالى ياماجد"
"حضرتك بعتلى"
"اه...اقعد"
قعد ماجد ... وكمل فاروق كلامه
"طبعا اللى حصل لنغم مكنش متوقع... وانت عارف ان معاد سفر المسابقة بعد بكرة ومفيش غيرك يسافر...حضر نفسك ياماجد"
"معلش ياا\فاروق انا بعتذر مش هينفع اسافر"
"مش هينفع ليه"
"فيه ظروف فى البيت تمنعنى اسيبهم...وبعدين بالنسبة للمسابقة ممكن المدربة الجديدة تروح"
"خلاص ياماجد مش مهم... اكيد يسرا هتوافق تروح"
"تؤمرنى بأى حاجة"
"لا شكرا"
قام ماجد يمشى وهو نازل من المكتب كان بيفكر
"انا ازاى رفضت الفرصة اللى مستنيها... بالعكس مكنش ينفع غير انى ارفض...دى اقل حاجة ممكن اعملها تخفف عذاب ضميرى... انا كده اتصرفت صح...ونشوى وجوازها؟؟؟ اعمل ايه واقولهم ايه؟؟ يارب حلها من عندك وسامحنى على اللى عملته ف نغم"

ماجد بعد ماخلص شغل فى النادى... مشى لحد المستشفى
لما وصل المستشفى دخل زى اليوم اللى قبله
وقابل نفس الممرض فى الدور اللى فيه نغم
وكلمه وهو بيحط فى جيبه ال20 جنيه
"مساء الفل ... اخبار نغم ايه"
"زى ماهى يا استاذ"
"ممكن ابص عليها"
"بس .."
"دقيقتين مش اكتر"
"ماشى يا باشا... اتفضل"
دخل ماجد ووقف الممرض بره
بص ماجد على نغم وهى نايمة
دموعه نزلت غصب عنه... قرب منها
مفيش صوت غير صوت الاجهزة
بصوت واطى ومسموع بدأ يكلمها
"سامحينى يانغم... والله ماكنت اقصد كل كده... انا اسف"

دخل ماجد البيت بالليل...لقى نشوى قاعدة بتعيط ومامتها جنبها
"السلام عليكم...ايه مالها نشوى"
الام"مفيش هى مكبرة الموضوع اوى"
نشوى بعصبية"متقوليش مكبرة الموضوع ...هو الموضوع كبير فعلا"
ماجد"مالك يانشوى ...كريم زعلك"
الام"ابدا ده حتى عايز يرضيها ومش عارف"
نشوى"انا هحكيلك واحك بالحق"
ماجد"احكى"
نشوى"النهاردة كان معادنا مع النجار اللى بيعمل اوضة النوم...روحنا لقيت منظر تانى خالص غير اللى كنا مختارينه"
ماجد"وحش يعنى"
نشوى"وحش اوى ياماجد عارف لما تختار حاجة وتلاقى العكس"
ماجد"وبعدين"
نشوى"اتخانقنا مع الراجل وقلناله مش عايزين الاوضة... وانت عارف ان كريم دفع جزء كبير من تمنها"
ماجد"المشكلة فين بقى"
نشوى"قلت لكريم مش عايزة القرف ده قالى طيب ولما طلب الفلوس من الراجل قاله هديلك الفلوس على شهرين... وكريم مصمم نعمل اوضة تانية عمولة وانا عايزة اوضة جاهزة"
ماجد"ووصلتوا لايه"
الام"وصلوا ان كل واحد فيهم مصمم على رأيه واتخانقوا وكريم نزل من هنا زعلان"
ماجد"كل حاجة بالهداوة يانشوى... انا هتكلم مع كريم"
نشوى"لا لاحسن يفتكر انى انا اللى قلتلك تتكلم"
الام"مينفعش العِند ده يانشوى ... ده انتوا حاجزين الشهر الجاى"
نشوى"انتى ياماما مسمعتيش قعد يزعق ازاى ويقولى انى عندية"
ماجد"هنستنى لبكرة لو متصلش بيكى هكلمه ونشوف الحل ايه"
الام"وانت ياماجد..احنا مجبناش حاجة من اللى قلتلك عليها وانت مدتنيش فلوس زى ماوعدتنى"
ماجد"حاضر ياماما ...هتصرف ان شاءالله"
رن تليفون البيت... قام ماجد يرد
"الو...ازيك ياكريم... كنت لسه فى سيرتك ياراجل... مزعل عروستك ليه؟... اتكلم وانا سامعك... ومقلتش ليه على طول هو احنا اغراب يعنى... لا طبعا متحملش نفسك فوق طاقتك... ماشى ياكريم... اه اهى هندهالك"
وشاور ماجد لنشوى انها تتكلم... اخدت نشوى التليفون ودخلت اوضتها
الام"ايه ياماجد ...قالك ايه"
ماجد"بيقول انه هيعملها اللى هى عايزاه بس هو الفلوس مقصرة معاه شوية وبيقول لو نأجل 3 شهور كمان ويتجوزوا على السنة الجديدة"
الام"هو بيتحجج ولا ايه... هو كان كلام عيال"
ماجد"مامااا... انا كمان مش معايا فلوس اكمل جهاز نشوى علشان كده انا حاسس بيه وحكاية التأجيل دى هتنفعنى انى الحق اتصرف واكملها اللى ناقصها"
الام"ياحبيبى يابنى ومقلتليش ليه"
ماجد"مكنتش عايز اكسر بخاطرها"
الام"ربنا يجبر بخاطرك ياماجد ويفتح لك ابواب الرزق يارب"

على مدى اسبوع... ماجد بيروح المستشفى لنغم يوميا
يسأل عليها الممرض اللى عرفه وبقى ياخد الفلوس ويدخله دقيقتين
وكل يوم ماجد يقولها نفس الجملة وهو حاسس بعذاب الضمير
اليوم ده وبعد اسبوع
وقف ماجد... وقالها
"نفسى تقومى بالسلامة... نفسى اكَفر عن غلطتى واعملك اى حاجة.. انا مش عارف ممكن اعمل ايه بس على الاقل ترجعى لطبيعتك تانى... انا مبنامش وصرتك وانتى نايمة كده مش بتفارقنى... قومى يانغم وارجعى لطبيعتك"
كان بيتكلم بتأثر شديد...نزلت دمعة من عينه على ايدها
جه يمسح الدمعة من على ايدها
شافها بتحرك ايدها... انتفض بفرحة
"نغم... نغم"
جفونها بتتحرك وهى مغمضة... وفتحت عينيها ببطء

الحلقة 5
اتفاجئ ماجد بنغم لما فتحت عينيها
مفاجأة بفرحة...وقبل اى رد فعل منه
غمضت عينيها تانى
"نغم ...نغم"
مردتش عليه...فتح الممرض الباب
"يالا يااستاذ"
"نغم فتحت عينيها"
"فين...ماهى زى ماهى اهى"
"حركت صوابعها وفتحت عينيها والله انا شفتها بعينيا"
بص لها ماجد تانى...شافها بتحرك جفونها
"بص...اهى عينيها بتتحرك"
فتحت نغم عينيها تانى للحظات وغمضت
"انا هنادى للدكتور...دى بتفوق"
خرج الممرض ووقف ماجد لحظات
"بتفوق...وبعدين لو فاقت ولقيتنى هنا هقولها ايه"
مشى ماجد بسرعة من الاوضة...ومن المستشفى كلها

تانى يوم فى اوضة عادية
نغم على السرير وضهرها مرفوع بالسرير شبه قاعدة
مامتها وباباها قاعدين على كراسى بعيدة شوية عن السرير
الدكتور واقف بيتكلم مع نغم
"اسمك ايه"
"نغم"
"عاملة ايه دلوقتى "
"الحمدلله بس عندى صداع فظيع"
"معلش بالوقت هيخف خالص...انتى عارفة انتى هنا ليه"
"لا"
"طيب عارفة مين دول"
"اه بابا وماما"
"مش فاكرة اى حاجة عن اللى خلاكى تيجى هنا"
"لا خالص"
"طيب انتى بتشتغلى فين"
"انا لسه بدرس فى تربية رياضية"
ردت الام وهى بتعيط"يا مصيبتى"
شاور لها الدكتور بالسكوت
"احكى لى عاملة ايه فى الدراسة"
"الحمدلله مبسوطة انا بحب دراستى وداخلة الكلية مخصوص علشان بحبها"
"فاكرة كنتى فى مدرسة ايه فى ثانوى"
"اه مدرسة..."
وقعدت نغم تفكر... وتفكر
"ازاى... هو انا مدخلتش ثانوى ازاى؟؟"
بص لها الدكتور... وبص لمامتها وباباها
"انا هتكلم هنا علشان نغم كمان تسمعنى... انتى يانغم عندك 22سنة"
"لا انا عندى 19"
"بصى انتى جيتى هنا لانك وقعتى على دماغك والخبطة اثرت على الذاكرة"
ووجه كلامه لاهلها
"نغم عندها فقدان ذاكرة جزئى والحمدلله انه جزئى انا كنت متوقع انها تفقد الذاكرة تماما...كده المشكلة اخف كتير"
الاب"يعنى ممكن ذاكرتها ترجع لها"
الدكتور"اه ان شاءالله بالعلاج وانتم كمان"
الام"احنا ايه؟"
الدكتور "يعنى تتكلموا معاها كتير عن الفترات اللى هى ناسياها... لو فيه صور وفيديوهات لمناسبات وتفكروها بيها...لو ليها اصحاب برضه ياخدوها الاماكن اللى كانوا بيروحوها وهى ناسياها...اشياء من هذا القبيل"
نغم بتبص عليهم وهى مش فاهمة اى حاجة
بتحاول تفتكر اى حاجة عن الوقعة اللى اتسببت لها فى فقدان الذاكرة ده...مش قادرة تفتكر حاجة خالص

من لحظة ما خرج ماجد من المستشفى وهو بيفكر فى نغم
فرحان انها هتبقى كويسة وف نفس الوقت هو متأكد انها مشفتوش وهو بيحط لها الشامبو ع الارض...طول اليوم وهو فى النادى بيفكر يطمن عليها ازاى
وكعادته طول الاسبوع... راح المستشفى بالليل
لما قابل الممرض...بعد مااخد منه الفلوس
"على فكرة خرجت من العناية الصبح"
رد ماجد بفرحة
"بجد... بقت كويسة يعنى"
"هى كويسة ومش كويسة"
ماجد بقلق
"يعنى ايه كويسة ومش كويسة"
"يعنى صحتها كويسة انما فقدت الذاكرة"
ماجد باستغراب وحزن
"فقدت الذاكرة؟؟!!"
"مش كلها يعنى"
"ماتقول يعنى ايه ...فقدت الذاكرة ولا لا"
"هى يعنى هتبقى فى حاجات فاكراها وحاجات ولا...ممكن سنين بحالها متفتكرهاش"
سكت ماجد...سكوت بحزن
"بعد اذنك يااستاذ"
"استنى"
"نعم"
"هى فين... ممكن اشوفها من بعيد"
"هى فى اوضة515 فى الدور الخامس وهناك تقدر تشوفها عادى مش ممنوع"
"متشكر اوى"
راح ماجد ركب الاسانسير... وطلع الدور الخامس
مشى فى الطرقة يدور على ارقام الاوض... لحد ما وصل للاوضة 515... بابها كان مفتوح ...وقف لبعيد بحيث يكون شايفها

بص شاف نغم قاعدة على السرير ومامتها قاعدها قصادها وبتديها عصير... اخدت منها العصير وهى بتضحك لها وبتطبطب على ايدها بعد ماخدت العصير
مامتها قامت تعدل المخدات من ورا ضهرها
نغم وهى بتتعدل لمحت ماجد
لحظات عينيهم جت فى عين بعض
ارتبك ماجد ومشى بسرعة
فضلت نغم سرحانة للحظات وتفكر
"مين ده؟؟ انا حاسة انى شفته قبل كده...مش عارفة مش قادرة افتكر"

تانى يوم بالليل راح ماجد يطمن على نغم
لما وقف قدام الاوضة كان الباب مقفول
وقف مش عارف يمشى ولا يخبط ويسأل عليها
حسم تفكيره باب الاوضة لما اتفتح وخرجت الممرضة

نغم بتبص على الممرضة وهى خارجة لمحت ماجد
لحظات عينيهم فى عين بعض
فكرت نغم انها تكلمه وتسأله هو مين
بس قبل ماتاخد قرارها كان ماجد مشى

دخل ماجد البيت وهو فرحان ان نغم بتتحسن
كانت مامته نايمة كالعادة ونور اوضة نشوى مفتوح
راح على اوضة نشوى... وخبط ولما مردتش
فتح الباب ودخل راسه وهو بيضحك لها
"يابنتى كفاية رغى بقى لزقتى فى الكرسى"
اتعدلت نشوى وقالت لكريم
"هكلمك كمان شوية يا كريم... سلام"
قامت ومسكت وش ماجد
"ايه ده ماجد اخويا شفته بيضحك تانى...ياماانت كريم يارب"
"ايه يابت ما انا طول عمرى بضحك"
"اممم طول عمرك اه انما الفترة الاخيرة دى لأ"
"عادى يعنى"
"على اختك برضه"
"هنتعشى ولا هنرغى"
"لولولولى ى ى ى "
"ايه يابت"
"بقالك 10 ايام بتدخل من بره على اوضتك وتنام من غير ما ترخم عليا ولا تتعشى معايا"
مسكها وباس راسها
"تصدقى هتفرقى اوى فى البيت لما تتجوزى"
"علشان تعرف قيمتى بس"
"عارف ياحبيبتى...بصى انا عايز اكل اكل كتييييييييير وحاجة جامدة كده "
"عيووووووووونى...شكلك مزاجك حلو"
"اووووى"
"ليه بقى"
"مفيش بقى...انا داخل اخد دش واطلع الاقى الاكل جاهز"
"اوامرك يا سى ماجد"

فى المستشفى الدكتور بيتكلم مع ابو نغم
"زى ماقلتلكم البيت واهلها واصحابها هما اللى هيساعدوها اكتر من الادوية... وهى دلوقتى مش محتاجة انها تفضل فى المستشفى... انا كتبتلها خروج بس طبعا لازم نبقى على تواصل...وجلسات كل اسبوعين اتابع حالتها"
"معلش يادكتور... هى ذاكرتها ممكن ترجع ولا نتعامل على انها كده خلاص مش هتفتكر تانى"
"لا اكيد هترجع ان شاءالله بس محدش يقدر يعرف امتى ولا ازاى"
"ولا ازاى يعنى ايه"
"يعنى هيرجع المفقود كله مرة واحدة ولا جزء جزء"
"ربنا كبير يادكتور.... بعد اذنك"

راح ابو نغم اوضتها... كانت مامتها بتحط هدوم فى الشنطة
ونغم لابسة لبس خروج
الاب"خلصتوا"
الام"اه ..خلاص... دفعت فلوس المستشفى"
الاب"اه خلاص... واتكلمت مع الدكتور كمان...يالا بينا"
الام"يالا يا نغم"

مسك الاب الشنطة... وراحت الام مسكت نغم وخرجوا

كالعادة راح ماجد المستشفى.. وعند اوضة نغم
شاف الاوضة مفتوحة والنور مطفى
راح اوضة الممرضات
"لو سمحتى...فين المريضة اللى كانت فى 515"
"خرجت النهاردة الضهر"
"متشكر"
مشى ماجد وهو زعلان انه مشفش نغم زى كل يوم واطمن عليها بنفسه حتى لو من غير كلام... بس احساسه انها خرجت من المستشفى كان بيخفف تأنيب ضميره

فات اسبوع وماجد كل احواله متغيرة
فاقد تركيزه فى كل حاجة ومفيش حاجة شاغلاه غير انه عايز يتطمن على نغم... محدش فى النادى يعرف عنها حاجة
وكل ما مصطفى يسأله عن سبب تغييره يقوله انه مشغول بالتفكير فى جهاز نشوى

لما وصل انه اسبوع ومش عارف يعرف عنها حاجة...حس انه ممكن يتجنن من التفكير

راح السكرتارية واخد رقم بيت نغم وعنوانها ...وسجله على موبايله وهو مش عارف هيعمل ايه

طول اليوم بيفكر... لحد ما وصل لفكرة وحس انها معقولة ومناسبة

الحلقة 6
لما وصل البيت... لقى نشوى راجعة من البلكونة وشايلة طبق غسيل فاضى فى ايديها
"نشوى عايزك ضرورى"
"خير... مالك ياماجد"
"ارمى الطبق اللى فى ايدك ده وتعاليلى اوضتى"
دخل ماجد اوضته...بعدها بلحظات جت نشوى
"ايه يابنى مالك"
"عايز منك خدمة"
"هات ياماجد الغسيل اللى انت عايزه ماانت كل مرة تجيب لى غسيل بعد مااخلص"
"غسيل ايه دلوقتى مالك قلبتى كده على امهات"
وردت وهى بتتنهد
"بأقلم نفسى ياخويا... هنعمل ايه شر لابد منه"
"لو طلبت منك اى حاجة هتعمليها"
"اؤمر يازعيم... معاك فى اى حاجة"
"بصى بقى من غير مقدمات علشان مش عارف ابدأ منين.... فيه واحدة عايزك تتصلى بيها فى البيت وتسألى عليها وعلى صحتها وتقولى انك صاحبتها"
"انت مجنون...واحدة مين اللى اقول انا صاحبتها دى...وهى هبلة يعنى اى حد يقولها انا صاحبتك هتسمع كلامه"
"اسمعى بس"
"سامعاك"
"دى واحدة زميلتى ف النادى.. حصل لها حادثة وفقدت ذاكرتها"
"ياعيييييييينى"
"انا بقى عايز تتصلى وتسألى عليها...تكلميها هى او مامتها المهم تعرفى اخبارها ايه"
"وانت شاغل نفسك بيها كده ليه"
ماجد بارتباك
"ايه شاغل نفسى بيها دى...بسأل عادى يعنى"
"ومش هتتصل انت بيها ليها"
"اصلا مكنش لينا كلام مع بعض بس هى صعبت عليا وعايزة اطمن عليها"
"ااااااااه صعبت عليك...والله انا حاسة الموضوع اكبر من صعبت عليا"
"خلاص يانشوى مش عايز منك حاجة"
"ايه ياعم ماجد هو عيب يعنى"
"هو ايه ده"
"لما تهتم بواحدة...تحب تطمن عليها...كده يعنى"
"اول مرة اكتشف انك غلسة بجد"
"خلاص مش هغلس بس هسألك سؤال"
"اسألى"
"ليه متكلمهاش انت وتطمن بنفسك"
"انا اتحرج ومعرفش عندهم فى بيتهم بيسمحوا بايه ومش بيسمحوا بايه...انتى بنت زيها وعادى لما تتصلى وتطمنى عليها "
هرشت نشوى فى دماغها وقالت وهى بتحاول تستجمع شجاعتها
"طيب رسينى بقى ع الكلام اللى هقوله"
"اسمها نغم وكانت بتشتغل معانا فى النادى مدربة سباحة وقعت من 10ايام ودخلت فى غيبوبة اسبوع بعدها جالها فقدان ذاكرة جزئى"
"ايه جزئى ده"
"تفتكر حاجات وحاجات لأ...وبعدين شايفانى دكتور هما قالولى كده وخلاص"
"هات التليفون يامغلبنى"
بسرعة خرج ماجد من الاوضة ورجع بتليفون البيت
نشوى قاعدة فى نص السرير... اخدت منه التليفون وحطته ف حجرها
"فين الرقم"
طلع ماجد موبايله واتصل بالرقم وادى لنشوى السماعة
"ايه ردوا"
"لسه اصبر...احم احم"
واتعدلت نشوى فى قعدتها
"الو... نغم معايا... ازيك ياطنط...انا ايمان زميلة نغم فى النادى...هى اخبارها ايه؟؟طيب الحمدلله انها بخير...اه طبعا هكلمها...معاكى ياطنط"
كانت بتتكلم وماجد قاعد قصادها ومركز معاها
حطت ايدها على السماعة ووجهت كلامها لماجد
"دى هتجيبهالى اكلمها"
"كملى عادى وشوفى فاكرة حاجة ولا لا"
شاورت نشوى لماجد ان نغم ردت
قرب ماجد ودانه من السماعة علشان يسمع صوتها
"الو...ازيك يانغم... انا ايمان زميلتك فى النادى... ولا يهمك انا بس كنت بتطمن عليكى...انتى كويسة... الحمدلله... اه طبعا ان شاءالله ابقى اجيلك... مع السلامة"
قفلت نشوى مع نغم...وقالت وهى بتتنهد
"دعنى اتنفس الصعداء"
"احكى لى قالتلك ايه"
"بص ياسيدى هى كويسة جدا بس قالت انها مش فاكرة اى حاجة عن النادى"
"اومال ايه حكاية اجيلك دى"
"مفيش لما قلتلها انى صاحبتها قالتلى تعالى اشوفك يمكن افتكرك قلت لها ان شاءالله...بخرج من الموقف يعنى"
"ومين ايمان"
"لا دى تمويه"
"ههههههههه ماشى يانوشة متحرمش منك ابدا"
"اى خدمة عيونى ليك"
قامت نشوى خرجت من الاوضة
"هحضر العشا واناديلك"

قفلت نغم التليفون وراحت قعدت جنب مامتها على الكنبة الكبيرة
وقدامهم على الترابيزة البومات كتير
"مين دى يانغم"
"مش فاكرة ياماما"
"بتقول معاكى فى النادى"
"انا مش فاكرة اى حاجة عن النادى ده خالص"
جه الاب من اوضته
الام"ايه يااسماعيل انت مش قلت داخل تنام"
الاب"كنت هنام جرس التليفون صحانى وسمعت انها واحدة زميلة نغم"
الام"اه بس نغم مش فاكراها"
الاب"انا جاتلى فكرة يمكن تساعد نغم... ايه رأيكم نعمل اشتراك فى النادى ونبقى نروح نقعد شوية او انتى ونغم تروحوا منها تغير جو ومنها يمكن لما تشوف الناس اللى تعرفهم تفتكر"
وبصت الام لنغم
"ايه رأيك"
نغم"مش عارفة"
الام"هى فكرة حلوة يانغم يمكن ربنا يسهل وتفتكرى"
نغم"ماشى ياماما"

تانى يوم فى النادى
ماجد قاعد سرحان ..جه عليه مصطفى
"صباح الخير"
"صباح النور"
مصطفى بيتلفت حواليه
"هو اخبار مسابقة شرم ايه"
"كويسة وبتسلم عليك"
"هى مين"
"المسابقة"
"ياباااااى على السخافة...المفروض اضحك"
"وانت ايه سؤالك الغبى ده...انت شايفنى قاعد هنا ولا معاهم هناك"
"مش المفروض انها تخلص امبارح"
وفكر ماجد شوية
"لا اخر يوم النهاردة...بس انت بتسأل ليه"
وارتبك مصطفى
"مفيش بسأل عادى يعنى"
"ده انت مكنتش بتسأل لما انا بسافر المسابقة جاى تسأل النهاردة"
"ايه ده... الساعة 12 عندى تمرين...سلام"
وضحك ماجد بعد مامشى مصطفى
"يا ابن اللذينة... وفاكرنى مش فاهم بتسأل ليه"

ماجد قاعد وعينه على المبنى الادارى
شاف فاروق طالع مكتبه
جه ولد صغير
"احنا هنبدأ التمرين امتى ياكابتن"
"ربع ساعة وهنبدأ"
قام ماجد وطلع المبنى الادارى
ولما وصل عند مكتب فاروق

الباب كان مفتوح... خبط على الباب
"تعالى ياماجد"
"صباح الخير"
"صباح النور...ايه اخبار الشغل"
"كله تمام الحمدلله"
"الحمدلله"
"انا كنت عايز اتكلم مع حضرتك فى موضوع كده ومحرج"
"محرج ليه انت عارف انى هنا بتعامل مع الكل زى ولادى...اتكلم فى ايه"
"بص حضرتك هو الموضوع انسانى بالدرجة الاولى"
"اتكلم"
"بخصوص كابتن نغم"
"مالها"
"حضرتك عرفت انها من الوقعة جالها فقدان ذاكرة"
"لاحول ولا قوة الا بالله... هى محتاجة يعنى مساعدة؟؟"
"مساعدة مش مادية"
"ازاى"
"يعنى هى محتاجة مساعدة انها تفتكر الجزء المفقود من ذاكرتها...على فكرة هى مش فاقدة الذاكرة كليا بس هى مش فاكرة حاجة عن شغل النادى"
"والمطلوب يعنى مش فاهم"
"يعنى بما انها اصيبت وهى كانت بتأدى عملها هنا فى النادى فمن واجبنا اننا نساعدها"
"نساعدها يعنى نطلع لها مبلغ شهرى مثلا"
"لا انا بقترح على حضرتك ...لو مفيهاش تجاوز يعنى ...لو ممكن تيجى تشتغل بالعقد معانا هنا فى النادى تانى... وطبعا لو حضرتك قلقان من انها تتحمل مسئولية تدريبات مش مهم انا ممكن اساعدها ...بس تواجدها هنا ولما تشوف الاطفال والبنات اللى كانت بتدربهم وهما بيحبوها وهى بتحبهم يمكن تفتكر حاجة ونبقى ساعدناها"
"هفكر ياماجد واشوف"
"انا اسف انى اخدت من وقت حضرتك"
"لا ابدا مفيش حاجة...بس انا عايز اسأل سؤال"
"اتفضل"
"ايه سر الاهتمام ده بنغم"
"ابدا مفيش سر ولا حاجة ونغم حتى مكنش ليا علاقة بيها كزملاء عاديين... بس صعبت عليا بعد اللى حصلها وحابب انى اساعد"
"اوك ياماجد"
"بعد اذنك"
خرج ماجد وهو عارف انه كدب على فاروق...هو عايز يساعدها مش علشان صعبانة عليه...لا ...علشان يخفف احساسه بالذنب

بعد ماخرج ماجد من مكتب فاروق
فكر فاروق شوية...ورفع سماعة التليفون
"اميرة... هاتى رقم بيت نغم اسماعيل من عندك واتصلى بيها وحوليلى المكالمة"

دقايق ورن التليفون عند فاروق
"الو...سلام عليكو..ا\ اسماعيل... انا فاروق غالب رئيس مجلس ادارة نادى الفيروز...اهلا بيك يافندم... انا كنت بتطمن على كابتن نغم... اه عرفت... بستأذنك تشرفنى بكرة انت ونغم على الساعة 1 الضهر... كل خير ان شاءالله هنتكلم مع بعض شوية... فى انتظاركم... مع السلامة"

الحلقة 7
فى بيت نغم... بالليل
قاعدة هى ومامتها
"ماما... انا كنت بحكيلك ايه عن النادى"
"انتى لما روحتى تشتغلى مرضيتيش ابوكى يروح معاكى وروحتى قابلتى الراجل لوحدك واشتغلتى وكنتى مبسوطة اوى"
"ومين زمايلى اللى كنت بحكى عنهم"
"مكنش ليكى اختلاط اوى انتى كنتى دايما بتحكى عن الاطفال المتعلقين بيكى وعن الناس اللى بتتعاملى معاهم فى التدريبات"
"مش قادرة افتكر اى حاجة... وتفتكرى ا\فاروق ده عايزنا ليه"
"مش عارفة...قال ياخبر بفلوس بكرة هيبقى ببلاش"
"معاكى حق"
"اه صحيح افتكرت"
"ايه ياماما"
"كان فيه مدرب معاكى مكنتيش بتطيقيه "
"ليه...ماله"
"معرفش انتى كنتى بتقولى انه غلس ومغرور"
"طيب.... انا هقوم انام"
"متنيسيش تاخدى الدوا قبل ماتنامى"
"حاضر ياماما ...تصبحى على خير"
*********************
دخلت نغم اوضتها... طلعت الدوا من درج الكومودينو
راحت المطبخ جابت ازازة مياه وخدت الدوا
قعدت تفكر
"هلبس ايه بكرة"
قامت فتحت الدولاب... طلعت جينز وتى شيرت
حطت التى شيرت عليها قدام المراية
"ولو انى مش فاكراك بس شغال"
حطت الهدوم تانى فى الدولاب... وهى بتقفل الدولاب
لمحت شنطة لاب توب.... اخدت الشنطة..طلعت اللاب توب وحطته قدامها على السرير
"ماما مقلتليش جبته امتى ده... انا اخر حاجة فاكراها الكمبيوتر اللى كان هنا"
شاورت جنب شباك اوضتها... لقت مكانه فاضى
"ماعلينا... يمكن افتكر اى حاجة"
فتحت اللاب توب...شافت الصور اول حاجة
صور كتير ليها مع اصحابها فى الكلية... اغلب الصور فاكراها
الا عدد قليل من الصور برضه فى الكلية مش فاكرة حاجة عنهم خالص
فتحت النت... جابت موقع الفيس بوك
كتبت الايميل بتاعها والباسوورد اللى فاكراهم
طلع لها تحذير ان الباسوورد غلط
"اكيد غيرته... واستحالة هفتكره.. انا هتعب نفسى ليه...ايميل واكونت جديد وخلاص...اهو حاجة تسلينى شوية"
وعملت نغم ايميل واكونت على الفيس جديد تماما

فى بيت ماجد... دخل ماجد البيت لقى مامته قاعدة على الكنبة وفاتحة التليفزيون ونايمة
"ماما...ماما...قومى نامى"
"ماجد انت جيت"
"ايوه ياحبيبتى...قومى نامى فى سريرك بدل القعدة دى"
اتعدلت مامته
"لا انا كنت عايزاك"
قعد ماجد على الكنبة اللى قصادها
"خير ياماما"
"يابنى انا من يوم مااتكلمت معاك فى اللى فاضل لاختك وانت بتقولى طيب ومجبناش حاجة...افرض كريم مكنش أجل الجواز كنا هنتصرف ازاى"
حس ماجد بالاحراج انه موفاش بالوعد
"ماما...انا والله عايز اجيبلها حتة م السما بس اللى انا مقلتوش انى مرتبى نقص اوى بقاله كام شهر والباقى بديلك منه مصروف البيت ومصروفى "
"ومقلتش ليه ياماجد"
"محبيتش اشيلك الهم"
"وتشيله لوحدك يعنى"
"معلش ربنا هيفرجها ان شاءالله"
"ان شاءالله ياحبيبى"
"نشوى بتكلم كريم طبعا"
"طبعا...ربنا يسعدها وعقبالك ياحبيبى"
قالت وهى قايمة
"انا هدخل انام وانت اتعشى مع اختك"
"تصبحى على خير...متقلقيش هى مخلية بالها منى كل يوم بتعشينى"
"والله ماانا عارفة بعد ماتتجوز هعمل ايه"
"وانا ايه...مش انا معاكى اهو"
"انت طول اليوم فى النادى...يالا ربنا يقويك"
دخلت مامته اوضتها وفتح ماجد شنطته اخد منها الهدوم وحطها فى الحمام... وراح خبط على نشوى

تانى يوم...ماجد فى النادى من 10 الصبح
ماجد فى البيسين مع الاطفال ...شاف مصطفى بيشاورله
مصطفى قعد ...وماجد طلع له بعد شوية
"ايه ده مصطفى باشا جاى بدرى قبل 12"
"صحيت بدرى قلت اجى اقعد معاك شوية...فيه مانع"
"ياسيدى تيجى وقت ماانت عايز هو نادى ابويا... هنزل للعيال وشوية واخلص"
"براحتك"
نزل ماجد البيسين... مصطفى طول ماهو قاعد بيبص فى ساعته وبيتلفت حواليه
خلص ماجد... التمرين وراح غير هدومه ورجع قعد مع مصطفى
قعدوا يتكلموا مع بعض... وفجأة مصطفى بيبص ورا ماجد
ومبتسم وهو مش بيبص لماجد
التفت ماجد وراه...شاف يسرا جاية عليهم
يسرا"هاى.... اخباركم ايه"
وقاموا الاتنين يسلموا عليها
مصطفى"حمدالله ع السلامة ياكابتن"
ماجد"اهلا ياكابتن...حمدالله ع السلامة"
يسرا"الله يسلمكم...عاملين ايه...طبعا النادى وحش من غيرى"
ضحكوا وهما بيقولولها "طبعا"
قعدت معاهم...ووجهت كلامه لماجد
"على فكرة معايا ليك سلامات قد كده"
ماجد"سلامات ليا انا..من مين"
يسرا"من كباتن كتير اوى كانوا فى المسابقة وطبعا مش فاكرة كل الاسامى"
مصطفى"وانا محدش بيسلم عليا"
يسرا"ياعم احنا بتوع سباحة زى بعض ايه دخلك انت"
ماجد وهو ميت م الضحك"بتحط نفسك فى مواقف بايخااااااا"
مصطفى"ماشى يابتوع السباحة...اسيبكم انا"
يسرا لماجد"هو م اللى بيقفشوا بسرعة"
ماجد"هو مكنش كده بس واضح انه بقى"
يسرا"متزعلش ياكابتن والله بهزر...اقعد اقعد ياراجل"
وقعد مصطفى تانى وهو ماصدق يقولولوا اقعد
ماجد"طمنينى حد من الولاد هنا كسب"
يسرا"طبعا هو انا اى كلام.... ولد جاب ميدالية فضية"
مصطفى بيضحك اووووووووووى
يسرا"بتضحك على ايه"
مصطفى"اصل ماجد بقاله سنين بيروح المسابقة وييجى فاضى"
قعدوا يضحكوا بعد ماقام ماجد وكان عايز يحدف مصطفى فى البيسين وخلصتهم يسرا وقعدوا يكملوا كلام وحكايات

فى المعاد المحدد وصلوا نغم وباباها لمكتب فاروق
قام فاروق ورحب بيهم ونغم بتحاول تفتكره...بلا جدوى

وسأل على صحة نغم وحكى باباها اللى حصل من ساعة مادخلت المستشفى
فاروق"طيب احنا عايزين نغم تكمل عقدها معانا فى النادى"
نغم بفرحة"بجد...يعنى موضوع الحادثة ده مأثرش على شغلى معاكم...على فكرة انا منسيتش السباحة لانى غير الكلية معايا بطولات من قبلها"
اسماعيل"نغم بتتعلم سباحة من وهى طفلة صغيرة"
فاروق"اه منا عارف قالتلى قبل كده...بس يعنى احنا مش عايزين نتعبها هى هتبقى مع زميلة ليها هنا للبنات والسيدات والاطفال بتتقسم بينهم وبين كابتن ماجد بيبقى معاه الشباب كمان... ايه رأيك يانغم"
نغم وباباها بيبصوا لبعض...هزت نغم راسها لباباها
اسماعيل"هو فيه بعد كده كلام... ده هيساعدها كتير فى العلاج...متشكرين يا استاذ فاروق"
فاروق"العفو...بس احقاقا للحق يعنى صاحب الاقتراح هو زميلها كابتن ماجد ...قال مش معقول بعد ماتصاب فى النادى نسيبها"
اسماعيل"ربنا يكرمه ويكرمك يارب"
فاروق"نغم تحبى تبدأى شغل النهاردة ولا بكرة"
نغم"النهاردة ياريت"
فاروق"تمام...هنادى لكابتن يسرا زميلتك وتتعرفوا على بعض"
اسماعيل"طيب بدل هيبقى شغل استأذن انا...عايزة حاجة يانغم"
نغم"شكرا يابابا"
اسماعيل وهو بيقوم وبيسلم على فاروق
"متشكرين جدا لحضرتك"
فاروق "العفو ده واجب"
خرج اسماعيل ورفع فاروق سماعة التليفون
"ابعتى حد يناديلى يسرا حالا"

يسرا وماجد ومصطفى قاعدين بيتكلموا بقالهم اكتر من ساعتين
جه ولد صغير بيشتغل فى مكتب فاروق
"كابتن يسرا...ا\فاروق عايزك"
واستأذنت يسرا وقامت... مصطفى بيتابعها بيعينيه وهو مبتسم
"اييييييييييه"
"ايه ماجد "
"ايه انت...ايه حكايتك انتو مظبطين مع بعض ولا ايه"
"يارييييييييت"
"يعنى عايز تفهمنى انك جاى بدرى صدفة"
"مش صدفة اوى يعنى...انا عرفت ان المسابقة خلصت امبارح فجيت بدرى"
"ماشى ياعم...بس ايه النظام وقعت ولا ايه"
"انت اشتغلت وكيل نيابة قبل كده"
"لا ...بس عايز افهم"
"ماهو لو انا فاهم حاجة هفهمك... بص م الاخر كده من ساعة ماشفتها وانا اتشديت ليها... وطبعا هى يومين وسافرت ومعرفش اى حاجة تانية ... معرفش هى حست بيا ولا لا معرفش هى مرتبطة ولا لا معرفش هى ممكن تحس بيا ولا لا"
"ياعينى ده انت حالتك صعبة اوى"
"اوى اوى"

جت يسرا من بعيد ... ومعاها نغم
اول ماجد ماشافهم... اتفاجئ
من مفاجأته قام وقف... وهو بيبتسم
مصطفى شافه واقف مبتسم كده
بص الناحية اللى ماجد بيبص لها
كانوا يسرا ونغم قربوا
يسرا"اعرفكم ..ماجد..مصطفى... نغم زميلتنا"
مصطفى"اه طبعا...حمدالله ع السلامة ياكابتن"
ماجد"حمدالله ع السلامة...انتى عاملة ايه؟؟"

نغم فى التعارف... بصت لماجد اوى
شافته فين قبل كده... هى فاكرة كويس انها شافته
بصت لمصطفى نظرة خاطفة...قالت لنفسها
"اشمعنى ده الوحيد اللى انا فاكره انى شفته"

ماجد وهو بيبص لها..وبيقول لنفسه
"يااااه قد ايه فرحت انى شفتك كويسة وبخير...نفسى اقولك سامحينى على اللى حصل... نفسى اعتذرلك"

يسرا"هنفضل واقفين كتير كده... ماتقعدوا"
وقعدوا الاربعة... ونظرات خاطفة متبادلة بين ماجد ونغم وكل واحد فيهم بيفكر فى حاجة مختلفة عن التانى"

الحلقة 8
فات شهر من يوم ما رجعت نغم للنادى
كل يوم وال4 يتقابلوا مع بعض ويقعدوا فى الاوقات اللى معندهمش فيها تدريب
يسرا ونغم الصبح فى النادى وبعد التمرين قاعدين
جه عليهم مصطفى
"صباح الخير يا كباتن"
نغم ويسرا"صباح النور"
وقعد معاهم وهو بتلفت حواليه
مصطفى"اومال فين ماجد"
نغم"مجاش النهاردة"
مصطفى"غريبة يعنى ماجد مبيغيبش الا من الشديد الاوى"
يسرا"بقولك ايه يامصطفى... ماتجيب رقم ماجد"
وبص لها مصطفى... بدهشة ورد بسرعة
"ليه"
يسرا"مش انت بتقول مش بيغيب الا للشديد الاوى...يبقى لازم نسأل عليه"
نغم ساكتة خالص وبتابع كلامهم بس
مصطفى طلع موبايله... وقال الرقم ليسرا... وسجلته
يسرا"انا هسأل عليه"
واتصلت يسرا... وقام مصطفى
"بعد اذنكم"
نغم"رايح فين"
مصطفى"عندى تمرين كمان شوية ...هروح اقعد هناك عند الملعب"
ابتسمت له نغم وهزت راسها... وودانها مع يسرا اول لما سمعتها بتقول "الو"

ماجد نايم وجت مامته تصحيه
"ماجد...ماجد...هتروح الشغل"
ماجد بيرد عليها بصعوبة
"اه هروح...بس هريح شوية واقوم"
"ماتخليك النهاردة احنا ماصدقنا السخونية خفت"
"الحمدلله بقيت احسن بس جسمى مكسر شوية"
"يابنى ماهو من المياه اللى انت طول النهار فيها والجو بدأ يبرد"
"وهى اول مرة ياماما ماانا بقالى سنين دى شغلتى"
"ربنا يشفيك ياحبيبى... هقوم اعملك حاجة سخنة تشربها وتقل لبسك شوية وبلاش تنزل المياه النهاردة"
"حاضر ياماما"
خرجت الام من الاوضة... وحاول ماجد يقوم ...ورجع مدد تانى وهو صاحى
رن موبايله جنبه...شاف رقم غريب
"الو.. اهلا يايسرا ازيك... تعبان شوية...اه شكله برد...لا جاى ان شاءالله بس مقدرتش اقوم لما المنبه ضرب فى معادى...اه والله طول الليل صاحى من السخونية...الله يسلمك ...مع السلامة"

بعد ماخلصت يسرا...نغم كانت متابعاها
"هو تعبان ولا ايه"
"اه اخد برد... بس بيقول جاى"
"ربنا يشفيه"
"يارب...هو مصطفى مشى ليه"
"مش عارفة"
"بقولك ايه هروح اشوفه"
"اوك"
                  ******************
راحت يسرا ملعب الكورة كان مصطفى بدأ التمرين
قعدت فى المدرج تتفرج عليه
وبعد ربع ساعة ساب اللاطفال يلعبوا وجه جنبها فى المدرج
"نورتى "
"ميرسى"
"سألتى على ماجد"
"اه طلع تعبان ياعينى"
وردد كلمتها وهو بيقلدها"ياعينى"
"مالك"
"مالى ...علشان بقلدك يعنى"
"لا علشان وشك اللى اتقلب ومشيت بسرعة"
"زى ماانتى شايفة كان عندى تمرين"
"بس اول مرة متقعدش معانا اول ماتيجى"
"انا لقيت الاهتمام بماجد فقلت امشى انا"
"اعيا انت بس وانا هتصل بيك برضه"
"يارب عيينى"
"بعد الشر"
بص لها مصطفى وهو شايف الخوف فى دعوتها
"خايفة عليا"
ردت بسرعة
"بخاف على كل اصحابى"
"وانا زى كل اصحابك"
قامت يسرا
"اسيبك انا بقى علشان تكمل تمرين"
"تسيبى مين ...اقعدى ..انا ماصدقت استفرد بيكى"
قالها وهو بيشد ايدها يقعدها...قعدت يسرا وهى مكسوفة
"ايه يامصطفى مالك النهاردة"
"مالى...انا زى كل يوم بس انتى اللى مش اخدة بالك"
"من ايه"
"منى"
وحطت يسرا وشها فى الارض... ونادى واحد من الاطفال على مصطفى... قام مصطفى
"خليكى متمشيش... عايزك"
"اوك... هتفرج عليك زى مابتتفرج علينا"

نغم قاعدة...ولما اتأخرت يسرا عليها... فتحت موبايلها وقعدت تلعب games لحد ما ييجى معاد التمرين اللى بعد كده
جه ماجد وقبل ما تشوفه.. سمعته بيكح
التفتت واول ما شافته ابتسمت بفرحة
"صباح الخير يانغم"
قال وهو بيقعد ...ردت بقلق
"صباح النور... شكلك تعبان اوى جيت ليه النهاردة"
"هقعد فى البيت اعمل ايه... اختى طول الليل بتعملى كمادات لحد ما الحرارة نزلت ونمت كام ساعة وقلت اجى"
"المفروض كنت ترتاح"
"انا الحمدلله كويس... انتى عاملة ايه"
"اومال يسرا فين"
واتضايقت لما قال اسم يسرا وردت وهى بتكمل لعب فى الموبايل
"موجودة راحت لمصطفى ومعرفش اتاخرت ليه"
"ااااه مصطفى... ربنا يسهل"
وبصت له نغم تشوفه اتضايق ولا لا ...حست انه عادى
سابت الموبايل...وبصت له اوى
"ماجد ممكن اسألك سؤال"
ورد بقلق"اتفضلى"
"يعنى طول الفترة اللى فاتت وانت مجبتليش سيرة اى حاجة عن الفترة اللى اشتغلتها هنا فى النادى قبل الحادثة"
"علشان معنديش حاجة اقولها"
"ازاى ياماجد.. انت الوحيد اللى كنت زميلى هنا واكيد بيننا مواقف او حكايات او اى حاجة ممكن تساعدنى انى افتكر"
"انا اكتر واحد نفسى ترجعى زى الاول واحسن...بس حقيقى مكنش بيننا اى كلام تقريبا"
"يعنى زى ماما ماقالتلى"
"قالتلك ايه"
"انى كنت قايلالها ان انا وانت مفيش بيننا اى كلام نهائى"
"بالظبط كده"
"غريبة"
"غريبة ايه"
"لا خلاص ولا حاجة"
"قولى يانغم...ايه اللى غريب"
"الغريب انى لما شفتك هنا فى النادى افتكرتك"
واتخض ماجد...هو مش عارف افتكرت ايه...بس اللى هو متأكد منه انها قبل الحادثة مشفتوش وهو بيحط الشامبو ع الارض
"افتكرتينى ازاى"
"حاسة انى شفتك قبل كده... مش عارفة فين وازاى"
وافتكر لما شافوا بعض لحظات فى المستشفى ومقدرش يفكرها
وغير الموضوع
"انا هقوم اجيب شاى علشان زورى بيوجعنى...اجيبلك حاجة معايا"
"لا ميرسى"
قام ماجد ونغم بتتابعه بعينيها...وبعد خطوات التفت يبص عليها ...ارتبكت ومسكت الموبايل بسرعة وبعد لحظات رفعت عينيها تانى تشوفه
               ***********************
خلص مصطفى التمرين وراح ليسرا
"زهقتى"
"لا خالص"
"انا عايز اسألك سؤال بس تجاوبينى بصراحة"
"اسأل"
"انتى مرتبطة"
واتكسفت يسرا وردت بخجل
"لا"
"ههههه تعرفى انى اول مرة اشوفك مكسوفة..مش متعود"
"انا جريئة فى شغلى مع اصحابى ...انما بتكسف لما حد بيجيبلى السيرة دى"
"ازاى"
"يعنى لما حد بيتقدملى ببقى واحدة تانية خالص"
"انتى حد اتقدملك"
"ايه ياكابتن هو انا مش بنت ولا ايه"
"لالالا مقصدش ده انتى ست البنات...انا بس بغير"
قامت يسرا بسرعة ومشيت وموقفتش لما سمعت مصطفى بيقولها استنى... ردت عليه
"هسبقك لما تخلص ابقى تعالى"
                      ********************
رجع ماجد بالشاى وقعد مع نغم
"مكنش المفروض تيجى النهاردة"
"مقدرتش مجيش... اتعودت نقعد مع بعض كل يوم.. كفاية يوم الجمعة انا ومصطفى بس اللى بنيجى وانتى ويسرا لأ"
كلامه بيحمل معنيين...ياترى يقصد ايه؟؟
يقصد انه جه علشانها ولا علشان يسرا
"انا مالى...هو حر"
قالت نغم كده لنفسها وهى شايفة ماجد بيشرب الشاى وبيبتسم لها

جت يسرا عليهم
"ماجد ...ايه اللى حصلك ماكنت زى القرد امبارح"
ماجد"قرد...الله يكرمك"
يسرا"لا بجد شكلك تعبان اوى جيت ليه"
ماجد"هو محدش طايقنى للدرجة دى كل ماتشوفونى تقولولى جيت ليه"
بصت يسرا لنغم"انتى كمان قلتيله"
هزت نغم راسها وهى بتضحك
يسرا"وانت بالمنظر ده هتشتغل"
ماجد"لا مش قادر...انا جيت اقعد معاكم شوية وامشى"

جه مصطفى...وسلم على ماجد
ماجد"اوعى تقولى جيت ليه"
مصطفى"كنت لسه هقولها والله"
ضحكوا يسرا ونغم عليهم ومصطفى مش فاهم بيضحكوا على ايه

على الساعة 4 رن موبايل يسرا وكانت قاعدة مع نغم وماجد
"الو... ايوه خلصت... اوك هطلع ع الباب حالا"
يسرا"انا قايمة علشان بابا جه يوصلنى...ماتيجى ياماجد نوصلك"
ماجد"الله يخليكى يا يسرا...انا لسه قاعد شوية"
يسرا"طيب..سلام"
نغم متضايقة من اهتمام يسرا بماجد... وهى شايفة ان مفيش مبرر انها تتضايق...بس غصب عنها

يسرا ماشية فى اتجاه الباب... كان مصطفى راجع
وقفت مع مصطفى...واتكلموا بسرعة ومشيت يسرا ووصل مصطفى عند ماجد ونغم
"عامل ايه دلوقتى ياصاحبى"
ماجد"الحمدلله"
نغم"انا هقوم انا بقى... مش عايزين حاجة"
ماجد"شكرا"
مصطفى"متتأخريش بقى يانغم"
نغم"لا تمام 6 زى مااتفقنا"
مشيت نغم... واتضايق ماجد... مش مجرد ضيق بس ...ده اتنرفز
وسأل مصطفى "انتوا بينكم معاد"
رد مصطفى "اه ...رايحين السينما"

الحلقة 9
نغم"انا هقوم انا بقى... مش عايزين حاجة"
ماجد"شكرا"
مصطفى"متتأخريش بقى يانغم"
نغم"لا تمام 6 زى مااتفقنا"
مشيت نغم... واتضايق ماجد... مش مجرد ضيق بس ...ده اتنرفز
وسأل مصطفى "انتوا بينكم معاد"
رد مصطفى "اه ...رايحين السينما"
ماجد بنرفزة"انت ونغم"
مصطفى ببرود"ايوه... انت محموق ليه"
قام ماجد يمشى ...قام مصطفى وشده من ايده
"استنى بس"
شد ماجد ايده من مصطفى وهو بيزقه
"اوعى... انت عايز ايه...بتلعب ع الاتنين"
وضحك مصطفى اوووى وهو بيشد ماجد
"ايوه بقى اعترف ياراجل...والله انا حاسس من يوم الحادثة وانت هتتجنن عليها"
واستغرب ماجد من كلام مصطفى
هو اه كان خايف وقلقان عليها بس لاحساسه بالذنب
هو اه كان بيروح لها المستشفى بس لاحساسه بالذنب
هو اه حاول يرجعها الشغل بس لاحساسه بالذنب
بس ليه بيفرح لما يشرفها
ليه يوم اجازتها بيعدى كأنه سنة
ليه وهو تعبان مقدرش ميجيشعلشان يشوفها
ليه اتضايق لما سمعها بتتفق مع مصطفى على معاد
كل ده خطر على باله بسرعة بعد كلام مصطفى
"يااااااه كل ده تفكير"
قعد ماجد وهو بيقول
"تفكير ايه بس"
"انت بتخبى ليه"
"مش بخبى... انا بجد مش عارف"
"مش عارف ايه ياماجد ده انت الحب بينط من عينيك لما تشوفها"
"سيبك من الكلام ده... انت رايح انت وهى السينما ليه"
"اهو... غيران والغيرة قاتلاك...وعلشان اريحك احنا التلاتة رايحين السينما انا ويسرا ونغم... انا عايز افاتح يسرا فى الارتباط ومش عارف فقلت نخرج كاصحاب يمكن ربنا يفك عقدة لسانى"
"مقلتليش ليه اجى معاكم"
"لا ياراااااجل... من امتى...الله يرحم لما كنت اتحايل عليك نروح سينما واحنا خارجين وانت تقولى محبش السينمات"
"يعنى مش يمكن كنت اجى...واتفقتوا امتى ما احنا مع بعض طول الوقت"
"امبارح بالليل ع الفيس "
"ازاى الفيس يعنى"
"مفيش انا من كام يوم لقيت رسالة من يسرا وفيه لينك لجروب عملته باسم النادى...وفيه نغم وبعتنا لبعض اضافات وبنقعد نتكلم احنا التلاتة ساعات...ساعات انا ويسرا ...يعنى بحاول اقربلها"
"ونغم كمان معاكم"
"ايوه يابنى... المهم تيجى معانا النهاردة"
"مش قادر بصراحة...وهيبقى شكلى وحش اوى لو جيت فجأة كده"
"طيب اعترف بقى... بتحب نغم صح"
"تصدق انى قبل 10 دقايق مكنتش فكرت فى وصف احساسى ناحيتها... بس لما سألتنى وانا فكرت... لقيت نفسى بعمل كل حاجة تقول انى بحبها"
وصقف مصطفى وهو بيضحك
"ايوه كده بقى ...واخيرا اعترفت...انا كنت حاسس"
"بس يفيد بايه حب من طرف واحد"
"مين قال انه من طرف واحد"
ورد ماجد باهتمام
"انت تعرف حاجة"
"معرفش..بس يعنى مين قال انها مش حاسة بيك مثلا او مش بتفكر فيك...يعنى صارحها واعرف"
"ياشيخ اتنيل...كنت صارحت انت يسرا بدل ماانت بتدينى نصايح"
"انا مهدت وقربت اصارحها اهو...بقولك ايه انا هقوم يدوب اروح اتغدا بسرعة واغير هدومى وألحق المعاد"
"ماشى ياعم... انا هقوم كمان معاك مش قادر وعايز انام"

فى بيت نغم... بتفتح الباب بالمفتاح
مامتها وباباها بيتفرجوا على التليفزيون
نغم"مساء الخير"
الاب"مساء النور...اتأخرتى يانغم"
الام"حمدالله على السلامة يابنتى قلقنا عليكى"
نغم"مالكم ياجماعة انا مش قلتلكم هروح السينما ومش هتأخر بعدها...الساعة اهو 9ونص يعنى يدوب المشوار"
الام"عملتى ايه مع اصحابك...اتبسطتى"
نغم"الحمدلله كان يوم حلو"
خلصت نغم كلامها وداخلة على اوضتها...وقفها باباها
الاب"تعالى يانغم عايزك"
راحت نغم وقعدت معاهم
نغم"خير يابابا"
الاب"بصى ياحبيبتى فيه واحد صاحب عمك جلال كان عايزك فى شغل"
نغم"شغل ايه"
الاب"هو عايزك تدربى ولاده على السباحة بس فى الفيلا بتاعتهم...وطبعا انا اتاكدت انهم ناس محترمين يعنى هبقى مطمن لو روحتى"
وفكرت نغم...وافتكرت كلام مصطفى عن ماجد بعد ما خرجوا من السينما وانه هو اللى بيصرف على البيت وبيجهز اخته اللى هتتجوز كمان شهرين
وافتكرت كلام فاروق ان اقتراح رجوعها الشغل كان اقتراح ماجد
نغم"معلش يابابا انا مش هقدر"
الاب"خلاص يانغم براحتك...انا هعتذرله"
نغم"وليه تعتذرله... انا ممكن اجيبلهم مدرب زميلى"
الاب"مش عارف...استنى كده لما اتصل بجلال واقوله يسأل صاحب الشأن"
قام الاب وعمل مكالمة وبعدها بدقايق جت له مكالمة
الاب"طيب يانغم هما معندهمش مانع ...هتقوليله امتى وتجيبى الرد"
نغم بتفكر"انا مش معايا رقم تليفونه...هقوله بكرة"
الاب"جلال كان عايز الرد دلوقتى...محدش من صحابك معاه رقمه"
وافتكرت ان يسرا معاها الرقم
"اه يابابا ...هتصل بواحدة صاحبتى واجيب منها تليفونه"
***************
دخلت نغم اوضتها... واتصلت بيسرا
اخدت منها رقم ماجد وهى محرجة...وقبل ما تقول مبررات يسرا قفلت معاها بسرعة فى الكلام فسكتت

نغم مترددة تتصل ...مع انها نفسها تسمع صوته وتطمن عليه
بعد تردد مسكت الموبايل

ماجد فى البيت وممدد على الكنبة الكبيرة بيتفرج على ماتش كورة
رن الموبايل جنبه...بص شاف رقم غريب

نغم مستنية ماجد يرد عليها...اول ما رد قالت
"الو...ماجد...انا نغم"

ماجد اول ما سمع اسمها...قام قعد
"نغم!! ازيك يانغم"
"الحمدلله...ازيك انت واخبار البرد ايه"
"انا خفيت لما سمعت صوتك"
وابتسمت نغم من غير ماتبين وهى فرحانة انها بتكلمه
"الحمدلله انك بخير... بقولك ايه انا كنت عايزاك فى شغل"
"شغل ايه"
"واحد من معارف بابا عايز مدرب سباحة لاولاده بس فى الفيلا بتاعته..ايه رأيك"
"انا معنديش مانع"
"يبقى خلاص هديله رقم تليفونك وانتوا تتفقوا"
"ماشى... احكى بى عملتى ايه فى السينما"
"ايه ده عرفت منين"
"من مصطفى بعد مامشيتى... عجبك الفيلم"
"اه كان حلو اوى"
"كان نفسى اكون معاكم"
"ياريت والله"
واحرجت نغم انها بينت امنيتها انه يكون معاهم...فكملت
"اكيد كان الفيلم هيعجبك"
"انا مكنتش عايز اجى علشان الفيلم... كنت عايز اجى علشان نبقى مع بعض"
سكتت نغم معرفتش ترد... وحس ماجد باحراجها
"بس ان شاءالله تتعوض فى يوم تانى بس تقولولى مش تتفقوا لوحدكم من غيرى"
"والله الفكرة جت بسرعة واحنا بنتكلم ع الفيس"
"ولا يهمك... هتيجى بكرة الساعة كام"
"فى معادى عادى... يالا اشوفك بكرة ...سلام"
"مع السلامة... لا اله الا الله"
وردت نغم بعفوية
"محمد رسول الله"

كل واحد فيهم بعد بعد ماقفل مسك التليفون شوية وهو مبتسم وبيفكر فى التانى
سمعت نغم باباها بينادى عليها وبيسألها عن الرد

تانى يوم راحت نغم النادى لقيت ماجد موجود
قعدت معاه
"صباح الخير"
"صباح الخير عليكى يا وش الخير"
"هههههه ليه كل ده"
"علشان حليتيلى مشكلتى"
"انا؟؟مشكلة ايه"
"تمرين السباحة اللى كلمتينى عليه امبارح...الراجل كلمنى واتفقنا وبصراحة هيدينى مبلغ هيساعدنى ألحق اكمل جهاز اختى"
"مبروك وربنا يتمم لها بخير"
"من غيرك مكنتش عارف هعمل ايه"
"متقولش كده ..انا مش اكتر من سبب... وده ميجيش حاجة جنب جميلك عليا"
"جميل ايه"
"لولا اقتراحك انى ارجع النادى انا مش عارفة حياتى كانت هتبقى ازاى...انا هنا برتاح نفسيا معاكم...هو انا اه مش فاكرة حاجة بس اهو يمكن "
"برضه انا مكنتش اكتر من سبب... وبعدين دى احسن حاجة فى حياتى انك رجعتى النادى تانى"
جه مصطفى.... وقعد معاهم
"ازيكم...اومال فين يسرا"
نغم"لسه مجتش"
طلع مصطفى موبايله واتصل بيسرا
"الو...ايه يا حبيبى انت فين... طيب يالا مستنيكى...متتأخريش علشان وحشتينى... مع السلامة"
نغم وماجد بيبصوا لبعض ومش فاهمين حاجة
نغم محرجة من الكلام الخاص اللى قاله مصطفى
ماجد"واضح ان فيه حاجة منعرفهاش"
مصطفى"امبارح فاتحت يسرا فى انى عايز اتقدم لها وهتقول لمامتها وباباها علشان اتقدملها"
نغم بفرحة"مبروك يامصطفى"
ماجد"ايه السرعة دى ياض... مبروك ياعم"
مصطفى"الله يبارك فيكم...عقبالكم"
نغم ارتبكت...ماجد بص لنغم
تلاقت عينيهم...ابتسم لها ابتسامة وكانه بيقولها
"يارب"
ردت الابتسامة بابتسامة صغيرة سريعة
بعدها لفت وشها بعيد فى اتجاه تانى وهى حاسة بسخونة الدم فى خدودها

الحلقة 10
احراج نغم احرج ماجد...فغير الموضوع بسرعة
"ويسرا فين علشان نباركلها"
مصطفى"باباها هيوصلها علشان كده استنته واتاخرت"
نغم"انا هطلع المكتبة شوية اشوف كتاب"
مصطفى"ايوه ياعم المدارس بدأت وفضينا بقى ..انما ياعينى عليا انا اللى شغلى صيف وشتا"
نغم وهى قايمة
"يا ساتر على الحقد"
مشيت نغم...وسأل ماجد مصطفى
"بس انت داخل على خطوبة كده على طول"
"واضيع وقت ليه...عجبتنى ...حبيتها...لقيت منها على الاقل رضا وقبول ان مكنش حب يبقى استنى ايه"
"بس الخطوة دى بتحتاج فلوس "
"بص ياماجد اللى معايا يكفى اجيب شبكة واعمل خطوبة حلوة كمان تفرحنا...والشقة موجودة يبقى اللى فاضل اسهل"
"مش اسهل ولا حاجة"
"ياسيدى اهو نتوكل على الله وربنا يسهل ان شاءالله"
"ان شاءالله"
"قولى...انت مش ناوى تصارح نغم باحساسك"
"اه صحيح ايه اللى انت قلته ده...عقبالنا ايه"
"طب تصدق بقى ان انا مكنتش اقصد عقبالكم مع بعض ...انا برد عادى بدل مااقول لكل واحد فيكم عقبالك...بس رد فعل نغم ده يبين ان فيه حاجة من ناحيتك يامعلم"
وسأله ماجد بفرحة وشك
"بجد...تفتكر ممكن يعنى"
"ياعم متضيعش وقت بقى وصارحها واعرف راسك من رجلك... وبعدين البنات بتحب اللى يقتحمها مش لسه هتسبل"
وشافوا يسرا جاية من بعيد
"قبل مايسرا تيجى...تحب اقولها تسألها لك"
"لالالا بلاش يامصطفى... انا هتعامل"

وصلت يسرا
"صباح الخير"
ماجد"يااهلا بالعروسة...مبروك يا يسرا"
يسرا لمصطفى"هو انت لحقت تقول"
ووجهت كلامها لماجد
"الله يبارك فيك ...عقبالك"

ماجد ماشى وماسك ورقة فى ايده... بيبص على الفيلات
شاف مكتوب
"فيلا نجيب سالم"
ضرب الجرس... جه البواب
"اؤمر يا بيه"
"ا\نجيب موجود...هو مستنينى"
رد وهو بيفتح البوابة
"حضرتك الاستاذ ماجد"
"ايوه"
"نجيب بيه مستنيك...اتفضل"
دخل ماجد الفيلا... واخده البواب من خلال الجنينة للبيسين
"نجيب بيه...ا\ماجد عايز حضرتك"
شاف ماجد راجل فى الخمسينات وعلى مظهره الهيبة والشياكة
وجنبه مراته فى التلاتينات ومعاهم 3 اطفال
"اهلا ياكابتن ...اتفضل"
سلموا على بعض
"اعرفك على الاسرة...والولاد العفاريت دول اللى عايزهم يبقوا زى السمك ما بيعوم فى المياه"
"ان شاءالله يافندم"
"المدام... ودول التوأم مروان ومازن 6سنين ومحمد 4سنين"
"اهلا اهلا بالكباتن الصغيرين"
ونادى ماجد للاطفال اللى جم يسلموا عليه بالدور
"ها ياكابتن تحب تبدأ امتى"
"من دلوقتى لو مفيش مانع"
"لا مفيش اى مانع...بس الاول طلباتك ايه"
"لا يافندم طلبات ايه... مفيش فرق"
"لا لازم تقول اللى يرضيك"
"والله لو من غير حاجة انا حبيت الولاد من اول مرة"
"لا ازاى...كفاية ذوقك...طيب لو قلنا 3الاف كويس"
ماجد معرفش ينطق من المفاجأة... ولا كان يتخيل انه ممكن يجيله مبلغ زى ده... كده مشكلة جهاز نشوى اتحلت الحاجات اللى باقية ممكن يجيبها من الفلوس دى
"ايه ياكابتن ساكت ليه"
"لا ابدا... بس ده كتير يا فندم والله "
"مش كتير ولا حاجة...اهم حاجة زى ماقلتلك عايزهم سباحين"
"ان شاءالله"
وحط نجيب ايده ف جيبه
"اتفضل ياكابتن"
"ايه ده...انا لسه مشتغلتش"
"معلش انا نظامى كده كل اللى عندى بيقبضوا مقدم"
اخد ماجد الفلوس وحطها ف جيبه... وقام نجيب ومراته دخلوا الفيلا
وبدأ ماجد مع الاطفال اول تمرين

ماجد بعد ماخرج من الفيلا كان كل تفكيره ف نغم
هو أذاها وهى ساعدته
هو كان بيفكر فيها بكل شر
وهى جلبت له كل خير
"لو اقدر اروح اعتذر لها واطلب منها تسامحنى"
"ولو قلت لها اللى حصل وخسرتها تماما يبقى ايه العمل"
"ابقى كسبت نفسى وراحة ضميرى"
"لا هبقى ضيعت اى امل ممكن يجمعنا"
"اقولها الحقيقة وارتاح"
"اى حقيقة فيهم...الماضى ولا الحاضر...انه سبب الحادثة ولا انه بيحبها؟؟"
"هقدر اقول...لا ابدا مش هقدر اخليها تكرهنى وانا بحبها"
"بحبها؟؟؟ ايوه بحبها...دى حقيقة اتاكدت منها طول الشهور اللى فاتت...لو كان عطف كنت لما لقيتها اتحسنت بقيت عادى انما انا كل يوم بيزيد حبى ليها...انا بحبها...ايوه بحبها...ولازم تعرف انى بحبها"

ماجد مش عارف هو مشى قد ايه...لفت نظره محل كمبيوتر ومكتوب ورقة عليه
"عروض خيالية لاجهزة الكمبيوتر واللاب توب بالنقد والتقسيط"
دخل ماجد المحل.... وخرج بكرتونة لاب توب
وقف تاكسى وراح ع البيت

خبط ماجد ع الباب وهو ماسك الكرتونة
فتحت نشوى
"بتخبط ليه مش معاك...ايه ده"
"يابنتى ادخل الاول وبعدين اقولك"
وسعت له نشوى ...دخل كريم حط الكرتونة ع الارض وقعد
خلصت مامته صلاة والتفتت له
"ايه ده ياماجد"
"ده لاب توب "
نشوى"مبروك عليك ياعم"
ماجد "الله يبارك فيكى"
الام"نشوى...اعمليلى كوباية شاى يابنتى دماغى مش قادرة منها خالص"
قامت نشوى دخلت المطبخ
ماجد"سلامتك ياماما ...مالك"
الام"سلامتك ياحبيبى ...شوية صداع وهيروح ان شاءالله"
ماجد طلع فلوس من جيبه
"ماما خدى الا2000جنيه دول جيبى اللى انتى عايزاه وقبل الفرح هديلك زيهم ان شاءالله...هتحتاجى تانى"
"لا ياحبيبى..هو اللى ناقص شوية رفايع بس يعملوا بتاع 4..5 الاف جنيه كده...بس قولى جبت الفلوس دى منين"
"ههههه بدى درس خصوصى"
"درس خصوصى؟؟"
"يعنى بدرب اطفال على السباحة فى الفيلا بتاعتهم وباباهم طلع حد جامد اوى وهيدينى مبلغ كويس...رزق نشوى الحمدلله"
"الحمدلله"
جت نشوى بكوباية الشاى
"مين بيجيب سيرتى"
ماجد"انا عايزك حالا"
نشوى"اؤمرنى ...عيونى لحبيبى"
"بما انك قاعدة على الكمبيوتر 25ساعة ف اليوم...عايزك تعلمينى شوية"
*******************
فى اوضة ماجد...قاعد هو ونشوى جنب بعض واللاب توب قصادها
"كده خلاص عملتلك ايميل واكونت ع الفيس زى ماطلبت"
"تمام...يعنى السيرش من هنا ولما احب اتكلم مع حد اعمل ايه"
"لازم تكونوا ضايفين بعض وتتكلموا فى الشات لو بينكم انتم بس ولو اتكلمتوا فى الصفحة هتبقى باينة للناس اللى عندك وعنده"
"طيب تمام...هقعد اجرب مع نفسى كده"
قامت نشوى...وهى خارجة من الاوضة
"لو احتاجت اى حاجة انا معاك"
خرجت نشوى وقفلت الباب...واول حاجة عملها ماجد
عمل سيرش باسم نغم اسماعيل بالعربى
ظهرت النتايج كلها معلومات غير معلومات نغم
عمل سيرش باسم نغم اسماعيل بالانجليزى
وكل النتايج برضه معلومات غير معلومات نغم
بدأ ييأس انه يلاقى نغم على الفيس
وافتكر ان مصطفى قال له انهم اتجمعوا فى بيدج باسم النادى
وعمل سيرش على اسم النادى
وفعلا شاف جروب باسم النادى
وابتسم ابتسامة واسعة لحد ودانه...لما شاف اكونت نغم
وبدون تردد بعت آد لنغم...وهو بيتمنى انها تكون قاعدة وتقبله ف نفس اللحظة

نغم قاعدة وسط باباها ومامتها... واللاب توب قدامها
جالها طلب صداقة... واول ما فتحته
اتفاجئت مفاجأة خلتها تبتسم ابتسامة كبيرة
لما شافت اسم ماجد وصورته
"ايه يانغم بتضحكى على ايه"
وانتبهت نغم ...حاولت تدارى ارتباكها
"مفيش ياماما شفت صورة ضحكتنى"
وقامت نغم دخلت اوضتها...قعدت على السرير
وبدون تردد... قبلت طلب الصداقة

ماجد... اول ماشاف اشعار قبول الصداقة
حس ان قلبه هيدخل جوه الشاشة
وبمجرد ما بقت نغم الصديقة الوحيدة عنده ...ظهرت انها اون لاين
وكتب لها فى الشات
"ازيك"
وردت نغم
"الحمدلله...مبروك على الاكونت الجديد"
"الله يبارك فيكى... اول علاقتى بالفيس بوك النهاردة"
"هيعجبك ده مسلى جدا"
"انا مدخلتش علشان اتسلى لانى مش من هواة الكمبيوتر"
"طيب لو داخل تستفيد يبقى هتستفيد برضه"
"ولا علشان استفيد"
"حيرتنى...اومال دخلت ليه"
"علشانك"
ضربات قلب نغم بقت بسرعة 500 دقة فى الدقيقة
كل ما تحاول تكتب كلمة ترجع تمسحها تانى
مش عارفة ترد تقول ايه
"نغم...انتى معايا"
"معاك"
"بقولك دخلت الفيس علشانك...وانتى اول حد دورت عليه"
"ليه"
"علشان نتكلم مع بعض"
"مااحنا مع بعض كل يوم"
"لا ...مش بنبقى انا وانتى بس"
حست نغم بتلميحاته وف نفس الوقت خافت يكون احساسها بيه هو اللى بيوهمها بالمعنى اللى فهمته
"نغم...سكتى تانى"
"انا معاك اهو"
"انا عايزك معايا على طول"
وسكتت ...بس المرة دى كانت احاسيس كتير جواها... فرحة بخجل
"يانغم...انتى كل شوية تسكتى كده"
"اصل انت النهاردة كلامك غريب اوى"
"بصراحة انا اتشجعت لما شفت مصطفى ويسرا اتفقوا"
"انت عايز تقلدهم ولا ايه"
"لا ...انا بحبك بس كنت متردد وخايف"
نغم جواها بيصرخ
"ده بيقول بحبك... معقول اللى كنت حاساه ده حقيقى وانه فعلا مهتم بيا... لا ده مش مهتم بيا بس...ده قالها بكل صراحة...بيحبنى"
"يانغم... انتى فين... قوليلى احساسى ده متبادل ولا هتصدم وتقولى انه من طرف واحد"
نغم مش عارفة ترد... هى مكسوفة واول مرة تتحط فى الموقف ده... او يمكن تكون اتحطت فيه بس ناسية... المهم هتقول ايه
"ماجد انا بتكسف"
"من ايه بس...هى كلمة واحدة...بتحبينى ولا هتصدمينى"
وبدأت نغم تستجمع شجاعتها وتكتب...
"مش هصدمك"

الحلقة 11
ماجد بيبص كويس فى الشاشة
علشان يتأكد من رد نغم
"مش هصدمك"
ايوه هو قرا صح متلخبطش
"بجد يانغم"
"وبعدين بقى ياماجد...قلتلك بتكسف"
"متتكسفيش منى زى ماانا متكسفتش وقلتلك كل اللى ف قلبى ناحيتك"
"الحاجات دى بتتحس مش بتتقال"
"ماهو لازم نأكد احساسنا باننا نقوله ونعترف بيه"
"مااحنا قلنا"
"انتى مقلتيش"
"هو لازم تبقى صريحة يعنى... انت سألتنى وقلت اختيارين وانا اخترت الخيار المناسب"
"ايه يانغم ده...حسستنينى اننا ف من سيربح المليون"
"ههههه ليه بس"
"اختيارين ايه والاختيار المناسب وكلام باللغة العربية الفصحى"
"انت اخدتنى على خوانة"
"ازاى"
"اولا اتفاجئت بيك ع الفيس...ثانيا اتفاجئت بكلامك...ثالثا بقى اتفاجئت بردى"
"وهو ردك ده مش نابع من قلبك"
"نابع طبعا"
"خلاص فكى بقى واتكلمى مش عمال اشد من بؤك الكلام"
"بص ياماجد انا اللى فاكراه انى محبيتش ولا ارتبطت بحد قبل كده وكمان اللى اعرفه عن الحب انه ميبقاش كلام بين اتنين وخلاص...يعنى زى مصطفى ويسرا كده لما عرفوا انهم بيحبوا بعض هيتقدملها وحبهم هيبقى ف النور"
"بصى يانغم الفترة اللى فاتت كنا اه قريبين من بعض بس اكيد مش عارفة عنى كل حاجة...انتى عارفة ان اختى هتتجوز قريب بس اللى متعرفيهوش ان انا اللى جهزتها وبساعد فى البيت لان معاش بابا الله يرحمه ميكفيش كل ده...يعنى بعد نشوى ماتتجوز ابدأ من تحت الصفر وعلشان اتقدملك لازم اكون قد اللى اهلك هيطلبوه علشان مقصرش فى اى طلبات"
"بس احنا مش بنبص للفلوس والحاجات دى"
"معلش بس انا برضه ليا اخت ومش هرضى ليكى بأقل من اللى طلبته من عريس اخته لما اتقدملها... وانا حاليا زى مابقولك لسه معملتش لنفسى اى حاجة"
سكتت نغم... وسكت ماجد
دقايق مرت محدش فيهم بيكتب حاجة للتانى
"نغم... انا ضايقتك؟؟"
"لأ ...ليه"
"يعنى يمكن كنتى تتمنى حد يكون جاهز يتقدملك على طول بس بجد انا بحبك واوعدك انى هعمل كل اللى يقربنى منك بسرعة لو حصلت اشتغل شغلتين وتلاتة هعمل كده"
"ماجد... انا احترمتك اكتر من كلامك...انا كنت ساكتة مستنياك تكمل كلامك...عايزة اتعرف على حياتك اكتر واكتر"
"بجد متضايقتيش"
"لا طبعا... وان شاءالله مع بعض هنبنى حياتنا وسعادتنا"
"ياااااااه يانغم ..انا مش مصدق نفسى انى بسمع الكلام ده منك"
"ليه بس...ده من القلب للقلب رسول ...وقلبى كان حاسس بيك بس كنت خايفة يكون بيتهيألى...وكنت خايفة كمان من مواضيع الحب دى"
"متخافيش ياحبيبتى طول ماانا معاكى"
كل واحد فيهم كان قلبه طاير من ورا الشاشة
قربوا من بعض بسرعة لما كل واحد فيهم ساب لسانه يقول اللى ف قلبه...احساسهم كان اقوى من اى حواجز كانت بينهم
الحواجز اتهدت من قوة احساسهم ببعض
وقعد كل واحد يحكى شوية عن نفسه
ومرت الساعات من غير ما يزهقوا ولا يحسوا بيها

تانى يوم ف النادى.. وصل ماجد اول واحد
قعد مستنى نغم واول ما وصلت وقف يسلم عليها
سلمت عليه واول ما حست برعشة ايدها سحبتها بسرعة
ماجد بيبص فى عينيها
"وحشتينى"
ابتسمت بخجل وهى بتبعد عينيها عنه بكسوف بحجة انها بتجر كرسى وبتقعد عليه
قعد ماجد على الكرسى وقربه منها
"تصدقى النهاردة يوم مختلف"
"من ناحية ايه"
"النهاردة انتى نغم حبيبتى مش زميلتى"
"لالالا الكلام كده صعب"
واستغرب ماجد
"صعب ازاى"
"امبارح كنت قاعدة ف اوضتى ولوحدى كان الكلام اسهل...انما دلوقتى وقدامك كده هموت من الكسوف وقلبى بيدق ومش عارفة اتكلم ولا كلمة"
وضحك ماجد...ضحك من قلبه
"انت بتضحك على ايه"
"ياحبيبتى حتى وانتى مكسوفة بتقولى كلام حلو... ولما خدودك دول بيحمروا كده بتزيدى جمال...يعنى مجننانى فى كل الاحوال"
ضحكت نغم ضحكة رقيقة خجولة وهى بتبص لماجد وبعدين للارض

فات شهر...وخلال الشهر ده
تمت قراية فاتحة مصطفى ويسرا
والعلاقة بين ماجد ونغم بتقوى كل يوم اكتر من اللى قبله

وفى يوم جمعة فى النادى
يسرا ونغم اجازة...ومصطفى قاعد مع ماجد
"ابقى حضر بطاقتك بقى يوم الخميس"
"بطاقتى ليه؟؟هو مش يوم الخميس الشبكة"
"مااحنا هنخليها شبكة وكتب كتاب مع بعض"
"مبروك يامصطفى الف مبروك"
"الله يبارك فيك وعقبالك انت ونغم"
"ان شاءالله"
"ايه ناوى امتى"
"لما ربنا يسهل "
"على فكرة انا همشى من النادى اخر الشهر ده"
"ليه كده"
"ماهو ده اللى هيخلينا نعمل كتب كتاب...بقالى فترة مكلم خالى يشوف لى عقد عمل ...هو بقاله 20سنة فى السعودية... كلمنى امبارح وجابلى شغل هناك وهخلص الورق واسافر ان شاءالله"
"ربنا يوفقك يا مصطفى انت تستاهل كل خير"
"الله يخليك ياماجد... احنا اتفقنا اننا هنعمل كتب كتاب علشان لو ظبطت امورى هناك ابقى ابعت ليسرا تجيلى"
"وليه متستناش الاجازة بتاعتك"
"بينى وبينك انا مبحبش القعدة لوحدى ودى غربة يعنى اكيد هبقى محتاجلها معايا..وهى كمان موافقتش على السفر غير لما قلتلها انى ممكن ابعتلها كمان كام شهر"
"ربنا يسعدكم "
"بقولك ايه ابقى اشوفلك حاجة هناك"
"ينفع؟؟"
"اهو نشوف يمكن ...اهم حاجة انت عندك استعداد تسافر"
"اه طبعا ...واهى حاجة تقرب البعيد وتساعدنى...اخوك على فيض الكريم واهو نشوى هتتجوز وافضى انا بقى"
"ان شاءالله ربنا هيقف معاك علشان انت فضلت اختك على نفسك وبتعمل كل حاجة تريح مامتك واختك"
"ماانت عارف انا ليا مين غيرهم"
"ربنا يخليهوملك يارب"

يوم كتب كتاب مصطفى ويسرا
نغم نازلة من بيتها على السلم ومعاها الفستان اللى هتلبسه ... وبتتكلم ف الموبايل
"ايوه يا يسرا... انا نازلة اهو.. هاخد تاكسى واجى متقلقيش ... متتعبيش نفسك... طيب هستناكى...سلام"
قفلت معاها وقبل ماتحط الموبايل فى جيب البنطلون...رن
"الو... انا نازلة اهو... يسرا باباها هيوصلها الكوافير وهيفوتوا عليا ياخدونى... ايوه احنا بنروح الكوافير من بدرى مش زيكم ... هنتقابل بالليل بقى لما تيجى مع مصطفى... قلتلك 100 مرة الفستان بكم مش عريان...من غير ماتقول مكنتش هلبس حاجة مكشوفة... متتصلش بيا انا لما اخلص هتصل بيك...مع السلامة"
نزلت وقفت قدام العمارة...ودقايق وجت يسرا مع باباها ركبت معاهم نغم...وراحوا الكوافير

فى الكوافير... يسرا لابسة فستان ابيض وطرحة
ونغم لابسة فستان اسود بكم طويل ومفتوح من الكتفين ...وشعرها مرفوع ونازل منه خصلات طويلة

نغم خلصت وقاعدة تستنى يسرا وهى فى اللمسات الاخيرة
"ها يانغم قوليلى حلو كده"
"طبعا قمر ماشاءالله...مع انك دوختينا لما قررتى فجأة تلبسى ابيض وقلت مش هنلحق نلاقى فستان"
"اعمل ايه بس يانغم لما عرفت من مصطفى انى ممكن اسافر له من غير فرح قلت أضمن والبس الابيض وعلشان يبقى عندنا صور زفاف زى كل الناس"
"معاكى حق طبعا...ده حلمنا كلنا"
"عقبالك انتى وماجد"
"ان شاءالله"
رن موبايل نغم...
"الو... كنا لسه بنجيب ف سيرتك... كل خير...يعنى فاضل دقايق كده وتكون جاهزة... اول ما تجهز هكلمك... الفيديو؟؟.. لما تخلص هبقى اقولك تبعته...سلام"
"ايه وصلوا"
"ايوه ياعروسة...ومصور الفيديو عايز يدخلك هنا قلتله لما تخلصى"
دقايق وخلصت يسرا واتصلت نغم بماجد
والتفوا اهل يسرا حواليها واهل مصطفى حواليه
ودخل مصطفى اخد يسرا وخرجوا
ماجد واقف بره الكوافير مستنى نغم
نغم خرجت ورا يسرا... بتدور بعينها على ماجد
ماجد اول ما عينه وقعت على نغم... اندهش
نغم قربت على ماجد... وهى بتسلم عليه
مد ايده يسلم عليها
"ايه ده...مين دى"
"هتكسفنى هسيبك وامشى"
"وانا اقدر...تمشى فين وتسيبينى... بس بجد كنتى مخبية الجمال ده فين"
وبصت نغم لماجد من فوق لتحت باعجاب
"وانت كنت مخبى الشياكة والوسامة دى كلها فين"
رد ماجد وهو بيظبط بدلته
"اعتبرها معاكسة"
ارتبكت نغم ولفت بعيد منه وكانت هتمشى
شدها من ايدها بحب
"خدى ..خدى... رايحة فين"
"قلتلك تبطل تكسفنى"
"عيونى"
مسك ايدها وحطها فى دراعه
"يالا بينا"
وسمع ناس ميعرفهمش بيقولوا
"ياماجد... فين ماجد؟؟ مين ماجد"
بصت نغم لماجد
"هو فيه ايه..الناس بتسال ليه"
"تصدقى نسيت ان انا اللى هسوق عربية العريس والعروسة...طبعا لازم انسى وانا مع القمر"
"انت جبت عربية منين"
"اجرت عربية...بس مش علشان العرسان...دى علشان اخد اميرتى جنبى ...وسيبك انتى كان مصطفى ويسرا مش موجودين اساسا"
مشيوا ناحية العربية...اول مافتح لها الباب
مصطفى"ايه ماجد احنا فى العربية بقالنا ساعة وانت كنت فين"
بص ماجد لنغم وهو بيقول لمصطفى
"معلش... نسيت الدنيا"
بص مصطفى لنظراتهم
"اه معاك حق"
زغدته يسرا لما سمعته بيقول كده
حط مصطفى ايده على كتف يسرا وهو بيقول لماجد
"زى ما بنسى الدنيا لما بشوف حبيبى"
يسرا وهى بتضحك له"ايوه كده... اتعدل"
**********************
راحوا الاستوديو... ودخل العروسين للتصوير
طلب المصور حد يدخل مع العروسة من قرايبها
طلبت يسرا ان نغم تدخل معاها

نغم واقفة ورا الكاميرا والمصور بيظبط الكادرات
ماجد واقف بره وبيبص عليهم من قزاز بيفصل بينهم

مع كل لقطة بيلقطها المصور لصور العروسين
ماجد ونغم يتبادلوا نظرة وابتسامة سريعة من بعيد

خلصت الصور...خرج العروسين ووراهم نغم
ماجد كان مستنيها ولما خرجت ومسك ايدها
"نغم"
"نعم"
"ممكن اطلب منك طلب"

الحلقة 12
استغربت نغم
"طلب ايه"
"نتصور مع بعض"
"بس..."
"بس ايه"
"مينفعش"
"ليه يانغم"
"احنا لسه يا ماجد مفيش بيننا اى حاجة رسمى علشان نتصور مع بعض"
اتفاجئ ماجد بردها
"ايوه مفيش بيننا حاجة رسمى...علشان كده خايفة تتصورى معايا"
حست نغم انها ضايقته
"مقصدش ياماجد...انا بس اتفاجئت بحكاية الصور دى"
"خلاص ولا يهمك...يالا علشان نلحقهم"
ولف ماجد علشان يمشى
"بقولك ايه...انا مش هينفع اخلى الصور عندى"
التفت لها
"قصدك ايه"
"قصدى يعنى لما نتصور والصور تطلع مش هينفع يبقوا عندى علشان ماما"
وابتسم لها
"نغم...انا مزعلتش منك ومش عايزك تعملى اى حاجة وانتى متضايقة...حاجة كان نفسى فيها وقلتهالك انما مش بجبرك"
"وانا عايزة اتصور معاك ...انا بس اتفاجئت بكلامك انما وانا بتكلم فكرت لقيت انها فكرة حلوة يبقى لينا صورة مع بعض واحنا سواريه كده"
ضحك ماجد وطلب من المصور انهم يتصوروا صورتين
رن موبايل ماجد
"ده مصطفى"
رد ماجد على مصطفى
"الو...ايوه ياعريس... نازلين اهو بس 5دقايق... هنتصور بس وننزل على طول...سلام"
خلص ماجد مع مصطفى وبص لنغم
ودخلوا يتصوروا
نغم قالت للمصور
"مش عايزة صور زى بتاعة العرايس اللى اتصوروا دلوقتى"
بص لها ماجد وابتسم وهو فاهم انها هتحرج من نفس الوقفات
قطع عليهم المصور التفكير بالرد
"متقلقيش يا انسة...اللى يعجبك"
وقفوا يتصوروا
اول صورة كانت يقفوا قصاد بعض وعينيهم فى عين بعض
الصورة كانت قريبة جدا وكأنها مركزة على وشهم ونظرتهم بس

تانى صورة كانت يقفوا الاتنين بالجنب ويمسك ماجد ايدها
ويبصوا للكاميرا... وكانت الصورة بعيدة الى حد ما وكأنها مركزة على القرب والحب اللى باين فى مسكة ايدهم

خلصوا الصور ونزلوا ركبوا العربية
مصطفى"انا مش عارف ايه اللى خلانى اسمع كلامك"
ماجد"على ايه"
مصطفى"هجيب عربية وازفكم... ياشيخ ده انت زفتتنا مش زفتنا"
ماجد"كل ده علشان اتأخرنا عليكم شوية"
مصطفى"ياعم يالا المأذون وصل واحنا اللى اتأخرنا وحمايا عمال يتصل بيا يستعجلنى"

وصلوا القاعة...طلع العروسين فى زفة للقاعة
وماجد ونغم وراهم...ومش بيسيب ايديها

لحظة كتب الكتاب...ورغم ان ماجد كان بيشهد على الجواز
بس عينه مفارقتش عين نغم
وعين نغم مبعدتش عن عين ماجد

بعد كتب الكتاب...راح لها ماجد
"عقبالنا ياحبيبتى"
"يارب ياحبيبى"

كان وقت الرقصة السلو
وبعد ما رقص العروسين
سمعوا ال dj بيقول
"ياريت العروسين يفضلوا ع البيست واى كابلز يحب يشارك بالرقص يتفضل"
وبدأت رقصة سلو جديدة
وناس من المدعوين اغلبهم بدأوا يطلعوا ع البيست ويرقصوا
نغم وماجد قاعدين على ترابيزة قريبة من البيست
قام ماجد وقف قصاد نغم وانحنى وهو بيمسك ايدها
"تسمحيلى بالرقصة دى"
"هههههه اقعد ياماجد بلاش هبل"
"تسمحيلى بالرقصة دى"
"هههه اقعد الناس هتتفرج علينا"
شدها من ايدها بحب
"طب قومى علشان الناس متتفرجش"
قامت معاه وهى محرجة وبصت حواليها لقت ناس غيرهم بيرقصوا مع بعض وكل حاجة عادى

لف ايديه حول وسطها وحطت ايدها على كتفه
وايديهم فى ايد بعض... وهما بيتمايلوا على انغام الموسيقى
"ابعد شوية عيب كده"
"هههه عيب ايه احنا بنرقص زى باقى الناس"
"انت مجنون وانا مجنونة انى سمعت كلامك"
"سيبك من الجنان دلوقتى...قوليلى حاسة بإيه"
"مش حاسة بحاجة"
"عينى ف عينك كده"
بصت له نغم وهى ف حضنه
"بحبك اوى يانغم"
"وانا بحبك اكتر"
"عارفة نفسى ف ايه دلوقتى"
"ايه"
"الاغنية متخلصش"
"ههههه اصدمك واقولك ان الاغنية قربت تخلص"
"حرام عليكى يانغم...عيشى اللحظة معايا"
"ياحبيبى انا معاك عملت حاجات عمرها ماخطرت على بالى... انى احب اصلا عمره ماخطر على بالى...انا بحبك حب مش عارفة اوصفه... انا بحبك اوى ياماجد"
"اخيراااااااااا سمعت منك جملتين على بعض يريحونى ويطمنونى ... انا بحبك اوى يانغم وهحاول اعمل كل اللى اقدر عليه علشان يجمعنا بيت واحد فى اسرع وقت"
"يارب ياماجد... وان شاءالله يبقى بيت كله حب وسعادة"

خلصت الاغنية... والنور زاد فى القاعة
بعدت نغم عن ماجد خطوتين ...قالها
"اففف مكنش المفروض تخلص"
"هههههههه انت مستغل للمواقف على فكرة"

قعدوا مع بعض وخلال الفرح شوية يبقوا مع مصطفى ويسرا
وشوية يقعدوا مع بعض شوية
والساعة 12 رن موبايل نغم
"الو... ايوه يابابا... لا الفرح لسه مخلصش.. متقلقش ...هتيجى... طيب لما توصل رن عليا هنزلك على طول...مع السلامة"
"باباكى؟؟"
"اه...قلقان علشان اتأخرت وهييجى ياخدنى"
"ماانا كنت هوصلك"
"وهو يعنى يعرف كده"
"عارفة يانغم...كان نفسى ظروفى كانت تبقى احسن من كده وانا كنت كلمت باباكى "
"ان شاءالله الظروف هتتحسن وتيجى وتكلمه وتبقى واحد من العيلة كمان"
"يارب يقرب البعيد"
قاموا ماجد ونغم يسلموا على العروسين ويتصوروا معاهم
واستأذنت نغم وعرفتهم انها ماشية
بعد نص ساعة رن موبايل نغم
"بابا وصل يا ماجد...انا هنزل بقى"
"هوصلك لحد تحت طيب"
"بلاش علشان بابا ميشوفناش مع بعض"
"لا الوقت متأخر... بصى امشى انتى وانا همشى وراكى لحد ما اشوفك وصلتى لباباكى وابقى ارجع انا"
"طيب...لما ترجع البيت كلمنى"
"حاضر"
مشيت نغم ومشى ماجد وراها
نزلت وفى الشارع قابلت باباها
وقف تاكسى وركب وركبت نغم
وودعوا بعض بعينيهم من شباك التاكسى

وصلت نغم البيت مع باباها
واول مادخلت
الام"ماشاءالله... ايه الجمال ده يانغم.. مش قلتلك يااسماعيل مينفعش ترجع لوحدها"
الاب"طبعا يافاطمة انا مكنتش هسيبها ترجع لوحدها"
نغم"عادى ياجماعة كان فيه زمايلنا فى النادى هيوصلونى"
الاب"لا كده احسن علشان اطمن عليكى"
نغم"هدخل اغير هدومى "
دخلت نغم اوضتها...
"قلتلها يااسماعيل"
"لا مقلتش حاجة.. ادخلى انتى قوليلها"
"طيب"
قامت الام دخلت اوضة نغم... وكانت غيرت هدومها
"بقولك ايه يانغم"
"ايه ياماما"
"النهاردة فى الشغل راح لباباكى واحد وعرفه بنفسه انه ساكن معانا هنا فى الشارع... وطلب ايدك"
انتبهت نغم لكلام مامتها
"يطلب ايدى انا؟؟"
"ايوه يانغم هو احنا عندنا غيرك"
"بس انا معرفوش"
"ماهو انا هقولك اللى عرفناه عنه...هو معيد فى كلية تجارة واخد الماجيستير وساكن معانا هنا فى الشارع وعنده شقته قريبة مننا هنا برضه وجاهز من مجاميعه"
"برضه ياماما مينفعش يتقدملى كده وانا معرفوش"
"ماهو ابوكى وهو راجع من الشغل سأل ابو جابر بتاع السوبر ماركت عنه...طلع يعرفه وقال عنه كلام كويس اوى"
"ماما انا مش عايزة اتخطب بالطريقة دى"
"ومالها الطريقة دى...اومال عايزة تتخطبى ازاى"
"لا انا اقصد يعنى حد اكون اعرفه"
"وانتى هتعرفى اى حد منين"
"هو يعرفنى طيب؟؟"
"ايوه اومال اتقدملك ازاى"
"يعنى مطلوب منى ايه"
"هو مستنى معاد مننا ييجى هو واهله"

ماجد داخل البيت... واول مادخل راح على اوضته
لسه بيقلع جاكيت البدلة لقى نشوى بتفتح الباب فجأة
"ماااااااااااااااااااااااجد"
"ايه يانشوى"
"ينفع كده يعنى... مش معقول بجد"
"فى ايه يانشوى..ايه اللى حصل"
قالت وهى بتلف حواليه
"اخويا يبقى مز كده والبنات متجريش وراه"
"يخربيت عقلك خضتينى"
"ايه العسل ده ياناس...بس قولى البنات اللى فى الفرح عملوا ايه"
"رقصوا"
"لا والله...وانت رقصت معاهم"
وسرح ماجد فى رقصته مع نغم ورد وهو سرحان
"رقصت"
قعدت على السرير وهى بتقوله
"لااااا ...ده الموضوع كبير وخطير ...احكى"
"احكى ايه يا بت انتى ...انتى مالك ومالى النهاردة"
"والله ضحكتك دى بتقول فيه حاجة...هتحكى يعنى هتحكى"
"هحكيلك"
"عرفتها النهاردة"
"لا... اطلعى بره "
"اطلع بره؟؟"
"ايوه...اغير هدومى واقعد معاكى نحكى ونرغى للصبح"
"ماشى يا كابير...مستنياك"
خرجت نشوى من الاوضة
غير ماجد هدومه... ومسك الموبايل علشان يتصل بنغم

الحلقة 13
ماجد بيتصل بنغم زى ما قالت له
اتصال ومفيش حد بيرد
استغرب...هى اكيد روحت من زمان
وملحقتش تنام...استنى شوية واتصل تانى
اتصال بدون رد لحد التليفون ما يفصل
دخلت عليه نشوى
"ايه ياماجد ...انت فين"
"تعالى يانشوى"
دخلت وقعدت جنبه
"احكيلى بقى"
"استنى اجرب بس تانى"
واتصل ماجد بنغم...اتصال بدون رد لحد التليفون ما فصل
حط ماجد التليفون جنبه وبص لنشوى
"بصى ياستى فاكرة لما طلبت منك تكلمى واحدة زميلتى تسألى عليها"
"اللى كانت فاقدة الذاكرة"
"الله ينور عليكى... هى دى بقى... كانت زميلة مفيش بيننا حتى الكلام العادى لانى مكنتش طايقها...لحد ما وقعت فى يوم بعد التمرين"
"وقعت ازاى"
وتعمد ماجد انه يلغى من الحكاية الجزء اللى هو نفسه ينساه او يلغيه من حياته...انه سبب الوقعة...وكمل الحكاية من غير السبب الحقيقى

نغم لسه فى اوضتها مع مامتها
"يعنى ايه مستنى معاد"
"علشان تتقابلوا وتشوفيه"
"وهو بابا وافق من غير مايقولى"
"باباكى بيقول ييجى وتشوفيه مقالش هييجى اول يوم تتجوزيه"
وبصت الام على الكومودينو
"هو موبايلك بينور ويطفى كده ليه"
قامت الام تشوف التليفون...حاولت نغم تسبقها بس اتحركت ببطء علشان ميبانش لهفتها
"مكتوب اتصال ومفيش اسم"
"هاتى ياماما كده ورينى"
اخد الموبايل وحمدت ربنا انها مش مسجلة ماجد بأى اسم غير نقطة بس وكانت عاملة حساب موقف زى ده
"ده باين المنبه بتاع الموبايل بيخرف"
"انا استغربت لما لقيت مكتوب اتصال...مين هيتصل بيكى ف وقت زى ده"
"مفيش طبعا... ماما بقولك ايه مابلاش العريس ده"
"يابنتى لو فيه سبب مقنع ماشى انما مفيش...طيب على الاقل شوفيه"
"اشوفه بس"
"ايوه شوفيه واتكلمى معاه لو معجبكيش خلاص انتى حرة"
"ماشى ياماما... الوقت اللى تحددوه"
قامت الام وهى بتدعيلها
"ربنا يجعله من حدك ومن نصيبك"
خرجت الام... وقفلت نغم عليها الاوضة لما مامتها بعدت
واتصلت بماجد
*********************
ماجد وهو قاعد مع نشوى
"دى الحكاية باختصار"
"انا مش عايزة اختصار...انا عايزة تفاصيل"
ورن موبايل ماجد...وشاف انها نغم
بص لنشوى
"بعدين بقى يانشوى"
"اااااه...سهلووووو ياعم"
خرجت نشوى من الاوضة...ورد ماجد بلهفة على نغم
"الو..حبيبتى انتى فين"
"معلش يا حبيبى ماما كانت عندى فى الاوضة وشافت التليفون"
"وبعدين حصل اى مشاكل"
"لا الحمدلله انا اصلا كنت عاملة الموبايل سايلنت ومش مسجلاك باسم"
"اومال كاتبة اسمى ايه"
"عاملة نقطة بس كده علشان لو الموبايل رن وماما ولا بابا شافوه محدش يفهم حاجة"
"ايه التخطيط ده"
"اهو على قدى"
"تعرفى انك وحشتينى اوى"
"عارفة"
"بجد"
"اه طبعا...علشان انت كمان وحشتنى"
"ااااااه"
"مالك ياماجد"
"قلبى مش مستحمل الحب ده كله"
"سلامة قلبك... قول لقلبك يجمد علشان كل يوم بحبه اكتر"
"بجد يانغم هتفضلى تحبينى كده"
"لو انت بطلت تحبنى ممكن ساعتها حبى يقل"
"انا ابطل احبك؟؟ ده انا حاسس ان الحب اللى بحبه ليكى عمره ما هيقل ولا يتغير...عارفة لما بشوف اتنين بيحبوا بعض بحس ان حبهم ميجيش حاجة جنب الحب اللى بحبهولك"
"ربنا يخليك ليا ويفضل حبنا يكبر ويكبر كل يوم"
"من كتر السعادة اللى انا فيها خايف"
"خايف من ايه"
"خايف ظروفى المادية تكون عقبة قصادنا ويجيلك حد جاهز واهلك يوافقوا عليه"
"وانت عرفت منين"
"عرفت ايه...هو انتى فيه حد فعلا متقدملك"
ندمت نغم انها وقعت بلسانها وقالت لماجد...هى مكنتش عايزة تقوله
"ملكش دعوة بالكلام ده انا هتصرف"
"يعنى ايه تتصرفى...وانا ايه طرطور"
"ايه الاسلوب ده ياماجد"
"انا عايز افهم انتى حد اتقدملك"
"ايوه"
"ومقلتليش"
"ايوه"
"ليه"
"لان الموضوع مش مهم"
"يعنى ايه مش مهم يانغم... انتى رفضتيه يعنى"
"بص ياماجد طريقتك فى الكلام مش عاجبانى"
"وعايزانى اتكلم ازاى...انا عمال ابنى احلام وانتى ف لحظة تهدى كل احلامى"
"علشان كده مكنتش هقولك"
"كمان عايزة تخبى عليا"
"ماهو لما قلتلك اهو شفت واحد تانى خالص"
"انتى عايزة ايه يعنى...عايزانى اقولك مبروك"
"عارف انا عايزة ايه"
"ايه"
"عايزة انام...تصبح على خير"
"استنى يانغم لما اخلص كلامى"
"معلش ياماجد...بلاش نتكلم دلوقتى مع السلامة"
قفلت نغم مع ماجد ودموعها على خدها
هى مش عارفة مين صح ومين غلط
بس اللى هى متأكدة منه انها زعلانة من كلام ماجد
******************
ماجد بعد مانغم قفلت كان متضايق منها ومن نفسه
متضايق منها انها خبت عليه وعرف بالصدفة منها
ومتضايق من نفسه انه مقدرش يمسك اعصابه وزعلها

طول الليل والاتنين كل واحد فيهم مش عارف ينام لانه بيفكر فى التانى
كل واحد زعلان من نفسه ومن التانى

تانى يوم الجمعة...قام ماجد ف معاده راح النادى
وهو فى النادى بيفكر فى نغم...عايز يكلمها ومتردد
مسك الموبايل يكلمها...وقبل مايتصل سمع الاذان
حط الموبايل فى جيبه وهو بيقول لنفسه
"اكلمها بعد الصلاة احسن"

وبره الاوضة باباها ومامتها
"انا نازل اصلى الجمعة مش عايزة حاجة"
"اه... الدوا بتاع نغم قرب يخلص هات علبة وانت جاى"
"طيب هاتى الروشتة"
"ثوانى اجيبها من جوه"
دخلت الام اوضة نغم تجيب الروشتة
نغم نايمة فى اوضتها...بعد مانامت الصبح من التفكير والحزن
مامتها بتدور على الروشتة فى درج الكومودينو
ملقيتش الروشتة.... فتحت علبة الدوا وبتشد حتة من الورقة المكتوب فيها الاسم...وهى بتقطعها ايدها وقعت موبايل نغم بدون قصد
صحيت نغم على صوت رزعة الموبايل
"فى ايه ياماما"
"معلش يانغم موبايلك وقع...شوفيه كده هيشتغل ولا لا"
قامت نغم تلم الموبايل اللى بقى 3حتت من ع الارض
صوت باباها من بره
"يا فاااااااااااطمة...بتعملى ايه كل ده"
نغم ركبت البطارية وحطت الغطا...وفتحت الموبايل
"الموبايل مبيفتحش"
الام"مكنش قصدى اوقعه يانغم"
"ولا يهمك ياماما ...فداكى"
"هاتى اديه لابوكى يوديه لحد يصلحه "
فتحت نغم الموبايل وشالت الشريحة وادت الموبايل لمامتها
اخدت الام الموبايل من نغم وخرجت من الاوضة
حاولت نغم انها تنام تانى... بس تفكيرها فى ماجد كان مخليها مش عارفة تنام
"ياترى ممكن يتصل بيا... ولو اتصل هيلاقى التليفون مقفول... بس لو عايز يكلمنى ممكن يبعتلى مسدج ع الميل ولا الفيس"
قامت نغم ببطء وكسل وهى بتبص فى الساعة
"مش هيرجع من النادى قبل 4"

ماجد بعد ما خلص صلاة الجمعة.. اتصل بنغم علشان يصالحها
اتفاجئ ان الموبايل مقفول
"بتقفلى الموبايل يانغم... للدرجة دى بتتلككى"
كمل ماجد شغل فى النادى... وف معاده روح البيت
اول حاجة عملها بعد ماوصل البيت... دخل اوضته وفتح اللاب توب
"نشووووووووووى"
جت نشوى تجرى من المطبخ
"ايه ياماجد"
"هو النت ماله"
"فاصل من امبارح بالليل"
"ليه"
"معرفش بكرة الصبح هتصل بالشركة واشوف"
رد وهو متنرفز
"طيب"
حاول يتصل تانى بنغم... الموبايل مقفول
مرة و2 و10 و30 الموبايل مقفول

نغم ومامتها وباباها قاعدين بيتغدوا
"موبايلك يانغم هجيبهولك بكرة وانا راجع من الشغل يكون اتصلح"
نغم"شكرا يابابا"
الام"معلش ياحبيبتى انا السبب"
نغم"ولا يهمك ياماما...بسيطة"
الاب"محمد قابلنى النهاردة وانا راجع وسألنى عن الرد"
نغم"محمد مين"
الاب"انتى مش قلتيلها يافاطمة"
الام"العريس يانغم"
هزت نغم راسها بمعنى افتكرته
الاب"هو هييجى بكرة الساعة 8 بس لوحده علشان يتعرفوا على بعض"
الام"اهلا وسهلا يشرف اى وقت"
نغم"الحمدلله "
قامت نغم من غير ماتكمل اكلها...علشان تروح تفتح النت
دخلت نغم اوضتها وفتحت الميل والفيس علشان تستنى ماجد
طول اليوم وهى بتستنى من غير ما يظهر ولا يفتح خالص

تانى يوم فى النادى
راحت نغم النادى فى معادها
مكنش حد موجود... مصطفى ويسرا فى اجازة علشان بيخلصوا اوراق السفر
قعدت على البيسين وهى بتدور بعينيها على ماجد
مش عارفة لما ييجى هتكلمه ولا لأ
بعد ربع ساعة شافت ماجد ... هى بتبص عليه بطرف عينيها وهى لابسة نضارة شمس وراسها فى اتجاه بعيد عنه علشان ميعرفش انها بتبص عليه
حست بيه بيقرب منها وبيقعد معاها... من غير مايتكلم
دقايق صامتة بينهم محدش فيهم بيتكلم...قامت نغم تمشى
مسك ايدها وهى معدية من جنبه
"استنى"
"نعم"
"فى ايه"
قعدت تانى واستغربت من سؤاله
"معرفش فى ايه....شوف انت"
"هو المفروض مين اللى يزعل من التانى...بتخبى عليا يانغم حاجة مهمة زى دى"
"وانت شايف ان مهم انى اقولك وانا عارفة انى مش هوافق...ولو قلتلك هتفتكرنى بعمل افلام بقى لما البنت تقول للى بتحبه متقدملى عريس علشان يغير والحاجات دى...خفت تفتكرنى بمثل عليك"
"لا مكنتش هفتكرك بتمثلى عليا"
قالها وهو بيبتسم لها...وكمل كلامه
"بس من اول مشكلة يانغم تاخدى جنب وتقفلى موبايلك"
"قال يعنى انت سألت ولا اهتميت"
"اومال عرفت منين ان موبايلك مقفول"
"مش مقفول...الموبايل بيتصلح ياماجد وفضلت قاعدة طول اليوم وطول الليل فاكراك هتسأل عليا ولا تكلمنى ع النت"
"والله النت عندنا فاصل من اول امبارح ومعرفتش اكلمك خالص"
"انا خفت اوى من قسوتك دى لما حسيت انك مسألتش عليا خالص"
"وانا اقدر... ياحبيبتى انا بحبك ومهما يحصل بيننا حتى لو زعلنا مع بعض شوية برضه مقدرش اشيل منك ولا اقسى عليكى"
نزلت دموع نغم من ورا النضارة
شال ماجد النضارة من على عينيها...ومسح دموعها بطرف صباعه
"مش عايز اشوف دموعك تانى"
هزت راسها وهى بتبتسم له
"قوليلى بقى ...رفضتى العريس"
"لسه"
"يعنى ايه لسه؟؟"
"يعنى هو لسه هييجى النهاردة علشان نتعرف على بعض"

الحلقة 14
"نعم... تتعرفى على مين يانغم"
"على العريس"
"ماشى يانغم...اتعرفى عليه براحتك"
قام ماجد... نادت عليه نغم
موقفش وكان سريع جدا لدرجة انه بقى بعيد فى لحظات لحد ما اختفى عن عينيها
قعدت نغم تفكر...تتصرف ازاى
******************
ماجد مشى متضايق وهو حاسس ان فيه خطوات بتبعد نغم عنه
عريس وبعدين تعارف وبعدين خطوبة
مشى ماجد بين الملاعب وبعد مازهق طلع المبنى الاجتماعى شاف قاعة مفتوحة وفاضية دخل قعد فيها لوحده
فضل قاعد حوالى نص ساعة... قاعد على كرسى وراسه راجعه لورا ساندها على ضهر الكرسى وبيبص لفوق وايديه على الكراسى اللى جنبه
"حاسب ايدك كده لما اقعد"
بص جنبه شاف نغم بتبتسم له
شال ايده من ع الكرسى وهو ساكت
"ينفع كده الف النادى كله عليك وافضل اسأل اى حد اشوفه فين ماجد فين ماجد"
"عايزة ايه من ماجد"
"مستغناش عنه"
ابتسم بسخرية وهو بيدور وشه
"مش عاجبك كلامى ولا ايه"
"نغم انتى بجد مش مقدرة اللى قلتيه... بتقولى عريس جايلك النهاردة وهتتعرفوا على بعض وقاعدة تهزرى"
"ماانت مش مدينى فرصة افهمك"
"فهمينى"
"انا هقابله وبعدين هرفضه...بس مقدرتش اقول لبابا لا كده من غير سبب"
"وافرضى قابلتيه وطلع كويس؟؟"
"انت بتثق فيا ولا لأ"
"بثق فيكى طبعا"
"يبقى خلاص سيبنى اتصرف باللى انا شايفاه صح"
"وانا؟؟"
"انت ايه"
"غيرتى عليكى اعمل فيها ايه"
"ياحبيبى صدقنى انا مش شايفة حد فى الدنيا دى كلها غيرك... وعلشان خاطرى بلاش تحسسنى انك مش واثق فيا ولا فى حبى ليك "
"سامحينى يانغم... والله ماكنت اقصد كل كده... انا اسف"
سكتت نغم... غمضت عينيها
صوت ماجد وهو بيقول
"سامحينى يانغم... والله ماكنت اقصد كل كده... انا اسف"
سمعته قبل كده... مش اول مرة تسمع الجملة دى بنفس الصوت
حاولت تفتكر اى مشكلة حصلت بينهم وقالها نفس الجملة
مفيش اى مشكلة كانت تستدعى انه يقول كده
"نغم...نغم مالك؟؟"
"مش عارفة ياماجد...حاسة انى سمعت كلامك ده قبل كده"
"كلام ايه"
"سامحينى يانغم... والله ماكنت اقصد كل كده... انا اسف... الكلام ده بنفس نبرة صوتك دى سمعتها قبل كده"
فكر ماجد... وافتكر انه مقالش الكلام ده قبل كده
غير لما كان بيروح لها وهى ف الغيبوبة
"خلاص بقى انا هتعب نفسى ليه...يمكن كان حلم...صح ياماجد"
"اه ...اكيد كان حلم"
"لسه زعلان منى بعد مافهمتك"
"مقدرش ازعل منك بس خايف"
"متخافش"
"هو جاى لكم امتى"
"النهاردة الساعة 8"
"وهتعملى ايه"
"هقابله ياماجد واقول لبابا وماما اى حاجة"
"ممكن متقعديش معاه كتير على قد ماتقدرى"
"حاضر"

ماجد فى البيت فى اوضته... ومعاه مامته
"بص ياماجد كريم جاى يتكلم معاك فى تفاصيل كتب الكتاب علشان يومها تكونوا اتفقتوا على كل حاجة"
ماجد وهو سرحان
"ماشى ياماما"
جرس الباب رن... قامت الام
"ده اكيد كريم.. قوم قابله"
"ماشى ياماما اقعدى معاه وانا هتكلم فى التليفون واجى"
قامت مامته وبص ماجد فى ساعة الحائط قدامه...7 ونص
اتصل ماجد بنغم على الموبايل
"ازيك ياحبيبتى"
"ازيك انت ياحبيبى"
" الموبايل اتصلح؟؟"
"اه وبابا جابه وهو راجع م الشغل"
"لبستى خلاص"
"ايوه"
"لبستى ايه"
"لبست هدومى"
"ماانا عارف انك لبستى هدومك مش هدوم الجيران... لبستى ايه بالظبط"
"ايه السؤال السخيف ده ياماجد...ريح نفسك لبست جينز وتى شيرت"
"بجد؟؟...بصراحة مش عايزك تبقى حلوة"
"متقلقش مش مهتمة باللبس ولا الميك اب"
"برضه هتبقى زى القمر"
"اعملك ايه ياماجد بقى دوختنى...مش معقول كل دى غيرة"
"اه غيران...فيها حاجة"
"ماقلنا بقى خلى فيه ثقة اكتر من كده شوية"
"ربنا يستر"
ودخلت مامة ماجد عليه وهو بيتكلم
"يالا ياماجد كريم عايزك"
"ماشى ياماما...جاى اهو"
خرجت الام...وكمل ماجد كلامه مع نغم
"اسيبك دلوقتى يا حبيبتى وابقى كلمينى لما الراجل ده يمشى"
قفل ماجد... وخرج يقعد مع كريم
كان الفرح لسه قدامه 3 اسابيع
وكل حاجة خلصت وماجد خلص كل اللى وراه فى جهاز نشوى من فلوس التمرين الخاص عند نجيب سالم
كريم بيتكلم وماجد بيسمعه وعينه على الساعة وتفكيره مع نغم
ماجد مش بيتناقش فى اى حاجة مع كريم وكل كلامه
"مش هنختلف على ماديات... احنا مش لسه هنعرفك النهاردة"
ولما جت الساعة 8 وربع مقدرش ماجد يقعد معاهم اكتر من كده واستأذن ودخل اوضته

فى اوضة نغم...بعد ما خلصت مع ماجد
دخلت مامتها
"خلصتى يانغم...ايه ده؟؟"
"ايه ياماما"
"ايه يانغم مش تلبسى حاجة عليها القيمة بدل اللبس اللى بتروحى بيه النادى ده"
"وماله ده ياماما"
"مش منظر تقابلى بيه عريس"
"ماما احنا على اتفاقنا اوعوا تغيروا كلامكم"
"اتفاق ايه؟؟"
استغربت ونغم ونادت على باباها...جه الاب
"بصوا انا وافقت اقابل العريس علشان بابا اتفق معاه انما انا مش مرتاحة ومش مهيأة نفسيا لخطوبة دلوقتى"
الاب"ليه يانغم"
نغم"مفيش سبب مش حاسة انى عايزة اتخطب "
الام"يمكن لما تشوفيه تغيرى رأيك"
الاب"ايوه يانغم...هو هييجى ولما نقعد مع بعض شوية هبقى انا ومامتك نسيبكم تتكلموا وتقعدوا مع بعض تتعرفوا اكتر"
وقالت نغم فى سرها
"ايه الورطة دى"
وكملت وهى بتقول لباباها ومامتها
"طيب انا عندى فكرة... لما ييجى لو حصل قبول هقعد معاه لو محصلش يبقى بلاش منها القعدة دى"
الاب"واحنا هنعرف منين"
الام"بصى يانغم هنقعد الاول بتاع 10 دقايق كده وبعدين هقوم اجيب عصير... لما اجى عندك لو اخدتى العصير من الصينية يبقى موافقة تقعدوا مع بعض لو قلتى مش عايزة يبقى خلاص...ولا ايه يااسماعيل"
الاب"هو مش المفروض ان العروسة هى اللى بتقدم"
نغم"وهو انا عروسة يابابا ...ده ضيف عادى لحد دلوقتى"
الاب"خلاص اللى تشوفوه"
مع دقات الساعة 8 رن جرس الباب
راح باباها فتح الباب واستقبل محمد
دقايق وخرجت نغم ومامتها يقابلوه
اتفاجئت نغم بشاب وسيم وشيك وبيتكلم بمنتهى الادب والذوق
مجاملات بسيطة من الطرفين
محمد من طرف وباباها ومامتها من طرف تانى
بسرعة شافت مامتها بتستأذن وتقوم
بصت فى الساعة شافت ان فات 10 دقايق ...بسرعة من غير ماتحس بيهم... سمعت صوت مامتها راجعة
وافتكرت ماجد...واتضايقت انها فكرت مجرد تفكير فى ان محمد شاب كويس واعجبت بيه مبدئيا
"ماجد عندى بالدنيا"
قالت كده فى سرها لما مامتها وصلت عندها بالعصير
"ميرسى ياماما...مش عايزة"
فهم باباها ومامتها رأيها ... قعدوا كلهم مع بعض حوالى نص ساعة بعدها استأذن محمد انه عايز يقعد مع نغم
باباها ومامتها بصوا لبعض وبصوا لها... ومع ذوق محمد
الاب"اه طبعا... احنا هنقعد قدامكم هنا فى البلكونة وانتوا اقعدوا مع بعض"
قام باباها ومامتها... وحست نغم ان باباها اضطر يوافق
لانهم متوقعوش ان محمد يطلب يقعد معاها وكانوا فاكرين ان القرار بايدهم لوحدهم
نغم قاعدة مش عارفة تبدأ بالكلام...وبمعنى ادق مش عايزة...سكتت واتكلم محمد
"بعد ماعرفتك على نفسى وانا بتكلم مع باباكى فى حاجة تانية عايزة تعرفيها"
"لا مفيش"
"وانا مش محتاج اعرف عنك حاجات عامة لانى عارفها انا بشوفك بقالى كام شهر وسألت عليكى وعرفت عنك حاجات كتير...كل حاجة بتقول انك الزوجة اللى اتمناها"
وحاولت ترد ...وبمجاملة
"وانت كمان فيك الصفات اللى تتمناها اى بنت"
"يعنى اعتبر انك موافقة مبدئيا"
ولحقت نغم نفسها وردت بسرعة
"لأ"
"لأ؟؟...ليه؟؟"
وحاولت نغم تدور على اى عيب او نقص فيه... مش لاقية
صورة ماجد وهما فى القاعة وبيقولها انه خايف ...جت قدام عينيها
"محمد شاب كويس بس انا بحب ماجد"
قالت لنفسها وكأنها بترد عبى قلق ماجد
وردت على محمد فى كلام حازم
"انت فعلا شاب كويس...بس انا مش بفكر فى اى ارتباط حاليا لانى مريت بحادثة ومش هفكر فى خطوبة وجواز غير لما اتعالج تماما"
"انا عارف موضوع الحادثة... وايه اللى يمنع العلاج مع الخطوبة"
"معلش ده قرارى... وقرار نهائى"
"اللى يريحك... ممكن تنادى بابا علشان استأذن"

ماجد فى اوضته... يقعد... يقوم... يقعد تانى يمسك الموبايل... يرميه ع السرير... يمشى للشباك... يرجع للسرير... يفتح اللاب... يمسك الموبايل..يرميه ع السرير...يقفل اللاب... يقوم...يرجع يقعد...يمسك الموبايل... يرميه ع السرير...الساعة تدق 9
*********************
نغم وقفت مع باباها ومامتها لحد ما محمد مشى
الاب"انتى قلتيله ايه"
نغم"قلت له انى مش هرتبط غير لما اتعالج من اثر الحادثة خالص"
الام"وايه اللى يمنع يابنتى"
نغم"ياماما محصلش قبول وانا مقدرتش اقولهاله كده ف وشه فعملت حجة الحادثة... انما يمكن مع حد تانى اوافق"
كانت تقصد ماجد بكلامها...بصت فى الساعة شافتها 9وخمسة
دخلت اوضتها وهى عايزة تطمنه بسرعة ان العريس خلاص...مشى بلا رجعة
اول ما مسكت موبايلها...شافت 30ميسد كول من ماجد
وبسرعة اتصلت بماجد...رد من قبل اول رنة ماتكمل
"نغم... كل ده قاعدة معاه"
"وانت كل دى ميسدات"
"احكى لى قالك ايه..وانتى قلتيله ايه... باباكى اتفق معاه على حاجة"
"ايه ياماجد بالراحة شوية "
"بالراحة ايه يانغم انا هتجنن"
"سلامتك من الجنان ياقلبى"
"الله يسلمك...بس لو فضلتى كده مش عايزة تريحينى هتجنن بجد"
"يا حبيبى ارتاح واطمن انامش هتجوز حد غيرك انت"
"والعريس؟؟"
"اترفض ولو جه 100 غيره مفيش غيرك انت بس اللى حبيبى"
"واهلك"
"مش ممكن يجبرونى على اى حاجة"
"انا بحبك اوى يانغم... اوعدك عمرك ماهتندمى ولا عمرى هزعلك ولا اتسببلك فى اى حزن"
"وعد؟؟"
"اه... وعد... انا عندى اموت ولا اتسبب فى نزول دمعة واحدة من عينيكى"

الحلقة 15
فاتت الايام ونغم وماجد فى سعادة
وف يوم وهما قاعدين ف النادى
جه عليهم مصطفى ويسرا
وسلموا على بعض ال4بكل ترحاب
نغم"وحشتونا اوى والله ...هترجعى امتى الشعل يا يسرا"
يسرا"خلاص بقى مش هرجع"
مصطفى"احنا جينا نعمل اخلاء طرف مع بعض...انا مسافر كمان يومين"
ماجد"تروح وتيجى بالسلامة... ويسرا هتسافر معاك ولا ايه"
نغم"اه صحيح يا يسرا مش كنتوا قلتوا انك هتحصليه بعد كام شهر"
مصطفى"مش هتسافر معايا فعلا بس شقتى هنا محتاجة توضيب وفرش وهى اللى هتشرف على كل ده وبعدين تجيلى ان شاءالله"
نغم"اه ...ربنا يعينك ده انتى وراكى حاجات كتير"
يسرا"علشان كده قلت مش هبقى فاضية لكل ده مع الشغل كمان"
مصطفى"احنا على كلامنا يا صاحبى ...هشوف لك حاجة هناك"
ماجد"ايوه طبعا... واى حاجة ختى لو مش بالشهادة"
وبص لنغم
"انا ورايا خطوات كتير عايز ابدأها"
مصطفى"ربنا معاك...والله من غير ماتقول انا عارف"
يسرا طلعت ظرف من شنطتها
"خدى يانغم"
نغم"ايه ده"
يسرا"افتحى وشوفى"
فتحت نغم الظرف... وماجد بيتابعها بعينيه بفضول
نغم ابتسمت ابتسامة كبيرة اول ما فتحت الظرف قالت بفرحة
"الصور"
قرب منها ماجد وبص للصور اللى ف ايديها وهو بيبتسم بفرحة
مسكوا الصور وقعدوا يتفرجوا مع بعض وهما الاتنين مبتسمين
مصطفى"واحد صاحبى ف الاستوديو جاب لنا الصور قبل المعاد وجاب صوركم معانا لانه شافكم يومها وعرف انكم معانا"
ماجد"اه فعلا الصور كان لسه معادها بعد اسبوع"
مصطفى"خيرى عليك طول عمرى"
يسرا"انتو الاتنين زى القمر...الصور حلوة اوى...صح يا مصطفى"
مصطفى"اه حلوين اوى... وخصوصا الصورة بتاعة العين ف العين دى... اى حد يشوفها يعرف قد ايه بيحبوا بعض"
ماجد ونغم فى دنيا تانية وهما بيتفرجوا على الصور
دنيا رجعتهم لاحلى يوم قضوه مع بعض
يوم فرح مصطفى ويسرا
يسرا ومصطفى بصوا لبعض
"يالا يامصطفى.. علشان نلحق نروح المشاوير اللى ورانا"
واستأذنوا وقاموا ونغم وماجد ماسكين الصور
"عقبال صور فرحنا ياحبيبتى"
"يارب يا حبيبى"
"تعرفى انى فرحان اوى بالصور دى"
"وانا كمان...بجد ياماجد كانت فكرة حلوة اوى"
"لو عايزة تاخديهم خديهم خليهم عندك"
"لا ياماجد مش هينفع...خليهم عندك انت"
"اللى يعجبك ياحبيبتى"
"الا قولى صحيح...هو مصطفى بيقولك اشوفلك حاجة فين"
"فى السعودية لما يسافر"
"هتسافر يعنى"
"ماهو الشغل عند نجيب مش مستمر يعنى كام شهر وخلاص...وانا عايز اشتغل علشان اعرف اتقدملك بسرعة...ماانتى عارفة الظروف"
"طيب يا ماجد"
قالتها بزعل
"انتى زعلتى"
"مزعلتش علشان كلامك صح انما غصب اتضايقت لما فكرت اننا هنبعد عن بعض"
"انا والله ماعارف ممكن يبقى حالى ازاى فى بعدنا عن بعض...بس انا بعمل كده علشان نقرب اكتر لما اتقدملك ونتجوز بسرعة غير لما اقعد هنا ويبقى قدامى سنين"
"معاك حق"
كل واحد فيهم فكر ازاى هيكون ف البعد حاله... لحظات تفكير صامتة
وقطع ماجد الصمت
"بلاش نفكر من دلوقتى ف اللى يضايقنا...ياعالم هيلاقى لى شغل ولا لا"
ابتسمت نغم ابتسامة حزينة من تفكيرها الحزين
"هتيجى فرح نشوى؟؟"
"مش هينفع"
"ليه"
"هقول لبابا وماما ايه"
"انا نفسى تيجى تتعرفى على امى واختى"
"خليها فى وقت تانى"
"اللى يريحك يا نغم... نشوى كان نفسها تشوفك"
"وانا والله عايزة اشوفها...بص هقولك فكرة كويسة...انا يومها لو عرفت اخرج لاى سبب هجيلكم نص ساعة كده ابارك لنشوى وامشى على طول...اتفقنا"
"اتفقنا"

يوم فرح نشوى... استأذنت نغم انها رايحة مع يسرا تجيب حاجات لجهازها... وخرجت فعلا
واتصلت بماجد وهى عند القاعة
"الو... انت فين ياماجد... انا قدام القاعة... طيب مستنياك"
دقيقتين ونزل لها ماجد
"اهلا يا حبيبتى تعالى"
"ماجد انا مكسوفة"
"ليه ياحبى"
"اول مرة هقابل مامتك واختك... ولابسة لبس خروج عادى هيبقى منظرى وحش"
"انتى زى القمر ف كل الاحوال...وانا عارف انك مش قايلة انك رايحة فرح يبقى هتنزلى بلبس عادى اكيد...وبعدين يا حبيبتى نشوى عارفة وفاهمة وهى نفسها تشوفك انتى مش تشوف لابسة ايه"
"امرى لله... برضه هموت م الكسوف"
اخدها ماجد من ايدها ودخلوا الفرح
راح على مامته
"ماما... دى نغم زميلتى فى النادى"
الام"اهلا يا بنتى... نورتى"
نغم"ميرسى ياطنط...مبروك"
الام"الله يبارك فيكى يا حبيبتى...عقبالك"
قالتها الام وهى بتبص لها هى وماجد ومبتسمة بعد مافهمت ليه اول مرة ماجد يعرفها على واحدة من زميلاته
ردت نغم بخجل"ميرسى ياطنط"
رد ماجد
"ان شاءالله يا ماما... قولى عقبالنا"
زادت الفرحة على وش مامة ماجد.... وبصت لنغم
"يارب يسعدكم يا حبيبى...تعالى يانغم اقعدى جنبى"
ماجد"مش هينفع تقعد ياماما علشان مستعجلة... هتبارك لنشوى وتمشى على طول"
نغم"معلش ياطنط مرة تانية ان شاءالله"
الام"ان شاءالله ياحبيبتى"
اخدها ماجد وراحوا يباركوا لنشوى
فرحت بيها نشوى وسلمت عليها بكل ود وكأنها تعرفها من زمان
"مبروك يانشوى ربنا يتمم بخير"
"الله يبارك فيكى يانغم... انا مبسوطة اوى انك جيتى.. عقبالكم بقى وافرح بيكم يارب"
نغم وماجد وهما بيضحكوا
"يااااااااااارب"
ماجد"استنوا لما اصوركم مع بعض"
طلع ماجد موبايله وصور نغم ونشوى مع بعض
وطلب من كريم يصور ماجد مع نشوى ونغم

فاتت الشهور وماجد ونغم الحب بيزيد بينهم كل يوم عن اللى قبله
بعد 3شهور ماجد ساب الشغل عند نجيب لان الاسرة كلها كانت مسافرة وهيستقروا لفترة ف امريكا لظروف شغل نجيب
مرت على ماجد ايام زعل كتير بعد ماراح منه الشغل ده وكانت دايما نغم بتخفف عنه
ماجد دايما قلقان من ظروفه انهم تبعدهم عن بعض
ودايما نغم بتطمنه انها مش بتحب ولا هتتجوز حد غيره
بعد 6 شهور من سفر مصطفى... وكان بداية دخول الصيف
اتصل بيه مصطفى وقاله يخلص اوراقه فى اسرع وقت علشان يسافر... وان يسرا سافرت له من شهر وهما مستقرين هناك
وفيه شقة ايجار مصطفى حجزها لماجد فى نفس العمارة اللى ساكنين فيها مصطفى وماجد

الايام اللى ماجد بيخلص فيها اوراقه كانت نغم معاه كل يوم وف اغلب مشاويره
كل واحد فيهم مش عايز يضيع ساعة بعيد عن التانى
يوم السفر... كانت طيارة ماجد الساعة 4 العصر
وده ساعد نغم انها تصمم انها تروح معاه لحد المطار

فى المطار...هما الاتنين قاعدين مع بعض
"اول ماتوصل تكلمنى"
"حاضر... هبقى اكلمك كل يوم ... وانتى طول ماانتى فى البيت خليكى فاتحة النت واول مااعرف مواعيدى هقولك"
"حاضر...خلى بالك من نفسك ياماجد...هتوحشنى اوى"
دموع نغم... اثارت دموع ماجد
مسح دموعه بسرعه... ومسح دموع نغم
"مش عايز اخر حاجة اشوفها قبل مااسافر تبقى دموعك"
"غصب عنى ياماجد"
"انا عارف"
قالها وهو بيطبطب على ايدها...ابتسم لها وقال
" بصى قوليلى ايه رأيك فى دى"
طلع علبة صغيرة من جيبه...فتحها وطلع منها سلسلة دهب فيها نص قلب مكتوب عليه"لا اله الا الله"
"الله ياماجد...احلى حاجة انها منك"
"خليها معاكى يانغم حتى لو مش هتقدرى تلبسيها علشان مامتك وباباكى خليها معاكى وانا معايا النص التانى من القلب اللى فيه(محمد رسول الله) واهى حاجة تفتكرينى بيها"
"انا مش هحتاج حاجة تفكرنى بيك ...انت ف قلبى على طول"
نزلت دمعة من ماجد غصب عنه
مسحتها نغم وهى بتضحك بدموع
"يعنى انت بتقولى متعيطيش وتعيط انت"
"مش عارف يانغم هعمل ايه من غيرك"
"ربنا يصبرنا لحد مانبقى مع بعض على طول"
"خايف تكون دى اخر مرة نتقابل فيها"
قبل ما ترد نغم... سمعوا النداء لركاب طيارة ماجد
دموعهم الاتنين نازلة بصمت... ايديهم فى ايد بعض
"نغم... خلى بالك من نفسك ... اوعى تنسينى"
"كلامك غريب اوى ياماجد النهاردة... متقلقنيش عليك"
"متقلقيش...اللقا نصيب ويارب يجمعنا تانى على خير"
"ان شاءالله هتروح وترجع بالسلامة"
قبل ما يمشى ماجد...وقف وقرب من نغم
باسها من راسها... واستسلمت نغم لاحساسها
حضنها ماجد ... نفسه يدخلها جوه قلبه
وهى ف حضن ماجد...حاطة راسها على صدره
نفسها تفضل سامعه دقات قلبه ومتبعدش عن حضنه ابدا
سمعوا النداء الاخير لركاب الطيارة
بعدوا الاتنين عن بعض ببطء وعينيهم متعلقة ببعض
"هكلمك لما اوصل... لا اله الا الله"
"هستنى اتصالك... محمد رسول الله"
مشى ماجد فى طريقه وكل شوية يلتفت لنغم
نغم واقفة مكانها بتعيط وكل ما يلتفت لها ماجد يبتسموا لبعض ويكمل طريقه تانى
قبل ما يختفى عن نظرها التفت ليها... وقف لحظة
شاور لها بايده...شاورت له
واختفى ماجد عن نظرها... وخرجت نغم من المطار
بعد ما راح قلبها مع ماجد وسابها

الحلقة 16
رجعت نغم البيت واول مادخلت
الام"اتأخرتى ليه يانغم"
نغم"روحت ادور على كتاب بعد الشغل"
الام"ولقيتيه"
نغم"لا"
الام"طيب غيرى هدومك لحد مااحضرلك الغدا"
نغم"لا ياماما مش قادرة...انا هنام شوية ولما اقوم ابقى اكل"
الام"انتى اكلتى حاجة ف النادى"
نغم اضطرت تكذب علشان مامتها متلحش عليها
"اه اكلت "
دخلت نغم اوضتها... قفلت عليها
طلعت السلسلة من شنطتها...فضلت تبص لها
الدموع نازلة من عينيها حضنت السلسلة وباستها
فتحت اللاب توب... وجابت كل المحادثات اللى بينها وبين ماجد
قعدت تقراهم...تعبيرات وشها بتتغير مع كل جملة بتقراها
تبتسم احيانا...تضحك احيانا...تدمع باقى الوقت

ماجد بعد ما ركب الطيارة وبدأت تتحرك
حس انه ساب قلبه مع نغم...مسك قلبه وكأنه بيلمس نغم
مكان ما كانت سانده راسها على صدره وهى بتودعه
طلع النص التانى من القلب ومسكه ف ايده
رجع راسه على الكرسى...غمض عينه
علشان يسترجع كل لحظاته اللى فاتت مع نغم

وصل ماجد المطار... كان مصطفى مستنيه...سلموا على بعض
"حمدالله ع السلامة ياماجد"
"الله يسلمك اخبارك ايه يامصطفى"
"الحمدلله...وحشتنى يامجود والله"
"وانت يادرش...اخبار الحياة هنا ايه"
"تمام هتاخد عليها بسرعة"
ركبوا عربية مصطفى
"عربيتك دى"
"اه ...ايه رأيك"
"ربنا يباركلك فيها"
"الله يخليك... اتفضل ياعم مفتاح شقتك اهو ..والنادى قريب من البيت"
"تعبتك معايا يا مصطفى"
"عيب عليك ياجدع...احنا هنروح تودى شنطك وتيجى تتعشا معانا يسرا مستنيانا"
"انا يدوب اروح انام"
"انت عايز يسرا ترمينى بره ولا ايه...دى بقالها يومين عمالة تحضر للعشا ده وترسم فى احلام .. وكل شوية تقول... ماجد هييجى امتى واكيد لما ييجى ويستقر هما هيجيب نغم كمان...اخيرا هلاقى اصحابى تانى"
"هههههه دى يا عينى باصة لبعيد اوى"
"ههههه اتخنقت هنا اوى وخصوصا ان لسه النادى جديد ومفيش مصريين غيرنا فمش عارفة تاخد ع الناس بسرعة"
"هى بتشتغل فى النادى"
"لا ..والعمارة اللى احنا فيها كلها ناس من جنسيات مختلفة...سيبك بكرة تتعود"
"ان شاءالله...بقولك ايه عايز اشترى خط قبل مانروح علشان اكلم نغم"
"اخباركم ايه مع بعض"
"الحمدلله... انت تعرف انى خايف اوى ومكنتش عايز اسافر"
"من ايه"
"مش عارف يامصطفى قلقان حاسس ان السفر اللى سافرته ده علشان نقرب من بعض هو اللى هيبعدنا"
"ايه ياعم الكلام ده"
"يمكن انت لما سافرت كنت مطمن علشان سافرت ويسرا مراتك انما انا ونغم كل اللى بيربطنا مشاعر بينى وبينها بس"
"متقلقش يا ماجد ...نغم بتحبك بجد "
ركن مصطفى العربية
"تعالى نشترى خط من هنا"
نزلوا واشتروا خط للموبايل وكانوا قريبين من البيت
طلعوا البيت... كانت شقة ماجد فى الدور التالت
"خد يا ماجد المفاتيح دى بتاعة الشقة... دخل حاجتك وهنستناك احنا فوقك على طول"
"ماشى يامصطفى...متشكر اوى"
"متقولش كده بقى احنا اخوات"
دخل ماجد شقته...وطلع مصطفى شقته

الشقة مناسبة لماجد اوضتين وصالة ومساحتهم متوسطة
دخل شنطته فى اوضة النوم
واول حاجة عملها انه شغل الخط
اتصل بمامته يطمنها عليه... وبعد ماخلص معاها
اتصل بنغم

نغم قاعدة فى اوضتها من ساعة مارجعت وهى مستنية تطمن على ماجد
بتمر الساعات وهى هتموت من القلق
لحد ما رن الموبايل برقم دولى
"الو... ماجد وحشتنى"
"انتى وحشتينى اكتر ياحبيبتى...عاملة ايه"
"قاعدة معاك"
"معايا ازاى"
"قاعدة اقرا كل الرسايل والمحادثات والكومنتات وكل حاجة بيننا من ساعة ماعرفنا بعض"
"انا بقى طول الطريق من ساعة ماسيبتك لحد ما وصلت المطار وانا بحلم بيكى وانا صاحى وبفتكر كل لحظة قضيناها مع بعض"
"يعنى اللى بيننا دلوقتى بقى ذكريات"
"اوعى تقولى كده يانغم... متخوفينيش اكتر ماانا"
"مش قصدى تخاف انا اقصد يعنى بيننا ذكريات قضيناها لحد ماترجع تانى"
"يااااه مش عارف الشهور دى كلها هتمر ازاى"
"هتمر صعبة علينا احنا الاتنين... بص ياماجد لازم نقوى بعض مينفعش كده"
"انتى قادرة تقوى"
"مش قادرة بس لازم نسلم بالامر الواقع...خلاص احنا كل واحد فى بلد وانت متغرب علشان نبقى مع بعض بسرعة... هنتكلم كل يوم وهنبقى مع بعض ع النت والتليفون ومش هنبعد عن بعض ساعة... ماشى ياماجد"
"ماشى ياحبيبتى... انتى عاقلة اوى يانغم انا بجد فخور بيكى انك بتشجعينى كده ووقفتى جنبى فى ظروفى دى"
"ياحبيبى احنا واحد وكل حاجة حد فينا بيعملها بتنفعنا احنا الاتنين"
"صح كلامك"
ورن جرس الباب عند ماجد
"جرس الباب ده؟؟"
"اه...هقوم اشوف مين وانتى معايا"
وصل ماجد للباب ...فتحه
مصطفى"هنستنى كتير ولا ايه"
ماجد لنغم"ده مصطفى... اصل يسرا عازمانى على العشا"
نغم"سلم عليه"
ماجد لمصطفى"بتسلمك عليك"
مصطفى بصوت عالى وبيقرب من الموبايل
"ازيك يا نغغغغغغغغغغم"
نغم سمعته وبتضحك
"الله يسلمك يا مصطفى...سلم على يسرا كتييييييير"
ماجد"اقعدوا كلموا بعض وانا اصلا اللى معايا التليفون"
مصطفى بالهمس"يالا بقى هسبقك واطلع ورايا على طول"
ماجد هز راسه وكمل مع نغم بعد ماخرج مصطفى وقفل الباب
"ايه يا حبى... هتعملى ايه دلوقتى"
"هقوم اتغدا بقى بدل اتطمنت عليك"
"انتى كنتى لسه مأكلتيش"
"اه مقدرتش الا لما اطمن عليك"
"طيب قومى اتغدى وخلى بالك من نفسك علشان خاطرى"
"حاضر وانت كمان خلى بالك من نفسك علشان خاطرى"
"حاضر يا حبى... يالا ... اسيبك علشان اطلع لمصطفى يزعل"
"اوك ياحبيبى...مع السلامة"

بعد 6 شهور
ماجد فى المطار... ومصطفى ويسرا وصلوا
ماجد ومصطفى بيسلموا على بعض..وبعدين ماجد بيسلم على يسرا
"حمدالله ع السلامة... طمنونى اخبار مصر ايه"
مصطفى"الحمدلله"
يسرا"بتسأل على مصر برضه ولا اللى ف مصر"
ضحك ماجد "الاتنين"
مصطفى مضحكش وهو مشغول انه يحط الشنط فى العربية
ماجد"هتسوق انت ولا اسوق انا"
اخد مصطفى المفاتيح من ماجد
"هات هسوق انا"
ركب مصطفى فى عربيته اللى كانت مع ماجد ويسرا جنبه وماجد لوحده ورا
ماجد"طمنينى يا يسرا اخبار نغم ايه"
يسرا"نغم بتسلم عليك وباعتالك سلامات بالهبل"
ماجد"هى كويسة بجد"
يسرا"اه والله قابلتها كذا مرة وكل مرة بنفضل نتكلم عنك طول الوقت...احكيلى عملت ايه من غيرنا"
ماجد"بصراحة الشهر ونص الاجازة بتوعكم دول عدوا عليا كأنهم سنة ونص"
يسرا"بذمتك اكلى موحشكش"
ماجد"ههههه يايسرا انتى اكلك لا يعلى عليه وبصراحة محدش يقدر يقاومه ابدا"
يسرا"خلاص هعملك بكرة اكلة حلوة وتيجى تتغدا معانا"
ماجد"ان شا..."
وقاطعهم مصطفى
"احنا بكرة نرتاح يا يسرا ونبقى نخرج نتغدا بره انا وانتى"
نبرة مصطفى كانت حاسمة للكلام...
يسرا حاولت تتكلم... ملقيتش كلام
ماجد حاول يتكلم... ملقاش كلام
سكوت تام بين ال3 لحد ما وصلوا للبيت
ماجد"انا رايح النادى...مش عايزين حاجة وانا جاى"
يسرا قبل ماتتكلم رد مصطفى
"شكرا ياماجد...احنا هنطلع ننام ونرتاح"
ابتسم ماجد باحراج واستأذن ومشى
طلعوا يسرا ومصطفى البيت واول مادخلوا البيت
"هو فيه ايه...ايه الطريقة اللى بتكلم بيها ماجد دى"
"طريقة ايه وهو ماجد لازم يبقى عندنا كل يوم وتشيلى هم اكله وشربه وخدمته...ايه يايسرا الاهتمام ده كله"
"انا مش مصدقة اللى بسمعه...انت فاهم انت بتقول ايه"
"اه فاهم وهو انا عيل صغير"
"انت بتتهمنى ف ماجد"
"انا مقلتش كده"
"اومال كلامك معناه ايه"
"معناه ان اهتمامك بيه غير طبيعى"
"اهتمام ايه احنا لسه جايين من مصر من ساعات"
"وقبل ماننزل مصر...انا كنت ساكت واقول هى هتحس من نفسها...ده انتى فى الاجازة كنتى بتفكرى فيه"
"افكر فيه!!!!!"
"تنكرى"
وصرخت يسرا
"افكر فيه ازاى هو ده الفرق...بفكر فيه كصاحبنا الوحيد اللى قريب مننا فى الغربة... بفكر فيه انه صاحبنا اللى مالوش غيرنا فى الغربة...وتعالى هنا انا لو بفكر فيه تفكير من اللى تقصده اروح لنغم واطمنها عليه ...انت نسيت ماجد ونغم يبقوا لنا ايه"
"ماجد راجل...وانتى مراتى وحقى اقولك تكلمى مين ومتكلميش مين"
"يعنى انت عايز ايه دلوقتى يامصطفى"
"ماجد ميدخلش البيت هنا تانى وملكيش دعوة بيه"
"هو ماجد بييجى وانت مش موجود؟؟"
"مليش دعوة... لا وانا موجود ولا وانا مش موجود"
سكتت يسرا وهى مستغربة
"عندك اعتراض على كلامى"
"لا معنديش...حاضر يا مصطفى...اهو صاحبك انت من قبل مانعرف بعض وطريقتك دى عيبه ف حقك قدام صاحبك "
"ملكيش دعوة انتى...علاقتى بصاحبى هتبقى ف الشغل بس ومالهاش لازمة تبقى ف البيت"
"ماشى يامصطفى اللى يريحك"
*********************
ماجد بعد ماسابهم ماجد راح النادى...قعد يفكر فى التغيير المفاجئ لمصطفى... راجع اللى حصل بينهم...هو معملش حاجة تضايقه... وافتكر ان مصطفى اتغير بعد ما يسرا عزمته
"يمكن انا زودتها وانا مش قصدى وهو اتضايق... مفيش داعى اضايقهم واسببلهم مشاكل ...مصطفى ساعدنى كتير وانا مينفعش اكون سبب فى مشاكل بينه وبين مراته... حتى لو عزمونى تانى انا مش هروح... هانت كلها كام شهر وانزل اجازة واحاول مع اهل نغم اننا نتجوز وتيجى معايا لحد مانعمل شقة ف مصر"

بعد كام شهر
نغم راجعة من النادى... وهى ماشية فى الشارع رن موبايلها

ماجد هو كمان فى الشارع وبيتصل بنغم
"الو...ازيك ياحبيبتى"
"الحمدلله ياحبيبى انت عامل ايه"
"عاملك مفاجأة"
"انتى فين دلوقتى"
"راجعة من النادى ورايحة ع البيت"
"بصى بقى ياستى...انا لسه خارج من الشغل واتحدد معاد اجازتى...احسبى 30 يوم من دلوقتى هكون عندك ان شاءالله"
"بجد ياماجد...دى مفاجأة حلوة اوى... يارب الشهر ده يعدى بسرعة"
"بصى احنا مش عايزين نضيع وقت...مهدى مع مامتك وباباكى الكلام علشان لما اجى من اول يوم اجى اطلبك منهم ...انا مش قادر استنى اكتر من كده"
"حاضر ياحبيبى هتكلم معاهم النهاردة واقولك بالليل ان شاءالله"
"حاولى يانغم تقنعيهم اننا نتجوز فى الاجازة دى...ولو باباكى ولا مامتك قالولك انى اكلمهم او ماما تكلمهم فى التليفون لحد ما ارجع قوليلى وانا هكلمهم على طول"
"طيب حاضر ان شاءالله كل حاجة تمشى زى ما اتفقنا"

ماجد بيعدى الشارع وهو بيكلمها
نغم دخلت الشارع اللى ساكنة فيه وهى بتتكلم
مامتها بالصدفة بتنشر غسيل وشايفاها وهى بتتكلم
محمد"العريس السابق" بيركن عربيته فى نفس الشارع

ماجد بيكمل كلامه معاها وهو بيعدى الشارع
"ان شاءالله... متنسيش تدورى على فستان الفرح من دلوقتى...اااااااااااااااااااااااااااااااااااااااااااااه"
سمعت نغم صوت ماجد بيصرخ ...صوت فرملة عربية... صوت ناس كتير الا ماجد
"ماجد... ماجد...رد عليا... ماجد انت فين"
نغم بتعيط... ماجد مش بيرد
نغم حست بأن ماجد حصل حاجة...عقلها رافض يصدق اللى سمعته
الدنيا لفت بيها
وقعت نغم فى الشارع مغمى عليها ومامتها ومحمد شايفينها من بعيد

الحلقة 17
مصطفى ويسرا فى المستشفى... وراء شباك يطل على العناية المركزة... وماجد نايم وجنبه اجهزة كتير متوصل بيها
يسرا واقفة بتعيط...مصطفى بيبص لها
مسحت دموعها
"الدكتور قال ايه"
"ربنا يستر"
"ياعينى ياماجد"
قالتها يسرا وهى بتعيط
"انتى بتعيطى كده ليه"
بصت له شذرا... وردت
"عيب عليك بقى"
قعد مصطفى جنبها
"طيب يالا اوصلك"
"هنسيبه لوحده بين الحياة والموت"
"لا طبعا مش هسيبه... هوصلك وارجعله"
ونزلت دموع من عين مصطفى
"ده اقرب صاحب ليا...ربنا ينجيه"
"مش هنقول لمامته"
"ولو قلنا لها هتعمل ايه.. هنبقى خضيناها وخلاص...هنستنى اما نشوف هيحصل ايه"
"حرام عليك يامصطفى الفترة اللى فاتت كنت بتعامله كأنه واحد غريب ...يعنى لو مات هتسامح نفسك"
"وهو انا عملت ايه... شوفى برضه بتتكلمى عنه ازاى"
"ايوه يامصطفى ماجد عزيز عليا زى اخويا مش اكتر واهتمامى بيه ده علشان مالوش حد هنا غيرنا واحنا مالناش حد هنا غيره"
"وانا من حقى اغير على مراتى"
"من ماجد؟"
"من اى راجل يا يسرا"
"ماشى يا مصطفى... مش هجادلك لانى بجد تعبانة"
"تعبانة مالك"
"حاسة بدوخة كده وريحة المستشفى قلبت معدتى ومن ساعتها معدتى واجعانى"
"تعالى نكشف قبل ما نمشى"

لما وقعت نغم فى الشارع
صرخت مامتها من البلكونة...ونزل باباها بسرعة
ومحمد جرى عليها هو والناس اللى فى الشارع

محمد وباباها وبعض الجيران طلعوها البيت وهى مازالت مغمى عليها
الام"هى مالها مبتردش ولا بتفوق ليه"
الاب وهو ماسك الموبايل
"انا هتصل بالدكتور بتاعها حالا"
محمد بيحاول يفوقها...بلا جدوى
الاب بعد ماقفل التليفون
"الحمدلله الدكتور كان فى مشوار قريب من هنا وبيقول 10 دقايق ويكون عندنا"
محمد"هى اول مرة يحصل لها اغماء كده ولا هى تعبانة"
الاب"عمرها ماحصل لها كده من غير سبب"
الدقايق بتمر بطيئة ونغم فاقدة الوعى وكل محاولات افاقتها دون جدوى
وصل الدكتور... خرج محمد واسماعيل لحد الدكتور ما يخلص كشف
كشف عليها.. وبعد ما اخدت حقنة ...بدأت تفوق
نغم بتفوق... حواليها مامتها\ باباها \ الدكتور \ محمد
نغم بتبص حواليها باستغراب... بدأت تقعد نص قعدة
"انا جيت هنا ازاى"
الام"يا لاهوى... انتى هنا فى بيتك"
نغم"انا كنت فى النادى"
الدكتور وهو بيشاور للجميع بالسكوت
"وبعدين"
نغم"خلصت التمرين وغيرت هدومى واتزحلقت وانا خارجة...هو مين اللى جابنى هنا"
الدكتور"احنا ف شهر كام"
نغم"9 ...بس انتو ليه لابسين شتوى...وانا جيت هنا ازاى"
الدكتور"هتفهمى كل حاجة بس عايز اسألك كام سؤال"
نغم بتبص للموجودين وهى مش فاهمة حاجة
الدكتور"انتى عندك كام سنة واتخرجتى امتى ومين اصحابك"
نغم"عندى 22سنة واتخرجت السنة اللى فاتت واشتغلت من 4شهور وماليش اصحاب قريبين كل اصحابى من ايام الكلية اتفرقنا وبنسأل على بعض من خلال تليفونات كل مدة"
الدكتور قعد على طرف السرير
"بصى يانغم... انتى دلوقتى عندك 24 سنة ووبتشتغلى فى النادى من سنتين تقريبا... اليوم اللى وقعتى فيه ده فات من سنة ونص"
نغم مش مستوعبة اللى بيقوله الدكتور
"يعنى ايه"
"يعنى انتى لما وقعتى كانت حالتك خطيرة ودخلتى ف غيبوبة وبعدين لما خفيتى جالك فقدان ذاكرة مؤقت نسيتى بعض اجزاء من حياتك"
نغم ساكتة بتحاول تستوعب
"والسنة ونص دول حصل فيهم ايه"
"انتى اللى المفروض تقولى"
"انا معرفش...انا وقعت فى النادى لقيت نفسى هنا دلوقتى"
"يعنى مش فاكرة اى حاجة تانية"
سكتت نغم تفكر...وتركز
"مش فاكرة حاجة خالص"
الدكتور وهو بيكلم باباها
"كده نغم خفت ورجعت لها ذاكرتها كاملة"
الاب"والفترة اللى فاتت دى"
الدكتور"احنا هنستمر على بعض الادوية ومحتاجين برضه انكم تساعدوها انها تفتكر... وعموما اللى يهمنا حياتها كلها فى ال22 سنة اللى قبل الحادثة والسنة ونص دول حتى لو مفتكرتهمش مش مهم"
الام والاب"الحمدلله يارب...يعنى كده خفت"
الدكتور"ايوه...حمدالله على سلامتها"
ابتسم محمد ابتسامة واسعة...ووجه كلامه لنغم
"حمدالله على السلامة"
ردت نغم باستغراب وهى متعرفوش
"الله يسلمك"
واستأذن محمد وهو خارج على الباب والاب بيوصله
"حمدالله على سلامة نغم ياعمى...انا بجدد طلبى لايد نغم وهى كانت قالت انها مستنية لما تخف... ياريت حضرتك تتكلم معاها وترد عليا"
"ان شاءالله يابنى...ربنا يقدم اللى فيه الخير"
خرج محمد ورجع الاب لنغم شافها قاعدة فى حضن مامتها وبيتكلموا
"انتى كنتى بتروحى شغلك كل يوم عادى وكان ليكى واحدة زميلتك فى النادى اسمها يسرا دى كانت اقرب واحدة ليكى بس هى اتجوزت وسافرت"
"يعنى اروح شغلى ازاى وانا مش فاكرة اللى فات"
اتدخل الاب فى الكلام
"ا\فاروق متفهم حالتك...وبعدين انتى كده رجعتى لطبيعتك يبقى شايلة هم ايه"
"انا متلخبطة اوى يابابا"
"معلش ياحبيبتى فترة وهتعدى... بقولك ايه يافاطمة محمد جدد طلبه تانى لنغم...اتكلمى معاها وشوفى رأيها وانا هنزل اجيب الدوا اللى الدكتور كتبه"
نغم"اه صحيح مين اللى كان واقف ده"
الام"هحيلك يانغم على كل حاجة"

تانى يوم راحت نغم النادى وهى بتتظاهر بانها عادية
راحت قعدت عند البيسين... واستغربت انها مشافتش ماجد ولا مصطفى... راحت السكرتارية واللى ساعدها ان مفيش تمارين فى الوقت الحالى
وهى قاعدة ... جه عامل الكافتيريا يجيب لها العصير اللى طلبته
"بقولك ايه يا احمد... هى كابتن يسرا مش بتيجى"
"هو مش حضرتك عارفة انها اتجوزت الكابتن وسافروا"
"و كابتن ماجد فين"
"ماهو سافر هو كمان"
"اه صح ...معلش يااحمد متلخبطة شوية"
مشى عامل الكافتيريا... وقعدت تربط الاحداث ببعض
يعنى بعد الحادثة بتاعتها جت يسرا الشغل زى ما مامتها قالت... هى ويسرا اتصاحبوا ...يسرا وماجد اتجوزوا وسافروا... كده ترتيب منطقى لانها بقت مدربة السباحة الوحيدة ف النادى

بعد 3 ايام فى المستشفى فى السعودية
ماجد فى غرفة عادية ورجله فى الجبس ودماغه مربوطة بشاش
يسرا ومصطفى معاه
يسرا"حمدالله ع السلامة يا ماجد"
مصطفى"خضيتنى عليك ياصاحبى"
ماجد"الحمدلله ...عمر الشقى بقى... انا بس قلقان تكون نغم قلقانة عليا...كلمتيها يا يسرا"
يسرا"وهى نغم هتعرف منين"
ماجد"لما عملت الحادثة كنت بكلمها"
يسرا"لا معرفش ومسألتنيش ومدخلتش نت اصلا الكام يوم اللى فاتوا دول"
ماجد"هات تليفونك يا مصطفى اكلمها"
مصطفى"حاضر"
اتصل بيها ماجد
"غريبة...تليفونها مقفول"
مصطفى"يمكن فاصل شحن ولا حاجة شوية كده نجرب تانى"
ماجد"هو انا هخرج امتى"
مصطفى"الدكتور قال يومين كمان تحت الملاحظة وممكن تخرج"
ماجد"الله يخليك يا مصطفى قدم لى معاد السفر واحجزلى انا عايز انزل مصر"
مصطفى"حاضر بس خد كلم مامتك علشان متعرفش حاجة وزمانها قلقانة عليك"
واتصل ماجد بمامته ومقالش حاجة عن الحادثة...كل اللى قاله انه هينزل الاجازة بدرى عن معاده... وهو بيدى التليفون لمصطفى
"مش تبارك لنا بقى ياماجد"
"مبروك...على ايه؟"
مصطفى"يسرا حامل"
ماجد بفرحة حقيقية"الف مبروك"
يسرا"عقبال اما نشوف ولادك انت ونغم"
ماجد"ان شاءالله"

بعد اسبوع فى المطار
كريم ونشوى مستنيين ماجد... ماجد وصل بعكاز بيسند عليه ولصق طبى فى راسه
اول مانشوى شافته
"يا مصيبتى .... مالك ياماجد"
ماجد"متخافيش يابت اخوكى ب7 ارواح"
كريم"مالك بجد ياماجد...ايه اللى حصلك وازاى متقولناش"
ماجد"هحكيلكم كل حاجة فى الطريق"
****************************
فى اوضة ماجد... ماجد على السرير
وحواليه مامته وكريم ونشوى
كريم"طيب انا هقوم علشان ورايا شغل...لو عايزة تباتى يانشوى هنا النهاردة خليكى مع ماجد"
نشوى"اه ياكريم...وتعالى بات معانا"
كريم"ماشى...مش عايزين حاجة"
ردوا عليه وقامت نشوى توصله...وبعد ما رجعت قامت مامتها دخلت المطبخ
"نشوى هاتيلى اللاب توب من الشنطة دى"
"ايوه ياعم ...بس التليفون اسهل يعنى "
"هاتى بس بسرعة"
فتح ماجد اللاب ...وفتح الميل والفيس
"برضه مفيش فايدة"
"مالك ياماجد فى ايه"
"نغم تليفونها مقفول ومبتدخلش نت خالص ومش عارف فى ايه"
"وفين تليفون بيتها"
"كان على موبايلى والموبايل ضاع ف الحادثة"
"وبعدين دى حاجة تقلق"
"انا هموت م القلق وده اللى خلانى اول ما اقدر ادوس على الارض انزل مصر علشان احاول اطمن عليها باى طريقة"
"تحب اروح لها البيت"
"ياريت يا نشوى"
"احنا الساعة 9 دلوقتى...نستنى لبكرة احسن"
"لا الله يخليكى انا مش قادر استنى اكتر من كده... هتجنن واشوفها... وحشتنى اوى ...بصى يانشوى قوليلها على الاقل تفتح النت واكلمها ولا تفتح تليفونها...واسأليها هى قافلاهم ليه"
"تفتكر ليه ياماجد"
"مش عارف انا خايف لتكون افتكرت انى مُت وتعبانة ولا حاجة"
"طيب هقوم اروح لها حالا... اوصف لى العنوان"

نشوى بتخبط على باب بيت نغم
فتحت مامة نغم
"مساء الخير ياطنط"
"مساء النور"
"نغم موجودة"
"لا والله نزلت...طيب تعالى يابنتى مينفعش كده من ع الباب"
دخلت نشوى وقعدت ومكنش حد موجود الا مامة نغم
"هى هتتأخر"
"هى لسه نازلة من شوية مع خطيبها"
"خطيبها!!!"
"اه ...انتى متعرفيش ان قراية فاتحتها كانت امبارح"
نشوى بترد وجواها كم غيظ وغل ناحية نغم اللى خدعت ماجد"
"لا معرفش"
"انتى مش معاها فى النادى"
"لا... بس لما تيجى قوليلها انى جيت لها...انا نشوى هى عارفانى كويس"
"معلش بس فى السؤال ...انتى تعرفى نغم من امتى"
"من حوالى سنة...بس ليه؟؟"
"نغم مش هتفتكرك"
"ازاى"
"اصل نغم كان حصل لها حادثة وفقدت الذاكرة... رجعت لها الذاكرة الحمدلله من ييجى اسبوع كده ... بس نسيت كل اللى حصل من بعد الحادثة لحد ما رجعت لها الذاكرة"
نشوى باستغراب
"كل حاجة ..كل حاجة"
"كل حااااااااااجة...دى حتى اول ما رجعت لها الذاكرة اتهيألها انها كانت لسه واقعة وفاقت بعد لحظات"
"وليه تليفونها مقفول ومبتفتحش نت"
"هى تليفونها اتكسر يوم مارجعت لها الذاكرة والخط ملقيناهوش ...باباها جاب لها تليفون وخط جديد... عايزة الرقم"
نشوى بترد وهى سرحانة وبتفكر
"اه"
فتحت اجندة جنب التليفون
"خدى ده رقمها الجديد ...اكتبيه
سجلته نشوى وقامت
"عايزانى اقولها حاجة لما تيجى"
"خلاص ياطنط بدل مش هتفتكرنى... عن اذنك"
قامت نشوى... نزلت
وهى نازلة حست ان دموعها حاجبة الطريق قدام عينيها
"هقول ايه لماجد... ماجد هيعمل ايه لما يعرف انها ناسية كل حاجة بينهم... وكمان اتخطبت... ياحبيبى ياخويا... يارب دبرنى اعمل ايه واتصرف ازاى واقوله ولا مقولوش"

الحلقة 18
نغم قاعدة مع محمد فى كافيه
"انا معجب بيكى من زمان يانغم ولما قلتى انك مش هتوافقى غير لما تخفى خالص مقدرتش ارتبط بحد غيرك... كان عندى امل انك هتخفى بسرعة وتبقى من نصيبى"
"اعذرنى يامحمد انى مش فاكرة حاجة من المقابلة اللى بتقول عليها بس ماما وبابا قالولى انى مكنتش معترضة"
"مش مهم المقابلة اللى انتى ناسياها... المهم اننا نعوض اللى فاتنا"
"مااحنا اتخطبنا اهو"
"بقولك ايه ايه رايك نعمل الشبكة وكتب الكتاب الاسبوع الجاى وشهرين كده نفرش الشقة ونتجوز"
"ليه نستعجل"
"هو انا كده مستعجل؟؟انا متقدملك من سنة يعنى لو كنتى وافقتى وقتها كان زماننا اتجوزنا او قربنا نتجوز"
سكتت نغم ...سرحت بتفكيرها
"نغم"
"نعم"
"سكتتى ليه"
"مش عارفة اقولك ايه"
"قولى اللى انتى عايزاه"
"انا اللى شفته منك لحد دلوقتى يطمنى ميقلقنيش... بس لسه مش عارفاك كفاية اننا نتجوز بسرعة كده"
"يعنى هنستنى كتير"
"مش كتير بس نتعرف على بعض شوية"
"ماشى بس الخطوبة الاسبوع الجاى زى مااتفقنا"
"ماشى يا محمد ...واهى فرصة نقرب من بعض اكتر"

نشوى واقفة قدام باب البيت... ماسكة المفتاح ومش قادرة تفتح
"هقوله... لازم يعرف... بس اقوله ايه الاول... اتخطبت ..ولا نسيت... انا ايه اللى انا فيه ده... انا هصدم اخويا بنفسى... يارب قوينى وقويه"
مسحت دموعها... ورسمت ابتسامة على وشها
طلعت ابتسامة حزينة... وفتحت الباب بالمفتاح

ماجد كان راجع من الحمام وهو بيسند على العكاز
نشوى فتحت لقت ماجد قدامها
بابتسامة باهتة"ايه واقف كده ليه"
ماجد بأمل"طمنينى عليها...قابلتيها... طمنتيها عليا... عرفتيها انى كويس وانى هنا ف مصر"
لفت نشوى تقفل الباب... علشان متواجهش ماجد
بتعض على شفايفها علشان دموعها اللى خانتها من كلام ماجد
مسكها ماجد من دراعها...لفها ناحيته
"انتى بتعيطى؟؟؟ بتعيطى ليه"
"مفيش يا ماجد... تعالى بس اقعد فى سريرك وهحكيلك"
ماجد بنفاد صبر" مش لسه هستنى...انا استنيت كتير... احكى على طول فى ايه"
جت مامتهم من اوضتها... ال3 واقفين
ماجد بيبص لنشوى... نشوى ضهرها للباب... الام ورا ماجد بتبص لنشوى
ماجد بخنقة"احكى يا نشوى... نغم حصلها حاجة"
نشوى بتردد وبطء"نغم كويسة ... بس..."
ماجد"بس ايه... حرام عليكى اعصابى "
نشوى قالت الكلام بسرعة ورا بعضه كأنها بترمى حمل تقيل من على قلبها
"نغم كويسة...ورجعت لها الذاكرة... ونسيت الفترة اللى بعد الحادثة لحد اليوم اللى رجعت لها فيه الذاكرة... واتخطبت امبارح"
"يعنى نسيتنى"
وقع العكاز من ايد ماجد... مقدرش يقف على رجله المكسورة
كان هيقع...لحقوه مامته ونشوى وسندوه قبل ما يقع
"ماااااااااجد"
"ابننننننننى"
اتسند عليهم ماجد...
"متخافوش... انا كويس...هاتى العكاز يا نشوى"
"ماجد متزعلش نفسك... بص.."
"مش قادر اتكلم خالص يا نشوى معلش...هدخل اوضتى واقعد لوحدى"
مامته مصدومة... نشوى بتعيط بصمت
سندوه لحد اوضته... قال بانكسار
"سيبونى لوحدى شوية"
خرجوا الاتنين وبعد ماقفلوا باب الاوضة ...قعدوا مع بعض
"فهمينى يانشوى... نسيت ايه بالظبط"
"نسيت الفترة مابين فقدان الذاكرة ورجوعها...ودى الفترة اللى هى وماجد حبوا بعض فيها ياماما... بصى انا اول ما مامتها قالت انها اتخطبت كنت عايزة اولع فيها وف امها...بس لما قالت انها نسيت كل حاجة صعبت عليا اوى وصعب عليا ماجد"
"ياعينى عليك يابنى...يوم ماتحب يحصل معاك اللى عمرنا ماسمعنا عنه"
"زمانه ياحبيبى زعلان اوى... ده كان جاى علشان يتجوزوا"
"لاحول ولا قوة الا بالله... هنعمل ايه يابنتى احنا تبع النصيب"

ماجد اول ما دخل اوضته سند العكاز على الحيطة
رمى نفسه على السرير... فتح درج الكومودينو
مسك صوره مع نغم...قعد يبص على الصور ودموعه نازلة وبدا يكلمها فى سره
"يعنى خلاص يانغم... نسيتينى... نسيتى الحب الكبير اللى كان بيننا.. انا كنت حاسس ان هيحصل حاجة تفرقنا...وانتى كنتى بتطمنينى... معقول نفترق بالطريقة دى... انى اتمسح تماما من ذاكرتك ومن حياتك ومن قلبك... اعمل ايه يانغم وانتى كل حياتى وحبى وحلمى اللى حلمت بيه... صعبتيها عليا يانغم بخطوبتك دى... انتى مش نسيتينى بس انتى كمان حل محلى واحد تانى ف قلبك وحياتك... اعمل ايه... ياريت بايدى افقد الذاكرة علشان انساكى ... انساكى؟؟ مش ممكن انساكى ابدا... هتفضلى طول عمرك حبيبتى حتى لو انتى مش فاكرة انا مش ممكن انسى... بحبك اوى يانغم"
دموعه وهو بيبص للصور كانت نازلة زى الشلال
اخد الصور فى حضنه... اخد اللاب توب من جنبه وفتح الصور بتاعته هو ونغم وصور نغم... والرسايل اللى بينهم وكل المحادثات
كان حاسس ان قلبه هيقف من كتر الحزن
ومع صوت اذان الفجر... سمع صوت خبط خفيف على الباب
"انت صاحى ياماجد"
ازاى محسش ان الوقت ده كله عدا وهو مش حاسس باى حاجة حواليه غير لما سمع صوت الاذان
رد بصوت حزين
"تعالى يا نشوى"
"انا مرضيتش اضايقك لما قلت عايز تقعد لوحدك... بس برضه مقدرتش استنى للصبح من غير ما اطمن عليك"
"انا كويس متقلقيش"
"انا عارفة انها صدمة كبيرة بالنسبة لك بس ليها حل"
"حل ايه"
"هى لما هتشوف المسدجات بتاعتك هتفتكر كل حاجة اكيد"
وضحك ماجد بسخرية
"كلامى ضحكك ليه"
"لما نغم فقدت الذاكرة عملت اكونتات جديدة ع الفيس والميل وطبعا دول اللى معايا واللى كنا بنتكلم عليهم يعنى اكيد هما كمان اتبخروا معايا بالظبط"
"مش مهم الاكونتات... الصور بتاعتكم ياماجد... وريها الصور وعرفها انكم كنتوا بتحبوا بعض"
"المشكلة مش انى اعرفها انى كنت بحبها وهى بتحبنى... المشكلة يانغم"
"انا نشوى"
"معلش يا نشوى... انا متلخبط"
"ولا يهمك ياحبيبى... كمل ايه المشكلة"
"المشكلة انها نستنى خالص وانا لو روحت اقولها اننا كنا بنحب بعض يبقى انا بلخبط لها حياتها اكتر واكتر...هى لو كانت فاكرة الحب مكنتش اتخطبت... هى نسيت حبها ليا يانشوى ...فاهمة قصدى"
"فاهماك ياماجد... بس يمكن تفتكر"
"يمكن"
"بقولك ايه... انا جبت رقم موبايلها الجديد...محتاجه؟؟"
"بجد؟؟اه طبعا ياريت... على الاقل اسمع صوتها... دى وحشانى اوى"
"طيب ثوانى واجيبلك الرقم"
قامت نشوى ورجعت بعد دقايق
"خد سجل الرقم عندك...انت هتكلمها"
"مش عارف"
"بص ياماجد... لازم تحط كل الاحتمالات حتى لو هى متفكرتش انت تحاول تنساها واهو انت قاعد شهر ونص ومسافر وهناك الشغل هينسيك اكتر... او لو تحب نشوفلك عروسة واهو حب جديد ينسى حب قديم"
"لالالا انا مبقتنعش بالكلام ده خالص... انا حبيت نغم من كل قلبى ومش هحب حد غيرها... حتى لو فضلت طول عمرى عايش على ذكرى الحب ده"
سكتت نشوى...قامت طبطبت على كتفه وخرجت من الاوضة
بص ماجد فى الساعة... كانت 5 الفجر
مقدرش يستنى اكتر من كده... نفسه يسمع صوتها
اتصل برقم نغم بدون تردد

نغم صحيت من النوم على صوت رنين الموبايل
قامت ترد قبل الصوت ما يصحى مامتها وباباها
"الو"

ماجد ساكت... حاسس انه قلبه هيخرج من مكانه من الحنين ليها
نغم"الو... الو"
ماجد"الو... ازيك يانغم"
نغم باستغراب بعد مافتحت نور الاباجورة وبصت فى ساعة ايدها
"الحمدلله... مين معايا"
ماجد وقلبه بيتقطع
"مش فاكرانى... مش عارفة صوتى"
نغم بضيق شديد
"لا مش عارفة... هتقول انت مين ولا اقفل السكة"
"انا اسف... مكنش قصدى اضايقك... مع السلامة"
قفل ماجد معاها...وهو حالته اصعب مما كان عليه

قفلت نغم...وقعدت تفكر
"مين الله بيتصل بيا دلوقتى ويقولى ازيك ومش فاكرانى ويقفل... لو هو يعرفنى وانا اعرفه مقالش اسمه ليه... اكيد حد بيعاكس..لو بيعاكس هيعرف اسمى منين والخط جديد ومش مع ناس كتير...يكون محمد ... ومحمد هيعمل كده ليه... لا مش صوته... يكون حد اعرفه... حد يعرفنى..يا ترى مين اللى اتصل ده؟؟"
قعدت نغم على حيرتها كده لحد ما نامت

تانى يوم الصبح... مامة ماجد ونشوى قاعدين
"انا اتكلمت معاه ياماما امبارح بس ياعينى مصدوم اوى"
"ربنا معاه..بكرة ينسى ياما الواحد بيشوف وكله بيعدى"
"انا قلتله كده بس هو قال مش هيحب حد غيرها"
باب اوضة ماجد اتفتحت...وخرج ماجد وهو لابس لبس خروج
الام"انت لابس كده ورايح فين"
ماجد"النادى"
نشوى"هتواجهها"
ماجد"لا هشوفها بس"
نشوى"فكرها ياماجد"
ماجد"ما انا قلتلك امبارح انا مش عايزها تفتكرنى وخلاص"
الام"بس انت هتنزل ازاى وانت تعبان"
ماجد"لا انا كويس الحمدلله... وبعدين ما انا جيت من السعودية كده مش هقدر اروح النادى فى تاكسى"
نشوى"اجى معاك؟؟"
ماجد"لا خليكى...سلامو عليكو"

دخل ماجد النادى... وهو ماشى بالعكاز على مهله...ونفسه يجرى على مكان نغم ... بص ف ساعته واتاكد انها اكيد موجودة
كل ما حد يقابله من موظفين النادى يسلم عليه ويسأل على رجله المكسورة وسببها
المشوار جوه النادى للبيسين ياخد فى العادى دقيقتين
اخدها ماجد فى نص ساعة بسبب الوقوف كل شوية
واخيرا... لمح نغم قاعدة
وقف لحظات يتأملها من بعيد...
"ياااااااااه ...لو تعرفى يانغم وحشتينى قد ايه... لو تعرفى نفسك اجرى عليكى واخدك ف حضنى واقولك وحشتينى يا حبيبتى "

نغم قاعدة وطلعت من شنطتها كتاب وبدأت تقرا فيه
ماجد بيقرب منها بخطوات بطيئة
شافته نغم وهو بيقرب... دورت وشها عنه للكتاب
وافتكر ان دى كانت نفس المعاملة قبل الحادثة
قرر انه يكلمها...قرب منها
"صباح الخير يانغم"
بصت له بلا اى تعبير
"اهلا ياكابتن"
"عاملة ايه"
"الحمدلله... سلامتك"
"الله يسلمك...دى حادثة حصلتلى وانا...."
رن موبايل نغم... اخدت موبايلها
"ربنا يشفيك.... بعد اذنك... الو... ازيك يامحمد"

شاور لها ماجد وهى بتتكلم خليكى مكانك
وراح هو قعد على ترابيزة تانية بعيد عنها... بس شايفها

ماجد مش بيشيل عينيه من عليها... خلصت المكالمة وهو قلبه بيتقطع من الحب والغيرة وهو شايفها بتضحك وهى بتتكلم

خلصت وفتحت الكتاب تقرا
ماجد بيبص عليها
وسمع صوت اغنية فى الكافتيريا...الصوت وصل ليه
لقى نفسه بيسرح مع صوت وائل جسار وهو بيغنى

عايز اطمن عليك وانسي روحي بين ايديك وافضل اجري واجري بيك وابقي مش عارف مكاني
نفسي اكمل عمري جنبك نفسي اعيش عمرين معاك
وانسى حضني جوا حضنك نفسي اتنفس هواك
عمري مانسيتك ولا اقدر اعيش حياتي الا بيك
ليل نهار بسرح وافكر غصب عني حبيبي فيك
عمري مانسيتك ولا اقدر اعيش حياتي الا بيك
ليل نهار بسرح وافكر غصب عني حبيبي فيك
قولي عمري يساوي ايه لو ماكنتش جنبي فيه لو ماعشتش عمري جنبك قولي بس هعيشه ليه
مهما تبعد قلبي شايفك مهما غبت بحس بيك
مهما طال البعد عنك بعدي بيقربني ليك

عمري مانسيتك ولا اقدر اعيش حياتي الا بيك
ليل نهار بسرح وافكر غصب عني حبيبي فيك

خلصت الاغنية... فى اللحظة اللى رفعت فيها نغم عينها عن الكتاب
واتلاقت نظرة سريعة بين عيون ماجد ونغم
بعدها رجعت عين نغم تانى للكتاب
ومسح ماجد الدمعة اللى حس بيها نزلت من عينيه

الحلقة 19
نغم بتبص فى الكتاب وبتفكر
هو ماجد بيبص لها كده ليه
هو مش كان مسافر هو ومراته
هى فين مراته يسرا يمكن اعرف منها اى حاجة عن الفترة اللى فاتت
رفعت نغم عينيها تانى ناحية ماجد

ماجد مازال بيبص عليها
لما بصت له تانى خاف يكون بيضايقها بنظراته
فجأة ...اخد قرار وقام
ماجد قام وهو بيتسند
نغم شافته بيقوم قامت وراه
"كابتن ماجد ممكن اسألك على حاجة"
"اتفضلى"
شاور لها تقعد...قعدت وقعد معاها
"احنا اشتغلنا مع بعض بعد الحادثة بتاعتى صح؟"
"مظبوط... حوالى 6 او 7 شهور قبل مااسافر"
"ماما قالتلى انى كانت ليا واحدة صاحبتى اوى اسمها يسرا ولما سألت عليها عرفت انكم اتجوزتوا وسافرتوا"
"ثوانى بس...مين اللى اتجوز مين"
"انت ويسرا"
"انتى مش فاكرة اى حاجة خالص عن يسرا ولا مصطفى ولا انا ولا الفرح"
هزت نغم راسها بالنفى ودمعت
"مصطفى؟؟ مصطفى مدرب الكورة"
"ايوه فاكراه"
"ايوه مش ده صاحبك اللى شفتكم مع بعض اول مرة جيت فيها النادى"
"ايوه هو... هو اللى اتجوز يسرا مش انا"
"وفين يسرا ...اقدر اشوفها او اقابلها يمكن تساعدنى انى افتكر اى حاجة"
"انتى مش فاكرة فرح يسرا ومصطفى"
سألها ماجد وهو قلبه بيتقطع على اكتر يوم عاشوه ف سعادة
"انا مش فاكرة يسرا نفسها هفتكر فرحها ازاى؟"
"اه معاكى حق"
قالت وهى بتقوم
"معلش ياكابتن انا اسفة انى عطلتك وازعجتك"
"ازعجتينى؟؟ انتى تزعجينى"
بصت له نغم باستغراب على نبرة صوته
"بعد اذنك"
قامت نغم ورجعت لمكانها من غير ما تبص وراها
ماجد بيتابع نغم بعينيه وهى صعبانة عليه وصعبان عليه نفسه
قام ماجد... وراح ناحية المبنى الادارى

وصل ماجد عند مكتب فاروق
وكالعادة الباب مفتوح وعند ناس كتير
"السلام عليكم"
"مين ...مااااااجد...حمدالله ع السلامة..تعالى"
دخل ماجد وسلم عليه فاروق بكل ود
"اقعد...ايه مالك"
رد ماجد وهو بيقعد
" حادثة والحمدلله انها جت على قد كده"
"واخبارك واخبار الشغل ايه هناك واخبار مصطفى ويسرا"
"الحمدلله مصطفى ويسرا استقروا هناك...بس انا كنت عايز اسأل حضرتك لو ينفع ارجع الشغل هنا تانى"
"يا سلاااام...ده انت تنور مكانك"
"ربنا يخليك يا ا\ فاروق ده العشم"
"بس خد وقتك خالص لما تخف براحتك"
"انا المفروض قدامى اسبوعين كمان ف الجبس بس هروح للدكتور لو ينفع افكه قبل كده هفكه واجى استلم الشغل"
"ومستعجل كده ليه هو الشغل هيطير"
"مش قادر ابعد عن النادى اكتر من كده"
"براحتك ياماجد اى وقت"

بعد اسبوع...ويوم خطوبة نغم
نغم خارجة من الحمام...ودخلت اوضتها
لبست هدومها... دخلت عليها مامتها
"مبروك ياحبيبتى ربنا يتمم بخير"
"الله يبارك فيكى ياماما"
"بقولك ايه انا كنت جاية معاكى بس انتى شايفة الضيوف اللى جم مش هينفع اسيبهم"
"عادى ياماما ماهو شيماء ورنا ولاد طنط مديحة جايين معايا"
"وماله ياحبيبتى اهم ولاد عمتك وعايزين يفرحوا بيكى ومعاكى"
"اه طبعا... انا هلبس واخرج لهم"
"طيب يا حبيبتى"
خرجت الام وكملت نغم لبسها...قعدت على السرير واخدت شنطة الميك اب على حجرها... وبدأت تطلع منها بعض الكريمات
قفلتها من غير ماتقفل السوستة بتاعتها... وحطت كريم فى ايديها... وقامت تحط الكريم فى وشها....وبعد ماخلصت مسكت الشنطة من ايديها ...اتفتحت الشنطة لانها مكنتش مقفولة ووقع كل اللى جواها
"يوووووووو زمان نص اللى فيها اتكسر"
نزلت نغم على ركبها تشوف اللى اتكسر تحطه على جنب واللى متكسرش تحطه فى الشنطة....من بين الحاجات شافت السلسلة اللى فيها نص قلب مكتوب فيه"لا اله الا الله"
مسكتها وهى مبتسمة...وفتحت باب الاوضة
"ماماااااا"
جت مامتها...حضنتها نغم وباستها
"ميرسى يا ماما على المفاجئة الحلوة دى ربنا يخليكى ليا"
الام باستغراب"مفاجئة ايه"
"السلسلة"
"سلسلة ايه"
"دى"
مسكتها مامة نغم
"بتاعة مين دى"
"انا لقيتها فى شنطة الميك اب... مش انتى اللى جايباها"
"لا يا حبيبتى"
"يمكن بابا"
"مش عارفة لما اسأله"
راحت الام ورجعت
"ابوكى مجابش حاجة يانغم...يمكن محمد جابهالك"
"وهو محمد لو جابهالى هيحطها جوه الشنطة اللى جوه اوضتى ازاى"
"يبقى انتى اللى حطيتيها"
"امتى؟؟ انا محطيتش حاجة"
"يمكن ناسية"
"ناسية... اكيد ناسية...يعنى انا حطيتها فى الفترة اللى انا ناسياها"
رددت نغم الكلام ده ف سرها بعد ما مامتها راحت تقابل الضيوف اللى بييجوا
"انا ليه حاطاها هنا ومش حاطاها مع الدهب ومين جابهالى وليه قلب... نص قلب تحديدا... اكيد ليه معنى...ياترى ايه"

ماجد فى بيته اغلب وقته بيقضيه مع صور نغم ومراجعة الرسايل اللى بينهم... ومستنى الايام تعدى بسرعة علشان يفك الجبس ويرجع يروح النادى تانى
رن موبايله.. وشاف انه رقم مصطفى
"الو.. ازيك يامصطفى اخبارك ايه"
"الحمدلله انت عامل ايه وصحتم عاملة ايه"
"احسن الحمدلله"
"مش هتفكر تانى يا ماجد"
"لا خلاص يامصطفى مش هرجع ...مش هقدر ابعد تانى"
"يابنى لازم تتعود انك تنساها وطول ماهى قدامك مش هتعرف"
"ومين قال انى عايز انساها"
"هتفضل على ذكريات"
"لا انا عندى امل انها تحس بيا"
"ماتقولها"
"افرض قلتلها وهى رجعت لى علشان انا اكدتلها ان كان بيننا حب ساعتها هحس انها اتورطت ...انما هى لو افتكرتنى لوحدها وحست بيا ساعتها بس هتأكد انها بتحبنى فعلا...غير كده يبقى خلينى زى ماانا وكفاية عليا اشوفها من بعيد"
"وجهه نظر برضه...بس عذاب"
"نصيبى محدش بيختار نصيبه ...بس انا ليا عندك طلب"
"اؤمر"
"انا عايز نسخة من الفرح بتاعكم"
"ولو ان انا مش عايزك تفضل حابس نفسك فى ذكريات بس من عينيا هكلم مجدى اخويا يعملك cdويجيبهولك"
"متشكر اوى يا مصطفى"
"بقولك ايه يسرا احتمال كمان كام شهر تيجى علشان تولد ف مصر.. لو قدرت تبقى تقابل نغم هتقابلها يمكن تفتكرها"
"يارب تفتكر ان شاءالله"

نغم فى الخطوبة... وهى فى احلى شكل
محمد بعد ما لبسها الشبكة... سألها
"اول مرة اشوف السلسلة دى"
ردت وهى بتضحك
"وانا كمان"
"ازاى"
"انا لقيتها وسط حاجتى وحسيت انى بحبها فقررت البسها على طول"
"ومين بقى جابهالك"
"مين يعنى ايه"
"يعنى هل حبيب قديم"
"انا معنديش حبيب قديم يامحمد وعيب تتكلم كده"
"زعلتى كده ليه...هو مش من حقى اعرف"
"لو كان فيه حاجة تتقال كنت قلتها"
"خلاص متزعليش"
"مش زعلانة بس مش معنى انى البس سلسلة وفيها نص قلب يبقى حد جابهالى"
"يمكن...بس هتكونى جبتيها لنفسك مثلا"
"وليه لا"
"يمكن...وحتى لو كان فيه حب قديم فاللى يهمنى انك اختارتينى انا بارادتك"
ونادى ال dj على العروسين للرقص
قامت نغم مع محمد يرقصوا
نغم وهى بترقص حست ان فيه صور تانية بتيجى قدام عينيها وتروح تانى
صور لعروسين تانيين..ولما تحقق متشوفهمش
صور لكوشة تانية ولما تحقق تتاكد انها شكل تانى
حتى محمد شايفاه مهزوز... هو...مش هو ...
              ***********************

"نغم...نغم...نغم"
نغم بتفتح عينيها... شافت باباها ومامتها ومحمد حواليها
الاب"الحمدلله فاقت...مالك يانغم"
نغم"ايه اللى حصل"
محمد"اغمى عليكى واحنا بنرقص"
الام"دى اكيد عين صابتك يابنتى"
محمد"هتقدرى نكمل الفرح ولا لا"
الاب"انا متهيالى نعتذر للناس وكفاية كده...وبعدين خلاص الشبكة اتلبست والبوفيه اتفتح يعنى كأن الفرح خلص"
محمد"تمام ياعمى...انا هروح اقول لل dj يطمن الناس وينهى الفرح واحنا ننزل على طول"

فى بيت نغم... نغم على سريرها بهدوم البيت ومامتها وباباها جنبها
"مش عارفة ايه اللى حصل حسيت انى شايفة ناس تانية حواليا"
الام"سلام قول من رب رحيم...ناس تانية؟؟ انا قلت دى عين"
نغم"لا ياماما... دى حاجات كأنى شفتها قبل كده"
الاب"ايوه يانغم... انتى اكيد كنتى بتفتكرى"
نغم بلهفة"افتكر ايه يابابا"
الاب"القاعة اللى كانت فيها خطوبتك دى هى نفس القاعة اللى كانت فيها فرح صاحبتك يسرا وانا جيت اخدتك من هناك"
نغم"بس انا حتى مش فاكرة شكل يسرا دى ايه... انا مش قادرة افتكر اى حاجة خالص"
الاب"خلاص يانغم...مش مهم نامى وارتاحى دلوقتى"
                   ***********************
لف ماجد ايديه حول وسط نغم وحطت نغم ايدها على كتفه
وايديهم فى ايد بعض... وهما بيتمايلوا على انغام الموسيقى
"ابعد شوية عيب كده"
"هههه عيب ايه احنا بنرقص زى باقى الناس"
"انت مجنون وانا مجنونة انى سمعت كلامك"
"سيبك من الجنان دلوقتى...قوليلى حاسة بإيه"
"مش حاسة بحاجة"
"عينى ف عينك كده"
بصت له نغم وهى ف حضنه
"بحبك اوى يانغم"
"وانا بحبك اكتر"
"عارفة نفسى ف ايه دلوقتى"
"ايه"
"الاغنية متخلصش"
"ههههه اصدمك واقولك ان الاغنية قربت تخلص"
"حرام عليكى يانغم...عيشى اللحظة معايا"
"ياحبيبى انا معاك عملت حاجات عمرها ماخطرت على بالى... انى احب اصلا عمره ماخطر على بالى...انا بحبك حب مش عارفة اوصفه... انا بحبك اوى ياماجد"
"اخيراااااااااا سمعت منك جملتين على بعض يريحونى ويطمنونى ... انا بحبك اوى يانغم وهحاول اعمل كل اللى اقدر عليه علشان يجمعنا بيت واحد فى اسرع وقت"
"يارب ياماجد... وان شاءالله يبقى بيت كله حب وسعادة"

فتحت نغم عينيها.... فتحت الاباجورة اللى جنبها
"ايه الحلم الوحش ده... استغفر الله العظيم يارب...افففففففف"
قامت نغم وهى متضايقة... فتحت الشباك
"هو مفيش غير ماجد ده اللى احلم بيه حلم زى ده... يارب سامحنى انا مليش ذنب فى الحلم ده... انا مش ممكن احب حد غير خطيبى ولا اخونه ابدا... انا متضايقة اوى من الحلم ده"
فضلت نغم تكلم ربنا من الشباك... وهى متضايقة من الحلم اللى حلمته... اخدت المصحف وقعدت تقرا قران علشان الضيقة تروح

فك ماجد الجبس...ورجع يروح النادى كل يوم
بيشوف نغم ونغم بتشوفه...العلاقة بينهم لاتزيد عن تحية زى الاول
ماجد نظراته لنغم كلها حب وحنين واشتياق
ونغم بتتعمد انها متبصلوش من بعد الحلم اللى ضايقها فترة لحد ماقدرت تنساه وتبقى عادية

وف يوم بعد 3 شهور... طلب فاروق نغم وماجد فى مكتبه
"ازيكم يا كباتن"
نغم وماجد"الحمدلله كويسين"
فاروق"انا عايز منكم خدمة هى مش شغلكم بس انا محتاج لكم انتم"
ماجد"حضرتك تؤمرنى انا مقدرش اقولك لا"
نغم"تحت امر حضرتك"
فاروق"دلوقتى النادى عامل رحلة شرم الشيخ الاسبوع الجاى...مشرفين الرحلة واحد اعتذر لظروف خاصة والتانى تعبان وف اجازة مرضى....تقدروا تروحوا الرحلة دى "
ماجد"مفيش مشكلة تحت امرك"
نغم"مش عارفة اقول لحضرتك ايه...بس هستأذن بابا وخطيبى الاول"
بص لها ماجد فجأة...وجعته كلمة خطيبى اوى
وحس ان الامل بيروح ان ممكن نغم تفتكره...خلاص بقى ليها خطيب بيهتم بيها وبتهتم بيه
فاروق"طبعا يانغم... بس ياريت تحاولى... انتوا الوحيدين اللى شغلكم فى الدراسة بسيط وتقدروا تروحوا الرحلة دى...هى 4 ايام بس مش كتير يعنى"

نغم فى بيتها... وقاعدة مع محمد
"ها يا محمد قلت ايه"
"لا يانغم مش موافق"
"ليه بس"
"يعنى ايه تسافرى 4 ايام لوحدك"
"مش شغلى ده"
"لا انتى شغلك مدربة سباحة مالك بقى بالرحلات...وبعدين هو باباكى موافق على كده"
"بابا كان معترض وبعدين لما عرف انه طلب من ا\ فاروق وافق على طول"
"اشمعنى يعنى"
"علشان ا\فاروق ده راجل طيب اوى ولما كنت تعبانة خلانى ارجع الشغل علشان يساعدنى يبقى اى طلب يطلبه منى لازم متأخرش عنه"
سكت محمد شوية... بيفكر
"علشان خاطرى يامحمد... معلش مش هقدر اقوله لأ"
"ماشى علشان خاطرك... بس انا كمان ليا عندك طلب"
"اطلب"
"عايز نكتب الكتاب ونحدد معاد الفرح"
وابتسمت نغم بخجل
"اتفق مع بابا مش معايا"
"يعنى انتى موافقة"
ابتسمت نغم بخجل
"طيب نادى لباباكى ومامتك نفرحهم"
قامت نغم نادت لباباها ومامتها... وطلب منهم محمد تحديد معاد كتب الكتاب والفرح
واتفقوا انهم بعد رجوع نغم من الرحلة يفرشوا الشقة ويكتبوا الكتاب ويتجوزوا اول ما يخلصوا الفرش... فى خلال شهر على اقصى تقدير

                     انتظروااااااااا الحلقة الاخيرة

الحلقة 20
نغم نايمة فى السرير
بتفتح عينيها...ببطء
شايفة خيال ماجد
بتفتح وتغمض...شايفة ماجد
فتحت عينيها... شايفة نفسها فى اوضة غريبة وجنبها صوت اجهزة
نغم فى العناية المركزة والدكتور بيكشف عليها

"نغم ...نغم"
فتحت نغم عينيها لقيت نفسها فى الاتوبيس المتجه لشرم الشيخ
وماجد بيكلمها وهى كانت نايمة وساندة على كتفه
احرجت انها كانت ساندة على كتفه
"انا اسفة... انا ضايقتك...محسيتش خالص"
"ولا يهمك... احنا قربنا نوصل"

ابتسمت نغم ولفت وشها ناحية الشباك
نغم كانت محرجة جدا لما صحيت ولقت نفسها نايمة على كتف ماجد... بس ازاى كانت بتحلم بيه كده...دى مش اول مرة.. ايه يانغم ... ايه اللى بيحصل ده...انتى عمرك ما كنتى بتحلمى بحد كده... جاية دلوقتى بعد ماخلاص قررتى هتكملى حياتك مع مين تحلمى بواحد تانى مفيش حاجة بتجمعكم غير احلامك

ماجد كان فرحان جدا باحساسه بقرب نغم منه...قرب مكان وكتير من الحواجز بينهم... مش مهم..."انا مكنتش احلم اننا هنبقى مع بعض ف مكان واحد ... يارب تفتكري حبنا يا نغم"
                        *******************
فى الاوتيل وبعد ما قسموا الاسر اللى معاهم كل اسرة فى مكانها
"اتفضلى يانغم...مفتاح اوضتك"
"ميرسى يا كابتن"
تبادلوا ابتسامة... ومشيوا الاتنين فى طريق الاوض
وكانت الاوضتين جنب بعض... فتحت نغم اوضتها
قبل ماتقفل بصت لماجد...شافته لسه واقف بيبص عليها
"مستنيكى تدخلى"
رد عليها من غير ما تسأله... ابتسمت له ودخلت وقفلت

نغم وماجد قاعدين ف النادى جه عليهم مصطفى ويسرا
نغم"اه صحيح يا يسرا مش كنتوا قلتوا انك هتحصليه بعد كام شهر"
مصطفى"مش هتسافر معايا فعلا بس شقتى هنا محتاجة توضيب وفرش وهى اللى هتشرف على كل ده وبعدين تجيلى ان شاءالله"
نغم"اه ...ربنا يعينك ده انتى وراكى حاجات كتير"
يسرا"علشان كده قلت مش هبقى فاضية لكل ده مع الشغل كمان"
مصطفى"احنا على كلامنا يا صاحبى ...هشوف لك حاجة هناك"
ماجد"ايوه طبعا... واى حاجة حتى لو مش بالشهادة"
وبص لنغم
"انا ورايا خطوات كتير عايز ابدأها"
مصطفى"ربنا معاك...والله من غير ماتقول انا عارف"
يسرا طلعت ظرف من شنطتها
"خدى يانغم"
نغم"ايه ده"
يسرا"افتحى وشوفى"
فتحت نغم الظرف... وماجد بيتابعها بعينيه بفضول

فتحت نغم عينيها لقيت نفسها فى الاوضة فى الاوتيل
"وبعدين بقى ف الاحلام اللى بشوفه فيها دى... بس اللى كنت قاعدة معاها دى يسرا؟؟ هى فعلا؟؟ولا مش هى"
قامت ولبست... ونزلت ... راحت تقعد على البحر
شافت ماجد قاعد وحاطط اللاب توب قدامه...ومركز فى الشاشة
قعدت بعيد عنه...هى شايفاه وهو مش شايفها
كل ما تبص للبحر تلاقى عينيها راحت عند ماجد
تبعد نظرها عنه... وتحاول تشغل نفسها بأى حاجة تانية
تلاقى عينيها راحت عنده...شافته بيقفل اللاب ويقوم..بعدت نظرها عنه... وهو قايم راح عدا من جنبها
"نزلتى امتى"
"من شوية...انت نزلت متى"
"من ييجى ساعتين كده"
"انت منمتش"
"لا...انتى نمتى"
"يعنى ...نوم بقلق كده"
"ليه فيه حاجة شاغلاكى"
"لا ابدا عادى"
"مش عايزة حاجة انا هطلع انام شوية"
"لا ميرسى"
مشى ماجد وفضلت نغم مكانها بتتفرج ع البحر
لما مشى حست انها متضايقة انه مشى وسابها
كان نفسها يقعد معاها شوية كمان
وفجأة افتكرت خطوبتها... وهى بترقص مع محمد
بس حست انها بترقص مع ماجد مش مع محمد
صور كتير ورا بعض قصاد عينيها
هى مع محمد... هى مع ماجد...فى نفس المكان
حست بدوخة مسكت دماغها وغمضت عينيها

سمعت صوت ماجد جنبها
"نغم ...مالك"
بصت له وهو بيقعد جنبها
"مفيش دوخة بسيطة"
"تحبى اسألك على دكتور"
"لا مفيش داعى"
" الدوا بتاعك معاكى"
واستغربت نغم... وبصت لماجد
"انت عرفت منين انى باخد دوا"
"منك...انتى كنتى بتاخدى دوا للذاكرة وانا معرفش لسه بتاخديه ولا لا بس استنتجت"
"اه لسه باخده فعلا... بس انت نزلت تانى على طول ليه ومنمتش"
"معرفتش انام... انا مضايقك"
وردت نغم بسرعة
"لالالا بالعكس"
فرح ماجد من ردها وابتسم ابتسامة غصب عنه احرجت نغم
"وحشتنى الابتسامة الخجولة دى اووووى"
قالها ف سره... وكمل كلامه لنغم
"بصى بقى انا زهقان ودى اول كام ساعة لينا وماشاءالله كل اللى فى الرحلة اسر وانا وانتى الوحيدين اللى فردى كده... لو مش هيضايقك يعنى ممكن نقعد مع بعض نتكلم شوية اهو نتسلى "
نغم فرحت اوى من كلام ماجد
"انا كمان زهقانة اوى ومش لاقية حد اتكلم معاه"
"ماانا حسيت بيكى"
نظرات ماجد لنغم كلها حب... ونغم مستغربة تجاوبها معاه كده
"ماجد انا عايزة اسألك سؤال"
"الحمدلله رجعتى تقوليلى ماجد مش كابتن"
"ههههه مش مقصودة يعنى"
"ياستى قولى اى حاجة تعجبك...عايزة تسألى عن ايه"
"هى يسرا شكلها ايه"
"ليه"
"حلمت بيها ومش عارفة هى ولا لا"
"ثوانى"
طلع ماجد موبايله...وقلب فيه
"دى صورتها هى ومصطفى فى فرحهم"
اخدت نغم الموبايل من ماجد... دققت فى الصورة كويس
"مش ممكن"
"مش ممكن ايه"
"هى اللى انا شفتها ف الحلم... مش كده وبس... يوم خطوبتى"
وافتكرت نغم يوم خطوبتها
وصور كتير جت قصادها
صور كتير من فرح يسرا ومصطفى ليها هى وماجد
"اه يا دماغى"
"مالك يانغم"
ونزلت دموع كتير من عيون نغم
"دماغى بتوجعنى اوى... مش قادرة"
"انا هروح اسأل على دكتور...مش معقول اسيبك تعبانة كده"
"لا ياماجد...انا هطلع اخد الدوا وانام شوية هبقى احسن"
                 ********************
ماجد قلقان ...الليل دخل ونغم منزلتش
وهو حيران بين انه يتصل بيها يطمن عليها ولا يستنى لما تقوم براحتها...شافها جاية من بعيد...مقدرش يستناها...راح عليها
"عاملة ايه دلوقتى"
"الحمدلله كويسة"
ورن موبايل نغم... ردت
"الو... الحمدلله يامحمد.. كويسة والله... كنت نايمة معلش... مش احنا اتكلمنا الصبح وطمنتك... متقلقش وانا اسفة انى نمت كل ده من غير مااكلمك تانى... خلاص يامحمد بقولك نمت... اه كلمتهم وكلمونى... حاضر هبقى اكلمك قبل ماانام... مع السلامة"
ماجد مركز مع كل كلمة بتقولها...ومتضايق والغيرة بتاكل ف قلبه
"ماجد انا متغديتش... هروح اتغدا"
"انا كمان متغديتش وكنت مستنيكى نتغدا مع بعض"
فرحت نغم بكلامه...ابتسمت بفرحة
"يالا"
                  ******************
وهما بيتغدوا... لاحظ ماجد سلسلة باين جزء منها فى رقبة نغم
السلسلة تحت الهدوم مش قادر ماجد يحدد هى ولا لأ
"انت سافرت امتى ورجعت امتى ياماجد"
"سافرت بعد فرح مصطفى بكام شهر ورجعت قبل مااجى النادى ب3 ايام"
"يوم ماجيت بالجبس"
"بالظبط"
"يعنى سافرت سنة واحدة بس...مرتاحتش هناك ولا ايه"
"لا كنت مرتاح جدا... وكنت عايش احلى حلم ف حياتى كنت بحب وجيت الاجازة علشان اتجوز"
وانتبهت نغم لكلام ماجد لما جت سيرة انه بيحب
"وبعدين"
"مفيش ...حصل ظروف واللى بحبها نسيت الحب اللى بيننا واتخطبت ...حسيت ان مفيش اى دافع يخلينى اشتغل واتغرب فرجعت واستقريت هنا"
"معلش يعنى اسمح لى ...اكيد مكنتش بتحبك هى لو بتحبك مكنتش اتخطبت لغيرك"
ابتسم ماجد ابتسامة حزينة
"للاسف كانت بتحبنى زى ما بحبها بس ظروفها كده"
واتكلمت نغم بانفعال
"مفيش ظروف تخلى واحدة تسيب حد بيحبها وبتحبه وتتخطب لغيره...انا لو مكانها لايمكن اعمل كده لو هموت"
"بعد الشر عليكى... انا خلصت أكل"
حست نغم ان ماجد بيقفل الكلام...ولمحت دموع بتلمع ف عينيه من غير ماتنزل...حست بالاحراج...وحست انه مازال بيحب

نغم فى اوضتها... قاعدة على السرير صاحية
جنبها الموبايل... بتبص له بتردد
مسكت الموبايل... واتصلت وهى بتنفخ
"الو... ازيك يا محمد.. انا كويسة الحمدلله... مفاجئة ايه؟؟ مش قادرة لفوازير انا دلوقتى... خلاص ابقى قولها براحتك... مش بقفل فى الكلام ولا حاجة انا بس طول اليوم مرهقة وكنت الصبح ف سفر طويل... عايزة انام... تصبح على خير"
قفلت معاه وقعدت تفتكر كلام ماجد عن اللى بيحبها...اتضايقت
وقالت فى نفسها"يابختها...هو فيه حب كده"
طول الليل بتحاول تنام مش عارفة...تفاصيل كل كلمة وكل لفتة وابتسامة من ماجد طول اليوم مش بتفارق خيالها
احلامها وهى مع ماجد تيجى على بالها تبتسم
صراع داخلى بين احساسها بماجد والواقع اللى هى فيه
"هى مخطوبة وماجد بيحب"

بعد نوم مقطع لساعتين بالاكتر...قامت نغم لبست ونزلت تستنى ماجد على البحر... بعد نزولها باقل من ربع ساعة لقيت ماجد جنبها
"صباح الخير...ايه اللى صحاكى بدرى"
"مفيش...قلت استمتع بجمال البحر"
"انا بقى عايز استمتع بالبحر نفسه...هتنزلى"
"لأ... هتنزل"
رد ماجد وهو بيقلع هدومه وبيحط الموبايل جنبها
"انا هنزل اخد غطسين واجى"
ردت نغم وهى بتاخد الهدوم منه وهى كلها سعادة انهم مع بعض
"ماشى...هستناك نفطر مع بعض"
نزل ماجد البحر... نغم بتتابعه بعينيها مش عايزاه يغيب عن عينيها
وماجد فى البحر... رن موبايله
وبحركة لا ارادية مسكت نغم الموبايل..شافت مكتوب
"البيت"
لسه هتحط الموبايل جنبها...لفت نظرها صورة ست كبيرة
اكيد مامة ماجد.. هى حاسة انها شافتها قبل كده..بس فين وازاى
كل تفكيرها وهى قاعدة بتفكر شافتها فين قبل كده...دون جدوى

بالليل... نغم وماجد بيتمشوا فى الشارع
نغم حاسة بسعادة معشتهاش قبل كده
وماجد حاسس بالقرب من نغم وده مخليه فى منتهى السعادة
بيتكلموا وبيضحكوا.. ورن موبايل نغم... حست ان اللى بيتصل محمد..واول ما طلعت الموبايل من جيبها
"الحمدلله ده بابا"
ردت على باباها
"الو...ازيك يابابا...كويسة الحمدلله... مفاجئة ايه... اييييييه... طيب يابابا... الله يبارك فيك...ازيك ياماما...الحمدلله متقلقيش...الله يبارك فيكى...حاضر هكلمك تانى...مع السلامة"
نغم وشها اتغير تماما... حطت الموبايل فى جيبها تانى
"مالك يانغم... اتضايقتى كده ليه"
حاولت تتصنع اللامبالاة
"ده بابا بيقولى ان خطيبى حجز القاعة للفرح كمان شهر وانهم اتفقوا يخلوا كتب الكتاب الاسبوع الجاى"
سكت ماجد لحظات...وبعدين سألها
"هما ليه حددوا وانتى مش موجودة"
"احنا كنا متفقين قبل مااجى الرحلة ان الجواز هيكون خلال شهر"
سكتت نغم... سكت ماجد... ماشيين فى اتجاه الاوتيل وكل واحد فيهم ساكت تماما
وهما فى الشارع سمعوا صوت فرملة عربية ..صوت عالى
صرخت نغم صرخة رعب... قربت من ماجد مسكت فيه
حضنها ماجد لحظة لما صرخت من صوت الفرملة

نغم خافت من الصوت...سمعت نفسها بتصرخ وتقول ماجد وهى منطقتش.. حست ان الموقف ده مرت بيه قبل كده ومكنش ماجد جنبها... مرت قصاد عينيها لحظة شافت فيها نفسها ماشية فى الشارع وبتتكلم فى الموبايل وسمعت فرملة...كل ده كان فى لحظات

"ماجد انا تعبانة اوى ... عايزة اروح الاوتيل بسرعة"
"تعالى قربنا اهو"
ولااراديا مد لها ايده...ومدت له ايدها... ومشيوا الاتنين وايديهم فى ايد بعض

نغم فى اوضتها... صور كتير بتمر قصاد عينيها
بترقص مع ماجد فى الفرح
بتسلم على مامة ماجد فى فرح تانى
هى وماجد فى المطار
ماجد بيحط فى ايدها السلسلة
قامت نغم من مكانها... راحت خبطت على اوضة ماجد
"نغم!!!مالك انتى معيطة"
نغم وهى بتعيط
"انا عايزة اتكلم معاك ضرورى"
"طيب ثوانى ننزل ولا تيجى نتكلم جوه"
دخلت نغم وهى مش خايفة... قعدت على طرف السرير
"ماجد... فيه حاجات كتير عايزة افهمها... انت...انا... "
سكتت وهى بتعيط... راح قعد جنبها
شاف طرف السلسلة فى رقبتها قام ماجد جاب ظرف من على الكومودينو...مسك طرف السلسلة وشدها بره هدومها برقة... حط نص القلب اللى معاه فى ايد نغم
نغم ساكتة ...ماجد طلع من الظرف اللى ف ايده الصور وحطها ف ايد نغم
نغم دموعها نازلة... بتبص للقلب وتفتكر وهما فى المطار وبتاخد من ماجد السلسلة
بتبص للصور وبتفتكر وهما مع بعض بيتصوروا
جاب اللاب توب وشغل cd واتفرجى على ده
كان فرح مصطفى ويسرا...نغم وماجد واضحين جدا طول الفرح مع بعض... وبيرقصوا مع بعض... ومبعدوش عن بعض

نغم بتعيط
"انت كنت اقصدنى انا ...انا اللى نسيت الحب واتخطبت ...انا اللى بتحبها"
ومسح ماجد دموعها
"ايوه يا حبيبتى"
"الحادثة... انت لما كنت بتكلمنى وسمعت صوت الحادثة هى دى اللى رجعت بعدها وانا كنت نسيت... ليه مفكرتنيش ياماجد"
"انا معرفتش اتصل بيكى بعد الحادثة تليفونك كان مقفول... واول يوم جيت فيه نشوى اختى راحت لك البيت ومامتك قالت انك اتخطبتى... ونسيتى كل حاجة... تخيلى العذاب اللى كنت فيه وكاتم ف قلبى علشان خايف الخبط لك حياتك"
"وانا اقول ايه سر الاحساس اللى انا حاساه ده"
"يعنى لسه بتحبينى يانغم"
نغم وهى بتعيط
"بحبك اوى ياماجد"
اخدها ف حضنه وهى بتعيط وطبطب عليها
"وانا كمان بحبك اوى ياحبيبتى"
رجعت نغم لورا ...وبعدت عنه
"ايه...مالك يانغم"
"حبى ليك دلوقتى خيانة يا ماجد... انا كتب كتابى الاسبوع الجاى"
"يعنى ايه...قصدك ايه"

ملحوظة... كنت قلت امبارح ان الحلقة 20 هى الاخيرة
بعتذر لان الاحداث مكنش ينفع تتحط ف حلقة واحدة
لذلك بكرة ان شاءالله الحلقة الاخيرة

الحلقة 21 والاخيرة
ردت نغم على ماجد
"يعنى مينفعش اكون بحبك انت ودبلة واحد تانى ف ايدى"
سكت ماجد لحظات... وسألها
"القرار قرارك يا نغم... انتى اختارى"
"انا عايزاك انت اكيد... بس كمان هروح اقول ايه لمحمد ولماما ولبابا"
"سيبينى وروحى اتجوزيه"
"انا بقولك كده علشان تفكر معايا اقولهم ايه... انما انا مش هتجوز غيرك انت"
بص لها ماجد بفرحة
"بجد يا نغم"
"طبعا ياحبيبى... انا كنت حاسة ان احساسى بيك ده مش طبيعى وكنت مستغرباه...بس بعد مافهمت وافتكرت كل حاجة مش هسيبك ابداوانت ملكش ذنب فى اللى حصل انت حبتنى وانا اللى وافقت على الخطوبة يعنى انا السبب فى اللى احنا فيه"
مسك ماجد ايديها...باسها
سحبتها نغم بهدوء
"انا هروح اوضتى...اشوفك الصبح"
خرجت نغم من اوضة ماجد.... قعد ماجد يفكر
"ياترى انا استاهل حبها ده... وانا السبب فى كل اللى حصل... ماهو لو مكنش ده حصل مكناش حبينا بعض... مش لازم اقولها... هى هتفضل فاكرانى ملاك بدون اخطاء... المفروض انها تعرف علشان ضميرى يستريح...بس ممكن تسيبنى؟وهقولها ازاى؟ مش عارف"

طول اليومين الباقيين فى الرحلة والعلاقة بين نغم وماجد رجعت طبيعية
وكل مكالمات محمد معاها لاتتعدى دقايق واغلبها هى اللى بتنهيها
اخر يوم فى الرحلة كان المقرر انهم هيباتوا ويقوموا يركبوا الصبح بدرى... طول اليوم وماجد بيحاول يحكيلها ومش عارف
وهما بيتمشوا ورايحين فى اتجاه الاوتيل
"مالك ياماجد... طول اليوم متغير كده ليه"
"مفيش يا حبيبتى بفكر بس هتعملى ايه مع محمد"
"انا اسفة يا ماجد انا السبب انك تفضل متضايق كده"
"لا يا حبيبتى متقوليش كده انا اللى اسف ومكنش قصدى"
وسكتت نغم...وبصت لماجد فجأة
"الجملة دى بسمعها وانا نايمة...اسمع صوتك بتقولى سامحينى مكنش قصدى... انا مش عارفة ليه الجملة دى بالذات وبتفتكرها وانا نايمة...ولما اصحى بفتح عينيا اشوفك وبعدين مش بلاقى حد"
سكت ماجد... ونغم مستنية رد
"انت عارف حاجة معرفهاش... انت عندك تفسير للى بيحصلى ده"
"عندى تفسير وهقولك كل حاجة"
"قول"
"انا كنت بجيلك فى المستشفى وانتى ف الغيبوبة...كنت باجى كل يوم علشان اطمن عليكى وكنت بكلمك ونفسى اطمن عليكى وتقومى بالسلامة...واول مرة فتحتى عينيكى من الغيبوبة كنت انا موجود"
"وكنت بتقولى انا اسف ؟؟"
"ايوه"
"على ايه"
"هقولك بس ارجوكى سامحينى"
وبصوت كله قلق... ردت نغم
"قول ياماجد"
"انتى لما جيتى اشتغلتى فى النادى انا مرتبى قل وكنت ف ظروف مادية وحشة اوى وكنت مستنى المسابقة...لما عرفت انك مسافرة المسابقة وجواز نشوى كان قرب ومحتاج فلوس... ففكرت انى اعطلك عن السفر باى طريقة"
"اى طريقة؟؟"
"ايوه... انا عارف انه تفكير شيطانى بس والله ماكنت متخيل كل ده هيحصل"
"هملت ايه ياماجد"
"لما دخلتى تغيرى هدومك حطيت لك شامبو ع الارض علشان تتزحلقى وافترضت انك مجرد هيحصلك كدمة او حتى كسر يمنعك انك تسافرى وخلاص مكنتش متخيل ان كل ده هيحصل"
"معقول...معقول انت تكون بالشر ده...معقول انت اللى كنت فاكراك ملاك تتطلع دى حقيقتك"
"افهمينى يانغم..انا حبيتك"
ووقفت نغم وزعقت له
"افهم ايه... انا فعلا فهمتك على حقيقتك... مش مصدقة انى اتخدعت فيك كل ده... الحمدلله انى عرفت الحقيقة ف الوقت المناسب... انا غلطانة انى كنت هسيب خطيبى الانسان الكويس علشانك انت"
جريت نغم فى اتجاه الاوتيل...وقف ماجد مصدوم من كلامها
"انا غلطت بس كنت فاكرك هتسامحينى"
قال الكلام وهو ف مكانه بيبص من بعيد على نغم اللى اختفت من مرمى البصر

فى معاد تجمع الرحلة..نغم بتتجاهل وجود ماجد تماما
راح ماجد ناحيتها وهى بتحط شنطها فى الاتوبيس
"صباح الخير يانغم"
كان بيشيل شنطتها من ع الارض ويحطها فى الاتوبيس...شدتها منه نغم وحطيتها بنفسها ومشيت من غير ماترد عليه
ركبت نغم وبعد ما كل الناس ركبوا...ركب ماجد جنبها
"ردى عليا يانغم ارجوكى وانا مش هضايقك تانى... انتى خلاص كده هتنسينى وتنسى حبى ليكى"
بصت له نغم بقسوة
"ايوه... هنسى انى اتخدعت... وهتجوز خطيبى زى ما بابا وماما اتفقوا معاه...يعنى يوم الخميس بعد 5ايام هكون على ذمة واحد احترمنى ومضحكش عليا... وكمان هسيب الشغل فى النادى علشان مرتبك يرجع تانى زى الاول وعلشان محبش انى اشوفك ولا اتعامل معاك"
كلام نغم كان قاسى بما فيه الكفاية... سكت ماجد خالص
طول الطريق وكل واحد فيهم بيبص فى اتجاه تانى

ماجد بعد مارجع... كل امله انتهى... كلام نغم قاسى عليه ومش هيقدر يحاول معاها بعد اللى قالته
اقتنع ان ده عقاب على اللى عمله فيها...بس كان اسوأ عقاب
حاسس ان قلبه بيتقطع كل ما يفتكر انها هتتجوز بعد ايام
واكتفى انه يشوفها ف النادى الكام يوم اللى جايين

نغم بعد مارجعت من الرحلة... وسلمت على باباها ومامتها
دخلت اوضتها وقفلت عليها... وانهارت من العياط
بتعيط على صدمتها ف ماجد..وعلى الحب اللى ضاع

طول اليوم قافلة على نفسها... ومخرجتش غير لما محمد جه بالليل يسلم عليها...خرجت من اوضتها وراحت قعدت معاه
سلم عليها...وبعد مامتها ماقامت...قرب منها
"وحشتينى"
اضطرت تبتسم ابتسامة طلعت حزينة
"مالك...فيه حاجة"
"لا مفيش ليه بتقول كده"
"شكلك متغير"
"لا من السفر بس...على فكرة انا هسيب النادى"
"بجد...احسن... علشان ورانا حاجات كتير عايزين نخلصها... بعد كتب الكتاب بقى نروح نشترى العفش وانتى ومامتك تفرشوا علشان مفضلش كتير ع الفرح"
ردت بحزن"ان شاءالله"
"عارفة يانغم...انا بعد الايام لحد ما نتجوز علشان نبقى مع بعض"
نغم ساكتة...قرب منها محمد ...قرب يبوسها من خدها
رجعت بسرعة لورا وقامت وقفت
"ايه ده يامحمد"
"اصل انتى وحشتينى"
"برضه مهما وحشتك مينفعش تعمل كده"
"ليه احنا كلها ايام وهنتجوز"
"لما نبقى نتجوز"
قالتها وهى بتحاول تكتم دموعها... مشيت بسرعة دخلت اوضتها
ارتبك محمد من تصرفها... واستأذن ومشى قبل باباها ما يرجع من احراجه
لما دخلت نغم اوضتها..وقفلت عليها...عيطت كتير
"انا مش طايقة يقرب منى ولا اقعد معاه شوية..هتجوزه ازاى.. ماجد وحشنى اوى...ياخسارة ياماجد كنت فاكراك غير كده"

تانى يوم قامت نغم لبست ونزلت وهى اخدة قرار انها رايحة تسيب الشغل... راحت النادى واول ما وصلت طلعت مكتب فاروق بس مكنش لسه وصل...راحت قعد ع البيسين كان ماجد موجود...تجاهلت وجوده وقعدت تستنى فاروق يوصل
بعد ساعة تقريبا... جه ماجد وقعد معاها
"مش عايزة تسامحينى"
مردتش عليه... حط قدامها فلاشة
"خدي شوفيها... ربنا يوفقك"
دورت وشها بعيد عنه...قام ماجد
نغم بتبص للفلاشة ومتردد تاخدها ولا لأ...اخدتها وقامت راحت لفاروق وقدمت استقالتها ومشيت

نغم اول ما وصلت شافت الفلاشة...فيها ملف وورد واغنية وصور
فتحت الصور لقيت صورهم فى فرح مصطفى ويسرا
فتحت الملف...لقت رسالة من ماجد
"انا اسف يانغم... ندم الدنيا كله مش هيعبر عن ندمى... كان نفسى تسامحينى لانى حبيتك بجد.. انا بحبك ومش هحب حد غيرك طول عمرى... اتمنى لك السعادة مع اللى اختارتيه"
دموعها نزلت من الرسالة القصيرة اللى بعتها ماجد
فتحت الاغنية تسمعها...وسمعت وائل جسار

لو عشت بعدي وبعد بعدي وجيت وحبيت
ابقي افتكرني واحكي عني مهما كنت نسيت
خليني ذكرى جميله عندك واوعي تنسي زمان
ماتقولش حبي وقت عدي ويوم خلاص عشناه
قول ان حبي حب غالي بس هي حياه
وابقي افتكرني بكلمه حلوه تنسي قلبي الاآآآآه
خلي الفراق اجمل فراق ف دنيا العاشقين
وان حد سألك عني قوله كنا اوفى اتنين
قول كان حبيبي وكان حياتي وعشره ليها سنين
مش كل حلم نشوفه سهل هنبقي حققناه دا ساعات يبقي السهل صعب لما نتمناه
والدنيا عمر ماحد جالها وعشها من غير آآآآه
اوقات بنتجرح وبنجرح واحنا مش حاسين
وان حد فينا حب يفرح فرحه يبقي حزين
ايام وبتعشنا وفاكرين اننا عايشين
خلي الفراق اجمل فراق ف دنيا العاشقين
وان حد سألك عني قوله كنا اوفي اتنين

خلصت الاغنية ودموعها على حنينها لماجد فوق الوصف
خرجت من اوضتها...شافت مامتها وباباها قاعدين..قعدت قصادهم
الاب"مالك يانغم"
الام"ايه يانغم بتعيطى ليه"
نغم"مش عايزة اتجوز محمد"
الام"يالاااااهوى....ليه يانغم... والنبى انتى محسودة"
الاب"ليه يانغم...حصل منه حاجة"
نغم وهى منهارة بتعيط"مش بحبه ومش عايزة اكمل حياتى معاه...مش قادرة يابابا...علشان خاطرى خلصنى من الارتباط ده"
الام"ده اسمه بطر ع النعمة شاب زى ده الف مين تتمناه"
الاب"مامتك معاها حق ...هاتى لى سبب مقنع ولا عيب فيه وانا اساعدك تسيبيه انما كده يبقى دلع"
نغم وهى بتعيط اكتر"مش بحبه... ده مش كفاية"
الام"زمان كانوا امهاتنا بتتجوز من غير مايشوفوا العريس مش يحبوه"
نغم وهى بتحاول تهدى نفسها
"انا هحكيلكم كل حاجة علشان انا تعبت وانا شايلة كل ده لوحدى"
وحكت نغم على حكايتها مع ماجد من اولها لحد الرحلة والمقابلة السريعة بتاعة الصبح
سكتت نغم... وباباها ومامتها ساكتين
شافت سكوتهم اتكلمت
"برضه عايزينى اتجوزه وانا بحب واحد تانى ومش قادرة انساه"
دخلت اوضتها وهى بتعيط...وبعد ساعة دخل لها باباها
"نغم... متزعليش نفسك...هاتى الشبكة واى هدايا جابهالك محمد واعتبرى نفسك من اللحظة دى حرة ومش مخطوبة"
جريت نغم على باباها حضنته وهى بتعيط

نغم بعد باباها مانزل وهى حاسة ان حمل تقيل اتشال من على قلبها
طول الوقت بتفكر... تكلم ماجد تقوله ولا لأ
تحاول ترجع النادى ولا لأ
فضلت تفكر كتير لحد ما تعبت...وبعد اكتر من 3ساعات جه باباها
دخل لها اوضتها...مسح دموعها
"قومى يانغم اغسلى وشك والبسى وتعالى اقعدى بره"
"ليه"
"خطيبك عايز ييجى يتكلم معاكى شوية"
"مش قلت يابابا ان كده خلاص"
"معلش اتكلمى معاه وبعدها هنفذ كل اللى تقولى عليه...علشان خاطرى اسمعى كلامى"
ومقدرتش نغم تقول لباباها لأ... قامت ولبست وقعدت
وبعد نص ساعة...رن جرس الباب
قام باباها يفتح
"اتفضل يابنى"
وسمعت صوت ماجد وهو بيقول
"السلام عليكم"
دخل بقى قصادها... قامت وقفت ومن المفاجأة معرفتش ترد السلام
دموع عينيها هى اللى بتتكلم... ونظرات الحب والسعادة بتملا عينيهم هما الاتنين
بصت نغم لباباها مستغربة
"انا روحت النادى وقابلت ماجد واتكلمت معاه...مع انى كنت زعلان منه انه مجاش يتقدملك اول ما اتعرفتوا على بعض بس هو فهمنى ظروفه وحكى لى كل حاجة وانا صدقته...هو خطبك منى بس انا قلت القرار النهائى ليكى...وزى ماقلتلك من شوية خطيبك عايز يتكلم معاكى والقرار النهائى ليكى"
بص لها ماجد وهو مبتسم لها
"سامحتينى؟؟"
هزت نغم راسها بالايجاب...كمل ماجد
"وموافقة على طلبى؟؟"
هزت نغم راسها موافقة على كلامه ودموع الفرح فى عينيها
الاب"طيب اقعدوا هتفضلوا واقفين كده...قومى يافاطمة اعملى حاجة لماجد يشربها"
الام كانت ساكتة كل ده وهى متفاجئة باللى حصل
حضنت نغم وباستها...وحضنت ماجد وهى بتقوله
"مبروك يابنى"
قعدوا نغم وماجد جنب بعض...وباباها قصادهم
"عمى انا بطلب ايد نغم من حضرتك...بعيد الكلام قدامها اهو"
"ههههه بعد ماهى وافقت انا موافق... شوف الوقت اللى يناسب الحاجة والدتك واتفضلوا علشان نقرا الفاتحة"

النهااااااااااااااااااااااااااااااية

» حكاية لسه بحب
» حكاية شبح الماضى
» حكاية عقد عرفى
» حكاية اقوى حب
» حكاية تحت سقف واحد